The Twa Dogs
A Tale
'Twas in that place o' Scotland's isle,
That bears the name o' auld King Coil,
Upon a bonie day in June,
When wearin' thro' the afternoon,
Twa dogs, that were na thrang at hame,
Forgather'd ance upon a time.
The first I'll name, they ca'd him Caesar,
Was keepit for His Honor's pleasure:
His hair, his size, his mouth, his lugs,
Shew'd he was nane o' Scotland's dogs;
But whalpit some place far abroad,
Whare sailors gang to fish for cod.
His locked, letter'd, braw brass collar
Shew'd him the gentleman an' scholar;
But though he was o' high degree,
The fient a pride, nae pride had he;
But wad hae spent an hour caressin,
Ev'n wi' al tinkler-gipsy's messin:
At kirk or market, mill or smiddie,
Nae tawted tyke, tho' e'er sae duddie,
But he wad stan't, as glad to see him,
An' stroan't on stanes an' hillocks wi' him.
The tither was a ploughman's collie-
A rhyming, ranting, raving billie,
Wha for his friend an' comrade had him,
And in freak had Luath ca'd him,
After some dog in Highland Sang,
Was made lang syne,-Lord knows how lang.
He was a gash an' faithfu' tyke,
As ever lap a sheugh or dyke.
His honest, sonsie, baws'nt face
Aye gat him friends in ilka place;
His breast was white, his touzie back
Weel clad wi' coat o' glossy black;
His gawsie tail, wi' upward curl,
Hung owre his hurdie's wi' a swirl.
Nae doubt but they were fain o' ither,
And unco pack an' thick thegither;
Wi' social nose whiles snuff'd an' snowkit;
Whiles mice an' moudieworts they howkit;
Whiles scour'd awa' in lang excursion,
An' worry'd ither in diversion;
Until wi' daffin' weary grown
Upon a knowe they set them down.
An' there began a lang digression.
About the 'lords o' the creation.'
Caesar
I've aften wonder'd, honest Luath,
What sort o' life poor dogs like you have;
An' when the gentry's life I saw,
What way poor bodies liv'd ava.
Our laird gets in his racked rents,
His coals, his kane, an' a' his stents:
He rises when he likes himsel';
His flunkies answer at the bell;
He ca's his coach; he ca's his horse;
He draws a bonie silken purse,
As lang's my tail, where, thro' the steeks,
The yellow letter'd Geordie keeks.
Frae morn to e'en, it's nought but toiling
At baking, roasting, frying, boiling;
An' tho' the gentry first are stechin,
Yet ev'n the ha' folk fill their pechan
Wi' sauce, ragouts, an' sic like trashtrie,
That's little short o' downright wastrie.
Our whipper-in, wee, blasted wonner,
Poor, worthless elf, it eats a dinner,
Better than ony tenant-man
His Honour has in a' the lan':
An' what poor cot-folk pit their painch in,
I own it's past my comprehension.
Luath
Trowth, Caesar, whiles they're fash't eneugh:
A cottar howkin in a sheugh,
Wi' dirty stanes biggin a dyke,
Baring a quarry, an' sic like;
Himsel', a wife, he thus sustains,
A smytrie o' wee duddie weans,
An' nought but his han'-daurk, to keep
Them right an' tight in thack an' rape.
An' when they meet wi' sair disasters,
Like loss o' health or want o' masters,
Ye maist wad think, a wee touch langer,
An' they maun starve o' cauld an' hunger:
But how it comes, I never kent yet,
They're maistly wonderfu' contented;
An' buirdly chiels, an' clever hizzies,
Are bred in sic a way as this is.
Caesar
But then to see how ye're negleckit,
How huff'd, an' cuff'd, an' disrespeckit!
Lord man, our gentry care as little
For delvers, ditchers, an' sic cattle;
They gang as saucy by poor folk,
As I wad by a stinkin brock.
I've notic'd, on our laird's court-day, -
An' mony a time my heart's been wae, -
Poor tenant bodies, scant o'cash,
How they maun thole a factor's snash;
He'll stamp an' threaten, curse an' swear
He'll apprehend them, poind their gear;
While they maun stan', wi' aspect humble,
An' hear it a', an' fear an' tremble!
I see how folk live that hae riches;
But surely poor-folk maun be wretches!
Luath
They're no sae wretched's ane wad think.
Tho' constantly on poortith's brink,
They're sae accustom'd wi' the sight,
The view o't gives them little fright.
Then chance and fortune are sae guided,
They're aye in less or mair provided:
An' tho' fatigued wi' close employment,
A blink o' rest's a sweet enjoyment.
The dearest comfort o' their lives,
Their grushie weans an' faithfu' wives;
The prattling things are just their pride,
That sweetens a' their fire-side.
An' whiles twalpennie worth o' nappy
Can mak the bodies unco happy:
They lay aside their private cares,
To mind the Kirk and State affairs;
They'll talk o' patronage an' priests,
Wi' kindling fury i' their breasts,
Or tell what new taxation's comin,
An' ferlie at the folk in Lon'on.
As bleak-fac'd Hallowmass returns,
They get the jovial, rantin kirns,
When rural life, of ev'ry station,
Unite in common recreation;
Love blinks, Wit slaps, an' social Mirth
Forgets there's Care upo' the earth.
That merry day the year begins,
They bar the door on frosty win's;
The nappy reeks wi' mantling ream,
An' sheds a heart-inspiring steam;
The luntin pipe, an' sneeshin mill,
Are handed round wi' right guid will;
The cantie auld folks crackin crouse,
The young anes rantin thro' the house-
My heart has been sae fain to see them,
That I for joy hae barkit wi' them.
Still it's owre true that ye hae said,
Sic game is now owre aften play'd;
There's mony a creditable stock
O' decent, honest, fawsont folk,
Are riven out baith root an' branch,
Some rascal's pridefu' greed to quench,
Wha thinks to knit himsel the faster
In favour wi' some gentle master,
Wha, aiblins, thrang a parliamentin,
For Britain's guid his saul indentin-
Caesar
Haith, lad, ye little ken about it:
For Britain's guid! guid faith! I doubt it.
Say rather, gaun as Premiers lead him:
An' saying ay or no's they bid him:
At operas an' plays parading,
Mortgaging, gambling, masquerading:
Or maybe, in a frolic daft,
To Hague or Calais takes a waft,
To mak a tour an' tak a whirl,
To learn bon ton, an' see the worl'.
There, at Vienna, or Versailles,
He rives his father's auld entails;
Or by Madrid he takes the rout,
To thrum guitars an' fecht wi' nowt;
Or down Italian vista startles,
Whore-hunting amang groves o' myrtles:
Then bowses drumlie German-water,
To mak himsel look fair an' fatter,
An' clear the consequential sorrows,
Love-gifts of Carnival signoras.
For Britain's guid! for her destruction!
Wi' dissipation, feud, an' faction.
Luath
Hech, man! dear sirs! is that the gate
They waste sae mony a braw estate!
Are we sae foughten an' harass'd
For gear to gang that gate at last?
O would they stay aback frae courts,
An' please themsels wi' country sports,
It wad for ev'ry ane be better,
The laird, the tenant, an' the cotter!
For thae frank, rantin, ramblin billies,
Feint haet o' them's ill-hearted fellows;
Except for breakin o' their timmer,
Or speakin lightly o' their limmer,
Or shootin of a hare or moor-cock,
The ne'er-a-bit they're ill to poor folk,
But will ye tell me, Master Caesar,
Sure great folk's life's a life o' pleasure?
Nae cauld nor hunger e'er can steer them,
The very thought o't need na fear them.
Caesar
Lord, man, were ye but whiles whare I am,
The gentles, ye wad ne'er envy them!
It's true, they need na starve or sweat,
Thro' winter's cauld, or simmer's heat:
They've nae sair wark to craze their banes,
An' fill auld age wi' grips an' granes:
But human bodies are sic fools,
For a' their colleges an' schools,
That when nae real ills perplex them,
They mak enow themsel's to vex them;
An' aye the less they hae to sturt them,
In like proportion, less will hurt them.
A country fellow at the pleugh,
His acre's till'd, he's right eneugh;
A country girl at her wheel,
Her dizzen's dune, she's unco weel;
But gentlemen, an' ladies warst,
Wi' ev'n-down want o' wark are curst.
They loiter, lounging, lank an' lazy;
Tho' deil-haet ails them, yet uneasy;
Their days insipid, dull, an' tasteless;
Their nights unquiet, lang, an' restless.
An'ev'n their sports, their balls an' races,
Their galloping through public places,
There's sic parade, sic pomp, an' art,
The joy can scarcely reach the heart.
The men cast out in party-matches,
Then sowther a' in deep debauches.
Ae night they're mad wi' drink an' whoring,
Niest day their life is past enduring.
The ladies arm-in-arm in clusters,
As great an' gracious a' as sisters;
But hear their absent thoughts o' ither,
They're a' run-deils an' jads thegither.
Whiles, owre the wee bit cup an' platie,
They sip the scandal-potion pretty;
Or lee-lang nights, wi' crabbit leuks
Pore owre the devil's pictur'd beuks;
Stake on a chance a farmer's stackyard,
An' cheat like ony unhanged blackguard.
There's some exceptions, man an' woman;
But this is gentry's life in common.
By this, the sun was out of sight,
An' darker gloamin brought the night;
The bum-clock humm'd wi' lazy drone;
The kye stood rowtin i' the loan;
When up they gat an' shook their lugs,
Rejoic'd they werena men but dogs;
An' each took aff his several way,
Resolv'd to meet some ither day.
poem by Robert Burns
Submitted by Poetry Lover
Vote! | Copy!
Related quotes
The Twa Dogs, A Tale
'Twas in that place o' Scotland's isle,
That bears the name o' auld King COIL,[1]
Upon a bonie day in June,
When wearing thro' the afternoon,
5 Twa dogs, that were na thrang at hame,
Forgather'd ance upon a time.
The first I'll name, they ca'd him 'Cæsar',
Was keepet for his Honor's pleasure:
His hair, his size, his mouth, his lugs,
10 Shew'd he was nane o' Scotland's dogs;
But whalpit some place far abroad,
Whare sailors gang to fish for Cod.
His locked, letter'd, braw brass collar
Shew'd him the gentleman an' scholar;
15 But though he was o' high degree,
The fient a pride, nae pride had he;
But wad hae spent an hour caressin,
Ev'n wi' al tinkler-gipsey's messan:
At kirk or market, mill or smiddie,
20 Nae tawted tyke, tho' e'er sae duddie,
But he wad stand, as glad to see him,
An' stroan'd on stanes an' hillocks wi' him.
The tither was a ploughman's collie-
A rhyming, ranting, raving billie,
25 Wha for his friend an' comrade had him,
And in freak had 'Luath' ca'd him,
After some dog in Highland Sang,[2]
Was made lang syne,-Lord knows how lang.
He was a gash an' faithfu' tyke,
30 As ever lap a sheugh or dyke.
His honest, sonsie, baws'nt face
Aye gat him friends in ilka place;
His breast was white, his tousie back
Weel clad wi' coat o' glossy black;
35 His gawsie tail, wi' upward curl,
Hung owre his hurdie's wi' a swirl.
Nae doubt but they were fain o' ither,
And unco pack an' thick thegither;
Wi' social nose whiles snuff'd an' snowket;
40 Whiles mice an' moudieworts they howket;
Whiles scour'd awa' in lang excursion,
An' worry'd ither in diversion;
Till tir'd at last wi mony a farce,
Upon a knowe they set them down upon their -,
45 An' there began a lang digression.
About the 'lords o' the creation.'
Cæsar
I've aften wonder'd, honest Luath,
What sort o' life poor dogs like you have;
An' when the gentry's life I saw,
50 What way poor bodies liv'd ava.
Our laird gets in his racked rents,
His coals, his kane, an' a' his stents:
He rises when he likes himsel';
His flunkies answer at the bell;
55 He ca's his coach; he ca's his horse;
He draws a bonie silken purse,
As lang's my tail, where, thro' the steeks,
The yellow letter'd Geordie keeks.
Frae morn to e'en, it's nought but toiling
60 At baking, roasting, frying, boiling;
An' tho' the gentry first are stechin,
Yet ev'n the ha' folk fill their pechan
Wi' sauce, ragouts, an' sic like trashtrie,
That's little short o' downright wastrie.
65 Our whipper-in, wee, blastet wonner,
Poor, worthless elf, it eats a dinner,
Better than ony tenant-man
His Honour has in a' the lan':
An' what poor cot-folk pit their painch in,
70 I own it's past my comprehension.
Luath
Trowth, Cæsar, whyles they're fash't eneugh:
A cotter howkin in a sheugh,
Wi' dirty stanes biggin a dyke,
Baring a quarry, an' sic like;
75 Himsel', a wife, he thus sustains,
A smytrie o' wee duddie weans,
An' nought but his han'-daurg, to keep
Them right an' tight in thack an' raep.
An' when they meet wi' sair disasters,
80 Like loss o' health or want o' masters,
Ye maist wad think, a wee touch langer,
An' they maun starve o' cauld an' hunger:
But how it comes, I never kent yet,
They're maistly wonderfu' contented;
85 An' buirdly chiels, an' clever hizzies,
Are bred in sic a way as this is.
Cæsar
But then to see how ye're neglecket,
How huff'd, an' cuff'd, an' disrespecket!
Lord man, our gentry care as little
90 For delvers, ditchers, an' sic cattle;
They gang as saucy by poor folk,
As I wad by a stinking brock.
I've notic'd, on our laird's court-day, -
An' mony a time my heart's been wae, -
95 Poor tenant bodies, scant o'cash,
How they maun thole a factor's snash;
He'll stamp an' threaten, curse an' swear
He'll apprehend them, poind their gear;
While they maun stan', wi' aspect humble,
100 An' hear it a', an' fear an' tremble!
I see how folk live that hae riches;
But surely poor-folk maun be wretches!
Luath
They're no sae wretched's ane wad think.
Tho' constantly on poortith's brink,
105 They're sae accustom'd wi' the sight,
The view ot gies them little fright.
Then chance and fortune are sae guided,
They're aye in less or mair provided:
An' tho' fatigu'd wi' close employment,
110 A blink o' rest's a sweet enjoyment.
The dearest comfort o' their lives,
Their grushie weans an' faithfu' wives;
The prattling things are just their pride,
That sweetens a' their fire-side.
115 An' whyles twalpennie worth o' nappy
Can mak the bodies unco happy:
They lay aside their private cares,
To mind the Kirk and State affairs;
They'll talk o' patronage an' priests,
120 Wi' kindling fury i' their breasts,
Or tell what new taxation's comin,
An' ferlie at the folk in LON'ON.
As bleak-fac'd Hallowmass returns,
They get the jovial, rantin kirns,
125 When rural life, of ev'ry station,
Unite in common recreation;
Love blinks, Wit slaps, an' social Mirth
Forgets there's Care upo' the earth.
That merry day the year begins,
130 They bar the door on frosty win's;
The nappy reeks wi' mantling ream,
An' sheds a heart-inspiring steam;
The luntin pipe, an' sneeshin mill,
Are handed round wi' right guid will;
135 The cantie auld folks crackin crouse,
The young anes rantin thro' the house-
My heart has been sae fain to see them,
That I for joy hae barket wi' them.
Still it's owre true that ye hae said,
140 Sic game is now owre aften play'd;
There's mony a creditable stock
O' decent, honest, fawsont folk,
Are riven out baith root an' branch,
Some rascal's pridefu' greed to quench,
145 Wha thinks to knit himsel the faster
In favour wi' some gentle master,
Wha, aiblins, thrang a parliamentin',
For Britain's guid his saul indentin'-
Cæsar
Haith, lad, ye little ken about it:
150 For Britain's guid! guid faith! I doubt it.
Say rather, gaun as PREMIERS lead him:
An' saying ay or no's they bid him:
At operas an' plays parading,
Mortgaging, gambling, masquerading:
155Or maybe, in a frolic daft,
To HAGUE or CALAIS takes a waft,
To mak a tour an' tak a whirl,
To learn bon ton, an' see the worl'.
There, at VIENNA, or VERSAILLES,
160He rives his father's auld entails;
Or by MADRID he takes the rout,
To thrum guitars an' fecht wi' nowt;
Or down Italian vista startles,
Whore-hunting amang groves o' myrtles:
165Then bowses drumlie German-water,
To mak himsel look fair an' fatter,
An' clear the consequential sorrows,
Love-gifts of Carnival signoras.
For Britain's guid! for her destruction!
170Wi' dissipation, feud, an' faction.
Luath
Hech, man! dear sirs! is that the gate
They waste sae mony a braw estate!
Are we sae foughten an' harass'd
For gear to gang that gate at last?
175 O would they stay aback frae courts,
An' please themsels wi' countra sports,
It wad for ev'ry ane be better,
The laird, the tenant, an' the cotter!
For thae frank, rantin, ramblin billies,
180 Feint haet o' them's ill-hearted fellows;
Except for breakin o' their timmer,
Or speakin lightly o' their limmer,
Or shootin of a hare or moor-cock,
The ne'er-a-bit they're ill to poor folk,
185But will ye tell me, master Cæsar,
Sure great folk's life's a life o' pleasure?
Nae cauld nor hunger e'er can steer them,
The very thought ot need na fear them.
Cæsar
Lord, man, were ye but whyles where I am,
190The gentles, ye wad ne'er envy them!
It's true, they need na starve or sweat,
Thro' winter's cauld, or simmer's heat:
They've nae sair-wark to craze their banes,
An' fill auld age wi' grips an' granes:
195But human bodies are sic fools,
For a' their colleges an' schools,
That when nae real ills perplex them,
They mak enow themsel's to vex them;
An' aye the less they hae to sturt them,
200In like proportion, less will hurt them.
A country fellow at the pleugh,
His acre's till'd, he's right eneugh;
A country girl at her wheel,
Her dizzen's dune, she's unco weel;
205But gentlemen, an' ladies warst,
Wi' ev'n-down want o' wark are curst.
They loiter, lounging, lank an' lazy;
Tho' deil-haet ails them, yet uneasy;
Their days insipid, dull, an' tasteless;
210Their nights unquiet, lang, an' restless.
An'ev'n their sports, their balls an' races,
Their galloping through public places,
There's sic parade, sic pomp, an' art,
The joy can scarcely reach the heart.
215The men cast out in party-matches,
Then sowther a' in deep debauches.
Ae night they're mad wi' drink an' whoring,
Niest day their life is past enduring.
The ladies arm-in-arm in clusters,
220As great an' gracious a' as sisters;
But hear their absent thoughts o' ither,
They're a' run-deils an' jads thegither.
Whyles, owre the wee bit cup an' platie,
They sip the scandal-potion pretty;
225Or lee-lang nights, wi' crabbit leuks
Pore owre the devil's pictur'd beuks;
Stake on a chance a farmer's stackyard,
An' cheat like ony unhanged blackguard.
There's some exceptions, man an' woman;
230But this is Gentry's life in common.
By this, the sun was out of sight,
An' darker gloaming brought the night;
The bum-clock humm'd wi' lazy drone;
The kye stood rowtin i' the loan;
235 When up they gat an' shook their lugs,
Rejoic'd they werena men but dogs;
An' each took aff his several way,
Resolv'd to meet some ither day.
poem by Robert Burns (1786)
Submitted by Veronica Serbanoiu
Vote! | Copy!
Death and Doctor Hornbook
SOME books are lies frae end to end,
And some great lies were never penn’d:
Ev’n Ministers they hae been kenn’d,
In holy rapture,
A rousing whid, at times, to vend,
And nail’t wi’ Scripture.
But this that I am gaun to tell,
Which lately on a night befel,
Is just as true ’s the Deil’s in hell,
Or Dublin city:
That e’er he nearer comes oursel
’S a muckle pity.
The Clachan yill had made me canty,
I was na fou, but just had plenty;
I stacher’d whyles, but yet took tent ay
To free the ditches;
An’ hillocks, stanes, an’ bushes kenn’d ay
Frae ghaists an’ witches.
The rising Moon began to glowr
The distant Cumnock hills out-owre;
To count her horns, wi’ a’ my pow’r,
I set mysel,
But whether she had three or four,
I cou’d na tell.
I was come round about the hill,
And todlin down on Willie’s mill,
Setting my staff wi’ a’ my skill,
To keep me sicker;
Tho’ leeward whyles, against my will,
I took a bicker.
I there wi’ Something does forgather,
That pat me in an eerie swither;
An awfu’ scythe, out-owre ae shouther,
Clear-dangling, hang;
A three-tae’d leister on the ither
Lay, large an’ lang.
Its stature seem’d lang Scotch ells twa,
The queerest shape that e’er I saw,
For fient a wame it had ava,
And then its shanks,
They were as thin, as sharp an’ sma’
As cheeks o’ branks.
»Guid-een«, quo I; »Friend! hae ye been mawin,
When ither folk are busy sawin?«
It seem’d to mak a kind o’ stan’,
But naething spak;
At length, says I, »Friend, whare ye gaun,
Will ye go back?«
It spak right howe – »My name is Death,
But be na’ fley’d.« – Quoth I, »Guid faith,
Ye’re maybe come to stap my breath;
But tent me, billie;
I red ye weel, tak care o’ skaith,
See, there’s a gully!«
»Gudeman«, quo’ he, »put up your whittle,
I’m no design’d to try its mettle;
But if I did, I wad be kittle
To be mislear’d,
I wad na’ mind it, no that spittle
Out-owre my beard.«
»Weel, weel!« says I, »a bargain be’t;
Come, gies your hand, an’ sae we’re gree’t;
We’ll ease our shanks an’ tak a seat,
Come, gies your news!
This while ye hae been mony a gate,
At mony a house.«
»Ay, ay!« quo’ he, an’ shook his head,
»It’s e’en a lang, lang time indeed
Sin’ I began to nick the thread,
An’ choke the breath:
Folk maun do something for their bread,
An’ sae maun Death.
Sax thousand years are near hand fled
Sin’ I was to the butching bred,
And mony a scheme in vain’s been laid,
To stap or scar me;
Till ane Hornbook’s ta’en up the trade,
And faith, he’ll waur me.
Ye ken Jock Hornbook i’ the Clachan,
Deil mak his king’s-hood in a spleuchan!
He’s grown sae weel acquaint wi’ Buchan
And ither chaps,
The weans haud out their fingers laughin,
And pouk my hips.
See, here’s a scythe, and there’s a dart,
They hae pierc’d monie a gallant heart;
But Doctor Hornbook, wi’ his art
And cursed skill,
Has made them baith no worth a fart,
Damn’d haet they’ll kill!
Twas but yestreen, nae farther gaen,
I threw a noble throw at ane;
Wi’ less, I’m sure, I’ve hundreds slain;
But deil-ma-care!
It just play’d dirl on the bane,
But did nae mair.
Hornbook was by, wi’ ready art,
And had sae fortify’d the part,
That when I looked to my dart,
It was sae blunt,
Fient haet o’t wad hae pierc’d the heart
Of a kail-runt.
I drew my scythe in sic a fury,
I nearhand cowpit wi’ my hurry,
But yet the bauld Apothecary
Withstood the shock;
I might as weel hae try’d a quarry
O’ hard whin-rock.
Ev’n them he canna get attended,
Altho’ their face he ne’er had kend it,
Just shit in a kail-blade an send it,
As soon’s he smells ’t,
Baith their disease, and what will mend it,
At once he tells’t.
And then a’ doctor’s saws and whittles,
Of a’ dimensions, shapes, an’ mettles,
A’ kinds o’ boxes, mugs, an’ bottles,
He’s shure to hae;
Their Latin names as fast he rattles
As A B C.
Calces o’ fossils, earths, and trees;
True Sal-marinum o’ the seas;
The Farina of beans and pease,
He has’t in plenty;
Aqua-fontis, what you please,
He can content ye.
Forbye some new, uncommon weapons,
Urinus Spiritus of capons;
Or Mite-horn shavings, filings, scrapings,
Distill’d per se;
Sal-alkali o’ Midge-tail clippings,
And monie mae.«
»Waes me for Johnny Ged’s-Hole now«,
Quoth I, »if that thae news be true!
His braw calf-ward whare gowans grew,
Sae white an’ bonie,
Nae doubt they’ll rive it wi’ the plew;
They’ll ruin Johnie!«
The creature grain’d an eldritch laugh,
And says, »Ye needna yoke the pleugh,
Kirk-yards will soon be till’d eneugh,
Tak ye nae fear:
They’ll a’ be trench’d wi’ monie a sheugh,
In twa-three year.
Whare I kill’d ane, a fair strae-death,
By loss o’ blood, or want o’ breath,
This night I’m free to tak my aith,
That Hornbook’s skill
Has clad a score i’ their last claith,
By drap and pill.
An honest Wabster to his trade,
Whase wife’s twa nieves were scarce weel-bred,
Gat tippence-worth to mend her head,
When it was sair;
The wife slade cannie to her bed,
But ne’er spak mair.
A countra Laird had ta’en the batts,
Or some curmurring in his guts,
His only son for Hornbook sets,
And pays him well,
The lad, for twa guid gimmer-pets,
Was Laird himsel.
An bonie lass, ye kend her name,
Some ill-brewn drink had hov’d her wame,
She trusts hersel, to hide the shame,
In Hornbook’s care;
Horn sent her off to her lang hame,
To hide it there.
That’s just a swatch o’ Hornbook’s way,
Thus goes he on from day to day,
Thus does he poison, kill an’ slay,
An’s weel pay’d for’t;
Yet stops me o’ my lawfu’ prey,
Wi’ his damn’d dirt!
But hark! I’ll tell you of a plot,
Tho’ dinna ye be speakin o’t;
I’ll nail the self-conceited Sot,
As dead’s herrin:
Niest time we meet, I’ll wad a groat,
He gets his fairin!«
But just as he began to tell,
The auld kirk-hammer strak the bell
Some wee, short hour ayont the twal,
Which rais’d us baith:
I took the way that pleas’d mysel,
And sae did Death.
poem by Robert Burns
Submitted by Veronica Serbanoiu
Vote! | Copy!
The Mother's Lesson
Come hither an' sit on my knee, Willie,
Come hither an' sit on my knee,
An' list while I tell how your brave brither fell,
Fechtin' for you an' for me:
Fechtin' for you an' for me, Willie,
Wi' his guid sword in his han'.
Hech, but ye'll be a brave man, Willie,
Hech, but ye'll be a brave man!
Ye min' o' your ain brither dear, Willie,
Ye min' o' your ain brither dear,
How he pettled ye aye wi' his pliskies an' play,
An' was aye sae cantie o' cheer:
Aye sae cantie o' cheer, Willie,
As he steppit sae tall an' sae gran',
Hech, but ye'll be a brave man, Willie,
Hech, but ye'll be a brave man.
D'ye min' when the bull had ye doun, Willie,
D'ye min' when the bull had ye doun?
D'ye min' wha grippit ye fra the big bull,
D'ye min' o' his muckle red woun'?
D'ye min' o' his muckle red woun', Willie,
D'ye min' how the bluid doun ran?
Hech, but ye'll be a brave man, Willie,
Hech, but ye'll be a brave man.
D'ye min' when we a' wanted bread, Willie,
the year when we a' wanted bread?
How he smiled when he saw the het parritch an' a',
An' gaed cauld an' toom to his bed:
Gaed awa' toom to his bed, Willie,
For the love o' wee Willie an' Nan?
Hech, but ye'll be a brave man, Willie,
Hech, but ye'll be a brave man!
Next simmer was bright but an' ben, Willie,
Next simmer was bright but an' ben,
When there cam a gran' cry like a win' strang an' high
By loch, an' mountain, an' glen:
By loch, an' mountain, an' glen, Willie,
The cry o' a far forrin lan',
An' up loupit ilka brave man, Willie,
Up loupit ilka brave man.
For the voice cam saying, 'Wha 'll gang?' Willie,
The voice cam saying, 'Wha'll gang
To fecht owre the sea that the slave may be free,
An' the weak be safe fra' the strang?'
The weak be safe fra' the strang, Willie;
Rab looked on Willie an' Nan,
An' hech, but he was a brave man, Willie,
Hech, but he was a brave man!
I kent by his een he was gaun, Willie,
I kent by his een he was gaun,
An' he rose like a chief: twice we spak in our grief-
'Dinna gang!' 'My mither, I maun!'
When he said, 'My mither, I maun,' Willie,
I gied him his sword to his han'.
Hech, but ye'll be a brave man, Willie,
Hech, but ye'll be a brave man!
An' sae it happened afar, Willie,
Sae it happened afar,
In the dead midnight there rose a great fecht,
An' Rab was first i' the war:
First i' the haur o' the war, Willie,
Wi' his guid sword in his han'!
Hech, but ye'll be a brave man, Willie,
Hech, but ye'll be a brave man!
An' there cam' a dark wicked lord, Willie,
There cam' a dark wicked lord,
An' oh my guid God! on my bauld bairn he rode,
An' smote him wi' his sword:
Smote him wi' his sword, Willie,
But Rab had his guid sword in han'!
Hech, but ye'll be a brave man, Willie,
Hech, but ye'll be a brave man!
He rushed on the fae in his might, Willie,
In his might to the fecht thro' the night,
An' he grippit him grim, an' the fae grippit him,
An' they rolled owre i' the fecht:
They rolled owre i' the fecht, Willie,
Rab wi' his guid sword in han'!
Hech, but ye'll be a brave man, Willie,
Hech, but ye'll be a brave man!
When the gran' stowre cleared awa', Willie,
When the gran' stowre cleared awa',
An' the mornin' drew near in chitter an' in fear,
Still, still, in death they lay twa:
Still, still, in death they lay twa, Willie,
Rab wi' his guid sword in han'!
Hech, but ye'll be a brave man, Willie,
Hech, but ye'll be a brave man.
Then up fra the death-sod they bore him, Willie,
The young men an' maidens they bore him,
An' they mak the rocks ring 'gin my bairn were a king,
An' a' the sweet lassies greet owre him:
A' the sweet lassies greet owre him, Willie,
An' their proud lips kiss his cauld han',
Hech, but ye'll be a brave man, Willie,
Hech, but ye'll be a brave man.
An' they big him a green grass grave, Willie,
They big him a green grass grave,
My ain lad! my ain! an' they write on the stane,
'Wha wad na sleep wi' the brave?'
An' wha wad na sleep wi' the brave, Willie?
Wha wad na dee for his lan'?
Hech, but ye'll be a brave man, Willie,
Hech, but ye'll be a brave man!
Noo come to yon press wi' me, Willie,
Come to yon press wi' me,
And I'll show ye somethin' o' auld lang syne,
When he was a bairnie like thee:
When he was a bairnie like thee, Willie,
And stood at my knee where ye stan',
Hech, but ye'll be a brave man, Willie,
Hech, but ye'll be a brave man.
D'ye see this wee bit bannet, Willie,
-I min' weel the day it was new-
See how I haud it here to my heart,
His wee bit bannet o' blue:
His wee bit bannet o' blue, Willie,
Wi' its wee bit cockie an' ban'!
Hech, but ye'll be a brave man, Willie,
Hech, but ye'll be a brave man.
D'ye see his ba' and his stickie, Willie,
When he played at the ba';
Na, na, ye 're no to tak it in han',
Ye 're no sae brave an' sae braw!
But gin ye grow braw an' brave, Willie,
Aiblins I'se gie 't to your han',
Hech, but ye'll be a brave man, Willie,
Hech, but ye'll be a brave man.
An' this was his Guid Buik, Willie,
The Guid Buik that he lo'ed,
Where he read the Word o' the great guid Lord
Wha bought us wi' His bluid.
An' will we spare our bluid, Willie,
To buy the dear auld lan'?
Hech, but ye'll be a brave man, Willie,
Hech, but ye'll be a brave man.
They say he's dead an' gane, Willie,
They say he's dead and gane.
Wad God my bairnies a' were sons,
That ten might gang for ane:
Ten might gang for ane, Willie,
To save the dear auld lan'!
Hech, but ye'll be a brave man, Willie,
Hech, but ye'll be a brave man.
I'd no be lorn an' lane, Willie,
I'd no be lorn an' lane,
For gin I had him here by the han'
He could na be mair my ain:
He'd no be mair my ain, Willie,
Gin I grippit him by the han'!
Hech, but ye'll be a brave man, Willie,
Hech, but ye'll be a brave man.
An' oh! gin ye gang fra me, Willie,
Gin ye gang as he gaed fra me,
Ye'll aye be still as near to my heart
As the noo when ye sit on my knee:
As the noo when ye sit on my knee, Willie,
An' I haud ye by the han'.
Hech, but ye'll be a brave man, Willie,
Hech, but ye'll be a brave man.
'An' wad ye no greet at a', mither?
Wad ye no greet at a'?'
Aye, wad I greet my bonnie bonnie bairn!
'An' will ye no greet when I fa'?'
Will I no greet when ye fa', Willie?
God bless your bonnie wee han'!
Hech, but ye'll be a brave man, Willie,
I kent weel ye'd be a brave man!
Aye, will I greet day an' night, Willie,
Aye, will I greet day an' night!
But gin ye can see fra your heaven doun to me,
Ye'se no be wae at the sight:
Ye'se no be wae at the sight, Willie,
E'en in your bright blessed lan'!
Hech, but ye'll be a brave man, Willie,
I kent weel ye'd be a brave man.
Ye ken how I greet sae sair, Willie,
Ye ken how I greet sae sair,
When ye're no my ain guid bairnie the day,
An' my een are cloudy wi' care:
My een are cloudy wi' care, Willie,
An' I lean doun my head on my han',
An' think 'Will ye be a guid man, Willie,
Ah, will ye grow a guid man?'
Ye ken when I did na greet sae, Willie,
Ye ken when I did na greet sae!
Gran' gran' are a proud mither's tears,
An' the gate that she gangs in her wae:
The gate that she gangs in her wae, Willie,
Wi' her foot on her ain proud lan'!
Hech, but ye'll be a brave man, Willie,
Hech, but ye'll be a brave man.
Ye min' how ye saw me greet, Willie,
Ye min' how ye saw me greet,
When the great news cam' to the toun at e'en,
An' we heard the shout in the street:
We heard the shout in the street, Willie,
An' the death-word it rode an' it ran.
Hech, but ye'll be a brave man, Willie,
Hech, but ye'll be a brave man.
Ye min' how I lift up mine ee', Willie,
Ye min' how I lift up mine ee',
An' smiled as I smile when I stan' i' the door,
An see ye come toddlin' to me:
See ye come toddlin' to me, Willie,
An' smile afar off where I stan'.
Hech, but ye'll be a brave man, Willie,
Hech, but ye'll be a brave man.
Thank God for ilk tear I let fa', Willie,
Thank God for ilk tear I let fa',
For oh, where they wipe awa' tears fra' a' een,
Sic tears they wad no wipe awa':
Sic tears they wad no wipe awa', Willie,
Tho' there's nane may be sad i' that lan'!
Hech, but ye'll be a brave man, Willie,
Hech, but ye'll be a brave man.
Noo to your play ye maun gang, Willie,
Noo to your play ye maun gang,
An' belyve, my ain wee, ye'll come back to my knee,
And I'se sing ye an auld Scots sang:
I'se sing ye an auld Scots sang, Willie,
A sang o' the dear auld lan'!
Hech, but ye'll be a brave man, Willie,
Hech, but ye'll be a brave man.
An' aye d'ye min' what I say, Willie,
What ye heard your auld mither say,
Better to dee a brave man an' free,
Than to live a fause coward for aye:
Than to live a fause coward for aye, Willie,
An' stan' by the shame o' your lan'!
Hech, but ye'll be a brave man, Willie,
Hech, but ye'll be a brave man.
It's brave to be first at the schule,
It's brave to be cock o' the class,
It's brave to thwack a strang fule,
It's brave to win a wee lass,
It's brave to be first wi' the pleugh,
An' first i' the reel an' strathspey,
An' first at the tod i' the cleugh,
An' first at the stag at bay.
It's brave to be laird o' the glen,
It's brave to be chief o' the clan,
But he that can dree for his neebor to dee,
Oh, he's the true brave man:
He's the true brave man, Willie,
An' the fame o' his name sall be gran'!
Hech, but ye'll be a brave man, Willie,
Hech, but ye'll be a brave man.
poem by Sydney Thompson Dobell
Submitted by Poetry Lover
Vote! | Copy!
The Sodger's Lassie
A'the toun is to the doun
Puin' o' the blaeberrie.
Ab's gane, Rab's gane,
Aggie's gane, Maggie's gane,
A' the toun is to the doun,
An's left the house to wae and me.
Heigho the blaeberrie!
Wha'll hae a blaeberrie?
Ah, to min' o' auld lang syne,
Puin' o' the blaeberrie!
Sodger Tam, he cam an' cam,
Puin' o' the blaeberrie;
Still I went, an' still I bent,
Puin' o' the blaeberrie.
Berries high, an' berries low,
Heigho the blaeberrie!
Tam maun come where berries grow,
Puin' o' the blaeberrie.
Heigho the blaeberrie!
Wha'll hae a blaeberrie?
Ah, to min' o' auld lang syne,
Puin' o' the blaeberrie!
Never ance I looked at Tam,
Heigho the blaeberrie!
Weel I kent him when he cam,
Puin' o' the blaeberrie.
Baith our faces to the groun',
Puin' o' the blaeberrie,
Tam cam near without a soun',
Heigho the blaeberrie!
Wow! but we were near, I ween,
Puin' o' the blaeberrie!
A' the air was warm between,
Heigho the blaeberrie!
Could a lassie think o' ill,
Puin' o' the blaeberrie?
Berries e'en grow where they will,
Heigho the blaeberrie!
Berries here, an' berries there,
Heigho the blaeberrie!
I was kissed or I was ware,
Puin' o' the blaeberrie.
Wha wad fash wi' ane anither
Puin' o' the blaeberrie?
Berries whiles will grow thegither,
Heigho the blaeberrie!
I was kissed or I could speer,
Heigho the blaeberrie!
Hech! that folk sud come sae near,
A' to pu' a blaeberrie!
While I grat and chid forbye,
Heigho the blaeberrie!
Doun we sat-I ken na why-
A' amang the blaeberrie.
Heigho the blaeberrie!
Wha 'll hae a blaeberrie?
Oh, to min' o' auld lang syne,
A' amang the blaeberrie!
Sidelong Tam he cam an' cam
A' amang the blaeberrie.
Wha could tell he meant na fair?
Weel I ken I chid him sair,
But that day we gaed na mair
Puin' o' the blaeberrie!
Heigho the blaeberrie!
Wha 'll hae a blaeberrie?
Oh, to min' o' auld lang syne,
Doun amang the blaeberrie!
poem by Sydney Thompson Dobell
Submitted by Poetry Lover
Vote! | Copy!
A Valentine
YE are twa laddies unco gleg,
An' blithe an' bonnie:
As licht o' heel as Anster's Meg;--
Gin ye'd a lassie's favor beg,
I' faith she couldna stir a peg
Ance lookin' on ye!
He's a douce wiselike callant--Jim:
Of wit aye ready.
Cuts aff ane's sentence, 't ither's limb,
An' whiles he's daft and whiles he's grim,
But brains?--wha's got the like o'him
In's wee bit heidie?
Dear laddie wi' the curlin' hair,
Gentlest of ony:
That gies kind looks an' speeches fair
To dour auld wives as lassies rare,--
I ken a score o' lads an' mair,
But nane like Johnnie!
And gin ye learn the way to woo,
Hae sweethearts mony,
O laddie, never say ye loe
An' gie fause coin for siller true;
A lassie's sair heart's naething new,--
Mind o' that, Johnnie.
An' dinna change your luve sae fast
For ilk face bonnie,
Lest waefu' want track wilfu' waste,
And a' your youthfu' years lang past,
Ye get the crookit stick at last,
Ochone, puir Johnnie!
But callants baith, tak tent, and when
Bright e'en hae won ye,
Tak each your jo--and keep her--then
Be faithfu' as ye're fond, ye ken,
Or--gang your gate like honest men,
Young Jim and Johnnie.
Sae when auld Time his crookit claw
Sall lay upon ye,
When, Jim, your feet that dance sae braw
Are no the lightest in the ha',
An' a' your curly haffets fa',
My winsome Johnnie,--
May each his ain warm ingle view,
Cosie as ony:
A gudewife sonsie, leal and true,
O' bonnie dochters not a few,
An' lads--sic lads as ye're the noo--
Dear Jim and Johnnie!
poem by Dinah Maria Mulock Craik
Submitted by Poetry Lover
Vote! | Copy!
Auld Lang Syne
(r.burns)
Traditional new years eves song. jeff performed it live at mercury lounge, new york, on december 31 1995.
Should auld acquaintance be forgot
And never brought to mind?
Should auld acquaintance be forgot
And auld lang syne!
For auld lang syne, my dear
For auld lang syne
Well tak a cup o kindness yet
For auld lang syne.
And surely yell be your pint stowp
And surely Ill be mine!
And well tak a cup o kindness yet,
For auld lang syne.
For auld lang syne, my dear
For auld lang syne
Well tak a cup o kindness yet
For auld lang syne.
We twa hae run about the braes
And poud the gowans fine
But weve wanderd mony a weary fit
Sin auld lang syne.
For auld lang syne, my dear
For auld lang syne
Well tak a cup o kindness yet
For auld lang syne.
We twa hae paidld in the burn
Frae morning sun till dine
But seas between us briad hae roard
Sin auld lang syne.
For auld lang syne, my dear
For auld lang syne
Well tak a cup o kindness yet
For auld lang syne.
And theres a hand, my trusty fere
And gies a hand o thine
And well tak a right gude-willie waught
For auld lang syne.
For auld lang syne, my dear
For auld lang syne
Well tak a cup o kindness yet
For auld lang syne.
song performed by by Jeff Buckley
Submitted by Lucian Velea
Vote! | Copy!
Last May a Braw Wooer
Last May a braw wooer cam down the lang glen,
And sair wi' his love he did deave me;
I said there was naething I hated like men:
The deuce gae wi 'm to believe me, believe me,
The deuce gae wi 'm to believe me.
He spak o' the darts in my bonie black een,
And vow'd for my love he was diein;
I said he might die when he liked for Jean:
The Lord forgie me for liein, for liein,
The Lord forgie me for liein!
A weel-stocked mailen, himsel for the laird,
And marriage aff-hand, were his proffers:
I never loot on that I ken'd it, or car'd,
But thought I might hae waur offers, waur offers,
But thought I might hae waur offers.
But what wad ye think? in a fortnight or less,
(The deil tak his taste to gae near her!)
He up the lang loan to my black cousin Bess,
Guess ye how, the jad! I could bear her, could bear her
Guess ye how, the jad! I could bear her.
But a' the niest week I fretted wi' care,
I gaed to the tryste o' Dalgarnock,
And wha but my fine fickle lover was there,
I glowr'd as I'd seen a warlock, a warlock.
I glowr'd as I'd seen a warlock.
But owre my left shoulder I gae him a blink,
Lest neibors might say I was saucy;
My wooer he caper'd as he'd been in drink,
And vow'd I was his dear lassie, dear lassie,
And vow'd I was his dear lassie.
I spier'd for my cousin fu' couthy and sweet,
Gin she had recover'd her hearin,
And how her new shoon fit her auld shachl't feet--
But, heavens! how he fell a swearin, a swearin,
But, heavens! how he fell a swearin.
He begg'd, for gudesake, I wad be his wife,
Or else I wad kill him wi' sorrow:
So e'en to preserve the poor body in life,
I think I maun wed him to-morrow, to-morrow,
I think I maun wed him to-morrow.
poem by Robert Burns
Submitted by Poetry Lover
Vote! | Copy!
The Auld Farmer's New-Year-Morning Salutation to His Auld Mare , Maggie
A Guide New-year I wish thee, Maggie!
Hae, there's a ripp to thy auld baggie:
Tho' thou's howe-backit now, an' knaggie,
I've seen the day
There could hae gaen like ony staggie,
Out-owre the lay.
Tho' now thou's dowie, stiff an' crazy,
An' thy auld hide as white's a daisie,
I've seen the dappl't, sleek an' glaizie,
A bonie gray:
He should been tight that daur't to raize thee,
Ance in a day.
Thou ance was i' the foremost rank,
A filly buirdly, steeve an' swank;
An' set weel down a shapely shank,
As e'er tread yird;
An' could hae flown out-owre a stank,
Like ony bird.
It's now some nine-an'-twenty year,
Sin' thou was my guid-father's mear;
He gied me thee, o' tocher clear,
An' fifty mark;
Tho' it was sma', 'twas weel-won gear,
An' thou was stark.
When first I gaed to woo my Jenny,
Ye then was trotting wi' your minnie:
Tho' ye was trickie, slee, an funnie,
Ye ne'er was donsie;
But hamely, tawie, quiet, an' cannie,
An' unco sonsie.
That day, ye pranc'd wi' muckle pride,
When ye bure hame my bonie bride:
An' sweet an' gracefu' she did ride,
Wi' maiden air!
Kyle-Stewart I could bragged wide
For sic a pair.
Tho' now ye dow but hoyte and hobble,
An' wintle like a saumont coble,
That day, ye was a jinker noble,
For heels an' win'!
An' ran them till they a' did wauble,
Far, far, behin'!
When thou an' I were young an' skeigh
An' stable-meals at fairs were dreigh,
How thou wad prance, and snore, an' skreigh
An' tak the road!
Town's-bodies ran, an' stood abeigh,
An' ca't thee mad.
When thou was corn't, an' I was mellow,
We took the road aye like a swallow:
At brooses thou had ne'er a fellow,
For pith an' speed;
But ev'ry tail thou pay't them hollow,
Whare'er thou gaed.
The sma', droop-rumpl't, hunter cattle
Might aiblins waurt thee for a brattle;
But sax Scotch mile, thou try't their mettle,
An' gar't them whaizle:
Nae whip nor spur, but just a wattle
O' saugh or hazel.
Thou was a noble fittie-lan',
As e'er in tug or tow was drawn!
Aft thee an' I, in aught hours' gaun,
In guid March-weather,
Hae turn'd sax rood beside our han',
For days thegither.
Thou never braing't, an' fetch't, an' fliskit;
But thy auld tail thou wad hae whiskit,
An' spread abreed thy weel-fill'd brisket,
Wi' pith an' power;
Till sprittie knowes wad rair't an' riskit
An' slypet owre.
When frosts lay lang, an' snaws were deep,
An' threaten'd labour back to keep,
I gied thy cog a wee bit heap
Aboon the timmer:
I ken'd my Maggie wad na sleep,
For that, or simmer.
In cart or car thou never reestit;
The steyest brae thou wad hae fac't it;
Thou never lap, an' sten't, and breastit,
Then stood to blaw;
But just thy step a wee thing hastit,
Thou snoov't awa.
My pleugh is now thy bairn-time a',
Four gallant brutes as e'er did draw;
Forbye sax mae I've sell't awa,
That thou hast nurst:
They drew me thretteen pund an' twa,
The vera warst.
Mony a sair daurk we twa hae wrought,
An' wi' the weary warl' fought!
An' mony an anxious day, I thought
We wad be beat!
Yet here to crazy age we're brought,
Wi' something yet.
An' think na', my auld trusty servan',
That now perhaps thou's less deservin,
An' thy auld days may end in starvin;
For my last fow,
A heapit stimpart, I'll reserve ane
Laid by for you.
We've worn to crazy years thegither;
We'll toyte about wi' ane anither;
Wi' tentie care I'll flit thy tether
To some hain'd rig,
Whare ye may nobly rax your leather,
Wi' sma' fatigue.
poem by Robert Burns
Submitted by Poetry Lover
Vote! | Copy!
Auld Farmer's New-Year-Morning Salutation to His Auld Mare, Maggie On giving her the accustomed ripp of corn to hansel in the New-Year, The
A Guide New-year I wish thee, Maggie!
Hae, there's a ripp to thy auld baggie:
Tho' thou's howe-backit now, an' knaggie,
I've seen the day
There could hae gaen like ony staggie,
Out-owre the lay.
Tho' now thou's dowie, stiff an' crazy,
An' thy auld hide as white's a daisie,
I've seen the dappl't, sleek an' glaizie,
A bonie gray:
He should been tight that daur't to raize thee,
Ance in a day.
Thou ance was i' the foremost rank,
A filly buirdly, steeve an' swank;
An' set weel down a shapely shank,
As e'er tread yird;
An' could hae flown out-owre a stank,
Like ony bird.
It's now some nine-an'-twenty year,
Sin' thou was my guid-father's mear;
He gied me thee, o' tocher clear,
An' fifty mark;
Tho' it was sma', 'twas weel-won gear,
An' thou was stark.
When first I gaed to woo my Jenny,
Ye then was trotting wi' your minnie:
Tho' ye was trickie, slee, an funnie,
Ye ne'er was donsie;
But hamely, tawie, quiet, an' cannie,
An' unco sonsie.
That day, ye pranc'd wi' muckle pride,
When ye bure hame my bonie bride:
An' sweet an' gracefu' she did ride,
Wi' maiden air!
Kyle-Stewart I could bragged wide
For sic a pair.
Tho' now ye dow but hoyte and hobble,
An' wintle like a saumont coble,
That day, ye was a jinker noble,
For heels an' win'!
An' ran them till they a' did wauble,
Far, far, behin'!
When thou an' I were young an' skeigh
An' stable-meals at fairs were dreigh,
How thou wad prance, and snore, an' skreigh
An' tak the road!
Town's-bodies ran, an' stood abeigh,
An' ca't thee mad.
When thou was corn't, an' I was mellow,
We took the road aye like a swallow:
At brooses thou had ne'er a fellow,
For pith an' speed;
But ev'ry tail thou pay't them hollow,
Whare'er thou gaed.
The sma', droop-rumpl't, hunter cattle
Might aiblins waurt thee for a brattle;
But sax Scotch mile, thou try't their mettle,
An' gar't them whaizle:
Nae whip nor spur, but just a wattle
O' saugh or hazel.
Thou was a noble fittie-lan',
As e'er in tug or tow was drawn!
Aft thee an' I, in aught hours' gaun,
In guid March-weather,
Hae turn'd sax rood beside our han',
For days thegither.
Thou never braing't, an' fetch't, an' fliskit;
But thy auld tail thou wad hae whiskit,
An' spread abreed thy weel-fill'd brisket,
Wi' pith an' power;
Till sprittie knowes wad rair't an' riskit
An' slypet owre.
When frosts lay lang, an' snaws were deep,
An' threaten'd labour back to keep,
I gied thy cog a wee bit heap
Aboon the timmer:
I ken'd my Maggie wad na sleep,
For that, or simmer.
In cart or car thou never reestit;
The steyest brae thou wad hae fac't it;
Thou never lap, an' sten't, and breastit,
Then stood to blaw;
But just thy step a wee thing hastit,
Thou snoov't awa.
My pleugh is now thy bairn-time a',
Four gallant brutes as e'er did draw;
Forbye sax mae I've sell't awa,
That thou hast nurst:
They drew me thretteen pund an' twa,
The vera warst.
Mony a sair daurk we twa hae wrought,
An' wi' the weary warl' fought!
An' mony an anxious day, I thought
We wad be beat!
Yet here to crazy age we're brought,
Wi' something yet.
An' think na', my auld trusty servan',
That now perhaps thou's less deservin,
An' thy auld days may end in starvin;
For my last fow,
A heapit stimpart, I'll reserve ane
Laid by for you.
We've worn to crazy years thegither;
We'll toyte about wi' ane anither;
Wi' tentie care I'll flit thy tether
To some hain'd rig,
Whare ye may nobly rax your leather,
Wi' sma' fatigue.
poem by Robert Burns
Submitted by Poetry Lover
Vote! | Copy!
To Charles Baxter
OUR Johnie's deid. The mair's the pity!
He's deid, an' deid o' Aqua-vitae.
O Embro', you're a shrunken city,
Noo Johnie's deid!
Tak hands, an' sing a burial ditty
Ower Johnie's heid.
To see him was baith drink an' meat,
Gaun linkin' glegly up the street.
He but to rin or tak a seat,
The wee bit body!
Bein' aye unsicken on his feet
Wi' whusky toddy.
To be aye tosh was Johnie's whim,
There's nane was better teut than him,
Though whiles his gravit-knot wad clim'
Ahint his ear,
An' whiles he'd buttons oot or in
The less ae mair.
His hair a' lang about his bree,
His tap-lip lang by inches three -
A slockened sort 'mon,' to pree
A' sensuality -
A droutly glint was in his e'e
An' personality.
An' day an' nicht, frae daw to daw,
Dink an' perjink an' doucely braw,
Wi' a kind o' Gospel ower a',
May or October,
Like Peden, followin' the Law
An' no that sober.
Whusky an' he were pack thegether.
Whate'er the hour, whate'er the weather,
John kept himsel' wi' mistened leather
An' kindled spunk.
Wi' him, there was nae askin' whether -
John was aye drunk.
The auncient heroes gash an' bauld
In the uncanny days of auld,
The task ance fo(u)nd to which th'were called,
Stack stenchly to it.
His life sic noble lives recalled,
Little's he knew it.
Single an' straucht, he went his way.
He kept the faith an' played the play.
Whusky an' he were man an' may
Whate'er betided.
Bonny in life - in death - this twae
Were no' divided.
An' wow! but John was unco sport.
Whiles he wad smile about the Court
Malvolio-like - whiles snore an' snort
Was heard afar.
The idle winter lads' resort
Was aye John's bar.
What's merely humorous or bonny
The Worl' regairds wi' cauld astony.
Drunk men tak' aye mair place than ony;
An' sae, ye see,
The gate was aye ower thrang for Johnie -
Or you an' me.
John micht hae jingled cap an' bells,
Been a braw fule in silks an' pells,
In ane o' the auld worl's canty hells
Paris or Sodom.
I wadnae had him naething else
But Johnie Adam.
He suffered - as have a' that wan
Eternal memory frae man,
Since e'er the weary worl' began -
Mister or Madam,
Keats or Scots Burns, the Spanish Don
Or Johnie Adam.
We leuch, an' Johnie deid. An' fegs!
Hoo he had keept his stoiterin' legs
Sae lang's he did's a fact that begs
An explanation.
He stachers fifty years - syne plegs
To's destination.
poem by Robert Louis Stevenson
Submitted by Poetry Lover
Vote! | Copy!
The Market-Wife's Song
The butter an' the cheese weel stowit they be,
I sit on the hen-coop the eggs on my knee,
The lang kail jigs as we jog owre the rigs,
The gray mare's tail it wags wi' the kail,
The warm simmer sky is blue aboon a',
An' whiddie, whuddie, whaddie, gang the auld wheels twa.
I sit on the coop, I look straight before,
But my heart it is awa' the braid ocean owre,
I see the bluidy fiel' where my ain bonny chiel',
My wee bairn o' a', gaed to fight or to fa',
An' whiddie, whuddie, whaddie, gang the auld wheels twa.
I see the gran' toun o' the big forrin' loun,
I hear the cannon soun', I see the reek aboon;
It may be lang John lettin' aff his gun,
It may be the mist-your mither disna wist-
It may be the kirk, it may be the ha',
An' whiddie, whuddie, whaddie, gang the auld wheels twa.
An' I ken the Black Sea, ayont the rock o' dool,
Like a muckle blot o' ink in a buik fra' the schule,
An' Jock! it gars me min' o' your buikies lang syne,
An' mindin' o' it a' the tears begin to fa',
An' whiddie, whuddie, whaddie, gang the old wheels twa.
Then a bull roars fra' the scaur, ilka rock's a bull agen,
An' I hear the trump o' war, an' the carse is fu' o' men,
Up an' doun the morn I ken the bugle horn,
Ilka birdie sma' is a fleein' cannon ba',
An' whiddie, whuddie, whaddie, gang the auld wheels twa.
Guid Heavens! the Russian host! We maun e'en gie up for lost!
Gin ye gain the battle hae ye countit a' the cost?
Ye may win a gran' name, but wad wee Jock come hame?
Dinna fecht, dinna fecht! there's room for us a',
An' whiddie, whuddie, whaddie, gang the auld wheels twa.
In vain, in vain, in vain! They are marchin' near and far!
Wi' swords an' wi' slings an' wi' instruments o' war!
Oh, day sae dark an' sair! ilka man seven feet an' mair!
I bow my head an' say, 'Gin the Lord wad smite them a'!'
An' whiddie, whuddie, whaddie, gang the auld wheels twa.
Then forth fra' their ban' there steps an armed man,
His tairge at his breast an' his claymore in his han',
His gowd pow glitters fine an' his shadow fa's behin',
I think o' great Goliath as he stan's before them a',
An' whiddie, whuddie, whaddie, gang the auld wheels twa.
To meet the Philistine leaps a laddie fra' our line,
Oh, my heart! oh, my heart! 'tis that wee lad o' mine!
I start to my legs-an' doun fa' the eggs-
The cocks an' hens a' they cackle an' they ca',
An' whiddie, whuddie, whaddie, gang the auld wheels twa.
Oh, Jock, my Hielan' lad-oh, Jock, my Hielan' lad,
Never till I saw thee that moment was I glad!
Aye sooner sud thou dee before thy mither's ee'
Than a man o' the clan sud hae stept out but thee!
An' sae I cry to God-while the hens cackle a',
An' whiddie. whuddie, whaddie, gang the auld wheels twa.
poem by Sydney Thompson Dobell
Submitted by Poetry Lover
Vote! | Copy!
The Death and Dying Words of Poor Mailie
The Author's Only Pet Yowe
An Unco Mournfu' Tale
As Mailie, an' her lambs thegither,
Was ae day nibbling on the tether,
Upon her cloot she coost a hitch,
An owre she warsl'd in the ditch:
There, groaning, dying, she did lie,
When Hughoc he cam doytin by.
Wi' glowrin een, and lifted han's
Poor Hughoc like a statue stan's;
He saw her days were near-hand ended,
But, wae's my heart! he could na mend it!
He gaped wide, but naething spak,
At length poor Mailie silence brak.
"O thou, whase lamentable face
Appears to mourn my woefu' case!
My dying words attentive hear,
An' bear them to my Master dear.
"Tell him, if e'er again he keep
As muckle gear as buy a sheep -
O, bid him never tie them mair,
Wi' wicked strings o' hemp or hair!
But ca' them out to park or hill,
An' let them wander at their will:
So may his flock increase, an' grow
To scores o' lambs, an' packs o' woo'!
"Tell him, he was a Master kin',
An' aye was guid to me an' mine;
An now my dying charge I gie him,
My helpless lambs, I trust them wi' him.
"O, bid him save their harmless lives,
Frae dogs, an' tods, an' butchers' knives!
But gie them guid cow-milk their fill,
Till they be fit to fend themsel';
An' tent them duly, e'en an' morn,
Wi' taets o' hay an' ripps o' corn.
"An' may they never learn the gates,
Of ither vile, wanrestfu' pets -
To slink thro' slaps, an' reave an' steal
At stacks o' pease, or stocks o' kail!
So may they, like their great forbears,
For mony a year come thro' the shears:
So wives will gie them bits o' bread,
An bairns greet for them when they're dead.
"My poor toop-lamb, my son an' heir,
O, bid him breed him up wi' care!
An' if he live to be a beast,
To pit some havins in his breast!
An' warn him - what I winna name -
To stay content wi' yowes at hame;
An' no to rin an' wear his cloots,
Like ither meseless, graceless brutes.
"An' neist, my yowie, silly thing,
Gude keep thee frae a tether string!
O, may thou ne'er forgather up,
Wi' ony blastit, moorland toop;
But aye keep mind to moop an' mell,
Wi' sheep o' credit like thysel'!
"And now, my bairns, wi' my last breath,
I lea'e my blessin wi' you baith:
An' when you think upo' your mither,
Mind to be kind to ane anither.
"Now, honest Hughoc, dinna fail,
To tell my master a' my tale;
An' bid him burn this cursed tether,
An' for thy pains thou'se get my blather."
This said, poor Mailie turn'd her head,
An' closed her een amang the dead!
poem by Robert Burns
Submitted by Poetry Lover
Vote! | Copy!
Death and Dying Words of Poor Mailie, The
The Author's Only Pet Yowe
An Unco Mournfu' Tale
As Mailie, an' her lambs thegither,
Was ae day nibbling on the tether,
Upon her cloot she coost a hitch,
An owre she warsl'd in the ditch:
There, groaning, dying, she did lie,
When Hughoc he cam doytin by.
Wi' glowrin een, and lifted han's
Poor Hughoc like a statue stan's;
He saw her days were near-hand ended,
But, wae's my heart! he could na mend it!
He gaped wide, but naething spak,
At length poor Mailie silence brak.
"O thou, whase lamentable face
Appears to mourn my woefu' case!
My dying words attentive hear,
An' bear them to my Master dear.
"Tell him, if e'er again he keep
As muckle gear as buy a sheep -
O, bid him never tie them mair,
Wi' wicked strings o' hemp or hair!
But ca' them out to park or hill,
An' let them wander at their will:
So may his flock increase, an' grow
To scores o' lambs, an' packs o' woo'!
"Tell him, he was a Master kin',
An' aye was guid to me an' mine;
An now my dying charge I gie him,
My helpless lambs, I trust them wi' him.
"O, bid him save their harmless lives,
Frae dogs, an' tods, an' butchers' knives!
But gie them guid cow-milk their fill,
Till they be fit to fend themsel';
An' tent them duly, e'en an' morn,
Wi' taets o' hay an' ripps o' corn.
"An' may they never learn the gates,
Of ither vile, wanrestfu' pets -
To slink thro' slaps, an' reave an' steal
At stacks o' pease, or stocks o' kail!
So may they, like their great forbears,
For mony a year come thro' the shears:
So wives will gie them bits o' bread,
An bairns greet for them when they're dead.
"My poor toop-lamb, my son an' heir,
O, bid him breed him up wi' care!
An' if he live to be a beast,
To pit some havins in his breast!
An' warn him - what I winna name -
To stay content wi' yowes at hame;
An' no to rin an' wear his cloots,
Like ither meseless, graceless brutes.
"An' neist, my yowie, silly thing,
Gude keep thee frae a tether string!
O, may thou ne'er forgather up,
Wi' ony blastit, moorland toop;
But aye keep mind to moop an' mell,
Wi' sheep o' credit like thysel'!
"And now, my bairns, wi' my last breath,
I lea'e my blessin wi' you baith:
An' when you think upo' your mither,
Mind to be kind to ane anither.
"Now, honest Hughoc, dinna fail,
To tell my master a' my tale;
An' bid him burn this cursed tether,
An' for thy pains thou'se get my blather."
This said, poor Mailie turn'd her head,
An' closed her een amang the dead!
poem by Robert Burns
Submitted by Poetry Lover
Vote! | Copy!
Auld Lang Syne
Should auld acquaintance be forgot,
And never brought to mind?
Should auld acquaintance be forgot
And days of auld lang syne?
For auld lang syne, my dear,
For auld lang syne,
Well take a cup o kindness yet
For auld lang syne.
We twa hae run aboot the braes
And poud the gowans fine;
Weve wanderd mony a weary foot
Sin auld lang syne.
We two hae paidled i the burn,
Frae mornin sun till dine;
But seas between us braid hae roard
Sin auld lang syne.
And heres a hand, my trusty friend,
And gies a hand o thine;
Well take a cup o kindness yet
For auld lang syne.
Should auld acquaintance be forgot,
And never brought to mind?
Should auld acquaintance be forgot
And days of auld lang syne?
For auld lang syne, my dear,
For auld lang syne,
Well take a cup o kindness yet
For auld lang syne.
For auld lang syne, my dear,
For auld lang syne,
Well take a cup o kindness yet
For auld lang syne.
song performed by by Boney M.
Submitted by Lucian Velea
Vote! | Copy!
Halloween
Upon that night, when fairies light
On Cassilis Downans dance,
Or owre the lays, in splendid blaze,
On sprightly coursers prance;
Or for Colean the route is ta'en,
Beneath the moon's pale beams;
There, up the cove, to stray and rove,
Among the rocks and streams
To sport that night.
Among the bonny winding banks,
Where Doon rins, wimplin' clear,
Where Bruce ance ruled the martial ranks,
And shook his Carrick spear,
Some merry, friendly, country-folks,
Together did convene,
To burn their nits, and pou their stocks,
And haud their Halloween
Fu' blithe that night.
The lasses feat, and cleanly neat,
Mair braw than when they're fine;
Their faces blithe, fu' sweetly kythe,
Hearts leal, and warm, and kin';
The lads sae trig, wi' wooer-babs,
Weel knotted on their garten,
Some unco blate, and some wi' gabs,
Gar lasses' hearts gang startin'
Whiles fast at night.
Then, first and foremost, through the kail,
Their stocks maun a' be sought ance;
They steek their een, and graip and wale,
For muckle anes and straught anes.
Poor hav'rel Will fell aff the drift,
And wander'd through the bow-kail,
And pou't, for want o' better shift,
A runt was like a sow-tail,
Sae bow't that night.
Then, staught or crooked, yird or nane,
They roar and cry a' throu'ther;
The very wee things, todlin', rin,
Wi' stocks out owre their shouther;
And gif the custoc's sweet or sour.
Wi' joctelegs they taste them;
Syne cozily, aboon the door,
Wi cannie care, they've placed them
To lie that night.
The lasses staw frae 'mang them a'
To pou their stalks of corn:
But Rab slips out, and jinks about,
Behint the muckle thorn:
He grippet Nelly hard and fast;
Loud skirl'd a' the lasses;
But her tap-pickle maist was lost,
When kitlin' in the fause-house
Wi' him that night.
The auld guidwife's well-hoordit nits,
Are round and round divided,
And monie lads' and lasses' fates
Are there that night decided:
Some kindle coothie, side by side,
And burn thegither trimly;
Some start awa, wi' saucy pride,
And jump out-owre the chimlie
Fu' high that night.
Jean slips in twa wi' tentie ee;
Wha 'twas she wadna tell;
But this is Jock, and this is me,
She says in to hersel:
He bleezed owre her, and she owre him,
As they wad never mair part;
Till, fuff! he started up the lum,
And Jean had e'en a sair heart
To see't that night.
Poor Willie, wi' his bow-kail runt,
Was brunt wi' primsie Mallie;
And Mallie, nae doubt, took the drunt,
To be compared to Willie;
Mall's nit lap out wi' pridefu' fling,
And her ain fit it brunt it;
While Willie lap, and swore by jing,
'Twas just the way he wanted
To be that night.
Nell had the fause-house in her min',
She pits hersel and Rob in;
In loving bleeze they sweetly join,
Till white in ase they're sobbin';
Nell's heart was dancin' at the view,
She whisper'd Rob to leuk for't:
Rob, stowlins, prie'd her bonny mou',
Fu' cozie in the neuk for't,
Unseen that night.
But Merran sat behint their backs,
Her thoughts on Andrew Bell;
She lea'es them gashin' at their cracks,
And slips out by hersel:
She through the yard the nearest taks,
And to the kiln goes then,
And darklins graipit for the bauks,
And in the blue-clue throws then,
Right fear't that night.
And aye she win't, and aye she swat,
I wat she made nae jaukin',
Till something held within the pat,
Guid Lord! but she was quakin'!
But whether 'was the deil himsel,
Or whether 'twas a bauk-en',
Or whether it was Andrew Bell,
She didna wait on talkin'
To spier that night.
Wee Jennie to her grannie says,
"Will ye go wi' me, grannie?
I'll eat the apple at the glass
I gat frae Uncle Johnnie:"
She fuff't her pipe wi' sic a lunt,
In wrath she was sae vap'rin',
She notice't na, an aizle brunt
Her braw new worset apron
Out through that night.
"Ye little skelpie-limmer's face!
I daur you try sic sportin',
As seek the foul thief ony place,
For him to spae your fortune.
Nae doubt but ye may get a sight!
Great cause ye hae to fear it;
For mony a ane has gotten a fright,
And lived and died deleeret
On sic a night.
"Ae hairst afore the Sherramoor, --
I mind't as weel's yestreen,
I was a gilpey then, I'm sure
I wasna past fifteen;
The simmer had been cauld and wat,
And stuff was unco green;
And aye a rantin' kirn we gat,
And just on Halloween
It fell that night.
"Our stibble-rig was Rab M'Graen,
A clever sturdy fallow:
His son gat Eppie Sim wi' wean,
That lived in Achmacalla:
He gat hemp-seed, I mind it weel,
And he made unco light o't;
But mony a day was by himsel,
He was sae sairly frighted
That very night."
Then up gat fechtin' Jamie Fleck,
And he swore by his conscience,
That he could saw hemp-seed a peck;
For it was a' but nonsense.
The auld guidman raught down the pock,
And out a hanfu' gied him;
Syne bade him slip frae 'mang the folk,
Some time when nae ane see'd him,
And try't that night.
He marches through amang the stacks,
Though he was something sturtin;
The graip he for a harrow taks.
And haurls it at his curpin;
And every now and then he says,
"Hemp-seed, I saw thee,
And her that is to be my lass,
Come after me, and draw thee
As fast this night."
He whistled up Lord Lennox' march
To keep his courage cheery;
Although his hair began to arch,
He was say fley'd and eerie:
Till presently he hears a squeak,
And then a grane and gruntle;
He by his shouther gae a keek,
And tumbled wi' a wintle
Out-owre that night.
He roar'd a horrid murder-shout,
In dreadfu' desperation!
And young and auld came runnin' out
To hear the sad narration;
He swore 'twas hilchin Jean M'Craw,
Or crouchie Merran Humphie,
Till, stop! she trotted through them
And wha was it but grumphie
Asteer that night!
Meg fain wad to the barn hae gaen,
To win three wechts o' naething;
But for to meet the deil her lane,
She pat but little faith in:
She gies the herd a pickle nits,
And two red-cheekit apples,
To watch, while for the barn she sets,
In hopes to see Tam Kipples
That very nicht.
She turns the key wi cannie thraw,
And owre the threshold ventures;
But first on Sawnie gies a ca'
Syne bauldly in she enters:
A ratton rattled up the wa',
And she cried, Lord, preserve her!
And ran through midden-hole and a',
And pray'd wi' zeal and fervour,
Fu' fast that night;
They hoy't out Will wi' sair advice;
They hecht him some fine braw ane;
It chanced the stack he faddom'd thrice
Was timmer-propt for thrawin';
He taks a swirlie, auld moss-oak,
For some black grousome carlin;
And loot a winze, and drew a stroke,
Till skin in blypes cam haurlin'
Aff's nieves that night.
A wanton widow Leezie was,
As canty as a kittlin;
But, och! that night amang the shaws,
She got a fearfu' settlin'!
She through the whins, and by the cairn,
And owre the hill gaed scrievin,
Whare three lairds' lands met at a burn
To dip her left sark-sleeve in,
Was bent that night.
Whyles owre a linn the burnie plays,
As through the glen it wimpl't;
Whyles round a rocky scaur it strays;
Whyles in a wiel it dimpl't;
Whyles glitter'd to the nightly rays,
Wi' bickering, dancing dazzle;
Whyles cookit underneath the braes,
Below the spreading hazel,
Unseen that night.
Among the brackens, on the brae,
Between her and the moon,
The deil, or else an outler quey,
Gat up and gae a croon:
Poor Leezie's heart maist lap the hool!
Near lav'rock-height she jumpit;
but mist a fit, and in the pool
Out-owre the lugs she plumpit,
Wi' a plunge that night.
In order, on the clean hearth-stane,
The luggies three are ranged,
And every time great care is ta'en',
To see them duly changed:
Auld Uncle John, wha wedlock joys
Sin' Mar's year did desire,
Because he gat the toom dish thrice,
He heaved them on the fire
In wrath that night.
Wi' merry sangs, and friendly cracks,
I wat they didna weary;
And unco tales, and funny jokes,
Their sports were cheap and cheery;
Till butter'd so'ns, wi' fragrant lunt,
Set a' their gabs a-steerin';
Syne, wi' a social glass o' strunt,
They parted aff careerin'
Fu' blythe that night.
poem by Robert Burns
Submitted by Poetry Lover
Vote! | Copy!
Tam O'Shanter
When chapman billies leave the street,
And drouthy neebors neebors meet,
As market-days are wearing late,
And folk begin to tak the gate;
While we sit bousin, at the nappy,
And gettin fou and unco happy,
We think na on the lang Scots miles,
The mosses, waters, slaps, and stiles,
That lie between us and our hame,
Whare sits our sulky, sullen dame,
Gathering her brows like gathering storm,
Nursing her wrath to keep it warm.
This truth fand honest Tam o' Shanter,
As he frae Ayr ae night did canter:
(Auld Ayr, wham ne'er a town surpasses,
For honest men and bonie lasses.)
O Tam! had'st thou but been sae wise
As taen thy ain wife Kate's advice!
She tauld thee weel thou was a skellum,
A bletherin, blusterin, drunken blellum;
That frae November till October,
Ae market-day thou was na sober;
That ilka melder wi' the miller,
Thou sat as lang as thou had siller;
That ev'ry naig was ca'd a shoe on,
The smith and thee gat roarin fou on;
That at the Lord's house, ev'n on Sunday,
Thou drank wi' Kirkton Jean till Monday.
She prophesied, that, late or soon,
Thou would be found deep drown'd in Doon;
Ot catch'd wi' warlocks in the mirk,
By Alloway's auld haunted kirk.
Ah, gentle dames! it gars me greet,
To think how mony counsels sweet,
How mony lengthen'd sage advices,
The husband frae the wife despises!
But to our tale:-Ae market night,
Tam had got planted unco right,
Fast by an ingle, bleezing finely,
Wi' reaming swats that drank divinely;
And at his elbow, Souter Johnie,
His ancient, trusty, drouthy crony:
Tam lo'ed him like a vera brither;
They had been fou for weeks thegither.
The night drave on wi' sangs and clatter;
And ay the ale was growing better:
The landlady and Tam grew gracious
Wi' secret favours, sweet, and precious:
The souter tauld his queerest stories;
The landlord's laugh was ready chorus:
The storm without might rair and rustle,
Tam did na mind the storm a whistle.
Care, mad to see a man sae happy,
E'en drown'd himsel amang the nappy:
As bees flee hame wi' lades o' treasure,
The minutes wing'd their way wi' pleasure;
Kings may be blest, but Tam was glorious,
O'er a' the ills o' life victorious!
But pleasures are like poppies spread,
You seize the flow'r, its bloom is shed;
Or like the snow falls in the river,
A moment white--then melts forever;
Or like the borealis race,
That flit ere you can point their place;
Or like the rainbow's lovely form
Evanishing amid the storm.
Nae man can tether time or tide:
The hour approaches Tam maun ride,-
That hour, o' night's black arch the key-stane
That dreary hour he mounts his beast in;
And sic a night he taks the road in,
As ne'er poor sinner was abroad in.
The wind blew as 'twad blawn its last;
The rattling show'rs rose on the blast;
The speedy gleams the darkness swallow'd;
Loud, deep, and lang the thunder bellow'd:
That night, a child might understand,
The Deil had business on his hand.
Weel mounted on his grey mare, Meg,-
A better never lifted leg,-
Tam skelpit on thro' dub and mire,
Despising wind and rain and fire;
Whiles holding fast his guid blue bonnet,
Whiles crooning o'er some auld Scots sonnet,
Whiles glowrin round wi' prudent cares,
Lest bogles catch him unawares.
Kirk-Alloway was drawing nigh,
Whare ghaists and houlets nightly cry.
By this time he was cross the ford,
Whare in the snaw the chapman smoor'd;
And past the birks and meikle stane,
Whare drucken Charlie brak's neckbane:
And thro' the whins, and by the cairn,
Whare hunters fand the murder'd bairn;
And near the thorn, aboon the well,
Whare Mungo's mither hang'd hersel.
Before him Doon pours all his floods;
The doubling storm roars thro' the woods;
The lightnings flash from pole to pole,
Near and more near the thunders roll;
When, glimmering thro' the groaning trees,
Kirk-Alloway seem'd in a bleeze:
Thro' ilka bore the beams were glancing,
And loud resounded mirth and dancing.
Inspiring bold John Barleycorn!
What dangers thou can'st make us scorn!
Wi' tippenny we fear nae evil;
Wi' usquebae we'll face the devil!
The swats sae ream'd in Tammie's noddle,
Fair play, he car'd na deils a boddle.
But Maggie stood right sair astonish'd,
Till, by the heel and hand admonish'd,
She ventur'd forward on the light;
And, wow! Tam saw an unco sight!
Warlocks and witches in a dance;
Nae cotillion brent-new frae France,
But hornpipes, jigs, strathspeys, and reels
Put life and mettle in their heels.
A winnock bunker in the east,
There sat Auld Nick in shape o' beast:
A towzie tyke, black, grim, and large,
To gie them music was his charge;
He screw'd the pipes and gart them skirl,
Till roof and rafters a' did dirl.-
Coffins stood round like open presses,
That shaw'd the dead in their last dresses;
And by some devilish cantraip sleight
Each in its cauld hand held a light,
By which heroic Tam was able
To note upon the haly table
A murderer's banes in gibbet airns;
Twa span-lang, wee, unchristen'd bairns;
A thief, new-cutted frae the rape--
Wi' his last gasp his gab did gape;
Five tomahawks, wi' blude red-rusted;
Five scimitars, wi' murder crusted;
A garter, which a babe had strangled;
A knife, a father's throat had mangled,
Whom his ain son o' life bereft-
The grey hairs yet stack to the heft;
Wi' mair o' horrible and awfu',
Which ev'n to name wad be unlawfu'.
As Tammie glowr'd, amaz'd and curious,
The mirth and fun grew fast and furious:
The piper loud and louder blew,
The dancers quick and quicker flew;
They reel'd, they set, they cross'd, they cleekit
Till ilka carlin swat and reekit
And coost her duddies to the wark
And linket at it in her sark!
Now Tam, O Tam! had thae been queans,
A' plump and strapping in their teens!
Their sarks, instead o' creeshie flannen,
Been snaw-white seventeen hunder linen!-
Thir breeks o' mine, my only pair,
That ance were plush, o' gude blue hair,
I wad hae gien them aff y hurdies,
For ae blink o' the bonie burdies!
But wither'd beldams, auld and droll,
Rigwoodie hags wad spean a foal,
Lowping and flinging on a crummock.
I wonder didna turn thy stomach.
But Tam ken'd what was what fu' brawlie;
There was ae winsom wench and walie,
That night enlisted in the core
(Lang after ken'd on Carrick shore.
For mony a beast to dead she shot,
And perish'd mony a bonie boat,
And shook baith meikle corn and bear
And kept the country-side in fear);
Her cutty sark o' Paisley harn,
That while a lassie she had worn,
In longitude tho' sorely scanty,
It was her best, and she was vauntie.
Ah! little ken'd thy reverend grannie,
That sark she coft for her wee Nannie,
Wi' twa pund Scots ('twas a' her riches),
Wad ever grac'd a dance of witches!
But here my Muse her wing maun cow'r,
Sic flights are far beyond her pow'r;
To sing how Nannie lap and flang,
(A souple jad she was and strang),
And how Tam stood like ane bewitch'd,
And thought his very een enrich'd;
Even Satan glowr'd and fidg'd fu' fain,
And hotch'd and blew wi' might and main:
Till first ae caper, syne anither,
Tam tint his reason a' thegither,
And roars out, "Weel done, Cutty-sark!"
And in an instant all was dark:
And scarcely had he Maggie rallied,
When out the hellish legion sallied.
As bees bizz out wi' angry fyke,
When plundering herds assail their byke;
As open pussie's mortal foes,
When, pop! she starts before their nose;
As eager runs the market-crowd,
When "Catch the thief!" resounds aloud;
So Maggie runs, the witches follow,
Wi' mony an eldritch skriech and hollo.
Ah, Tam! ah, Tam! thou'll get thy fairin!
In hell they'll roast thee like a herrin!
In vain thy Kate awaits thy comin!
Kate soon will be a woefu' woman!
Now, do thy speedy utmost, Meg,
And win the key-stane of the brig:
There at them thou thy tail may toss,
A running stream they dare na cross.
But ere the key-stane she could make,
The fient a tail she had to shake!
For Nannie far before the rest,
Hard upon noble Maggie prest,
And flew at Tam wi' furious ettle;
But little wist she Maggie's mettle-
Ae spring brought aff her master hale
But left behind her ain grey tail:
The carlin claught her by the rump,
And left poor Maggie scarce a stump.
Now, wha this tale o' truth shall read,
Ilk man and mother's son, take heed,
Whene'er to drink you are inclin'd,
Or cutty-sarks run in your mind,
Think, ye may buy the joys o'er dear,
Remember Tam o' Shanter's mear.
poem by Robert Burns
Submitted by Poetry Lover
Vote! | Copy!
The Braw Wooer
Last May, a braw wooer cam doun the lang glen,
And sair wi’ his love he did deave me;
I said, there was naething I hated like men—
The deuce gae wi’m, to believe me, believe me;
The deuce gae wi’m to believe me.
He spak o’ the darts in my bonie black e’en,
And vow’d for my love he was diein,
I said, he might die when he likèd for Jean—
The Lord forgie me for liein, for liein;
The Lord forgie me for liein!
A weel-stocked mailen, himsel’ for the laird,
And marriage aff-hand, were his proffers;
I never loot on that I kenn’d it, or car’d;
But thought I might hae waur offers, waur offers;
But thought I might hae waur offers.
But what wad ye think?—in a fortnight or less—
The deil tak his taste to gae near her!
He up the Gate-slack to my black cousin, Bess—
Guess ye how, the jad! I could bear her, could bear her;
Guess ye how, the jad! I could bear her.
But a’ the niest week, as I petted wi’ care,
I gaed to the tryst o’ Dalgarnock;
But wha but my fine fickle wooer was there,
I glowr’d as I’d seen a warlock, a warlock,
I glowr’d as I’d seen a warlock.
But owre my left shouther I gae him a blink,
Lest neibours might say I was saucy;
My wooer he caper’d as he’d been in drink,
And vow’d I was his dear lassie, dear lassie,
And vow’d I was his dear lassie.
I spier’d for my cousin fu’ couthy and sweet,
Gin she had recover’d her hearin’,
And how her new shoon fit her auld schachl’t feet,
But heavens! how he fell a swearin, a swearin,
But heavens! how he fell a swearin.
He beggèd, for gudesake, I wad be his wife,
Or else I wad kill him wi’ sorrow;
So e’en to preserve the poor body in life,
I think I maun wed him to-morrow, to-morrow;
I think I maun wed him to-morrow.
poem by Robert Burns
Submitted by Veronica Serbanoiu
Vote! | Copy!
A Dedication
Expect na, sir, in this narration,
A fleechin, fleth'rin Dedication,
To roose you up, an' ca' you guid,
An' sprung o' great an' noble bluid,
Because ye're surnam'd like His Grace-
Perhaps related to the race:
Then, when I'm tir'd-and sae are ye,
Wi' mony a fulsome, sinfu' lie,
Set up a face how I stop short,
For fear your modesty be hurt.
This may do-maun do, sir, wi' them wha
Maun please the great folk for a wamefou;
For me! sae laigh I need na bow,
For, Lord be thankit, I can plough;
And when I downa yoke a naig,
Then, Lord be thankit, I can beg;
Sae I shall say-an' that's nae flatt'rin-
It's just sic Poet an' sic Patron.
The Poet, some guid angel help him,
Or else, I fear, some ill ane skelp him!
He may do weel for a' he's done yet,
But only-he's no just begun yet.
The Patron (sir, ye maun forgie me;
I winna lie, come what will o' me),
On ev'ry hand it will allow'd be,
He's just-nae better than he should be.
I readily and freely grant,
He downa see a poor man want;
What's no his ain, he winna tak it;
What ance he says, he winna break it;
Ought he can lend he'll no refus't,
Till aft his guidness is abus'd;
And rascals whiles that do him wrang,
Ev'n that, he does na mind it lang;
As master, landlord, husband, father,
He does na fail his part in either.
But then, nae thanks to him for a'that;
Nae godly symptom ye can ca' that;
It's naething but a milder feature
Of our poor, sinfu' corrupt nature:
Ye'll get the best o' moral works,
'Mang black Gentoos, and pagan Turks,
Or hunters wild on Ponotaxi,
Wha never heard of orthodoxy.
That he's the poor man's friend in need,
The gentleman in word and deed,
It's no thro' terror of damnation;
It's just a carnal inclination.
Morality, thou deadly bane,
Thy tens o' thousands thou hast slain!
Vain is his hope, whase stay an' trust is
In moral mercy, truth, and justice!
No-stretch a point to catch a plack:
Abuse a brother to his back;
Steal through the winnock frae a whore,
But point the rake that taks the door;
Be to the poor like ony whunstane,
And haud their noses to the grunstane;
Ply ev'ry art o' legal thieving;
No matter-stick to sound believing.
Learn three-mile pray'rs, an' half-mile graces,
Wi' weel-spread looves, an' lang, wry faces;
Grunt up a solemn, lengthen'd groan,
And damn a' parties but your own;
I'll warrant they ye're nae deceiver,
A steady, sturdy, staunch believer.
O ye wha leave the springs o' Calvin,
For gumlie dubs of your ain delvin!
Ye sons of Heresy and Error,
Ye'll some day squeel in quaking terror,
When Vengeance draws the sword in wrath.
And in the fire throws the sheath;
When Ruin, with his sweeping besom,
Just frets till Heav'n commission gies him;
While o'er the harp pale Misery moans,
And strikes the ever-deep'ning tones,
Still louder shrieks, and heavier groans!
Your pardon, sir, for this digression:
I maist forgat my Dedication;
But when divinity comes 'cross me,
My readers still are sure to lose me.
So, sir, you see 'twas nae daft vapour;
But I maturely thought it proper,
When a' my works I did review,
To dedicate them, sir, to you:
Because (ye need na tak it ill),
I thought them something like yoursel'.
Then patronize them wi' your favor,
And your petitioner shall ever-
I had amaist said, ever pray,
But that's a word I need na say;
For prayin, I hae little skill o't,
I'm baith dead-sweer, an' wretched ill o't;
But I'se repeat each poor man's pray'r,
That kens or hears about you, sir-
"May ne'er Misfortune's gowling bark,
Howl thro' the dwelling o' the clerk!
May ne'er his genrous, honest heart,
For that same gen'rous spirit smart!
May Kennedy's far-honour'd name
Lang beet his hymeneal flame,
Till Hamiltons, at least a dizzen,
Are frae their nuptial labours risen:
Five bonie lasses round their table,
And sev'n braw fellows, stout an' able,
To serve their king an' country weel,
By word, or pen, or pointed steel!
May health and peace, with mutual rays,
Shine on the ev'ning o' his days;
Till his wee, curlie John's ier-oe,
When ebbing life nae mair shall flow,
The last, sad, mournful rites bestow!"
I will not wind a lang conclusion,
With complimentary effusion;
But, whilst your wishes and endeavours
Are blest with Fortune's smiles and favours,
I am, dear sir, with zeal most fervent,
Your much indebted, humble servant.
But if (which Pow'rs above prevent)
That iron-hearted carl, Want,
Attended, in his grim advances,
By sad mistakes, and black mischances,
While hopes, and joys, and pleasures fly him,
Make you as poor a dog as I am,
Your humble servant then no more;
For who would humbly serve the poor?
But, by a poor man's hopes in Heav'n!
While recollection's pow'r is giv'n-
If, in the vale of humble life,
The victim sad of fortune's strife,
I, thro' the tender-gushing tear,
Should recognise my master dear;
If friendless, low, we meet together,
Then, sir, your hand-my Friend and Brother!
poem by Robert Burns
Submitted by Poetry Lover
Vote! | Copy!
Address to the Deil
O Prince! O chief of many throned Pow'rs
That led th' embattl'd Seraphim to war-
Milton
O Thou! whatever title suit thee-
Auld Hornie, Satan, Nick, or Clootie,
Wha in yon cavern grim an' sootie,
Clos'd under hatches,
Spairges about the brunstane cootie,
To scaud poor wretches!
Hear me, auld Hangie, for a wee,
An' let poor damned bodies be;
I'm sure sma' pleasure it can gie,
Ev'n to a deil,
To skelp an' scaud poor dogs like me,
An' hear us squeel!
Great is thy pow'r an' great thy fame;
Far ken'd an' noted is thy name;
An' tho' yon lowin' heuch's thy hame,
Thou travels far;
An' faith! thou's neither lag nor lame,
Nor blate, nor scaur.
Whiles, ranging like a roarin lion,
For prey, a' holes and corners tryin;
Whiles, on the strong-wind'd tempest flyin,
Tirlin the kirks;
Whiles, in the human bosom pryin,
Unseen thou lurks.
I've heard my rev'rend graunie say,
In lanely glens ye like to stray;
Or where auld ruin'd castles grey
Nod to the moon,
Ye fright the nightly wand'rer's way,
Wi' eldritch croon.
When twilight did my graunie summon,
To say her pray'rs, douse, honest woman!
Aft'yont the dyke she's heard you bummin,
Wi' eerie drone;
Or, rustlin, thro' the boortrees comin,
Wi' heavy groan.
Ae dreary, windy, winter night,
The stars shot down wi' sklentin light,
Wi' you, mysel' I gat a fright,
Ayont the lough;
Ye, like a rash-buss, stood in sight,
Wi' wavin' sough.
The cudgel in my nieve did shake,
Each brist'ld hair stood like a stake,
When wi' an eldritch, stoor "quaick, quaick,"
Amang the springs,
Awa ye squatter'd like a drake,
On whistlin' wings.
Let warlocks grim, an' wither'd hags,
Tell how wi' you, on ragweed nags,
They skim the muirs an' dizzy crags,
Wi' wicked speed;
And in kirk-yards renew their leagues,
Owre howkit dead.
Thence countra wives, wi' toil and pain,
May plunge an' plunge the kirn in vain;
For oh! the yellow treasure's ta'en
By witchin' skill;
An' dawtit, twal-pint hawkie's gane
As yell's the bill.
Thence mystic knots mak great abuse
On young guidmen, fond, keen an' crouse,
When the best wark-lume i' the house,
By cantrip wit,
Is instant made no worth a louse,
Just at the bit.
When thowes dissolve the snawy hoord,
An' float the jinglin' icy boord,
Then water-kelpies haunt the foord,
By your direction,
And 'nighted trav'llers are allur'd
To their destruction.
And aft your moss-traversin Spunkies
Decoy the wight that late an' drunk is:
The bleezin, curst, mischievous monkies
Delude his eyes,
Till in some miry slough he sunk is,
Ne'er mair to rise.
When masons' mystic word an' grip
In storms an' tempests raise you up,
Some cock or cat your rage maun stop,
Or, strange to tell!
The youngest brither ye wad whip
Aff straught to hell.
Lang syne in Eden's bonie yard,
When youthfu' lovers first were pair'd,
An' all the soul of love they shar'd,
The raptur'd hour,
Sweet on the fragrant flow'ry swaird,
In shady bower;
Then you, ye auld, snick-drawing dog!
Ye cam to Paradise incog,
An' play'd on man a cursed brogue,
(Black be your fa'!)
An' gied the infant warld a shog,
'Maist rui'd a'.
D'ye mind that day when in a bizz
Wi' reekit duds, an' reestit gizz,
Ye did present your smoutie phiz
'Mang better folk,
An' sklented on the man of Uzz
Your spitefu' joke?
An' how ye gat him i' your thrall,
An' brak him out o' house an hal',
While scabs and botches did him gall,
Wi' bitter claw;
An' lows'd his ill-tongu'd wicked scaul',
Was warst ava?
But a' your doings to rehearse,
Your wily snares an' fechtin fierce,
Sin' that day Michael did you pierce,
Down to this time,
Wad ding a Lallan tounge, or Erse,
In prose or rhyme.
An' now, auld Cloots, I ken ye're thinkin,
A certain bardie's rantin, drinkin,
Some luckless hour will send him linkin
To your black pit;
But faith! he'll turn a corner jinkin,
An' cheat you yet.
But fare-you-weel, auld Nickie-ben!
O wad ye tak a thought an' men'!
Ye aiblins might-I dinna ken-
Stil hae a stake:
I'm wae to think up' yon den,
Ev'n for your sake!
poem by Robert Burns
Submitted by Veronica Serbanoiu
Vote! | Copy!
The Gaberlunzie's Walk
The Laird is dead, the laird is dead,
An' dead is cousin John,
His henchmen ten, an' his sax merrie men,
Forbye the steward's son.
An' his ain guid gray that he strode sae gay
When hunt was up an' on,
An' the win' blew fair, an' the grews pu'd sair,
An' dawn was on Maol-don,
An' the skeigh steeds neigh'd, an' the slot-hounds bay'd,
An' up gaed the mornin' sun,
An' awa' gaed the deer wi' the merrie men's cheer,
Awa' owre the auld Maol-don,
An' awa' wi' a shout ran the rabble an' the rout,
An' awa' rode cousin John,
Wi' his horn, his horn, thro' the merry merry morn,
His hunter's horn sae shrill!
An' 't was 'Ho, heigho, hereawa',
Hereawa', hereawa'!
Ho, heigho, hereawa'!'
A' roun' the hill!
Walie! walie! they're a' gane dead,
A' owre the seas an' awa'
The laird an' his men, the sax an' the ten,
They gaed to fight and to fa'.
An' walie, an' wae, an' hech! the weary day!
The laird is dead an' a'!
A' in ae grave by the margent o' the wave
Thegither they lay doun,
Sax feet deep, where dead men sleep,
A' i' the faeman's grun'.
Foremost i' the van, wi' his bagpipes i' his han',
The steward's ae braw son,
An' next the young laird-gin the guid Lord had spared!-
A' as he led them on,
Wi' his bonnie brow bare an' his lang fair hair,
An' his bluidy braid-sword drawn;
An' hard by his chief, that in life was sae lief,
In death cam cousin John,
Wi' his horn, his horn, thro' the merry merry morn,
His hunter's horn sae shrill
When 't was 'Ho, heigho, hereawa',
Hereawa', hereawa'!'
Ho, heigho, hereawa'!'
A' roun' the hill!
Gin ony uphauld the young Laird lies cauld,
An' cauld lies cousin John,
Sax feet deep, as dead men sleep,
A' i' the faeman's grun,'
A' in ae grave by the margent o' the wave,
Where doun they lay that day,
Wi' the henchmen ten, an' the sax merrie men,
Ask the gaberlunzie gray.
Step an' step, step an' step, gaed the gaberlunzie gray,
Faint an lame, wi' empty wame, he hirples on his way.
Step an' step, step an' step, an' owre the hill maun he,
His head is bent, his pipe is brent, he has na a bawbee.
Step an' step, step an' step, he totters thro' the mirk,
He hears the fox amang the cocks, the houlet by the kirk.
Step an' step, step an' step, an' as he climbs the hill
The auld auld moon is gaun doun; the nicht grows cauld an' still,
The breathin' kye aroun' him lie, the ingle-light is gane,
He wakes the yowes amang the knowes, an' still he gangs his lane.
His slow steps rouse the blethrin' grouse, the peewit fa's an' squeals,
The nicht-goat bleats amang the peats, an' still he speils an' speils,
Step an' step, step an' step, an' up the craigie stark,
An' mony a stane ane after ane gangs snirtlin' doun the dark.
Step an' step, step an' step, that gaberlunzie gray,
A' win's seem tint far far ahint as he gangs on his way.
He hears the burn amang the fern, he hears the stoatie cheep,
He hears the rustle, an' flit an' fussle, as the kae shifts her roost in her sleep.
Step an' step, step an' step, he gangs wi' troubled breath,
He feels the silence a' aboon, he feels the warl beneath;
Wheet an' wheet about his feet the startit mousie ran,
An' as he gaes his riskin' claes aye gar him start an' stan';
An' as he stan's wi' knotted han's, an' leans his chitterin' head,
He hears the sod his steps have trod a-tirlin' to his tread;
An' crisp foot-fa', an' sibblin sma' o' stealthy cony crappin',
An' click o' bat aboon his hat, like fairy fingers snappin',
An' ilka yird that ticked an' stirred, where swairdie there is nae,
As elfin shools the tittlin' mools gar'd rinkle doun the brae;
An' safter soun' alang the groun' the grass-taps thro' an' thro',
Gin owre the fiel's the wee bit chiel's were dealin' out the dew.
Step an' step, step an' step, an' hech! his freezin' bluid!
He gaes into the silence as ane gaes into a wood.
The mair the height, mair still the nicht, an' faster did he gang,
Step an' step, an' then a step, an' he listens hard an' lang!
He listens twice, he listens thrice, but why he disna ken;
His cauld skin skeared, an' clipped his beard; he stops an' lists agen.
There's somethin' creepin' thro' his banes, there's somethin' stirs his hair:
'Tis mair than use, he canna choose, he listens ten times mair!
He pits his pack fra his auld back, he sits him on a stane,
His eyelids fa', he gapes his jaw, an' harks wi' might an' main,
The mair he list the mair uprist his gray-locks wi' affright,
Till ilka hair that he might wear was stiff an' stark upright.
His sick heart stops, the low moon drops, the nicht is eerie chill!
Wi' sudden shout the dead cry out, like hunters at a kill,
Full cry, full cry, the win's sweep by, a horn, a horn is shrill!
An' 'tis 'Ho, heigho, hereawa',
Hereawa', hereawa'!
Ho, heigho, hereawa'!'
A' roun' the hill!
poem by Sydney Thompson Dobell
Submitted by Poetry Lover
Vote! | Copy!