En.Citatepedia^®.ro

Anelida and Arcite

Thou ferse god of armes, Mars the rede,
That in the frosty contre called Trace,
Within thy grisly temple ful of drede
Honoured art as patroun of that place;
With thy Bellona, Pallas, ful of grace,
Be present and my song contynue and guye;
At my begynnyng thus to the I crye.

For hit ful depe is sonken in my mynde,
With pitous hert in Englyssh to endyte
This olde storie, in Latyn which I fynde,
Of quene Anelida and fals Arcite,
That elde, which that al can frete and bite,
As hit hath freten mony a noble storie,
Hath nygh devoured out of oure memorie.

Be favorable eke, thou Polymya,
On Parnaso that with thy sustres glade,
By Elycon, not fer from Cirrea,
Singest with vois memorial in the shade,
Under the laurer which that may not fade,
And do that I my ship to haven wynne.
First folowe I Stace, and after him Corynne.

The Story.

Iamque domos patrias Cithice post aspera gentis
Prelia laurigero subeunte Thesea curru
Letifici plausus missusque ad sidera vulgi

When Theseus with werres longe and grete
The aspre folk of Cithe had overcome,
With laurer corouned, in his char gold-bete,
Hom to his contre-houses is he come,
For which the peple, blisful al and somme,
So cry{:e}den that to the sterres hit wente,
And him to honouren dide al her entente.

Beforn this duk, in signe of victorie,
The trompes come, and in his baner large
The ymage of Mars, and in tokenyng of glorie
Men myghte sen of tresour many a charge,
Many a bright helm, and many a spere and targe,
Many a fresh knyght, and many a blysful route,
On hors, on fote, in al the feld aboute.

Ipolita his wif, the hardy quene
Of Cithia, that he conquered hadde,
With Emelye her yonge suster shene,
Faire in a char of gold he with him ladde,
That al the ground about her char she spradde
With brightnesse of the beaute in her face,
Fulfilled of largesse and of alle grace.

With his tryumphe and laurer-corouned thus,
In al the flour of Fortunes yevynge,
Let I this noble prince Theseus
Toward Athenes in his wey rydinge,
And founde I wol in shortly for to bringe
The slye wey of that I gan to write,
Of quene Anelida and fals Arcite.

Mars, which that through his furious cours of ire,
The olde wrathe of Juno to fulfille,
Hath set the peples hertes bothe on fire
Of Thebes and Grece, everich other to kille
With blody speres, ne rested never stille,
But throng now her, now ther, among hem bothe,
That everych other slough, so were they wrothe.

For when Amphiorax and Tydeus,
Ipomedon, Parthonope also
Were ded, and slayn proude Campaneus,
And when the wrecched Thebans, bretheren two,
Were slayn, and kyng Adrastus hom ago,
So desolat stod Thebes and so bare
That no wight coude remedie of his fare.

And when the olde Creon gan espye
How that the blood roial was broght a-doun,
He held the cite by his tyrannye
And dyde the gentils of that regioun
To ben his frendes and wonnen in the toun.
So, what for love of him and what for awe,
The noble folk were to the toun idrawe.

Among al these Anelida, the quene
Of Ermony, was in that toun dwellynge,
That fairer was then is the sonne shene.
Thurghout the world so gan her name springe
That her to seen had every wyght likynge,
For, as of trouthe, is ther noon her lyche
Of al the women in this worlde riche.

Yong was this quene, of twenty yer of elde,
Of mydel stature, and of such fairenesse
That Nature had a joye her to behelde;
And for to speken of her stidfastnesse,
She passed hath Penelope and Lucresse;
And shortly, yf she shal be comprehended,
In her ne myghte no thing been amended.

This Theban knyght [Arcite] eke, soth to seyn,
Was yong and therwithal a lusty knyght,
But he was double in love and no thing pleyn,
And subtil in that craft over any wyght,
And with his kunnyng wan this lady bryght;
For so ferforth he gan her trouthe assure
That she him trusted over any creature.

What shuld I seyn? She loved Arcite so
That when that he was absent any throwe,
Anon her thoghte her herte brast a-two;
For in her sight to her he bar hym lowe,
So that she wende have al his hert yknowe;
But he was fals; hit nas but feyned chere
As nedeth not to men such craft to lere.

But nevertheles ful mykel besynesse
Had he er that he myghte his lady wynne,
And swor he wolde dyen for distresse
Or from his wit he seyde he wolde twynne.
Alas, the while! For hit was routhe and synne
That she upon his sorowes wolde rewe;
But nothing thinketh the fals as doth the trewe.

Her fredom fond Arcite in such manere
That al was his that she hath, moche or lyte;

Ne to no creature made she chere
Ferther then that hit lyked to Arcite.
Ther nas no lak with which he myghte her wite;
She was so ferforth yeven hym to plese
That al that lyked hym hit dyde her ese.

Ther nas to her no maner lettre sent
That touched love, from any maner wyght,
That she ne shewed hit him er hit was brent;
So pleyn she was and dide her fulle myght
That she nyl hiden nothing from her knyght,
Lest he of any untrouthe her upbreyde.
Withoute bode his heste she obeyde.

And eke he made him jelous over here,
That what that any man had to her seyd
Anoon he wolde preyen her to swere
What was that word or make him evel apaid.
Then wende she out of her wyt have breyd;
But al this nas but sleght and flaterie;
Withoute love he feyned jelousye.

And al this tok she so debonerly
That al his wil her thoghte hit skilful thing,
And ever the lenger she loved him tendirly
And dide him honour as he were a kyng.
Her herte was to him wedded with a ring;
So ferforth upon trouthe is her entente
That wher he gooth her herte with him wente.

When she shal ete, on him is so her thoght
That wel unnethe of mete tok she kep;
And when that she was to her reste broght,
On him she thoghte alwey til that she slep;
When he was absent, prevely she wep:
Thus lyveth feire Anelida the quene
For fals Arcite, that dide her al this tene.

This fals Arcite, of his newfanglenesse,
For she to him so lowly was and trewe,
Tok lesse deynte of her stidfastnesse
And saw another lady, proud and newe,
And ryght anon he cladde him in her hewe--
Wot I not whethir in white, rede, or grene--
And falsed fair Anelida the quene.

But neverthelesse, gret wonder was hit noon
Thogh he were fals, for hit is kynde of man
Sith Lamek was, that is so longe agoon,
To ben in love as fals as evere he can;
He was the firste fader that began
To loven two, and was in bigamye,
And he found tentes first, but yf men lye.

This fals Arcite, sumwhat moste he feyne,
When he wex fals, to covere his traitorie,
Ryght as an hors that can both bite and pleyne,
For he bar her on honde of trecherie,
And swor he coude her doublenesse espie,
And al was falsnes that she to him mente.
Thus swor this thef, and forth his way he wente.

Alas, what herte myght enduren hit,
For routhe and wo, her sorwe for to telle?
Or what man hath the cunnyng or the wit?
Or what man mighte within the chambre dwelle,
Yf I to him rehersen sholde the helle
That suffreth fair Anelida the quene
For fals Arcite, that dide her al this tene.

She wepith, waileth, swowneth pitously;
To grounde ded she falleth as a ston;
Craumpyssheth her lymes crokedly;
She speketh as her wit were al agon;
Other colour then asshen hath she noon;
Non other word speketh she, moche or lyte,
But 'Merci, cruel herte myn, Arcite!'

And thus endureth til that she was so mat
That she ne hath foot on which she may sustene,
But forth languisshing evere in this estat,
Of which Arcite hath nouther routhe ne tene.
His herte was elleswhere, newe and grene,
That on her wo ne deyneth him not to thinke;
Him rekketh never wher she flete or synke.

His newe lady holdeth him so narowe
Up by the bridil, at the staves ende,
That every word he dredeth as an arowe;
Her daunger made him bothe bowe and bende,
And as her liste, made him turne or wende,
For she ne graunted him in her lyvynge
No grace whi that he hath lust to singe,

But drof hym forth. Unnethe liste her knowe
That he was servaunt unto her ladishippe;
But lest that he were proud, she held him lowe.
Thus serveth he withoute fee or shipe;
She sent him now to londe, now to shippe;
And for she yaf him daunger al his fille,
Therfor she hadde him at her owne wille.

Ensample of this, ye thrifty wymmen alle,
Take her of Anelida and Arcite,
That for her liste him 'dere herte' calle
And was so meke, therfor he loved her lyte.
The kynde of mannes herte is to delyte
In thing that straunge is, also God me save!
For what he may not gete, that wolde he have.

Now turne we to Anelida ageyn,
That pyneth day be day in langwisshinge,
But when she saw that her ne gat no geyn,
Upon a day, ful sorowfully wepinge,
She caste her for to make a compleynynge,
And of her owne hond she gan hit write,
And sente hit to her Theban knyght, Arcite.

The compleynt of Anelida the quene upon fals Arcite.

Proem

So thirleth with the poynt of remembraunce
The swerd of sorowe, ywhet with fals plesaunce,
Myn herte, bare of blis and blak of hewe,
That turned is in quakyng al my daunce,
My surete in awhaped countenaunce,
Sith hit availeth not for to ben trewe;
For whoso trewest is, hit shal hir rewe
That serveth love and doth her observaunce
Alwey til oon, and chaungeth for no newe.

Strophe

I wot myself as wel as any wight,
For I loved oon with al myn herte and myght,
More then myself an hundred thousand sithe,
And called him myn hertes lif, my knyght,
And was al his, as fer as hit was ryght;
And when that he was glad, then was I blithe,
And his disese was my deth as swithe;
And he ayein his trouthe hath me plyght
For evermore, his lady me to kythe.

Now is he fals, alas, and causeles,
And of my wo he is so routheles
That with a word him list not ones deyne
To bringe ayen my sorowful herte in pes,
For he is caught up in another les.
Ryght as him list, he laugheth at my peyne,
And I ne can myn herte not restreyne
For to love him alwey neveretheles;
And of al this I not to whom me pleyne.

And shal I pleyne--alas, the harde stounde!--
Unto my foo that yaf myn herte a wounde
And yet desireth that myn harm be more?
Nay, certis, ferther wol I never founde
Non other helpe, my sores for to sounde.
My destinee hath shapen hit so ful yore;
I wil non other medecyne ne lore;
I wil ben ay ther I was ones bounde.
That I have seid, be seid for evermore!

Alas! Wher is become your gentilesse,
Youre wordes ful of plesaunce and humblesse,
Youre observaunces in so low manere,
And your awayting and your besynesse
Upon me, that ye calden your maistresse,
Your sovereyne lady in this world here?
Alas! Is ther now nother word ne chere
Ye vouchen sauf upon myn hevynesse?
Alas! Youre love, I bye hit al to dere.

Now, certis, swete, thogh that ye
Thus causeles the cause be
Of my dedly adversyte,
Your manly resoun oghte hit to respite
To slen your frend, and namely me,
That never yet in no degre
Offended yow, as wisly He
That al wot, out of wo my soule quyte!
But for I shewed yow, Arcite,
Al that men wolde to me write,
And was so besy yow to delyte--
Myn honor save--meke,kynde,and fre,
Therfor ye put on me this wite,
And of me rekke not a myte,
Thogh that the swerd of sorwe byte
My woful herte through your cruelte.

My swete foo, why do ye so, for shame?
And thenke ye that furthered be your name
To love a newe, and ben untrewe? Nay!
And putte yow in sclaunder now and blame,
And do to me adversite and grame,
That love yow most--God, wel thou wost--alway?
Yet come ayein, and yet be pleyn som day,
And than shal this, that now is mys, be game,
And al foryive, while that I lyve may.

Antistrophe

Lo, herte myn, al this is for to seyne
As whether shal I preve or elles pleyne?
Which is the wey to doon yow to be trewe?
For either mot I have yow in my cheyne
Or with the deth ye mote departe us tweyne;
Ther ben non other mene weyes newe.
For God so wisly upon my soule rewe,
As verrayly ye sleen me with the peyne;
That may ye se unfeyned of myn hewe.

For thus ferforth have I my detb [y-]soght?
Myself I mordre with my privy thoght;
For sorowe and routhe of your unkyndenesse
I wepe, I wake, I faste; al helpeth noght;
I weyve joye that is to speke of oght,
I voyde companye, I fle gladnesse.
Who may avaunte her beter of hevynesse
Then I? And to this plyte have ye me broght,
Withoute gilt--me nedeth no witnesse.

And shal I preye, and weyve womanhede?--
Nay! Rather deth then do so foul a dede!--
And axe merci, gilteles--what nede?
And yf I pleyne what lyf that I lede,
Yow rekketh not; that knowe I, out of drede;
And if that I to yow myne othes bede
For myn excuse, a skorn shal be my mede.
Your chere floureth, but it wol not sede;
Ful longe agoon I oghte have taken hede.

For thogh I hadde yow to-morowe ageyn,
I myghte as wel holde Aperill fro reyn
As holde yow, to make yow be stidfast.
Almyghty God, of trouthe sovereyn,
Wher is the trouthe of man? Who hath hit slayn?
Who that hem loveth, she shal hem fynde as fast
As in a tempest is a roten mast.
Is that a tame best that is ay feyn
To fleen away when he is lest agast?

Now merci, swete, yf I mysseye!
Have I seyd oght amys, I preye?
I noot; my wit is al aweye.
I fare as doth the song of Chaunte-pleure
For now I pleyne, and now I pleye;
I am so mased that I deye;
Arcite hath born awey the keye
Of al my world, and my good aventure.
For in this world nis creature
Wakynge in more discomfiture
Then I, ne more sorowe endure.
And yf I slepe a furlong wey or tweye,
Then thynketh me that your figure
Before me stont, clad in asure,
To profren eft and newe assure
For to be trewe, and merci me to preye.

The longe nyght this wonder sight I drye,
And on the day for thilke afray I dye,
And of al this ryght noght, iwis, ye reche.
Ne nevere mo myn yen two be drie,
And to your routhe, and to your trouthe, I crie.
But welawey! To fer be they to feche;
Thus holdeth me my destinee a wreche.
But me to rede out of this drede, or guye,
Ne may my wit, so weyk is hit, not streche.

Conclusion.

Then ende I thus, sith I may do no more.
I yeve hit up for now and evermore,
For I shal never eft putten in balaunce
My sekernes, ne lerne of love the lore.
But as the swan, I have herd seyd ful yore,
Ayeins his deth shal singen his penaunce,
So singe I here my destinee or chaunce,
How that Arcite Anelida so sore
Hath thirled with the poynt of remembraunce.

The Story continued

When that Anelida, this woful quene,
Hath of her hand ywriten in this wise,
With face ded, betwixe pale and grene,
She fel a-swowe; and sith she gan to rise,
And unto Mars avoweth sacrifise
Withinne the temple, with a sorowful chere,
That shapen was as ye shal after here.

poem by Geoffrey Chaucer
Submitted by Poetry Lover
Vote! | Copy!

The Complaint unto Pity

Pite, that I have sought so yore agoo
With herte soore and ful of besy peyne,
That in this world was never wight so woo
Withoute deth-- and yf I shal not feyne,
My purpos was to Pite to compleyne
Upon the crueltee and tirannye
Of Love, that for my trouthe doth me dye.

And when that I, be lengthe of certeyne yeres,
Had evere in oon a tyme sought to speke,
To Pitee ran I al bespreynt with teres
To prayen hir on Cruelte me awreke.
But er I myghte with any word outbreke
Or tellen any of my peynes smerte,
I fond hir ded, and buried in an herte.

Adoun I fel when that I saugh the herse,
Ded as a ston while that the swogh me laste;
But up I roos with colour ful dyverse
And pitously on hir myn eyen I caste,
And ner the corps I gan to presen faste,
And for the soule I shop me for to preye.
I was but lorn, ther was no more to seye.

Thus am I slayn sith that Pite is ded.
Allas, that day, that ever hyt shulde falle.
What maner man dar now hold up his hed?
To whom shal any sorwful herte calle?
Now Cruelte hath cast to slee us alle,
In ydel hope, folk redeless of peyne,
Syth she is ded, to whom shul we compleyne?

But yet encreseth me this wonder newe,
That no wight woot that she is ded, but I--
So many men as in her tyme hir knewe--
And yet she dyed not so sodeynly,
For I have sought hir ever ful besely
Sith first I hadde wit or mannes mynde,
But she was ded er that I koude hir fynde.

Aboute hir herse there stoden lustely,
Withouten any woo as thoughte me,
Bounte parfyt, wel armed and richely,
And fresshe Beaute, Lust, and Jolyte,
Assured Maner, Youthe, and Honeste,
Wisdom, Estaat, Drede, and Governaunce,
Confedred both by honde and alliaunce.

A compleynt had I, writen in myn hond,
For to have put to Pite as a bille;
But when I al this companye ther fond,
That rather wolden al my cause spille
Then do me help, I held my pleynte stille,
For to that folk, withouten any fayle,
Withoute Pitee ther may no bille availe.

Then leve I al these vertues, sauf Pite,
Kepynge the corps as ye have herd me seyn,
Confedered alle by bond of Cruelte[Riv., p. 641]
And ben assented when I shal be sleyn.
And I have put my complaynt up ageyn,
For to my foes my bille I dar not shewe,
Th'effect of which seith thus, in wordes fewe:

(The Bill of Complaint)

Humblest of herte, highest of reverence,
Benygne flour, coroune of vertues alle,
Sheweth unto youre rial excellence
Youre servaunt, yf I durste me so calle,
Hys mortal harm in which he is yfalle,
And noght al oonly for his evel fare,
But for your renoun, as he shal declare.

Hit stondeth thus: your contraire, Crueltee,
Allyed is ayenst your regalye
Under colour of womanly Beaute--
For men shulde not, lo, knowe hir tirannye--
With Bounte, Gentilesse, and Curtesye,
And hath depryved yow now of your place
That hyghte 'Beaute apertenant to Grace.'

For kyndely by youre herytage ryght
Ye ben annexed ever unto Bounte;
And verrayly ye oughte do youre myght
To helpe Trouthe in his adversyte.
Ye be also the corowne of Beaute,
And certes yf ye wanten in these tweyne,
The world is lore; ther is no more to seyne.

Eke what availeth Maner and Gentilesse
Withoute yow, benygne creature?
Shal Cruelte be your governeresse?
Allas, what herte may hyt longe endure?
Wherfore, but ye the rather take cure
To breke that perilouse alliaunce,
Ye sleen hem that ben in your obeisaunce.

And further over yf ye suffre this,
Youre renoun ys fordoo than in a throwe;
Ther shal no man wite well what Pite is.
Allas, that your renoun is falle so lowe!
Ye be than fro youre heritage ythrowe
By Cruelte that occupieth youre place,
And we despeyred that seken to your grace.

Have mercy on me, thow Herenus quene,
That yow have sought so tendirly and yore;
Let som strem of youre lyght on me be sene
That love and drede yow ever lenger the more;
For sothly for to seyne I bere the soore,
And though I be not konnynge for to pleyne,
For Goddis love have mercy on my peyne.

My peyne is this, that what so I desire
That have I not, ne nothing lyk therto;
And ever setteth Desir myn hert on fire.
Eke on that other syde where so I goo,
What maner thing that may encrese my woo,
That have I redy, unsoght, everywhere;
Me lakketh but my deth and than my here.

What nedeth to shewe parcel of my peyne?
Syth every woo that herte may bethynke
I suffre and yet I dar not to yow pleyne;
For wel I wot although I wake or wynke,
Ye rekke not whether I flete or synke.
But natheles yet my trouthe I shal sustene
Unto my deth, and that shal wel be sene.

This is to seyne I wol be youres evere,
Though ye me slee by Crueltee your foo,
Algate my spirit shal never dissevere
Fro youre servise for any peyne or woo.
Sith ye be ded-- allas that hyt is soo--
Thus for your deth I may wel wepe and pleyne
With herte sore and ful of besy peyne.

poem by Geoffrey Chaucer
Submitted by Poetry Lover
Vote! | Copy!

A Rondel of Merciless Beauty - The Original

I. 1.
Youre two eyn will sle me sodenly
I may the beaute of them not sustene,
So wendeth it thorowout my herte kene.

2.
And but your words will helen hastely
My hertis wound, while that it is grene,
Youre two eyn will sle me sodenly.

3.
Upon my trouth I sey yow feithfully,
That ye ben of my liffe and deth the quene;
For with my deth the trouth shal be sene.
Youre two eyn will sle me sodenly
I may the beaute of them not sustene,
So wendeth it thorowout my herte kene.

II. 1.
So hath youre beauty fro your herte chased
Pitee, that me n'availeth not to pleyn:
For daunger halt your mercy in his cheyne.

2.
Giltless my deth thus have ye purchased;
I sey yow soth, me nedeth not to fayn:
So hath your beaute fro your herte chased.

3.
Alas, that nature hath in yow compassed
So grete beaute, that no man may atteyn
To mercy, though he sterve for the peyn.
Youre two eyn will sle me sodenly
I may the beaute of them not sustene,
So wendeth it thorowout my herte kene.

III. 1.
Syn I fro love escaped am so fat,
I nere thinke to ben in his prison lene;
Syn I am fre, I counte hym not a bene.

2.
He may answere and sey this and that,
I do no fors, I speak ryght as I mene;
Syn I fro love escaped am so fat.

3.
Love hath my name i-strike out of his sclat,
And he is strike out of my bokes clene:
For ever mo 'ther' is non other mene,
Syn I fro love escaped am so fat.

poem by Geoffrey Chaucer
Submitted by Poetry Lover
Vote! | Copy!

Merciles Beaute

1. CAPTIVITY

YOUR eyen two wol slee me sodenly,
I may the beaute of hem not sustene,
So woundeth hit through-out my herte kene.

And but your word wol helen hastily
My hertes wounde, whyl that hit is grene,
   Your eyen two wol slee me sodenly,
   I may the beaute of hem not sustene.

Upon my trouthe I sey yow feithfully,
That ye ben of my lyf and deeth the quene;
For with my deeth the trouthe shal be sene.
   Your eyen two wol slee me sodenly,
   I may the beaute of hem not sustene,
   So woundeth hit through-out my herte kene.

2. REJECTION

So hath your beaute fro your herte chaced
Pitee, that me ne availeth not to pleyne;
For Daunger halt your mercy in his cheyne.

Giltles my deeth thus han ye me purchaced;
I sey yow sooth, me nedeth not to feyne;
   So hath your beaute fro your herte chaced
   Pitee, that me ne availeth not to pleyne.

Allas! that nature hath in yow compassed
So greet beaute, that no man may atteyne
To mercy, though he sterve for the peyne.
   So hath your beaute fro your herte chaced
   Pitee, that me ne availeth not to pleyne;
   For Daunger halt your mercy in his cheyne.

3. ESCAPE

Sin I fro Love escaped am so fat,
I never thenk to ben in his prison lene;
Sin I am free, I counte him not a bene.

He may answere, and seye this or that;
I do no fors, I speke right as I mene.
   Sin I fro Love escaped am so fat,
   I never thenk to ben in his prison lene.

Love hath my name y-strike out of his sclat,
And he is strike out of my bokes clene
For ever-mo; ther is non other mene.
   Sin I fro Love escaped am so fat,
   I never thenk to ben in his prison lene;
   Sin I am free, I counte him not a bene.

poem by Geoffrey Chaucer
Submitted by Poetry Lover
Vote! | Copy!

On The Death Of K. Edward The First

Alle, that beoth of huerte trewe,
A stounde herkneth to my song
Of duel, that Deth hath diht us newe,
That maketh me syke, ant sorewe among;
Of a knyght, that wes so strong,
Of wham God hath don ys wille;
Me-thuncheth that deth hath don us wrong,
That he so sone shall ligge stille.

Al Englond ahte for te knowe
Of wham that song is, that y synge;
Of Edward Kyng, that lith so lowe,
Zent al this world is nome con springe:
Trewest mon of all thinge,
Ant in werre war ant wys,
For him we ahte oure honden wrynge,
Of Christendome he ber the prys.

Byfore that oure kyng was ded,
He spek ase mon that wes in care,
'Clerkes, knyhtes, barons,' he sayde,
'Y charge ou by oure sware,
That ye to Engelonde be trewe.
Y deze, y ne may lyven na more;
Helpeth mi sone, ant crouneth him newe,
For he is nest to buen y-core.

'Ich biqueth myn herte arhyt,
That hit be write at my devys,
Over the sea that Hue be diht,
With fourscore knyhtes al of prys,
In werre that buen war ant wys,
Azein the hethene for te fyhte,
To wynne the croiz that lowe lys,
Myself ycholde zef that y myhte.'

King of Fraunce, thou hevedest 'sinne',
That thou the counsail woldest fonde,
To latte the wille of 'Edward Kyng'
To wende to the Holy Londe:
That oure kynge hede take on honde
All Engelond to zeme ant wysse,
To wenden in to the Holy Londe
To wynnen us heveriche blisse.

The messager to the Pope com,
And seyde that our kynge was ded:
Ys oune hond the lettre he nom,
Ywis his herte was full gret:
The Pope him self the lettre redde,
Ant spec a word of gret honour.
'Alas!' he seid, 'is Edward ded?
Of Christendome he ber the flour.'

The Pope to his chaumbre wende,
For dol ne mihte he speke na more;
Ant after cardinals he sende,
That muche couthen of Cristes lore,
Bothe the lass, ant eke the more,
Bed hem both rede ant synge:
Gret deol me myhte se thore,
Mony mon is honde wrynge.

The Pope of Peyters stod at is masse
With ful gret solempnete,
Ther me con the soule blesse:
'Kyng Edward honoured thou be:
God love thi sone come after the,
Bringe to ende that thou hast bygonne,
The holy crois y-mad of tree,
So fain thou woldest hit hav y-wonne.

'Jerusalem, thou hast i-lore
The flour of al chivalrie
Now Kyng Edward liveth na more:
Alas! that he zet shulde deye!
He wolde ha rered up ful heyze
Oure banners, that bueth broht to grounde;
Wel! longe we mowe clepe and crie
Er we a such kyng han y-founde.'

Nou is Edward of Carnarvan
Kyng of Engelond al aplyht,
God lete him ner be worse man
Then his fader, ne lass of myht.
To holden is pore men to ryht,
And understonde good counsail,
Al Engelong for to wysse ant dyht;
Of gode knyhtes darh him nout fail.

Thah mi tonge were mad of stel,
Ant min herte yzote of bras,
The godness myht y never telle,
That with Kyng Edward was:
Kyng, as thou art cleped conquerour,
In uch bataille thou hadest prys;
God bringe thi soule to the honour
That ever wes, ant ever ys.

That lasteth ay withouten ende,
Bidde we God, ant oure Ledy to thilke blisse
Jesus we sende. Amen.

poem by Anonymous Olde English
Submitted by Poetry Lover
Vote! | Copy!

The Nut-Brown Maid. A Poem.

Written three hundred years since.

Be it right or wrong, these men among
On women do complayne;
Affyrmynge this, how that it is
A labour spent in vaine
To love them wele; for never a dele
They love a man againe:
For lete a man do what he can
Ther favour to attayne,
Yet yf a new do them pursue,
Ther furst trew lover than
Laboureth for nought; for from her thought
He is a banishyd man.
I say not nay, but that all day
It is bothe writ and sayde
That woman's fayth is as who saythe,
All utterly decayed.
But nevertheless right good witness
I' this case might be layde,
That they love trewe, and continew,
Record the Nut-brown Mayde;
Which from her love (whan her to prove
He came to make his mone)
Wold not depart, for in her herte
She lovyd but him alone.
Than betweene us lettens discusse,
What was all the maner
Between them two: we wyl also
Telle all the peyne and fere
That she was in. Now I begynne,
So that ye me answere.
Wherefore all ye that present be
I pray ye give an eare.

Man.
I am the knyght, I come by nyght
As secret as I can,
Saying, alas! thus standeth the case,
I am a banishyd man.

Woman.
And I your wylle, for to fulfylle
In this wyl not refuse,
Trusting to show, in wordis fewe,
That men have an ill use,
(To ther own shame) women to blame,
And causelese them accuse:
Therefore to you I answere now,
Alle women to excuse.
Myn own herte dere, with you what chere,
I pray you telle anone;
For in my mynde, of al mankynde,
I love but you alone.

Man.
It stondeth so; a dede is do,
Wherefore moche harm shall growe;
My desteny is for to-dey
A shameful deth I trowe;
Or ellis to flee: the one must be,
None other way I knowe,
But to withdrawe, as an outlawe,
And take me to my bowe.
Wherefore adew, my owne herte trewe,
None other red I can;
For I must to the grene wode goe,
Alone, a banishyd man.

Woman.
O Lord! what is this worldis blysse,
That chaungeth as the mone?
My somer's day, in lusty May,
Is derked before the none.
I here you saye farewell: nay, nay,
We departe not soo sone.
Why say ye so? wheder wyl ye goe?
Alas! what have ye done?
Alle my welfare to sorrow and care
Shulde chaung yf ye were gone;
For in my mynde, of al mankynde,
I love but you alone.

Man.
I can beleve it shall you greeve,
And shomwhat you distrayne,
But aftyrwarde your paynes harde,
Within a day or tweyne,
Shal sone aslake, and ye shal take
Comfort to you agayne.
Why shuld ye nought? for to make thought
Your labur were in vayne,
And thus I do, and pray you too,
As hertely as I can;
For I muste to the greene wode goe,
Alone, a banishyd man.

Woman.
Now sythe that ye have showed to me
The secret of your mynde,
I shal be plaine to you againe,
Lyke as ye shal me fynde.
Sythe it is so that ye wyl goe,
I wol not leve behynde:
Shal never be sayd the Nut-Brown Mayde
Was to her love unkynde.
Make you redy, for so am I,
Although it were agone;
For in my mynd, of all mankynde,
I love but you alone.

Man.
Yet I you rede to take good hede
What men wyl think and sey;
Of yonge and olde it shall be tolde
That ye be gone away;
Your wanton wylle for to fulfylle
In grene wode you to play;
And that ye myght from your delyte
Noo longer make delay.
Rather than ye shuld thus for me
Be called an ylle woman,
Yet wold I to the grene wode goe,
Alone, a banishyd man.

Woman.
Though it be songe of olde and yonge
That I shuld be to blame,
Thers be the charge that speke so large
In hurting of my name:
For I wyll prove that feythful love
It is devoyd of shame;
In your distress and hevyness
To parte wyth you the same.
And sure all thoo that doo not so
Trewe lovers are they none;
But in my mynde of al mankynde,
I love but you alone.

Man.
I counsel you, remember how
It is noo mayden's lawe
Nothing to dought, but to renne out
To wode with an outlawe:
For ye must there in your hand bere
O bowe redy to drawe;
And as a theef, thus must ye lyve,
Ever in drede and awe.
Whereby to you gret harme myght growe
Yet I had lever than
That I had to the grene wode goe,
Alone, a banishyd man.

Woman.
I think not nay; but as ye saye,
It is noo mayden's lore;
But love may make me for your sake,
To com on fote to hunte and shote,
To get us mete in store:
For so that I your company
May have, I ask noo more:
From whiche to parte, it makith myn herte
As colde as ony stone;
For in my mynde, of al mankynde,
I love but you alone.

Man.
For an outlawe, this is the lawe,
That men hym take and binde,
Wythout pytee, hanged to bee,
And waver with the wynde.
Yf I had neede, as God forbede,
What resons coude ye finde?
For sothe I trowe, ye and your bowe
Shuld drawe for fere behynde.
And noo merveyle; for lytel avayle
Were in your council than:
Wherefore I to the wode wyl goe,
Alone, a banishyd man.

Woman.
Full well knowe ye that women be
But febyl for to fyght:
Noo woman hede it is in deede
To be bold as a knyght:
Yet in suche fere yf that ye were
With enemys day and nyght,
I wolde withstonde wyth bowe in honde
To greve them as I myght;
And you to save as women have
From dethe many one;
For in my mynde, of al mankynde,
I love but you alone.

Man.
Yet take gude hede! for ever I drede
That ye coude not sustein
The thorney-weyes, the depe valeis,
The snowe, the frost, the reyn;
The cold, the hete: for drye, or wete,
We must lodge on the playn,
And us above noon other rofe,
But a brake, bush, or twaine,
Whiche sone shuld greve you, I beleve;
And ye wolde gladely than,
That I had to the grene wode goe,
Alone, a banishyd man.

Woman.
Sythe I have here been partynere
With you of joy and blysse,
I must also parte of your woo
Endure, as reson is:
Yet am I sure of one pleasure,
And, shortly, it is this,
That where ye bee, me seemeth, par-dy
I could not fare amyss.
Without more speche I you beseche
That we were soon a gone;
For in my mynde, of al mankynde,
I love but you alone.

Man.
Yf ye goo thedyr, ye must consyder,
Whan ye have lust to dyne,
Ther shal no mete be for to gete,
Nor drink, bere, ale, ne wine;
Ne shetis clean, to lye betwene,
Made of thred and twyne;
Noon other house but levys and bowes,
To kever your head and myn.
O myn herte swete, this ylle dyet
Shuld make you pale and wan;
Wherefore I to the wode wyl goe,
Alone, a banishyd man.

Woman.
Among the wylde dere, such an archier,
As men say that ye bee,
We may not fayle of good vitayle,
Where is so grete plente:
And watir cleere of the ryvere
Shal be full swete to me,
With whiche in hele, I shal right wele
Endure, as ye shal see.
And er we goe, a bed or two
I can provide anone;
For in my mynde, of al mankynde,
I love but you alone.

Man.
Loo! yet before, ye must do more
Yf ye wyl go with me;
As cute your here up by your ere,
Your curtel by the kneel:
Wyth bowe in honde, for to wythstonde
Your enemys yf nede be;
And this same nyght, before daylyght,
To wode-ward wyl I flee.
And yf ye wylle al this fulfylle,
Do it shortly as ye can;
Ellis wyl I to the grene wode goe,
Alone, a banishyd man.

Woman.
I shall as now do more for you
Than longeth to womanhede;
To short my here, a bow to bere,
To shote in tyme of nede.
O my sweet moder, before al other,
For you have I most drede;
But now adew, I must ensue
Where Fortune duth me lede.
All this make ye, and lete us flee,
The day run fast upon;
For in my mynde, of al mankynde,
I love but you alone.

Man.
Nay, nay, not so: ye shal not goe,
And I shal telle ye why;
Your appetyte is to be light
Of love I wele espie;
For right as ye have sayde to me
In lykewise hardely
Ye wolde answere, whosoever it were,
In way of company.
It is sayd of olde, Sone hote, sone colde,
And so is a woman;
Wherefore I to the wode wyl goe,
Alone, a banishyd man.

Woman.
Yf ye take hede yt is noo nede
Such wordis to say bee me;
For ofte ye prey'd, and longe assay'd,
Er I you lovid, par-dy;
And though that I of auncestry
A baron's daughter bee,
Yet have you proved how I you loved,
A squyer of low degree;
And ever shal, what so befalle,
To dey therefore anone:
For in my mynde, of al mankynde,
I love but you alone.

Man.
A baron's childe to be begyled,
It were a cursed dede:
To be felawe with an outlawe
Almighty God forbede!
Yt bettyr were the pore squyer
Alone to forrest spede,
Than ye shal saye another daye,
That by that wycked dede
Ye were betrayed. Wherefore good mayde,
The best rede that I can,
Is that I to the grene wode goe,
Alone, a banishyd man.

Woman.
Whatsoever befalle, I never shale
Of this thing you upbraid;
But yf ye go and leve me so,
Then have ye me betraid.
Remember ye wele how that ye dele;
For yf ye, as ye sayde,
Be so unkynde to leve behynde
Your love, the Nut-brown Mayde,
Trust me truely, that I shal dey
Some after ye be gone;
For in my mynde, of al mankynde,
I love but you alone.

Man.
Yf that ye went ye shulde repent;
For in the forrest now
I have purveid me of a mayde,
Whom I love more than you.
Another fayrer than e'er ye were,
I dare it well avowe;
And of you bothe eche shude be worthe
Wyth other, as I trowe,
It were myn ese to live in pese,
So wyl I yf I can;
Wherefore I to the wode wyl goe,
Alone, a banishyd man.

Woman.
Though in the wode I understode
Ye had a paramour,
All this may nought remove my thought,
But that I will be your:
And she shall fynde me soft and kynde,
And curteis every hour,
Glad to fulfylle all that she wylle
Commaunde me to my power.
For had ye loo an hundred moo,
Yet wolde I be that one;
For in my mynde, of al mankynde,
I love but you alone.

Man.
Myne own dere love, I see the prove,
That ye be kynde and trewe;
Of mayde and wyfe, in al my lyfe,
The best that ever I knewe.
Be merey and glad, be no more sad,
The case is chaunged newe;
For it were ruthe, that for your trouth,
Ye shulde have cause to rewe.
Be not dismay'd whatsoever I sayd
To you whan I began:
I wyl not to the grene wode goe,
I am no banishyd man.

Woman.
Theis tydingis be more glad to me
Than to be made a quene,
Yf I were sure they shulde endure;
But it is often seene,
When men wyle breke promyse, they speke
The wordis on the splene.
Ye shape some wyle, me to begyle,
And stele fro me, I wene.
Then were the case wurs than it was,
And I more woo begone;
For in my mynde, of al mankynde,
I love but you alone.

Man.
Ye shal not nede further to drede;
I wyl not disparage
You. God defend, syth you descend
Of so grete a lynage.
Now understonde, to Westmerlande,
Which is my herytage
I wyl you bringe, and with a rynge,
By way of maryage,
I wyl you take, and lady make,
As shortly as I can.
Thus have ye wone an erlie's sone,
And not a banishyd man.

poem by Matthew Prior
Submitted by Poetry Lover
Vote! | Copy!

An ABC

Incipit carmen secundum ordinem litterarum alphabeti.

Almighty and al merciable queene,
To whom that al this world fleeth for socour,
To have relees of sinne, of sorwe, and teene,
Glorious virgine, of alle floures flour,
To thee I flee, confounded in errour.
Help and releeve, thou mighti debonayre,
Have mercy on my perilous langour.
Venquisshed me hath my cruel adversaire.

Bountee so fix hath in thin herte his tente
That wel I wot thou wolt my socour bee;
Thou canst not warne him that with good entente
Axeth thin helpe, thin herte is ay so free.
Thou art largesse of pleyn felicitee,
Haven of refut, of quiete, and of reste.
Loo, how that theeves sevene chasen mee.
Help, lady bright, er that my ship tobreste.[Riv., p. 638]

Comfort is noon but in yow, ladi deere;
For loo, my sinne and my confusioun,
Which oughten not in thi presence appeere,
Han take on me a greevous accioun
Of verrey right and desperacioun;
And as hi right thei mighten wel susteene
That I were wurthi my dampnacioun,
Nere merci of you, blisful hevene queene.

Dowte is ther noon, thou queen of misericorde,
That thou n'art cause of grace and merci heere;
God vouched sauf thurgh thee with us to accorde.
For certes, Crystes blisful mooder deere,
Were now the bowe bent in swich maneere
As it was first of justice and of ire,
The rightful God nolde of no mercy heere;
But thurgh thee han we grace as we desire.

Evere hath myn hope of refut been in thee,
For heer-biforn ful ofte in many a wyse
Hast thou to misericorde receyved me.
But merci, ladi, at the grete assyse
Whan we shule come bifore the hye justyse.
So litel fruit shal thanne in me be founde
That, but thou er that day correcte [vice],
Of verrey right my werk wol me confounde.

Fleeinge, I flee for socour to thi tente
Me for to hide from tempeste ful of dreede,
Biseeching yow that ye you not absente
Thouh I be wikke. O, help yit at this neede!
Al have I ben a beste in wil and deede,
Yit, ladi, thou me clothe with thi grace.
Thin enemy and myn-- ladi, tak heede--
Unto my deth in poynt is me to chace!

Glorious mayde and mooder, which that nevere
Were bitter, neither in erthe nor in see,
But ful of swetnesse and of merci evere,
Help that my Fader be not wroth with me.
Spek thou, for I ne dar not him ysee,
So have I doon in erthe, allas the while,
That certes, but if thou my socour bee,
To stink eterne he wole my gost exile.

He vouched sauf, tel him, as was his wille,
Bicome a man, to have oure alliaunce,
And with his precious blood he wrot the bille
Upon the crois as general acquitaunce
To every penitent in ful creaunce;
And therfore, ladi bright, thou for us praye.
Thanne shalt thou bothe stinte al his grevaunce,
And make oure foo to failen of his praye.

I wot it wel, thou wolt ben oure socour,
Thou art so ful of bowntee, in certeyn,
For whan a soule falleth in errour
Thi pitee goth and haleth him ayein.
Thanne makest thou his pees with his sovereyn
And bringest him out of the crooked strete.
Whoso thee loveth, he shal not love in veyn,
That shal he fynde as he the lyf shal lete.

Kalenderes enlumyned ben thei
That in this world ben lighted with thi name,
And whoso goth to yow the righte wey,
Him thar not drede in soule to be lame.
Now, queen of comfort, sith thou art that same
To whom I seeche for my medicyne,
Lat not my foo no more my wounde entame;
Myn hele into thin hand al I resygne.

Ladi, thi sorwe kan I not portreye
Under the cros, ne his greevous penaunce;
But for youre bothes peynes I yow preye,
Lat not oure alder foo make his bobaunce
That he hath in his lystes of mischaunce
Convict that ye bothe have bought so deere.
As I seide erst, thou ground of oure substaunce,
Continue on us thi pitous eyen cleere!

Moises, that saugh the bush with flawmes rede
Brenninge, of which ther never a stikke brende,
Was signe of thin unwemmed maidenhede.[Riv., p. 639]
Thou art the bush on which ther gan descende
The Holi Gost, the which that Moyses wende
Had ben a-fyr, and this was in figure.
Now, ladi, from the fyr thou us defende
Which that in helle eternalli shal dure.

Noble princesse, that nevere haddest peere,
Certes if any comfort in us bee,
That cometh of thee, thou Cristes mooder deere.
We han noon oother melodye or glee
Us to rejoyse in oure adversitee,
Ne advocat noon that wole and dar so preye
For us, and that for litel hire as yee
That helpen for an Ave-Marie or tweye.

O verrey light of eyen that ben blynde,
O verrey lust of labour and distresse,
O tresoreere of bountee to mankynde,
Thee whom God ches to mooder for humblesse!
From his ancille he made the maistresse
Of hevene and erthe, oure bille up for to beede.
This world awaiteth evere on thi goodnesse
For thou ne failest nevere wight at neede.

Purpos I have sum time for to enquere
Wherfore and whi the Holi Gost thee soughte
Whan Gabrielles vois cam to thin ere.
He not to werre us swich a wonder wroughte,
But for to save us that he sithen boughte.
Thanne needeth us no wepen us for to save,
But oonly ther we dide not, as us oughte,
Doo penitence, and merci axe and have.

Queen of comfort, yit whan I me bithinke
That I agilt have bothe him and thee,
And that my soule is worthi for to sinke,
Allas, I caityf, whider may I flee?
Who shal unto thi Sone my mene bee?
Who, but thiself, that art of pitee welle?
Thou hast more reuthe on oure adversitee
Than in this world might any tonge telle.

Redresse me, mooder, and me chastise,
For certeynly my Faderes chastisinge,
That dar I nouht abiden in no wise,
So hidous is his rightful rekenynge.
Mooder, of whom oure merci gan to springe,
Beth ye my juge and eek my soules leche;
For evere in you is pitee haboundinge
To ech that wole of pitee you biseeche.

Soth is that God ne granteth no pitee
Withoute thee; for God of his goodnesse
Foryiveth noon, but it like unto thee.
He hath thee maked vicaire and maistresse
Of al this world, and eek governouresse
Of hevene, and he represseth his justise
After thi wil; and therfore in witnesse
He hath thee corowned in so rial wise.

Temple devout, ther God hath his woninge,
Fro which these misbileeved deprived been,
To you my soule penitent I bringe.
Receyve me-- I can no ferther fleen.
With thornes venymous, O hevene queen,
For which the eerthe acursed was ful yore,
I am so wounded, as ye may wel seen,
That I am lost almost, it smert so sore.

Virgine, that art so noble of apparaile,
And ledest us into the hye tour
Of Paradys, thou me wisse and counsaile
How I may have thi grace and thi socour,
All have I ben in filthe and in errour.
Ladi, unto that court thou me ajourne
That cleped is thi bench, O freshe flour,
Ther as that merci evere shal sojourne.

Xristus, thi sone, that in this world alighte
Upon the cros to suffre his passioun,
And eek that Longius his herte pighte
And made his herte blood to renne adoun,
And al was this for my salvacioun;
And I to him am fals and eek unkynde,
And yit he wole not my dampnacioun--
This thanke I yow, socour of al mankynde!

Ysaac was figure of his deth, certeyn,
That so fer forth his fader wolde obeye
That him ne roughte nothing to be slayn;[Riv., p. 640]
Right soo thi Sone list as a lamb to deye.
Now, ladi ful of merci, I yow preye,
Sith he his merci mesured so large,
Be ye not skant, for alle we singe and seye
That ye ben from vengeaunce ay oure targe.

Zacharie yow clepeth the open welle
To wasshe sinful soule out of his gilt.
Therfore this lessoun oughte I wel to telle,
That, nere thi tender herte, we were spilt.
Now, ladi bryghte, sith thou canst and wilt
Ben to the seed of Adam merciable,
Bring us to that palais that is bilt
To penitentes that ben to merci able. Amen.

poem by Geoffrey Chaucer
Submitted by Poetry Lover
Vote! | Copy!

A Balade of Complaint

Compleyne ne koude, ne might myn herte never,
My peynes halve, ne what torment I have,
Though that I sholde in your presence ben ever,
Myn hertes lady, as wisly he me save
That Bountee made, and Beautee list to grave
In your persone, and bad hem bothe in-fere
Ever t'awayte, and ay be wher ye were.

As wisly he gye alle my joyes here
As I am youres, and to yow sad and trewe,
And ye, my lyf and cause of my gode chere,
And deeth also, whan ye my peynes newe,
My worldes joye, whom I wol serve and sewe,
Myn heven hool, and al my suffisaunce,
Whom for to serve is set al my plesaunce.

Beseching yow in my most humble wyse
T'accepte in worth this litel pore dyte,
And for my trouthe my servyce not despyse,
Myn observaunce eke have not in despyte,
Ne yit to longe to suffren in this plyte;
I yow beseche, myn hertes lady, here,
Sith I yow serve, and so wil yeer by yere.

poem by Geoffrey Chaucer
Submitted by Poetry Lover
Vote! | Copy!

The Canterbury Tales; The Phisiciens Tale

Heere folweth the Phisiciens tale.

Ther was, as telleth Titus Livius,
A knyght that called was Virginius,
Fulfild of honour and of worthynesse,
And strong of freendes, and of greet richesse.
This knyght a doghter hadde by his wyf,

No children hadde he mo in al his lyf.
Fair was this mayde in excellent beautee
Aboven every wight that man may see.
For Nature hath with sovereyn diligence
Yformed hir in so greet excellence,

As though she wolde seyn, 'Lo, I, Nature,
Thus kan I forme and peynte a creature
Whan that me list; who kan me countrefete?
Pigmalion noght, though he ay forge and bete,
Or grave, or peynte, for I dar wel seyn

Apelles, Zanzis sholde werche in veyn
Outher to grave or peynte, or forge, or bete,
If they presumed me to countrefete.
For He that is the former principal
Hath maked me his vicaire general

To forme and peynten erthely creaturis
Right as me list, and ech thyng in my cure is
Under the Moone, that may wane and waxe,
And for my werk right nothyng wol I axe.
My lord and I been ful of oon accord;

I made hir to the worship of my lord,
So do I alle myne othere creatures,
What colour that they han, or what figures.'
Thus semeth me that Nature wolde seye.
This mayde of age twelf yeer was and tweye,

Is which that Nature hadde swich delit.
For right as she kan peynte a lilie whit,
And reed a rose, right with swich peynture
She peynted hath this noble creature,
Er she were born, upon hir lymes fre,

Where as by right swiche colours sholde be.
And Phebus dyed hath hir treses grete,
Lyk to the stremes of his burned heete;
And if that excellent was hir beautee,
A thousand foold moore vertuous was she.

In hire ne lakked no condicioun
That is to preyse, as by discrecioun;
As wel in goost as body chast was she,
For which she floured in virginitee
With alle humylitee and abstinence,

With alle attemperaunce and pacience,
With mesure eek of beryng and array.
Discreet she was in answeryng alway,
Though she were wise Pallas, dar I seyn,
Hir facound eek ful wommanly and pleyn,

No countrefeted termes hadde she
To seme wys, but after hir degree
She spak, and alle hir wordes, moore and lesse,
Sownynge in vertu and in gentillesse.
Shamefast she was in maydens shamefastnesse,

Constant in herte, and evere in bisynesse
To dryve hir out of ydel slogardye.
Bacus hadde of hire mouth right no maistrie;
For wyn and youthe dooth Venus encresse,
As man in fyr wol casten oille or greesse.

And of hir owene vertu unconstreyned,
She hath ful ofte tyme syk hir feyned,
For that she wolde fleen the compaignye
Wher likly was to treten of folye,
As is at feestes, revels, and at daunces

That been occasions of daliaunces.
Swich thynges maken children for to be
To soone rype and boold, as men may se,
Which is ful perilous, and hath been yoore;
For al to soone may they lerne loore

Of booldnesse, whan she woxen is a wyf.
And ye maistresses, in youre olde lyf,
That lordes doghtres han in governaunce,
Ne taketh of my wordes no displesaunce;
Thenketh that ye been set in governynges

Of lordes doghtres, oonly for two thynges;
Outher for ye han kept youre honestee,
Or elles ye han falle in freletee,
And knowen wel ynough the olde daunce,
And han forsaken fully swich meschaunce

For everemo; therfore for Cristes sake,
To teche hem vertu looke that ye ne slake.
A theef of venysoun, that hath forlaft
His likerousnesse, and al his olde craft,
Kan kepe a forest best of any man.

Now kepeth wel, for if ye wole, ye kan.
Looke wel that ye unto no vice assente,
Lest ye be dampned for your wikke entente.
For who so dooth, a traitour is, certeyn;
And taketh kepe of that that I shal seyn,

Of alle tresons, sovereyn pestilence
Is whan a wight bitrayseth innocence.
Ye fadres and ye moodres, eek also,
Though ye han children, be it oon or two,
Youre is the charge of al hir surveiaunce

Whil that they been under youre governaunce.
Beth war, if by ensample of youre lyvynge,
Or by youre necligence in chastisynge,
That they perisse, for I dar wel seye,
If that they doon ye shul it deere abeye;

Under a shepherde softe and necligent
The wolf hath many a sheep and lamb to-rent.
Suffyseth oon ensample now as here,
For I moot turne agayn to my mateere.
This mayde, of which I wol this tale expresse,

So kepte hirself, hir neded no maistresse.
For in hir lyvyng maydens myghten rede,
As in a book, every good word or dede
That longeth to a mayden vertuous,
She was so prudent and so bountevous.

For which the fame out-sprong on every syde
Bothe of hir beautee and hir bountee wyde,
That thurgh that land they preised hire echone
That loved vertu; save encye allone,
That sory is of oother mennes wele,

And glad is of his sorwe and his unheele-
The doctour maketh this descripcioun.
This mayde upon a day wente in the toun
Toward a temple, with hir mooder deere,
As is of yonge maydens the namere.

Now was ther thanne a justice in that toun,
That governour was of that regioun,

And so bifel this juge hise eyen caste
Upon this mayde, avysynge hym ful faste
As she cam forby, ther as this juge stood.

Anon his herte chaunged and his mood,
So was he caught with beautee of this mayde,
And to hymself ful pryvely he sayde,
'This mayde shal be myn, for any man.'
Anon the feend into his herte ran,

And taughte hym sodeynly, that he by slyghte
The mayden to his purpos wynne myghte.
For certes, by no force, ne by no meede,
Hym thoughte he was nat able for to speede;
For she was strong of freends, and eek she

Confermed was in swich soverayn bountee,
That wel he wiste he myghte hir nevere wynne,
As for to maken hir with hir body synne.
For which, by greet deliberacioun,
He sente after a cherl, was in the toun,

Which that he knew for subtil and for boold.
This Juge unto this cherl his tale hath toold
In secree wise, and made hym to ensure
He sholde telle it to no creature,
And if he dide, he sholde lese his heed.

Whan that assented was this cursed reed,
Glad was this juge, and maked him greet cheere,
And yaf hym yiftes preciouse and deere.
Whan shapen was al hir conspiracie
Fro point to point, how that his lecherie

Parfourned sholde been ful subtilly,
(As ye shul heere it after openly)
Hoom gooth the cherl, that highte Claudius.
This false juge, that highte Apius,
So was his name-for this is no fable,

But knowen for historial thyng notable;
The sentence of it sooth is out of doute-
This false juge gooth now faste aboute
To hasten his delit al that he may.
And so bifel soone after on a day,

This false juge, as telleth us the storie,
As he was wont, sat in his consistorie,
And yaf his doomes upon sondry cas.
This false cherl cam forth a ful greet pas
And seyde, 'Lord, if that it be youre wille,

As dooth me right upon this pitous bille
In which I pleyne upon Virginius;
And if that he wol seyn it is nat thus,
I wol it preeve, and fynde good witnesse
That sooth is, that my bille wol expresse.'

The juge answerde, 'Of this in his absence,
I may nat yeve diffynytyve sentence.
Lat do hym calle, and I wol gladly heere.
Thou shalt have al right and no wrong heere.'
Virginius cam to wite the juges wille,

And right anon was rad this cursed bille.
The sentence of it was, as ye shul heere:
'To yow, my lord, Sire Apius so deere,
Sheweth youre povre servant Claudius,
How that a knyght called Virginius

Agayns the lawe, agayn al equitee,
Holdeth expres agayn the wyl of me
My servant, which that is my thral by right,
Which fro myn hous was stole upon a nyght,
Whil that she was ful yong; this wol I preeve

By witnesse, lord, so that it nat yow greeve.
She nys his doghter, nat what so he seye.
Wherfore to yow, my lord the Juge, I preye
Yeld me my thral, if that it be youre wille.'
Lo, this was al the sentence of his bille.

Virginius gan upon the cherl biholde,
But hastily, er he his tale tolde,
And wolde have preeved it as sholde a knyght,
And eek by witnessyng of many a wight,
That it was fals, that seyde his adversarie,

This cursed juge wolde no thyng tarie,
Ne heere a word moore of Virginius,
But yaf his juggement and seyde thus:
'I deeme anon this cherl his servant have,
Thou shalt no lenger in thyn hous hir save.

Go, bryng hir forth, and put hir in our warde.
The cherl shal have his thral, this I awarde.'
And whan this worthy knyght Virginius,
Thurgh sentence of this justice Apius,
Moste by force his deere doghter yeven

Unto the juge in lecherie to lyven,
He gooth hym hoom, and sette him in his halle,
And leet anon his deere doghter calle,
And with a face deed as asshen colde,
Upon hir humble face he gan biholde

With fadres pitee stikynge thurgh his herte,
Al wolde he from his purpos nat converte.
'Doghter,' quod he, 'Virginia, by thy name,
Ther been two weyes, outher deeth or shame
That thou most suffre, allas, that I was bore!

For nevere thou deservedest wherfore
To dyen with a swerd, or with a knyf.
O deere doghter, ender of my lyf,
Which I have fostred up with swich plesaunce,
That thou were nevere out of my remembraunce.

O doghter, which that art my laste wo,
And in my lyf my laste joye also,
O gemme of chastitee, in pacience
Take thou thy deeth, for this is my sentence,
For love and nat for hate, thou most be deed;

My pitous hand moot smyten of thyn heed.
Allas, that evere Apius the say!
Thus hath he falsly jugged the to day.'
And tolde hir al the cas, as ye bifore
Han herd, nat nedeth for to telle it moore.

'O mercy, deere fader,' quod this mayde,
And with that word she bothe hir armes layde
About his nekke, as she was wont to do.
The teeris bruste out of hir eyen two,
And seyde, 'Goode fader, shal I dye?

Is ther no grace? is ther no remedye?'
'No certes, deere doghter myn,' quod he.
'Thanne yif me leyser, fader myn,' quod she,
'My deeth for to compleyne a litel space,
For, pardee, Jepte yaf his doghter grace

For to compleyne, er he hir slow, allas!
And God it woot, no thyng was hir trespas
But for she ran hir fader for to see
To welcome hym with greet solempnitee.'
And with that word she fil aswowne anon;

And after whan hir swownyng is agon
She riseth up and to hir fader sayde,
'Blissed be God that I shal dye a mayde;
Yif me my deeth, er that I have a shame.
Dooth with youre child youre wyl, a Goddes name.'

And with that word she preyed hym ful ofte
That with his swerd he wolde smyte softe,
And with that word aswowne doun she fil.
Hir fader with ful sorweful herte and wil
Hir heed of smoot, and by the top it hente,

And to the juge he gan it to presente
As he sat yet in doom, in consistorie.
And whan the juge it saugh, as seith the storie,
He bad to take hym and anhange hym faste.
But right anon a thousand peple in thraste

To save the knyght for routhe and for pitee;
For knowen was the false iniquitee.
The peple anon hath suspect of this thyng,
By manere of the cherles chalangyng,
That it was by the assent of Apius-

They wisten wel that he was lecherus;
For which unto this Apius they gon
And caste hym in a prisoun right anon,
Ther as he slow hymself, and Claudius
That servant was unto this Apius,

Was demed for to hange upon a tree,
But that Virginius, of his pitee,
So preyde for hym, that he was exiled;
And elles, certes, he had been bigyled.
The remenant were anhanged, moore and lesse,

That were consentant of this cursednesse.
Heere men may seen, how synne hath his merite.
Beth war, for no man woot whom God wol smyte
In no degree, ne in which manere wyse
The worm of conscience may agryse

Of wikked lyf, though it so pryvee be
That no man woot therof but God and he.
For be he lewed man, or ellis lered,
He noot how soone that he shal been afered.
Therfore I rede yow this conseil take,
Forsaketh synne, er synne yow forsake.

Heere endeth the Phisiciens tale.

poem by Geoffrey Chaucer
Submitted by Poetry Lover
Vote! | Copy!

The Parliament Of Fowles

Here begynyth the Parlement of Foulys

THE PROEM

The lyf so short, the craft so long to lerne,
Thassay so hard, so sharp the conquering,
The dredful Ioy, that alwey slit so yerne,
Al this mene I by love, that my feling
Astonyeth with his wonderful worching
So sore y-wis, that whan I on him thinke,
Nat wot I wel wher that I wake or winke.

For al be that I knowe nat love in dede,
Ne wot how that he quyteth folk hir hyre,
Yet happeth me ful ofte in bokes rede
Of his miracles, and his cruel yre;
Ther rede I wel he wol be lord and syre,
I dar not seyn, his strokes been so sore,
But God save swich a lord! I can no more.

Of usage, what for luste what for lore,
On bokes rede I ofte, as I yow tolde.
But wherfor that I speke al this? not yore
Agon, hit happed me for to beholde
Upon a boke, was write with lettres olde;
And ther-upon, a certeyn thing to lerne,
The longe day ful faste I radde and yerne.

For out of olde feldes, as men seith,
Cometh al this newe corn fro yeer to yere;
And out of olde bokes, in good feith,
Cometh al this newe science that men lere.
But now to purpos as of this matere --
To rede forth hit gan me so delyte,
That al the day me thoughte but a lyte.

This book of which I make of mencioun,
Entitled was al thus, as I shal telle,
`Tullius of the dreme of Scipioun.';
Chapitres seven hit hadde, of hevene and helle,
And erthe, and soules that therinnr dwelle,
Of whiche, as shortly as I can hit trete,
Of his sentence I wol you seyn the grete.

First telleth hit, whan Scipion was come
In Afrik, how he mette Massinisse,
That him for Ioye in armes hath y nome.
Than telleth hit hir speche and al the blisse
That was betwix hem, til the day gan misse;
And how his auncestre, African so dere,
Gan in his slepe that night to him appere.

Than telleth hit that, fro a sterry place,
How African hath him Cartage shewed,
And warned him before of al his grace,
And seyde him, what man, lered other lewed,
That loveth comun profit, wel y-thewed,
He shal unto a blisful place wende,
Ther as Ioye is that last withouten ende.

Than asked he, if folk that heer be dede
Have lyf and dwelling in another place;
And African seyde, `ye, withoute drede,'
And that our present worldes lyves space
Nis but a maner deth, what wey we trace,
And rightful folk shal go, after they dye,
To heven; and shewed him the galaxye.

Than shewed he him the litel erthe, that heer is,
At regard of the hevenes quantite;
And after shewed he him the nyne speres,
And after that the melodye herde he
That cometh of thilke speres thryes three,
That welle is of musyk and melodye
In this world heer, and cause of armonye.

Than bad he him, sin erthe was so lyte,
And ful of torment and of harde grace,
That he ne shulde him in the world delyte.
Than tolde he him, in certeyn yeres space,
That every sterre shulde come into his place
Ther hit was first; and al shulde out of minde
That in this worlde is don of al mankinde.

Than prayde him Scipioun to telle him al
The wey to come un-to that hevene blisse;
And he seyde, `know thy-self first immortal,
And loke ay besily thou werke and wisse
To comun profit, and thou shalt nat misse
To comen swiftly to that place dere,
That ful of blisse is and of soules clere.

But brekers of the lawe, soth to seyne,
And lecherous folk, after that they be dede,
Shul alwey whirle aboute therthe in peyne,
Til many a world be passed, out of drede,
And than, for-yeven alle hir wikked dede,
Than shul they come unto that blisful place,
To which to comen god thee sende his grace!' --

The day gan failen, and the derke night,
That reveth bestes from her besinesse,
Berafte me my book for lakke of light,
And to my bedde I gan me for to dresse,
Fulfild of thought and besy hevinesse;
For bothe I hadde thing which that I nolde,
And eek I ne hadde that thing that I wolde.

But fynally my spirit, at the laste,
For-wery of my labour al the day,
Took rest, that made me to slepe faste,
And in my slepe I mette, as I lay,
How African, right in the selfe aray
That Scipioun him saw before that tyde,
Was comen and stood right at my bedes syde.

The wery hunter, slepinge in his bed,
To wode ayein his minde goth anoon;
The Iuge dremeth how his plees ben sped;
The carter dremeth how his cartes goon;
The riche, of gold; the knight fight with his foon;
The seke met he drinketh of the tonne;
The lover met he hath his lady wonne.

Can I nat seyn if that the cause were
For I had red of African beforn,
That made me to mete that he stood there;
But thus seyde he, `thou hast thee so wel born
In loking of myn olde book to-torn,
Of which Macrobie roghte nat a lyte,
That somdel of thy labour wolde I quyte!' --

Citherea! thou blisful lady swete,
That with thy fyr-brand dauntest whom thee lest,
And madest me this sweven for to mete,
Be thou my help in this, for thou mayst best;
As wisly as I saw thee north-north-west,
When I began my sweven for to wryte,
So yif me might to ryme and endyte!

THE STORY

This forseid African me hente anoon,
And forth with him unto a gate broghte
Right of a parke, walled of grene stoon;
And over the gate, with lettres large y-wroghte,
Ther weren vers y-writen, as me thoghte,
On eyther halfe, of ful gret difference,
Of which I shal yow sey the pleyn sentence.

`Thorgh me men goon in-to that blisful place
Of hertes hele and dedly woundes cure;
Thorgh me men goon unto the welle of Grace,
Ther grene and lusty May shal ever endure;
This is the wey to al good aventure;
Be glad, thou reder, and thy sorwe of-caste,
Al open am I; passe in, and hy the faste!'

`Thorgh me men goon,' than spak that other syde,
`Unto the mortal strokes of the spere,
Of which Disdayn and Daunger is the gyde,
Ther tre shal never fruyt ne leves bere.
This streem yow ledeth to the sorwful were,
Ther as the fish in prison is al drye;
Theschewing is only the remedye.'

Thise vers of gold and blak y-writen were,
Of whiche I gan a stounde to beholde,
For with that oon encresed ay my fere,
And with that other gan myn herte bolde;
That oon me hette, that other did me colde,
No wit had I, for errour, for to chese
To entre or flee, or me to save or lese.

Right as, betwixen adamauntes two
Of even might, a pece of iren y-set,
That hath no might to meve to ne fro --
For what that on may hale, that other let --
Ferde I; that niste whether me was bet,
To entre or leve, til African my gyde
Me hente, and shoof in at the gates wyde,

And seyde,`hit stondeth writen in thy face,
Thyn errour, though thou telle it not to me;
But dred the nat to come in-to this place,
For this wryting is no-thing ment by thee,
Ne by noon, but he Loves servant be;
For thou of love hast lost thy tast, I gesse,
As seek man hath of swete and bitternesse.

But natheles, al-though that thou be dulle,
Yit that thou canst not do, yit mayst thou see;
For many a man that may not stonde a pulle,
Yit lyketh him at the wrastling for to be,
And demeth yit wher he do bet or he;
And if thou haddest cunning for tendyte,
I shal thee shewen mater of to wryte.'

With that my hond in his he took anoon,
Of which I comfort caughte, and went in faste;
But, lord! so I was glad and wel begoon!
For over-al, wher that I myn eyen caste,
Were trees clad with leves that ay shal laste,
Eche in his kinde, of colour fresh and grene
As emeraude, that Ioye was to sene.

The bilder ook, and eek the hardy asshe;
The piler elm, the cofre unto careyne;
The boxtree piper; holm to whippes lasshe;
The sayling firr; the cipres, deth to pleyne;
The sheter ew, the asp for shaftes pleyne;
The olyve of pees, and eek the drunken vyne,
The victor palm, the laurer to devyne.

A gardyn saw I, ful of blosmy bowes,
Upon a river, in a grene mede,
Ther as swetnesse evermore y-now is,
With floures whyte, blewe, yelowe, and rede;
And colde welle-stremes, no-thing dede,
That swommen ful of smale fisshes lighte,
With finnes rede and scales silver-brighte.

On every bough the briddes herde I singe,
With voys of aungel in hir armonye,
Som besyed hem hir briddes forth to bringe;
The litel conyes to hir pley gunne hye.
And further al aboute I gan espye
The dredful roo, the buk, the hert and hinde,
Squerels, and bestes smale of gentil kinde.

Of instruments of strenges in acord
Herde I so pleye a ravisshing swetnesse,
That god, that maker is of al and lord,
Ne herde never better, as I gesse;
Therwith a wind, unnethe hit might be lesse,
Made in the leves grene a noise softe
Acordaunt to the foules songe on-lofte.

The air of that place so attempre was
That never was grevaunce of hoot ne cold;
Ther wex eek every holsum spyce and gras,
Ne no man may ther wexe seek ne old;
Yet was ther Ioye more a thousand fold
Then man can telle; ne never wolde it nighte,
But ay cleer day to any mannes sighte.

Under a tree, besyde a welle, I say
Cupyde our lord his arwes forge and fyle;
And at his fete his bowe al redy lay,
And wel his doghter tempred al this whyle
The hedes in the welle, and with hir wyle
She couched hem after as they shulde serve,
Some for to slee, and some to wounde and kerve.

Tho was I war of Plesaunce anon-right,
And of Aray, and Lust, and Curtesye,
And of the Craft that can and hath the might
To doon by force a wight to do folye --
Disfigurat was she, I nil not lye;
And by him-self, under an oke, I gesse,
Saw I Delyt, that stood with Gentilnesse.

I saw Beautee, withouten any atyr,
And Youthe, ful of game and Iolyte,
Fool-hardinesse, Flatery, and Desyr,
Messagerye, and Mede, and other three --
Hir names shul noght here be told for me --
And upon pilers grete of Iasper longe
I saw a temple of bras y-founded stronge.

Aboute the temple daunceden alway
Wommen y-nowe, of whiche some ther were
Faire of hem-self, and somme of hem were gay;
In kirtels, al disshevele, wente they there --
That was hir office alway, yeer by yere --
And on the temple, of doves whyte and faire
Saw I sittinge many a hunderede paire.

Before the temple-dore ful soberly
Dame Pees sat, with a curteyn in hir hond:
And hir besyde, wonder discretly,
Dame Pacience sitting ther I fond
With face pale, upon an hille of sond;
And alder-next, within and eek with-oute,
Behest and Art, and of hir folke a route.

Within the temple, of syghes hote as fyr
I herde a swogh that gan aboute renne;
Which syghes were engendred with desyr,
That maden every auter for to brenne
Of newe flaume; and wel aspyed I thenne
That al the cause of sorwes that they drye
Com of the bitter goddesse Ialousye.

The god Priapus saw I, as I wente,
Within the temple, in soverayn place stonde,
In swich aray as whan the asse him shente
With crye by night, and with ceptre in honde;
Ful besily men gunne assaye and fonde
Upon his hede to sette, of sondry hewe,
Garlondes ful of fresshe floures newe.

And in a privee corner, in disporte,
Fond I Venus and hir porter Richesse,
That was ful noble and hauteyn of hir porte;
Derk was that place, but afterward lightnesse
I saw a lyte, unnethe hit might be lesse,
And on a bed of golde she lay to reste,
Til that the hote sonne gan to weste.

Hir gilte heres with a golden threde
Y-bounden were, untressed as she lay,
And naked fro the breste unto the hede
Men might hir see; and, sothly for to say,
The remenant wel kevered to my pay
Right with a subtil kerchef of Valence,
Ther was no thikker cloth of no defence.

The place yaf a thousand savours swote,
And Bachus, god of wyn, sat hir besyde,
And Ceres next, that doth of hunger bote;
And, as I seide, amiddes lay Cipryde,
To whom on knees two yonge folkes cryde
To ben hir help; but thus I leet hir lye,
And ferther in the temple I gan espye

That, in dispyte of Diane the chaste,
Ful many a bowe y-broke heng on the wal
Of maydens, suche as gunne hir tymes waste
In hir servyse; and peynted over al
Of many a story, of which I touche shal
A fewe, as of Calixte and Athalaunte,
And many a mayde, of which the name I wante;

Semyramus, Candace, and Ercules,
Biblis, Dido, Thisbe, and Piramus,
Tristram, Isoude, Paris, and Achilles,
Eleyne, Cleopatre, and Troilus,
Silla, and eek the moder of Romulus --
Alle these were peynted on that other syde,
And al hir love, and in what plyte they dyde.

Whan I was come ayen unto the place
That I of spak, that was so swote and grene,
Forth welk I tho, my-selven to solace.
Tho was I war wher that ther sat a quene
That, as of light the somer-sonne shene
Passeth the sterre, right so over mesure
She fairer was than any creature.

And in a launde, upon an hille of floures,
Was set this noble goddesse Nature;
Of braunches were hir halles and hir boures,
Y-wrought after hir craft and hir mesure;
Ne ther nas foul that cometh of engendrure,
That they ne were prest in hir presence,
To take hir doom and yeve hir audience.

For this was on seynt Valentynes day,
Whan every foul cometh ther to chese his make,
Of every kinde, that men thenke may;
And that so huge a noyse gan they make,
That erthe and see, and tree, and every lake
So ful was, that unnethe was ther space
For me to stonde, so ful was al the place.

And right as Aleyn, in the Pleynt of Kinde,
Devyseth Nature of aray and face,
In swich aray men mighten hir ther finde.
This noble emperesse, ful of grace,
Bad every foul to take his owne place,
As they were wont alwey fro yeer to yere,
Seynt Valentynes day, to stonden there.

That is to sey, the foules of ravyne
Were hyest set; and than the foules smale,
That eten as hem nature wolde enclyne,
As worm or thing of whiche I telle no tale;
And water-foul sat loweste in the dale;
But foul that liveth by seed sat on the grene,
And that so fele, that wonder was to sene.

There mighte men the royal egle finde,
That with his sharpe look perceth the sonne;
And other egles of a lower kinde,
Of which that clerkes wel devysen conne.
Ther was the tyraunt with his fethres donne
And greye, I mene the goshauk, that doth pyne
To briddes for his outrageous ravyne.

The gentil faucoun, that with his feet distreyneth
The kinges hond; the hardy sperhauk eke,
The quayles foo; the merlion that payneth
Him-self ful ofte, the larke for to seke;
Ther was the douve, with hir eyen meke;
The Ialous swan, ayens his deth that singeth;
The oule eek, that of dethe the bode bringeth;

The crane the geaunt, with his trompes soune;
The theef, the chogh; and eek the Iangling pye;
The scorning Iay; the eles foo, heroune;
The false lapwing, ful of trecherye;
The stare, that the counseyl can bewrye;
The tame ruddok; and the coward kyte;
The cok, that orloge is of thorpes lyte;

The sparow, Venus sone; the nightingale,
That clepeth forth the fresshe leves newe;
The swalow, mordrer of the flyes smale
That maken hony of floures fresshe of hewe;
The wedded turtel, with hir herte trewe;
The pecok, with his aungels fethres brighte;
The fesaunt, scorner of the cok by nighte;

The waker goos; the cukkow ever unkinde;
The popiniay, ful of delicasye;
The drake, stroyer of his owne kinde;
The stork, the wreker of avouterye;
The hote cormeraunt of glotonye;
The raven wys, the crow with vois of care;
The throstel olde; the frosty feldefare.

What shulde I seyn? of foules every kinde
That in this world han fethres and stature,
Men mighten in that place assembled finde
Before the noble goddesse Nature,
And everich of hem did his besy cure
Benignely to chese or for to take,
By hir acord, his formel or his make.

But to the poynt -- Nature held on hir honde
A formel egle, of shap the gentileste
That ever she among hir werkes fonde,
The moste benigne and the goodlieste;
In hir was every vertu at his reste,
So ferforth, that Nature hir-self had blisse
To loke on hir, and ofte hir bek to kisse.

Nature, the vicaire of thalmighty lorde,
That hoot, cold, hevy, light, and moist and dreye
Hath knit by even noumbre of acorde,
In esy vois began to speke and seye,
`Foules, tak hede of my sentence, I preye,
And, for your ese, in furthering of your nede,
As faste as I may speke, I wol me spede.

Ye knowe wel how, seynt Valentynes day,
By my statut and through my governaunce,
Ye come for to chese -- and flee your way --
Your makes, as I prik yow with plesaunce.
But natheles, my rightful ordenaunce
May I not lete, for al this world to winne,
That he that most is worthy shal beginne.

The tercel egle, as that ye knowen wel,
The foul royal above yow in degree,
The wyse and worthy, secree, trewe as stel,
The which I formed have, as ye may see,
In every part as hit best lyketh me,
Hit nedeth noght his shap yow to devyse,
He shal first chese and speken in his gyse.

And after him, by order shul ye chese,
After your kinde, everich as yow lyketh,
And, as your hap is, shul ye winne or lese;
But which of yow that love most entryketh,
God sende him hir that sorest for him syketh.'
And therwith-al the tercel gan she calle,
And seyde, `my sone, the choys is to thee falle.

But natheles, in this condicioun
Mot be the choys of everich that is here,
That she agree to his eleccioun,
What-so he be that shulde be hir fere;
This is our usage alwey, fro yeer to yere;
And who so may at this time have his grace,
In blisful tyme he com in-to this place.'

With hed enclyned and with ful humble chere
This royal tercel spak and taried nought:
`Unto my sovereyn lady, and noght my fere,
I chese, and chese with wille and herte and thought,
The formel on your hond so wel y-wrought,
Whos I am al and ever wol hir serve,
Do what hir list, to do me live or sterve.

Beseching hir of mercy and of grace,
As she that is my lady sovereyne;
Or let me dye present in this place.
For certes, long may I not live in peyne;
For in myn herte is corven every veyne;
Having reward only to my trouthe,
My dere herte, have on my wo som routhe.

And if that I to hir be founde untrewe,
Disobeysaunt, or wilful negligent,
Avauntour, or in proces love a newe,
I pray to you this be my Iugement,
That with these foules I be al to-rent,
That ilke day that ever she me finde
To hir untrewe, or in my gilte unkinde.

And sin that noon loveth hir so wel as I,
Al be she never of love me behette,
Than oghte she be myn thourgh hir mercy,
For other bond can I noon on hir knette.
For never, for no wo, ne shal I lette
To serven hir, how fer so that she wende;
Sey what yow list, my tale is at an ende.'

Right as the fresshe, rede rose newe
Ayen the somer-sonne coloured is,
Right so for shame al wexen gan the hewe
Of this formel, whan she herde al this;
She neyther answerde `Wel', ne seyde amis,
So sore abasshed was she, til that Nature
Seyde, `doghter, drede yow noght, I yow assure.'

Another tercel egle spak anoon
Of lower kinde, and seyde, `that shal nat be;
I love hir bet than ye do, by seynt Iohn,
Or atte leste I love hir as wel as ye;
And lenger have served hir, in my degree,
And if she shulde have loved for long loving,
To me allone had been the guerdoninge.

I dar eek seye, if she me finde fals,
Unkinde, Iangler, or rebel in any wyse,
Or Ialous, do me hongen by the hals!
And but I bere me in hir servyse
As wel as that my wit can me suffyse,
From poynt to poynt, hir honour for to save,
Tak she my lyf, and al the good I have.'

The thridde tercel egle answerde tho,
`Now, sirs, ye seen the litel leyser here;
For every foul cryeth out to been a-go
Forth with his make, or with his lady dere;
And eek Nature hir-self ne wol nought here,
For tarying here, noght half that I wolde seye;
And but I speke, I mot for sorwe deye.

Of long servyse avaunte I me no-thing,
But as possible is me to dye to-day
For wo, as he that hath ben languisshing
Thise twenty winter, and wel happen may
A man may serven bet and more to pay
In half a yere, al-though hit were no more,
Than som man doth that hath served ful yore.

I ne sey not this by me, for I ne can
Do no servyse that may my lady plese;
But I dar seyn, I am hir trewest man
As to my dome, and feynest wolde hir ese;
At shorte wordes, til that deth me sese,
I wol ben hires, whether I wake or winke,
And trewe in al that herte may bethinke.'

Of al my lyf, sin that day I was born,
So gentil plee in love or other thing
Ne herde never no man me beforn,
Who-so that hadde leyser and cunning
For to reherse hir chere and hir speking;
And from the morwe gan this speche laste
Til dounward drow the sonne wonder faste.

The noyse of foules for to ben delivered
So loude rong, `have doon and let us wende!'
That wel wende I the wode had al to-shivered.
`Come of!' they cryde, `allas! ye wil us shende!
Whan shal your cursed pleding have an ende?
How shulde a Iuge eyther party leve,
For yee or nay, with-outen any preve?'

The goos, the cokkow, and the doke also
So cryden, `kek, kek!' `kukkow!' `quek, quek!' hye,
That thorgh myn eres the noyse wente tho.
The goos seyde, `al this nis not worth a flye!
But I can shape hereof a remedye,
And I wol sey my verdit faire and swythe
For water-foul, who-so be wrooth or blythe.'

`And I for worm-foul,' seyde the fool cukkow,
`For I wol, of myn owne auctorite,
For comune spede, take the charge now,
For to delivere us is gret charite.'
`Ye may abyde a whyle yet, parde!'
Seide the turtel, `if hit be your wille
A wight may speke, him were as good be stille.

I am a seed-foul, oon the unworthieste,
That wot I wel, and litel of kunninge;
But bet is that a wightes tonge reste
Than entermeten him of such doinge
Of which he neyther rede can nor singe.
And who-so doth, ful foule himself acloyeth,
For office uncommitted ofte anoyeth.'

Nature, which that alway had an ere
To murmour of the lewednes behinde,
With facound voys seide, `hold your tonges there!
And I shal sone, I hope, a counseyl finde
You to delivere, and fro this noyse unbinde;
I Iuge, of every folk men shal oon calle
To seyn the verdit for you foules alle.'

Assented were to this conclusioun
The briddes alle; and foules of ravyne
Han chosen first, by pleyn eleccioun,
The tercelet of the faucon, to diffyne
Al hir sentence, and as him list, termyne;
And to Nature him gonnen to presente,
And she accepteth him with glad entente.

The tercelet seide than in this manere:
`Ful hard were it to preve hit by resoun
Who loveth best this gentil formel here;
For everich hath swich replicacioun,
That noon by skilles may be broght a-doun;
I can not seen that argumentes avayle;
Than semeth hit ther moste be batayle.'

`Al redy!' quod these egles tercels tho.
`Nay, sirs!' quod he, `if that I dorste it seye,
Ye doon me wrong, my tale is not y-do!
For sirs, ne taketh noght a-gref, I preye,
It may noght gon, as ye wolde, in this weye;
Oure is the voys that han the charge in honde,
And to the Iuges dome ye moten stonde;

`And therfor, pees! I seye, as to my wit,
Me wolde thinke how that the worthieste
Of knighthode, and lengest hath used hit,
Moste of estat, of blode the gentileste,
Were sittingest for hir, if that hir leste;
And of these three she wot hir-self, I trowe,
Which that he be, for hit is light to knowe.'

The water-foules han her hedes leyd
Togeder, and of short avysement,
Whan everich had his large golee seyd,
They seyden sothly, al by oon assent,
How that `the goos, with hir facounde gent,
That so desyreth to pronounce our nede,
Shal telle our tale,' and preyde `god hir spede.'

And for these water-foules tho began
The goos to speke, and in hir cakelinge
She seyde, `pees! now tak kepe every man,
And herkeneth which a reson I shal bringe;
My wit is sharp, I love no taryinge;
I seye, I rede him, though he were my brother,
But she wol love him, lat him love another!'

`Lo here! a parfit reson of a goos!'
Quod the sperhauk; `never mot she thee!
Lo, swich hit is to have a tonge loos!
Now parde, fool, yet were hit bet for thee
Have holde thy pees, than shewed thy nycete!
Hit lyth not in his wit nor in his wille,
But sooth is seyd, 'a fool can noght be stille.''

The laughter aroos of gentil foules alle,
And right anoon the seed-foul chosen hadde
The turtel trewe, and gunne hir to hem calle,
And preyden hir to seye the sothe sadde
Of this matere, and asked what she radde;
And she answerde, that pleynly hir entente
She wolde shewe, and sothly what she mente.

`Nay, god forbede a lover shulde chaunge!'
The turtle seyde, and wex for shame al reed;
`Thogh that his lady ever-more be straunge,
Yet let him serve hir ever, til he be deed;
For sothe, I preyse noght the gooses reed;
For thogh she deyed, I wolde non other make,
I wol ben hires, til that the deth me take.'

`Wel bourded!' quod the doke, `by my hat!
That men shulde alwey loven, causeles,
Who can a reson finde or wit in that?
Daunceth he mury that is mirtheles?
Who shulde recche of that is reccheles?
Ye, quek!' yit quod the doke, ful wel and faire,
`There been mo sterres, god wot, than a paire!'

`Now fy, cherl!' quod the gentil tercelet,
`Out of the dunghil com that word ful right,
Thou canst noght see which thing is wel be-set:
Thou farest by love as oules doon by light,
The day hem blent, ful wel they see by night;
Thy kind is of so lowe a wrechednesse,
That what love is, thou canst nat see ne gesse.'

Tho gan the cukkow putte him forth in prees
For foul that eteth worm, and seide blyve,
`So I,' quod he, `may have my make in pees,
I recche not how longe that ye stryve;
Lat ech of hem be soleyn al hir lyve,
This is my reed, sin they may not acorde;
This shorte lesson nedeth noght recorde.'

`Ye! have the glotoun fild ynogh his paunche,
Than are we wel!' seyde the merlioun;
`Thou mordrer of the heysugge on the braunche
That broghte thee forth, thou rewthelees glotoun!
Live thou soleyn, wormes corrupcioun!
For no fors is of lakke of thy nature;
Go, lewed be thou, whyl the world may dure!'

`Now pees,' quod Nature, `I comaunde here;
For I have herd al your opinioun,
And in effect yet be we never the nere;
But fynally, this is my conclusioun,
That she hir-self shal han the eleccioun
Of whom hir list, who-so be wrooth or blythe,
Him that she cheest, he shal hir have as swythe.

For sith hit may not here discussed be
Who loveth hir best, as seide the tercelet,
Than wol I doon hir this favour, that she
Shal have right him on whom hir herte is set,
And he hir that his herte hath on hir knet.
Thus Iuge I, Nature, for I may not lye;
To noon estat I have non other ye.

But as for counseyl for to chese a make,
If hit were reson, certes, than wolde I
Counseyle yow the royal tercel take,
As seide the tercelet ful skilfully,
As for the gentilest and most worthy,
Which I have wroght so wel to my plesaunce;
That to yow oghte been a suffisaunce.'

With dredful vois the formel hir answerde,
`My rightful lady, goddesse of Nature,
Soth is that I am ever under your yerde,
Lyk as is everiche other creature,
And moot be youres whyl that my lyf may dure;
And therfor graunteth me my firste bone,
And myn entente I wol yow sey right sone.'

`I graunte it you,' quod she; and right anoon
This formel egle spak in this degree,
`Almighty quene, unto this yeer be doon
I aske respit for to avysen me.
And after that to have my choys al free;
This al and sum, that I wolde speke and seye;
Ye gete no more, al-though ye do me deye.

I wol noght serven Venus ne Cupyde
For sothe as yet, by no manere wey.'
`Now sin it may non other wyse betyde,'
Quod tho Nature, `here is no more to sey;
Than wolde I that these foules were a-wey
Ech with his make, for tarying lenger here' --
And seyde hem thus, as ye shul after here.

`To you speke I, ye tercelets,' quod Nature,
`Beth of good herte and serveth, alle three;
A yeer is not so longe to endure,
And ech of yow peyne him, in his degree,
For to do wel; for, god wot, quit is she
Fro yow this yeer; what after so befalle,
This entremes is dressed for you alle.'

And whan this werk al broght was to an ende,
To every foule Nature yaf his make
By even acorde, and on hir wey they wende.
A! lord! the blisse and Ioye that they make!
For ech of hem gan other in winges take,
And with hir nekkes ech gan other winde,
Thanking alwey the noble goddesse of kinde.

But first were chosen foules for to singe,
As yeer by yere was alwey hir usaunce
To singe a roundel at hir departinge,
To do to Nature honour and plesaunce.
The note, I trowe, maked was in Fraunce;
The wordes wer swich as ye may heer finde,
The nexte vers, as I now have in minde.

Qui bien aime a tard oublie.

`Now welcom somer, with thy sonne softe,
That hast this wintres weders over-shake,
And driven awey the longe nightes blake!

`Saynt Valentyn, that art ful hy on-lofte; --
Thus singen smale foules for thy sake --
Now welcom somer, with thy sonne softe,
That hast this wintres weders over-shake.

`Wel han they cause for to gladen ofte,
Sith ech of hem recovered hath his make;
Ful blisful may they singen whan they wake;
Now welcom somer, with thy sonne softe,
That hast this wintres weders over-shake,
And driven away the longe nightes blake.'

And with the showting, whan hir song was do,
That foules maden at hir flight a-way,
I wook, and other bokes took me to
To rede upon, and yet I rede alway;
In hope, y-wis, to rede so som day
That I shal mete som thing for to fare
The bet; and thus to rede I nil not spare.

Parliamentum avium in die Sancti Valentini tentum secundum
Galfridum Chaucer. Deo gracias.

poem by Geoffrey Chaucer
Submitted by Poetry Lover
Vote! | Copy!

Book Of The Duchesse

THE PROEM

I have gret wonder, be this lighte,
How that I live, for day ne nighte
I may nat slepe wel nigh noght,
I have so many an ydel thoght
Purely for defaute of slepe
That, by my trouthe, I take no kepe
Of no-thing, how hit cometh or goth,
Ne me nis no-thing leef nor loth.
Al is y-liche good to me --
Ioye or sorowe, wherso hyt be --
For I have feling in no-thinge,
But, as it were, a mased thing,
Alway in point to falle a-doun;
For sorwful imaginacioun
Is alway hoolly in my minde.
And wel ye wite, agaynes kynde
Hit were to liven in this wyse;
For nature wolde nat suffyse
To noon erthely creature
Not longe tyme to endure
Withoute slepe, and been in sorwe;
And I ne may, ne night ne morwe,
Slepe; and thus melancolye
And dreed I have for to dye,
Defaute of slepe and hevinesse
Hath sleyn my spirit of quiknesse,
That I have lost al lustihede.
Suche fantasies ben in myn hede
So I not what is best to do.
But men myght axe me, why soo
I may not slepe, and what me is?
But natheles, who aske this
Leseth his asking trewely.
My-selven can not telle why
The sooth; but trewely, as I gesse,
I holde hit be a siknesse
That I have suffred this eight yere,
And yet my bote is never the nere;
For ther is phisicien but oon,
That may me hele; but that is doon.
Passe we over until eft;
That wil not be, moot nede be left;
Our first matere is good to kepe.
So whan I saw I might not slepe,
Til now late, this other night,
Upon my bedde I sat upright
And bad oon reche me a book,
A romaunce, and he hit me took
To rede and dryve the night away;
For me thoghte it better play
Then playen either at chesse or tables.
And in this boke were writen fables
That clerkes hadde, in olde tyme,
And other poets, put in ryme
To rede, and for to be in minde
Whyl men loved the lawe of kinde.
This book ne spak but of such thinges,
Of quenes lyves, and of kinges,
And many othere thinges smale.
Amonge al this I fond a tale
That me thoughte a wonder thing.
This was the tale: There was a king
That hight Seys, and hadde a wyf,
The beste that mighte bere lyf;
And this quene hight Alcyone.
So hit befel, therafter sone,
This king wolde wenden over see.
To tellen shortly, whan that he
Was in the see, thus in this wyse,
Soche a tempest gan to ryse
That brak hir mast, and made it falle,
And clefte her ship, and dreinte hem alle,
That never was founden, as it telles,
Bord ne man, ne nothing elles.
Right thus this king Seys loste his lyf.
Now for to speken of his wife: --
This lady, that was left at home,
Hath wonder, that the king ne come
Hoom, for hit was a longe terme.
Anon her herte gan to erme;
And for that hir thoughte evermo
Hit was not wel he dwelte so,
She longed so after the king
That certes, hit were a pitous thing
To telle hir hertely sorwful lyf
That hadde, alas! this noble wyfe;
For him she loved alderbest.
Anon she sente bothe eest and west
To seke him, but they founde nought.
`Alas!' quoth she, `that I was wrought!
And wher my lord, my love, be deed?
Certes, I nil never ete breed,
I make a-vowe to my god here,
But I mowe of my lord here!'
Such sorwe this lady to her took
That trewely I, which made this book,
Had swich pite and swich rowthe
To rede hir sorwe, that, by my trowthe,
I ferde the worse al the morwe
After, to thenken on her sorwe.
So whan she coude here no word
That no man mighte fynde hir lord,
Ful ofte she swouned, and saide `Alas!'
For sorwe ful nigh wood she was,
Ne she coude no reed but oon;
But doun on knees she sat anoon,
And weep, that pite was to here.
`A! mercy! swete lady dere!'
Quod she to Iuno, hir goddesse;
`Help me out of this distresse,
And yeve me grace my lord to see
Sone, or wite wher-so he be,
Or how he fareth, or in what wyse,
And I shal make you sacrifyse,
And hoolly youres become I shal
With good wil, body, herte, and al;
And but thou wilt this, lady swete,
Send me grace to slepe, and mete
In my slepe som certeyn sweven,
Wher-through that I may knowen even
Whether my lord be quik or deed.'
With that word she heng doun the heed,
And fil a-swown as cold as ston;
Hir women caught her up anon,
And broghten hir in bed al naked,
And she, forweped and forwaked,
Was wery, and thus the dede sleep
Fil on hir, or she toke keep,
Through Iuno, that had herd hir bone,
That made hir to slepe sone;
For as she prayde, so was don,
In dede; for Iuno, right anon,
Called thus her messagere
To do her erande, and he com nere.
Whan he was come, she bad him thus:
`Go bet,' quod Iuno, `to Morpheus,
Thou knowest hym wel, the god of sleep;
Now understond wel, and tak keep.
Sey thus on my halfe, that he
Go faste into the grete see,
And bid him that, on alle thing,
He take up Seys body the king,
That lyth ful pale and no-thing rody.
Bid him crepe into the body,
Aud do it goon to Alcyone
The quene, ther she lyth alone,
And shewe hir shortly, hit is no nay,
How hit was dreynt this other day;
And do the body speke so
Right as hit was wont to do,
The whyles that hit was on lyve.
Go now faste, and hy thee blyve!'
This messager took leve and wente
Upon his wey, and never ne stente
Til he com to the derke valeye
That stant bytwene roches tweye,
Ther never yet grew corn ne gras,
Ne tree, ne nothing that ought was,
Beste, ne man, ne nothing elles,
Save ther were a fewe welles
Came renning fro the cliffes adoun,
That made a deedly sleping soun,
And ronnen doun right by a cave
That was under a rokke y-grave
Amid the valey, wonder depe.
Ther thise goddes laye and slepe,
Morpheus, and Eclympasteyre,
That was the god of slepes heyre,
That slepe and did non other werk.
This cave was also as derk
As helle pit over-al aboute;
They had good leyser for to route
To envye, who might slepe beste;
Some henge hir chin upon hir breste
And slepe upright, hir heed y-hed,
And some laye naked in hir bed,
And slepe whyles the dayes laste.
This messager come flying faste,
And cryed, `O ho! awake anon!'
Hit was for noght; ther herde him non.
`Awak!' quod he, `who is, lyth there?'
And blew his horn right in hir ere,
And cryed `awaketh!' wonder hye.
This god of slepe, with his oon ye
Cast up, axed, `who clepeth there?'
`Hit am I,' quod this messagere;
`Iuno bad thou shuldest goon' --
And tolde him what he shulde doon
As I have told yow here-tofore;
Hit is no need reherse hit more;
And wente his wey, whan he had sayd.
Anon this god of slepe a-brayd
Out of his slepe, and gan to goon,
And did as he had bede him doon;
Took up the dreynte body sone,
And bar hit forth to Alcyone,
His wif the quene, ther-as she lay,
Right even a quarter before day,
And stood right at hir beddes fete,
And called hir, right as she hete,
By name, and sayde, `my swete wyf,
Awak! let be your sorwful lyf!
For in your sorwe there lyth no reed;
For certes, swete, I nam but deed;
Ye shul me never on lyve y-see.
But good swete herte, look that ye
Bury my body, at whiche a tyde
Ye mowe hit finde the see besyde;
And far-wel, swete, my worldes blisse!
I praye god your sorwe lisse;
To litel whyl our blisse lasteth!'
With that hir eyen up she casteth,
And saw noght; `A!' quod she, `for sorwe!'
And deyed within the thridde morwe.
But what she sayde more in that swow
I may not telle yow as now,
Hit were to longe for to dwelle;
My first matere I wil yow telle,
Wherfor I have told this thing
Of Alcione and Seys the king.
For thus moche dar I saye wel,
I had be dolven everydel,
And deed, right through defaute of sleep,
If I nad red and taken keep
Of this tale next before:
And I wol telle yow wherfore:
For I ne might, for bote ne bale,
Slepe, or I had red this tale
Of this dreynte Seys the king,
And of the goddes of sleping.
Whan I had red this tale wel
And over-loked hit everydel,
Me thoughte wonder if hit were so;
For I had never herd speke, or tho,
Of no goddes that coude make
Men for to slepe, ne for to wake;
For I ne knew never god but oon.
And in my game I sayde anoon --
And yet me list right evel to pleye --
`Rather then that I shulde deye
Through defaute of sleping thus,
I wolde yive thilke Morpheus,
Or his goddesse, dame Iuno,
Or som wight elles, I ne roghte who --
To make me slepe and have som reste --
I wil yive him the alder-beste
Yift that ever he aboode his lyve,
And here on warde, right now, as blyve;
If he wol make me slepe a lyte,
Of downe of pure dowves whyte
I wil yive him a fether-bed,
Rayed with golde, and right wel cled
In fyn blak satin doutremere,
And many a pilow, and every bere
Of clothe of Reynes, to slepe softe;
Him thar not nede to turnen ofte.
And I wol yive him al that falles
To a chambre; and al his halles
I wol do peynte with pure golde,
And tapite hem ful many folde
Of oo sute; this shal he have,
Yf I wiste wher were his cave,
If he can make me slepe sone,
As did the goddesse Alcione.
And thus this ilke god, Morpheus,
May winne of me mo fees thus
Than ever he wan; and to Iuno,
That is his goddesse, I shal so do,
I trow that she shal holde her payd.'
I hadde unneth that word y-sayd
Right thus as I have told hit yow,
That sodeynly, I niste how,
Swich a lust anoon me took
To slepe, that right upon my book
I fil aslepe, and therwith even
Me mette so inly swete a sweven,
So wonderful, that never yit
I trowe no man hadde the wit
To conne wel my sweven rede;
No, not Ioseph, withoute drede,
Of Egipte, he that redde so
The kinges meting Pharao,
No more than coude the leste of us;
Ne nat scarsly Macrobeus,
(He that wroot al thavisioun
That he mette, Kyng Scipioun,
The noble man, the Affrican --
Swiche marvayles fortuned than)
I trowe, a-rede my dremes even.
Lo, thus hit was, this was my sweven.

THE DREAM

Me thoughte thus: -- that hit was May,
And in the dawning ther I lay,
Me mette thus, in my bed al naked: --
I loked forth, for I was waked
With smale foules a gret hepe,
That had affrayed me out of slepe
Through noyse and swetnesse of hir song;
And, as me mette, they sate among,
Upon my chambre-roof withoute,
Upon the tyles, al a-boute,
And songen, everich in his wise,
The moste solempne servyse
By note, that ever man, I trowe,
Had herd; for som of hem song lowe,
Som hye, and al of oon acorde.
To telle shortly, at oo worde,
Was never y-herd so swete a steven,
But hit had be a thing of heven; --
So mery a soun, so swete entunes,
That certes, for the toune of Tewnes,
I nolde but I had herd hem singe,
For al my chambre gan to ringe
Through singing of hir armonye.
For instrument nor melodye
Was nowher herd yet half so swete,
Nor of acorde half so mete;
For ther was noon of hem that feyned
To singe, for ech of hem him peyned
To finde out mery crafty notes;
They ne spared not hir throtes.
And, sooth to seyn, my chambre was
Ful wel depeynted, and with glas
Were al the windowes wel y-glased,
Ful clere, and nat an hole y-crased,
That to beholde hit was gret Ioye.
For hoolly al the storie of Troye
Was in the glasing y-wroght thus,
Of Ector and of king Priamus,
Of Achilles and king Lamedon,
Of Medea and of Iason,
Of Paris, Eleyne, and Lavyne.
And alle the walles with colours fyne
Were peynted, bothe text and glose,
Of al the Romaunce of the Rose.
My windowes weren shet echon,
And through the glas the sunne shon
Upon my bed with brighte bemes,
With many glade gilden stremes;
And eek the welken was so fair,
Blew, bright, clere was the air,
And ful atempre, for sothe, hit was;
For nother cold nor hoot hit nas,
Ne in al the welken was a cloude.
And as I lay thus, wonder loude
Me thoughte I herde an hunte blowe
Tassaye his horn, and for to knowe
Whether hit were clere or hors of soune.
I herde goinge, up and doune,
Men, hors, houndes, and other thing;
And al men speken of hunting,
How they wolde slee the hert with strengthe,
And how the hert had, upon lengthe,
So moche embosed,I not now what.
Anon-right, whan I herde that,
How that they wolde on hunting goon,
I was right glad, and up anoon;
I took my hors, and forth I wente
Out of my chambre; I never stente
Til I com to the feld withoute.
Ther overtook I a gret route
Of huntes and eek of foresteres,
With many relayes and lymeres,
And hyed hem to the forest faste,
And I with hem; -- so at the laste
I asked oon, ladde a lymere: --
`Say, felow, who shal hunten here'
Quod I, and he answerde ageyn,
`Sir, themperour Octovien,'
Quod he, `and is heer faste by.'
`A goddes halfe, in good tyme,' quod I,
`Go we faste!' and gan to ryde.
Whan we came to the forest-syde,
Every man dide, right anoon,
As to hunting fil to doon.
The mayster-hunte anoon, fot-hoot,
With a gret horne blew three moot
At the uncoupling of his houndes.
Within a whyl the hert y-founde is,
Y-halowed, and rechased faste
Longe tyme; and so at the laste,
This hert rused and stal away
Fro alle the houndes a prevy way.
The houndes had overshote hem alle,
And were on a defaute y-falle;
Therwith the hunte wonder faste
Blew a forloyn at the laste.
I was go walked fro my tree,
And as I wente, ther cam by me
A whelp, that fauned me as I stood,
That hadde y-folowed, and coude no good.
Hit com and creep to me as lowe,
Right as hit hadde me y-knowe,
Hild doun his heed and Ioyned his eres,
And leyde al smothe doun his heres.
I wolde han caught hit, and anoon
Hit fledde, and was fro me goon;
And I him folwed, and hit forth wente
Doun by a floury grene wente
Ful thikke of gras, ful softe and swete,
With floures fele, faire under fete,
And litel used, hit seemed thus;
For bothe Flora and Zephirus,
They two that make floures growe,
Had mad hir dwelling ther, I trowe;
For hit was, on to beholde,
As thogh the erthe envye wolde
To be gayer than the heven,
To have mo floures, swiche seven
As in the welken sterres be.
Hit had forgete the povertee
That winter, through his colde morwes,
Had mad hit suffren, and his sorwes;
Al was forgeten, and that was sene.
For al the wode was waxen grene,
Swetnesse of dewe had mad it waxe.
Hit is no need eek for to axe
Wher ther were many grene greves,
Or thikke of trees, so ful of leves;
And every tree stood by him-selve
Fro other wel ten foot or twelve.
So grete trees, so huge of strengthe,
Of fourty or fifty fadme lengthe,
Clene withoute bough or stikke,
With croppes brode, and eek as thikke --
They were nat an inche a-sonder --
That hit was shadwe over-al under;
And many an hert and many an hinde
Was both before me and bihinde.
Of founes, soures, bukkes, does
Was ful the wode, and many roes,
And many squirelles that sete
Ful hye upon the trees, and ete,
And in hir maner made festes.
Shortly, hit was so ful of bestes,
That thogh Argus, the noble countour,
Sete to rekene in his countour,
And rekened with his figures ten --
For by tho figures mowe al ken,
If they be crafty, rekene and noumbre,
And telle of every thing the noumbre --
Yet shulde he fayle to rekene even
The wondres, me mette in my sweven.
But forth they romed wonder faste
Doun the wode; so at the laste
I was war of a man in blak,
That sat and had y-turned his bak
To an oke, an huge tree.
`Lord,' thoghte I, `who may that be?
What ayleth him to sitten here?'
Anoon-right I wente nere;
Than fond I sitte even upright
A wonder wel-faringe knight --
By the maner me thoughte so --
Of good mochel, and yong therto,
Of the age of four and twenty yeer.
Upon his berde but litel heer,
And he was clothed al in blakke.
I stalked even unto his bakke,
And ther I stood as stille as ought,
That, sooth to saye, he saw me nought,
For-why he heng his heed adoune.
And with a deedly sorwful soune
He made of ryme ten vers or twelve
Of a compleynt to him-selve,
The moste pite, the moste rowthe,
That ever I herde; for, by my trowthe,
Hit was gret wonder that nature
Might suffren any creature
To have swich sorwe, and be not deed.
Ful pitous, pale, and nothing reed,
He sayde a lay, a maner song,
Withoute note, withoute song,
And hit was this; for wel I can
Reherse hit; right thus hit began. --
`I have of sorwe so grete woon,
That Ioye gete I never noon,
Now that I see my lady bright,
Which I have loved with al my might,
Is fro me dedd, and is a-goon.
And thus in sorwe lefte me alone.
`Allas, o deeth! what ayleth thee,
That thou noldest have taken me,
`Whan that thou toke my lady swete?
That was so fayr, so fresh, so free,
So good, that men may wel y-see
`Of al goodnesse she had no mete!' --
Whan he had mad thus his complaynte,
His sorowful herte gan faste faynte,
And his spirites wexen dede;
The blood was fled, for pure drede,
Doun to his herte, to make him warm --
For wel hit feled the herte had harm --
To wite eek why hit was a-drad,
By kinde, and for to make hit glad;
For hit is membre principal
Of the body; and that made al
His hewe chaunge and wexe grene
And pale, for no blood was sene
In no maner lime of his.
Anoon therwith whan I saw this,
He ferde thus evel ther he sete,
I wente and stood right at his fete,
And grette him, but he spak noght,
But argued with his owne thoght,
And in his witte disputed faste
Why and how his lyf might laste;
Him thoughte his sorwes were so smerte
And lay so colde upon his herte;
So, through his sorwe and hevy thoght,
Made him that he ne herde me noght;
For he had wel nigh lost his minde,
Thogh Pan, that men clepe god of kinde,
Were for his sorwes never so wrooth.
But at the laste, to sayn right sooth,
He was war of me, how I stood
Before him, and dide of myn hood,
And grette him, as I best coude.
Debonairly, and no-thing loude,
He sayde, `I prey thee, be not wrooth,
I herde thee not, to sayn the sooth,
Ne I saw thee not, sir, trewely.'
`A! goode sir, no fors,' quod I,
`I am right sory if I have ought
Destroubled yow out of your thought;
For-yive me if I have mis-take.'
`Yis, thamendes is light to make,'
Quod he, `for ther lyth noon ther-to;
Ther is no-thing missayd nor do,'
Lo! how goodly spak this knight,
As it had been another wight;
He made it nouther tough ne queynte
And I saw that, and gan me aqueynte
With him, and fond him so tretable,
Right wonder skilful and resonable,
As me thoghte, for al his bale.
Anoon-right I gan finde a tale
To him, to loke wher I might ought
Have more knowing of his thought.
`Sir,' quod I, `this game is doon;
I holde that this hert be goon;
Thise huntes conne him nowher see.'
`I do no fors therof,' quod he,
`My thought is ther-on never a del.'
`By our lord,' quod I, `I trow yow wel,
Right so me thinketh by your chere.
But, sir, oo thing wol ye here?
Me thinketh, in gret sorwe I yow see;
But certes, good sir, yif that ye
Wolde ought discure me your wo,
I wolde, as wis god help me so,
Amende hit, yif I can or may;
Ye mowe preve hit by assay.
For, by my trouthe, to make yow hool,
I wol do al my power hool;
And telleth me of your sorwes smerte,
Paraventure hit may ese your herte,
That semeth ful seke under your syde.'
With that he loked on me asyde,
As who sayth, `Nay, that wol not be.'
`Graunt mercy, goode frend,' quod he,
`I thanke thee that thou woldest so,
But hit may never the rather be do,
No man may my sorwe glade,
That maketh my hewe to falle and fade,
And hath myn understonding lorn,
That me is wo that I was born!
May noght make my sorwes slyde,
Nought the remedies of Ovyde;
Ne Orpheus, god of melodye,
Ne Dedalus, with playes slye;
Ne hele me may phisicien,
Noght Ypocras, ne Galien;
Me is wo that I live houres twelve;
But who so wol assaye him-selve
Whether his herte can have pite
Of any sorwe, lat him see me.
I wrecche, that deeth hath mad al naked
Of alle blisse that ever was maked,
Y-worthe worste of alle wightes,
That hate my dayes and my nightes;
My lyf, my lustes be me lothe,
For al welfare and I be wrothe.
The pure deeth is so my fo
Thogh I wolde deye, hit wolde not so;
For whan I folwe hit, hit wol flee;
I wolde have hit, hit nil not me.
This is my peyne withoute reed,
Alway deinge and be not deed,
That Sesiphus, that lyth in helle,
May not of more sorwe telle.
And who so wiste al, be my trouthe,
My sorwe, but he hadde routhe
And pite of my sorwes smerte,
That man hath a feendly herte.
For who so seeth me first on morwe
May seyn, he hath y-met with sorwe;
For I am sorwe and sorwe is I.
`Allas! and I wol telle the why;
My song is turned to pleyning,
And al my laughter to weping,
My glade thoghtes to hevinesse,
In travaile is myn ydelnesse
And eek my reste; my wele is wo,
My goode is harm, and ever-mo
In wrathe is turned my pleying,
And my delyt in-to sorwing.
Myn hele is turned into seeknesse,
In drede is al my sikernesse.
To derke is turned al my light,
My wit is foly, my day is night,
My love is hate, my sleep waking,
My mirthe and meles is fasting,
My countenaunce is nycete,
And al abaved wher-so I be,
My pees, in pleding and in werre;
Allas! how mighte I fare werre?
`My boldnesse is turned to shame,
For fals Fortune hath pleyd a game
Atte ches with me, allas! the whyle!
The trayteresse fals and ful of gyle,
That al behoteth and no-thing halt,
She goth upryght and yet she halt,
That baggeth foule and loketh faire,
The dispitouse debonaire,
That scorneth many a creature!
An ydole of fals portraiture
Is she, for she wil sone wryen;
She is the monstres heed y-wryen,
As filth over y-strawed with floures;
Hir moste worship and hir flour is
To lyen, for that is hir nature;
Withoute feyth, lawe, or mesure.
She is fals; and ever laughinge
With oon eye, and that other wepinge.
That is broght up, she set al doun.
I lykne hir to the scorpioun,
That is a fals, flateringe beste;
For with his hede he maketh feste,
But al amid his flateringe
With his tayle he wol stinge,
And envenyme; and so wol she.
She is thenvyouse charite
That is ay fals, and seemeth wele,
So turneth she hir false whele
Aboute, for it is no-thing stable,
Now by the fyre, now at table;
Ful many oon hath she thus y-blent;
She is pley of enchauntement,
That semeth oon and is not so,
The false theef! what hath she do,
Trowest thou? By our lord, I wol thee seye.
Atte ches with me she gan to pleye;
With hir false draughtes divers
She stal on me, and took my fers.
And whan I saw my fers aweye,
Alas! I couthe no lenger playe,
But seyde, 'Farewel, swete, y-wis,
And farwel al that ever ther is!'
Therwith Fortune seyde, 'Chek here!'
And 'Mate!' in mid pointe of the chekkere
With a poune erraunt, allas!
Ful craftier to pley she was
Than Athalus, that made the game
First of the ches: so was his name.
But God wolde I had ones or twyes
Y-koud and knowe the Ieupardyes
That coude the Grek Pithagores!
I shulde have pleyd the bet at ches,
And kept my fers the bet therby;
And thogh wherto? for trewely,
I hold that wish nat worth a stree!
Hit had be never the bet for me.
For Fortune can so many a wyle,
Ther be but fewe can hir begyle,
And eek she is the las to blame;
My-self I wolde have do the same,
Before god, hadde I been as she;
She oghte the more excused be.
For this I say yet more therto,
Hadde I be god and mighte have do
My wille, whan she my fers caughte,
I wolde have drawe the same draughte.
For, also wis god yive me reste,
I dar wel swere she took the beste!
`But through that draughte I have lorn
My blisse; allas! that I was born!
For evermore, I trowe trewly,
For al my wil, my lust hoolly
Is turned; but yet what to done?
Be oure lord, hit is to deye sone;
For no-thing I ne leve it noght,
But live and deye right in this thoght.
There nis planete in firmament,
Ne in air, ne in erthe, noon element,
That they ne yive me a yift echoon
Of weping, whan I am aloon.
For whan that I avyse me wel,
And bethenke me every-del,
How that ther lyth in rekening,
In my sorwe for no-thing;
And how ther leveth no gladnesse
May gladde me of my distresse,
And how I have lost suffisance,
And therto I have no plesance,
Than may I say, I have right noght.
And whan al this falleth in my thoght,
Allas! than am I overcome!
For that is doon is not to come!
I have more sorowe than Tantale.'
And whan I herde him telle this tale
Thus pitously, as I yow telle,
Unnethe mighte I lenger dwelle,
Hit dide myn hert so moche wo.
`A! good sir!' quod I, `say not so!
Have som pite on your nature
That formed yow to creature,
Remembre yow of Socrates;
For he ne counted nat three strees
Of noght that Fortune coude do.`
`No,' quod he, `I can not so.'
`Why so? good sir! parde!' quod I;
`Ne say noght so, for trewely,
Thogh ye had lost the ferses twelve,
And ye for sorwe mordred your-selve,
Ye sholde be dampned in this cas
By as good right as Medea was,
That slow hir children for Iason;
And Phyllis als for Demophon
Heng hir-self, so weylaway!
For he had broke his terme-day
To come to hir. Another rage
Had Dydo, quene eek of Cartage,
That slow hir-self for Eneas
Was fals; a whiche a fool she was!
And Ecquo dyed for Narcisus.
Nolde nat love hir; and right thus
Hath many another foly don.
And for Dalida died Sampson,
That slow him-self with a pilere.
But ther is noon a-lyve here
Wolde for a fers make this wo!'
`Why so?' quod he; `hit is nat so,
Thou woste ful litel what thou menest;
I have lost more than thow wenest.'
`Lo, sir, how may that be?' quod I;
`Good sir, tel me al hoolly
In what wyse, how, why, and wherfore
That ye have thus your blisse lore,'
`Blythly,' quod he, `com sit adoun,
I telle thee up condicioun
That thou hoolly, with al thy wit,
Do thyn entent to herkene hit.'
`Yis, sir.' `Swere thy trouthe ther-to.'
`Gladly.' `Do than holde her-to!'
`I shal right blythly, so god me save,
Hoolly, with al the witte I have,
Here yow, as wel as I can,'
`A goddes half!' quod he, and began: --
`Sir,' quod he, `sith first I couthe
Have any maner wit fro youthe,
Or kyndely understonding
To comprehende, in any thing,
What love was, in myn owne wit,
Dredeles, I have ever yit
Be tributary, and yiven rente
To love hoolly with goode entente,
And through plesaunce become his thral,
With good wil, body, herte, and al.
Al this I putte in his servage,
As to my lorde, and dide homage;
And ful devoutly prayde him to,
He shulde besette myn herte so,
That it plesaunce to him were,
And worship to my lady dere.
`And this was longe, and many a yeer
Or that myn herte was set o-wher,
That I did thus, and niste why;
I trowe hit cam me kindely.
Paraunter I was therto most able
As a whyt wal or a table;
For hit is redy to cacche and take
Al that men wil therin make,
Wher-so so men wol portreye or peynte,
Be the werkes never so queynte.
`And thilke tyme I ferde so
I was able to have lerned tho,
And to have coud as wel or better,
Paraunter, other art or letter.
But for love cam first in my thought,
Therfore I forgat hit nought.
I chees love to my firste craft,
Therfor hit is with me y-laft.
Forwhy I took hit of so yong age,
That malice hadde my corage
Nat that tyme turned to no-thing
Through to mochel knowleching.
For that tyme youthe, my maistresse,
Governed me in ydelnesse;
For hit was in my firste youthe,
And tho ful litel good I couthe,
For al my werkes were flittinge,
And al my thoghtes varyinge;
Al were to me y-liche good,
That I knew tho; but thus hit stood.
`Hit happed that I cam on a day
Into a place, ther I say,
Trewly, the fayrest companye
Of ladies that ever man with ye
Had seen togedres in oo place.
Shal I clepe hit hap other grace
That broght me ther? nay, but Fortune,
That is to lyen ful comune,
The false trayteresse, pervers,
God wolde I coude clepe hir wers!
For now she worcheth me ful wo,
And I wol telle sone why so.
`Among thise ladies thus echoon,
Soth to seyn, I saw ther oon
That was lyk noon of al the route;
For I dar swere, withoute doute,
That as the someres sonne bright
Is fairer, clere, and hath more light
Than any planete, is in heven,
The mone, or the sterres seven,
For al the worlde so had she
Surmounted hem alle of beaute,
Of maner and of comlinesse,
Of stature and wel set gladnesse,
Of goodlihede so wel beseye --
Shortly, what shal I more seye?
By god, and by his halwes twelve,
It was my swete, right al hir-selve!
She had so stedfast countenaunce,
So noble port and meyntenaunce.
And Love, that had herd my bone,
Had espyed me thus sone,
That she ful sone, in my thoght,
As helpe me god, so was y-caught
So sodenly, that I ne took
No maner reed but at hir look
And at myn herte; for-why hir eyen
So gladly, I trow, myn herte seyen,
That purely tho myn owne thoght
Seyde hit were bet serve hir for noght
Than with another to be wel.
And hit was sooth, for, everydel,
I wil anoon-right telle thee why.
I saw hir daunce so comlily,
Carole and singe so swetely,
Laughe and pleye so womanly,
And loke so debonairly,
So goodly speke and so frendly,
That certes, I trow, that evermore
Nas seyn so blisful a tresore.
For every heer upon hir hede,
Soth to seyn, hit was not rede,
Ne nouther yelw, ne broun hit nas;
Me thoghte, most lyk gold hit was.
And whiche eyen my lady hadde!
Debonair, goode, glade, and sadde,
Simple, of good mochel, noght to wyde;
Therto hir look nas not a-syde,
Ne overthwert, but beset so wel,
Hit drew and took up, everydel,
Alle that on hir gan beholde.
Hir eyen semed anoon she wolde
Have mercy; fooles wenden so;
But hit was never the rather do.
Hit nas no countrefeted thing,
It was hir owne pure loking,
That the goddesse, dame Nature,
Had made hem opene by mesure,
And close; for, were she never so glad,
Hir loking was not foly sprad,
Ne wildely, thogh that she pleyde;
But ever, me thoght, hir eyen seyde,
'By god, my wrathe is al for-yive!'
`Therwith hir liste so wel to live,
That dulnesse was of hir a-drad.
She nas to sobre ne to glad;
In alle thinges more mesure
Had never, I trowe, creature.
But many oon with hir loke she herte,
And that sat hir ful lyte at herte,
For she knew no-thing of her thoght;
But whether she knew, or knew hit noght,
Algate she ne roghte of hem a stree!
To gete hir love no ner was he
That woned at home, than he in Inde;
The formest was alway behinde.
But goode folk, over al other,
She loved as man may do his brother;
Of whiche love she was wonder large,
In skilful places that bere charge.
`Which a visage had she ther-to!
Allas! myn herte is wonder wo
That I ne can discryven hit!
Me lakketh bothe English and wit
For to undo hit at the fulle;
And eek my spirits be so dulle
So greet a thing for to devyse.
I have no wit that can suffyse
To comprehenden hir beaute;
But thus moche dar I seyn, that she
Was rody, fresh, and lyvely hewed;
And every day hir beaute newed.
And negh hir face was alder-best;
For certes, Nature had swich lest
To make that fair, that trewly she
Was hir cheef patron of beautee,
And cheef ensample of al hir werke,
And moustre; for, be hit never so derke,
Me thinketh I see hir ever-mo.
And yet more-over, thogh alle tho
That ever lived were not a-lyve,
They ne sholde have founde to discryve
In al hir face a wikked signe;
For hit was sad, simple, and benigne.
`And which a goodly, softe speche
Had that swete, my lyves leche!
So frendly, and so wel y-grounded,
Up al resoun so wel y-founded,
And so tretable to alle gode,
That I dar swere by the rode,
Of eloquence was never founde
So swete a sowninge facounde,
Ne trewer tonged, ne scorned lasse,
Ne bet coude hele; that, by the masse,
I durste swere, thogh the pope hit songe,
That ther was never yet through hir tonge
Man ne woman gretly harmed;
As for hir, ther was al harm hid;
Ne lasse flatering in hir worde,
That purely, hir simple recorde
Was founde as trewe as any bonde,
Or trouthe of any mannes honde.
Ne chyde she coude never a del,
That knoweth al the world ful wel.
`But swich a fairnesse of a nekke
Had that swete that boon nor brekke
Nas ther non sene, that mis-sat.
Hit was whyt, smothe, streght, and flat,
Withouten hole; and canel-boon,
As by seming, had she noon.
Hir throte, as I have now memoire,
Semed a round tour of yvoire,
Of good gretnesse, and noght to grete.
`And gode faire Whyte she hete,
That was my lady name right.
She was bothe fair and bright,
She hadde not hir name wrong.
Right faire shuldres, and body long
She hadde, and armes; every lith
Fattish, flesshy, not greet therwith;
Right whyte handes, and nayles rede,
Rounde brestes; and of good brede
Hyr hippes were, a streight flat bake.
I knew on hir non other lak
That al hir limmes nere sewing,
In as fer as I had knowing.
`Therto she coude so wel pleye,
Whan that hir liste, that I dar seye,
That she was lyk to torche bright,
That every man may take of light
Ynogh, and hit hath never the lesse.
`Of maner and of comlinesse
Right so ferde my lady dere;
For every wight of hir manere
Might cacche ynogh, if that he wolde,
If he had eyen hir to beholde.
For I dar sweren, if that she
Had among ten thousand be,
She wolde have be, at the leste,
A cheef mirour of al the feste,
Thogh they had stonden in a rowe,
To mennes eyen coude have knowe.
For wher-so men had pleyd or waked,
Me thoghte the felawship as naked
Withouten hir, that saw I ones,
As a coroune withoute stones.
Trewly she was, to myn ye,
The soleyn fenix of Arabye,
For ther liveth never but oon;
Ne swich as she ne know I noon.
`To speke of goodnesse; trewly she
Had as moche debonairte
As ever had Hester in the bible
And more, if more were possible.
And, soth to seyne, therwith-al
She had a wit so general,
So hool enclyned to alle gode,
That al hir wit was set, by the rode,
Withoute malice, upon gladnesse;
Therto I saw never yet a lesse
Harmul, than she was in doing.
I sey nat that she ne had knowing
What harm was; or elles she
Had coud no good, so thinketh me.
`And trewly, for to speke of trouthe,
But she had had, hit had be routhe.
Therof she had so moche hir del --
And I dar seyn and swere hit wel --
That Trouthe him-self, over al and al,
Had chose his maner principal
In hir, that was his resting-place.
Ther-to she hadde the moste grace,
To have stedfast perseveraunce,
And esy, atempre governaunce,
That ever I knew or wiste yit;
So pure suffraunt was hir wit.
And reson gladly she understood,
Hit folowed wel she coude good.
She used gladly to do wel;
These were hir maners every-del.
`Therwith she loved so wel right,
She wrong do wolde to no wight;
No wight might do hir no shame,
She loved so wel hir owne name.
Hir luste to holde no wight in honde;
Ne, be thou siker, she nolde fonde
To holde no wight in balaunce,
By half word ne by countenaunce,
But-if men wolde upon hir lye;
Ne sende men in-to Walakye,
To Pruyse, and in-to Tartarye,
To Alisaundre, ne in-to Turkye,
And bidde him faste, anoon that he
Go hoodles to the drye see,
And come hoom by the Carrenare;
And seye, 'Sir, be now right ware
That I may of yow here seyn
Worship, or that ye come ageyn!'
She ne used no suche knakkes smale.
`But wherfor that I telle my tale?
Right on this same, as I have seyd,
Was hoolly al my love leyd;
For certes, she was, that swete wyf,
My suffisaunce, my lust, my lyf,
Myn hap, myn hele, and al my blisse,
My worldes welfare, and my lisse,
And I hires hoolly, everydel.'
`By our lord,' quod I, `I trowe yow wel!
Hardely, your love was wel beset,
I not how ye mighte have do bet.'
`Bet? ne no wight so wel!' quod he.
`I trowe hit, sir,' quod I, `parde!'
`Nay, leve hit wel!' `Sir, so do I;
I leve yow wel, that trewely
Yow thoghte, that she was the beste,
And to beholde the alderfaireste,
Who so had loked hir with your eyen.'
`With myn? Nay, alle that hir seyen
Seyde and sworen hit was so.
And thogh they ne hadde, I wolde tho
Have loved best my lady fre,
Thogh I had had al the beautee
That ever had Alcipyades,
And al the strengthe of Ercules,
And therto had the worthinesse
Of Alisaundre, and al the richesse
That ever was in Babiloyne,
In Cartage, or in Macedoyne,
Or in Rome, or in Ninive;
And therto al-so hardy be
As was Ector, so have I Ioye,
That Achilles slow at Troye --
And therfor was he slayn also
In a temple, for bothe two
Were slayn, he and Antilegius,
And so seyth Dares Frigius,
For love of hir Polixena --
Or ben as wys as Minerva,
I wolde ever, withoute drede,
Have loved hir, for I moste nede!
'Nede!' nay, I gabbe now,
Noght 'nede', and I wol telle how,
For of good wille myn herte hit wolde,
And eek to love hir I was holde
As for the fairest and the beste.
`She was as good, so have I reste,
As ever was Penelope of Grece,
Or as the noble wyf Lucrece,
That was the beste -- he telleth thus,
The Romayn Tytus Livius --
She was as good, and no-thing lyke,
Thogh hir stories be autentyke;
Algate she was as trewe as she.
`But wherfor that I telle thee
Whan I first my lady say?
I was right yong, the sooth to sey,
And ful gret need I hadde to lerne;
Whan my herte wolde yerne
To love, it was a greet empryse.
But as my wit coude best suffyse,
After my yonge childly wit,
Withoute drede, I besette hit
To love hir in my beste wise,
To do hir worship and servyse
That I tho coude, be my trouthe,
Withoute feyning outher slouthe;
For wonder fayn I wolde hir see.
So mochel hit amended me,
That, whan I saw hir first a-morwe,
I was warished of al my sorwe
Of al day after, til hit were eve;
Me thoghte no-thing mighte me greve,
Were my sorwes never so smerte.
And yit she sit so in myn herte,
That, by my trouthe, I nolde noghte,
For al this worlde, out of my thoght
Leve my lady; no, trewly!'
`Now, by my trouthe, sir,' quod I,
`Me thinketh ye have such a chaunce
As shrift withoute repentaunce.'
`Repentaunce! nay, fy,' quod he;
`Shulde I now repente me
To love? nay, certes, than were I wel
Wers than was Achitofel,
Or Anthenor, so have I Ioye,
The traytour that betraysed Troye,
Or the false Genelon,
He that purchased the treson
Of Rowland and of Olivere.
Nay, why! I am a-lyve here
I nil foryete hir never-mo.'
`Now, goode sir,' quod I right tho,
`Ye han wel told me her-before.
It is no need reherse hit more
How ye sawe hir first, and where;
But wolde ye telle me the manere,
To hir which was your firste speche --
Therof I wolde yow be-seche --
And how she knewe first your thoght,
Whether ye loved hir or noght,
And telleth me eek what ye have lore;
I herde yow telle her-before.'
`Ye,' seyde he,`thow nost what thou menest;
I have lost more than thou wenest.'
`What los is that, sir?' quod I tho;
`Nil she not love yow? Is hit so?
Or have ye oght y-doon amis,
That she hath left yow? is hit this?
For goddes love, telle me al.'
`Before god,' quod he, `and I shal.
I saye right as I have seyd,
On hir was al my love leyd;
And yet she niste hit never a del
Noght longe tyme, leve hit wel.
For be right siker, I durste noght
For al this worlde telle hir my thoght,
Ne I wolde have wratthed hir, trewely.
For wostow why? she was lady
Of the body; she had the herte,
And who hath that, may not asterte.
`But, for to kepe me fro ydelnesse,
Trewly I did my besinesse
To make songes, as I best coude,
And ofte tyme I song hem loude;
And made songes a gret del,
Al-thogh I coude not make so wel
Songes, ne knowe the art al,
As coude Lamekes sone Tubal,
That fond out first the art of songe;
For, as his brothers hamers ronge
Upon his anvelt up and doun,
Therof he took the firste soun;
But Grekes seyn, Pictagoras,
That he the firste finder was
Of the art; Aurora telleth so,
But therof no fors, of hem two.
Algates songes thus I made
Of my feling, myn herte to glade;
And lo! this was the alther-firste,
I not wher that hit were the werst. --
'Lord, hit maketh myn herte light,
Whan I thenke on that swete wight
That is so semely on to see;
And wisshe to god hit might so be,
That she wolde holde me for hir knight,
My lady, that is so fair and bright!' --
`Now have I told thee, sooth to saye,
My firste song. Upon a daye
I bethoghte me what wo
And sorwe that I suffred tho
For hir, and yet she wiste hit noght,
Ne telle hir durste I nat my thoght.
`Allas!' thoghte I, `I can no reed;
And, but I telle hir, I nam but deed;
And if I telle hir, to seye sooth,
I am a-dred she wol be wrooth;
Allas! what shal I thanne do?'
`In this debat I was so wo,
Me thoghte myn herte braste a-tweyn!
So atte laste, soth to sayn,
I me bethoghte that nature
Ne formed never in creature
So moche beaute, trewely,
And bounte, withouten mercy.
`In hope of that, my tale I tolde,
With sorwe, as that I never sholde;
For nedes, and, maugree my heed,
I moste have told hir or be deed.
I not wel how that I began,
Ful evel rehersen hit I can;
And eek, as helpe me god with-al,
I trowe hit was in the dismal,
That was the ten woundes of Egipte;
For many a word I over-skipte
In my tale, for pure fere
Lest my wordes mis-set were.
With sorweful herte, and woundes dede,
Softe and quaking for pure drede
And shame, and stinting in my tale
For ferde, and myn hewe al pale,
Ful ofte I wex bothe pale and reed;
Bowing to hir, I heng the heed;
I durste nat ones loke hir on,
For wit, manere, and al was gon.
I seyde 'mercy!' and no more;
Hit nas no game, hit sat me sore.
`So atte laste, sooth to seyn,
Whan that myn herte was come ageyn,
To telle shortly al my speche,
With hool herte I gan hir beseche
That she wolde be my lady swete;
And swor, and gan hir hertely hete
Ever to be stedfast and trewe,
And love hir alwey freshly newe,
And never other lady have,
And al hir worship for to save
As I best coude; I swor hir this --
'For youres is al that ever ther is
For evermore, myn herte swete!
And never false yow, but I mete,
I nil, as wis god helpe me so!'
`And whan I had my tale y-do,
God wot, she acounted nat a stree
Of al my tale, so thoghte me.
To telle shortly as hit is,
Trewly hir answere, hit was this;
I can not now wel counterfete
Hir wordes, but this was the grete
Of hir answere: she sayde, 'nay'
Al-outerly. Allas! that day
The sorwe I suffred, and the wo!
That trewly Cassandra, that so
Bewayled the destruccioun.
Of Troye and of Ilioun,
Had never swich sorwe as I tho.
I durste no more say therto
For pure fere, but stal away;
And thus I lived ful many a day;
That trewely, I hadde no need
Ferther than my beddes heed
Never a day to seche sorwe;
I fond hit redy every morwe,
For-why I loved hir in no gere.
`So hit befel, another yere,
I thoughte ones I wolde fonde
To do hir knowe and understonde
My wo; and she wel understood
That I ne wilned thing but good,
And worship, and to kepe hir name
Over al thing, and drede hir shame,
And was so besy hir to serve; --
And pite were I shulde sterve,
Sith that I wilned noon harm, y-wis.
So whan my lady knew al this,
My lady yaf me al hoolly
The noble yift of hir mercy,
Saving hir worship, by al weyes;
Dredles, I mene noon other weyes.
And therwith she yaf me a ring;
I trowe hit was the firste thing;
But if myn herte was y-waxe
Glad, that is no need to axe!
As helpe me god, I was as blyve,
Reysed, as fro dethe to lyve,
Of alle happes the alder-beste,
The gladdest and the moste at reste.
For trewely, that swete wight,
Whan I had wrong and she the right,
She wolde alwey so goodely
For-yeve me so debonairly.
In alle my youthe, in alle chaunce,
She took me in hir governaunce.
`Therwith she was alway so trewe,
Our Ioye was ever y-liche newe;
Our hertes wern so even a payre,
That never nas that oon contrayre
To that other, for no wo.
For sothe, y-liche they suffred tho
Oo blisse and eek oo sorwe bothe;
Y-liche they were bothe gladde and wrothe;
Al was us oon, withoute were.
And thus we lived ful many a yere
So wel, I can nat telle how.'
`Sir,' quod I, `where is she now?'
`Now!' quod he, and stinte anoon.
Therwith he wex as deed as stoon,
And seyde, `allas! that I was bore,
That was the los, that her-before
I tolde thee, that I had lorn.
Bethenk how I seyde her-beforn,
'Thou wost ful litel what thou menest;
I have lost more than thou wenest' --
God wot, allas! right that was she!'
`Allas! sir, how? what may that be?'
`She is deed!' `Nay!' `Yis, by my trouthe!'
`Is that your los? By god, hit is routhe!'
And with that worde, right anoon,
They gan to strake forth; al was doon,
For that tyme, the hert-hunting.
With that, me thoghte, that this king
Gan quikly hoomward for to ryde
Unto a place ther besyde,
Which was from us but a lyte,
A long castel with walles whyte,
Be seynt Iohan! on a riche hil,
As me mette; but thus it fil.
Right thus me mette, as I yow telle,
That in the castel was a belle,
As hit had smiten houres twelve. --

Therwith I awook my-selve,
And fond me lying in my bed;
And the book that I had red,
Of Alcyone and Seys the king,
And of the goddes of sleping,
I fond it in myn honde ful even.
Thoghte I, `this is so queynt a sweven,
That I wol, be processe of tyme,
Fonde to putte this sweven in ryme
As I can best'; and that anoon. --
This was my sweven; now hit is doon.

Explicit the Boke of the Duchesse.

poem by Geoffrey Chaucer
Submitted by Poetry Lover
Vote! | Copy!

The Canterbury Tales; The Prioresses Tale

The prologe of the Prioresses tale.

Domine dominus noster.

O lord oure lord, thy name how merveillous
Is in this large world ysprad-quod she-
For noght oonly thy laude precious
Parfourned is by men of dignitee,
But by the mouth of children thy bountee
Parfourned is, for on the brest soukynge
Somtyme shewen they thyn heriynge.

Wherfore in laude, as I best kan or may,
Of thee, and of the whyte lylye flour
Which that the bar, and is a mayde alway,
To telle a storie I wol do my labour;
Nat that I may encreessen hir honour,
For she hirself is honour, and the roote
Of bountee, next hir sone, and soules boote.

O mooder mayde! O mayde mooder fre!
O bussh unbrent, brennynge in Moyses sighte,
That ravysedest doun fro the deitee
Thurgh thyn humblesse, the goost that in thalighte,
Of whos vertu, whan he thyn herte lighte,
Conceyved was the Fadres sapience,
Help me to telle it in thy reverence.

Lady, thy bountee, thy magnificence,
Thy vertu, and thy grete humylitee,
Ther may no tonge expresse in no science,
For somtyme, lady, er men praye to thee,
Thou goost biforn of thy benyngnytee
And getest us the lyght, thurgh thy preyere,
To gyden us unto thy sone so deere.

My konnyng is so wayk, O blisful queene,
For to declare thy grete worthynesse,
That I ne may the weighte nat susteene,
But as a child of twelf monthe oold, or lesse,
That kan unnethes any word expresse,
Right so fare I; and therfore I yow preye,
Gydeth my song that I shal of yow seye.

Heere begynneth the Prioresses Tale.

Ther was in Asye, in a greet citee,
Amonges cristene folk a Jewerye,
Sustened by a lord of that contree
For foule usure and lucre of vileynye,
Hateful to Crist and to his compaignye,
And thurgh this strete men myghte ride or wende,
For it was free and open at eyther ende.

A litel scole of cristen folk ther stood
Doun at the ferther ende, in which ther were
Children an heep, ycomen of cristen blood,
That lerned in that scole yeer by yeer
Swich manere doctrine as men used there,
This is to seyn, to syngen and to rede,
As smale children doon in hir childhede.

Among thise children was a wydwes sone,
A litel clergeoun, seven yeer of age,
That day by day to scole was his wone,
And eek also, wher as he saugh thymage
Of Cristes mooder, he hadde in usage
As hym was taught, to knele adoun, and seye
His Ave Marie, as he goth by the weye.

Thus hath this wydwe hir litel sone ytaught
Oure blisful lady, Cristes mooder deere,
To worshipe ay; and he forgate it naught,
For sely child wol alday soone leere.
But ay, whan I remembre on this mateere,
Seint Nicholas stant evere in my presence,
For he so yong to Crist dide reverence.

This litel child, his litel book lernynge,
As he sat in the scole at his prymer,
He 'Alma redemptoris' herde synge
As children lerned hir anthiphoner;
And as he dorste, he drough hym ner and ner,
And herkned ay the wordes and the noote,
Til he the firste vers koude al by rote.

Noght wiste he what this Latyn was to seye,
For he so yong and tendre was of age,
But on a day his felawe gan he preye
Texpounden hym this song in his langage,
Or telle hym why this song was in usage;
This preyde he hym to construe and declare
Ful often tyme upon hise knowes bare.

His felawe, which that elder was than he,
Answerde hym thus, 'This song, I have herd seye,
Was maked of oure blisful Lady free,
Hir to salue, and eek hir for to preye
To been our help, and socour whan we deye.
I kan namoore expounde in this mateere,
I lerne song, I kan but smal grammere.'

'And is this song maked in reverence
Of Cristes mooder?' seyde this innocent.
'Now, certes, I wol do my diligence
To konne it al, er Cristemasse is went;
Though that I for my prymer shal be shent
And shal be beten thries in an houre,
I wol it konne, oure lady for to honoure.'

His felawe taughte hym homward prively
Fro day to day, til he koude it by rote;
And thanne he song it wel and boldely
Fro word to word acordynge with the note.
Twies a day it passed thurgh his throte,
To scoleward, and homward whan he wente;
On Cristes mooder set was his entente.

As I have seyd, thurghout the Jewerie
This litel child, as he cam to and fro,
Ful murily than wolde he synge and crie
'O Alma redemptoris' evere-mo.
The swetnesse hath his herte perced so
Of Cristes mooder, that to hir to preye
He kan nat stynte of syngyng by the weye.

Oure firste foo, the serpent Sathanas,
That hath in Jewes herte his waspes nest,
Up swal, and seyde, 'O Hebrayk peple, allas,
Is this to yow a thyng that is honest,
That swich a boy shal walken as hym lest
In youre despit, and synge of swich sentence,
Which is agayn oure lawes reverence?'

Fro thennes forth the Jewes han conspired
This innocent out of this world to chace.
An homycide therto han they hyred
That in an aleye hadde a privee place;
And as the child gan forby for to pace,
This cursed Jew hym hente and heeld hym faste,
And kitte his throte, and in a pit hym caste.

I seye that in a wardrobe they hym threwe,
Where as this Jewes purgen hire entraille.
O cursed folk of Herodes al newe,
What may youre yvel entente yow availle?
Mordre wol out, certeyn, it wol nat faille,
And namely ther thonour of God shal sprede,
The blood out crieth on youre cursed dede.

O matir, sowded to virginitee,
Now maystow syngen, folwynge evere in oon
The white lamb celestial-quod she-
Of which the grete Evaungelsit Seint John
In Pathmos wroot, which seith that they that goon
Biforn this lamb and synge a song al newe,

That never, fleshly, wommen they ne knewe.

This povre wydwe awaiteth al that nyght
After hir litel child, but he cam noght;
For which, as soone as it was dayes light,
With face pale of drede and bisy thoght,
She hath at scole and elles-where hym soght,
Til finally she gan so fer espie,
That he last seyn was in the Jewerie.

With moodres pitee in hir brest enclosed,
She gooth, as she were half out of hir mynde,
To every place where she hath supposed
By liklihede hir litel child to finde,
And evere on Cristes mooder, meeke and kynde
She cride, and atte laste thus she wroghte,
Among the cursed Jewes she hym soghte.

She frayneth, and she preyeth pitously
To every Jew that dwelte in thilke place,
To telle hir if hir child wente oght forby.
They seyde nay; but Jesu, of his grace,
Yaf in hir thoght, inwith a litel space,
That in that place after hir sone she cryde,
Wher he was casten in a pit bisyde.

O grete God, that parfournest thy laude
By mouth of innocentz, lo, heer thy myght!
This gemme of chastite, this emeraude,
And eek of martirdom the ruby bright,
Ther he with throte ykorven lay upright,
He 'Alma redemptoris' gan to synge
So loude, that al the place gan to rynge.

The cristene folk that thurgh the strete wente
In coomen, for to wondre upon this thyng,
And hastily they for the Provost sente.
He cam anon withouten tariyng,
And herieth Crist that is of hevene kyng,
And eek his mooder, honour of mankynde;
And after that, the Jewes leet he bynde.

This child, with pitous lamentacioun,
Uptaken was, syngynge his song alway,
And with honour of greet processioun
They carien hym unto the nexte abbay;
His mooder swownynge by his beere lay,
Unnethe myghte the peple that was theere
This newe Rachel brynge fro his beere.

With torment and with shameful deeth echon
This Provost dooth the Jewes for to sterve,
That of this mordre wiste, and that anon.
He nolde no swich cursednesse observe;
Yvele shal have that yvele wol deserve.
Therfore with wilde hors he dide hem drawe,
And after that he heng hem, by the lawe.

Upon his beere ay lith this innocent
Biforn the chief auter, whil masse laste,
And after that, the abbot with his covent
Han sped hem for to burien hym ful faste,
And whan they hooly water on hym caste,
Yet spak this child, whan spreynd was hooly water,
And song 'O Alma redemptoris mater.'

This abbot, which that was an hooly man,
As monkes been-or elles oghte be-
This yonge child, 'and, as by wey of kynde,
I sholde have dyed, ye, longe tyme agon,
But Jesu Crist, as ye in bookes fynde,
Wil that his glorie laste and be in mynde,
And for the worship of his mooder deere,
Yet may I synge 'O Alma' loude and cleere.

This welle of mercy, Cristes mooder swete,
I loved alwey as after my konnynge;
And whan that I my lyf sholde forlete,
To me she cam, and bad me for to synge
This antheme, verraily, in my deyynge,
As ye han herd, and whan that I hadde songe,
Me thoughte she leyde a greyn upon my tonge.

Wherfore I synge, and synge I moot certeyn
In honour of that blisful mayden free,
Til fro my tonge oftaken is the greyn.
And afterward thus seyde she to me,
`My litel child, now wol I fecche thee,
Whan that the greyn is fro thy tonge ytake;
Be nat agast, I wol thee nat forsake.''

This hooly monk, this Abbot, hym meene I,
His tonge out-caughte, and took awey the greyn,
And he yaf up the goost ful softely;
And whan this Abbot hadde this wonder seyn,
Hise salte teeris trikled doun as reyn,
And gruf he fil al plat upon the grounde,
And stille he lay, as he had been ybounde.

The covent eek lay on the pavement,
Wepynge, and heryen Cristes mooder deere.
And after that they ryse, and forth been went,
And tooken awey this martir from his beere,
And in a temple of marbul stones cleere
Enclosen they his litel body sweete.
Ther he is now, God leve us for to meete!

O yonge Hugh of Lyncoln, slayn also
With cursed Jewes, as it is notable,
For it nis but a litel while ago,
Preye eek for us, we synful folk unstable,
That of his mercy God so merciable
On us his grete mercy multiplie,
For reverence of his mooder Marie. Amen.

Heere is ended the Prioresses Tale.

poem by Geoffrey Chaucer
Submitted by Poetry Lover
Vote! | Copy!

The Floure of Curtesye

In Feverier, whan the frosty moone
Was horned, ful of Phebus firy lyght,
And that she gan to reyse her streames sone,
Saynt Valentyne, upon thy blisful nyght
Of dutie whan glad is every wight,
And foules chese, to voyde her olde sorowe,
Everyche his make, upon the next morowe,

The same tyme, I herde a larke synge
Ful lustely, agayne the morowe gray:
'Awake, ye lovers, out of your slombringe,
This glad morowe, in al the haste ye may!
Some observaunce dothe unto this day,
Your choyse agen of herte to renewe,
In confyrmyng forever to be trewe.

'And ye that be, of chosyng, at your large
This lusty day, by custome of nature,
Take upon you the blisful holy charge
To serve love, whyle your lyfe may dure,
With herte, body, and al your besy cure,
Forevermore, as Venus and Cipride
For you disposeth, and the god Cupyde.

'For joye owe we playnly to obey
Unto this lordes mighty ordynaunce,
And, mercylesse, rather forto dye,
Than ever in you be founden varyaunce;
And though your lyfe be medled with grevaunce,
And, at your herte, closed be your wounde,
Beth alway one, there as ye are bounde.'

That whan I had herde and lysted longe,
With devoute herte, the lusty melodye
Of this hevenly comfortable songe,
So agreable as by ermonye,
I rose anon, and faste gan me hye
Towarde a grove, and the way take,
Foules to sene everyche chose his make.

And yet I was ful thursty in languisshyng;
Myn ague was so fervent in his hete,
Whan Aurora, for drery complaynyng,
Can distyl her chrystal teeres wete
Upon the soyle with sylver dewe so swete;
For she durste, for shame, not apere
Under the lyght of Phebus beames clere.

And so, for anguysshe of my paynes kene,
And for constraynte of my sighes sore,
I set me downe under a laurer grene
Ful pitously; and alway more and more,
As I behelde into the holtes hore,
I gan complayne myn inwarde deedly smerte,
That aye so sore crampisshed myn herte.

And whyle that I, in my drery payne
Sate and behelde, aboute on every tre
The foules sytte, alway twayne and twayne,
Than thought I thus: 'Alas, what may this be,
That every foule hath his lyberté
Frely to chose, after his desyre,
Everyche his make thus, fro yere to yere?

'The sely wrenne, the tytemose also,
The lytel redbrest, have free election
To flyen yfere and togyther go
Where as hem lyst, aboute envyron,
As they of kynde have inclynacion,
And as Nature, empresse and gyde
Of every thyng, lyst to provyde.

But man alone, alas, the harde stounde!
Ful cruelly, by kyndes ordynaunce,
Constrayned is, and by statute bounde
And debarred, from al suche plesaunce.
What meneth this? What is this purveyaunce
Of God above, agayne al right of kynde,
Without cause, so narowe man to bynde?

'Thus may I sene, and playne, alas!
My woful houre and my disaventure,
That doulfully stonde in the same caas
So ferre behynde from al helth and cure.
My wounde abydeth lyke a sursanure;
For me fortune so felly lyste dispose,
My harme is hyd, that I dare not disclose.

'For I my herte have set in suche a place
Where I am never lykely forto spede,
So ferre I am hyndred from her grace
That, save Daunger, I have none other mede;
And thus, alas, I not who shal me rede,
Ne for myne helpe shape remedye,
For Male Bouche, and for false Envye.

'The whiche twayne aye stondeth in my wey
Malyciously, and false Suspection
Is very cause also that I dey,
Gynnyng and rote of my distruction,
So that I fele, in conclusyon,
With her traynes that they wol me shende
Of my labour, that dethe mote make an ende.

'Yet or I dye, with herte, wyl, and thought,
To God of Love this avowe I make:
As I best can, howe dere that it be bought,
Where so it be that I slepe or wake,
Whyle Boreas dothe the leaves shake,
As I have heyght plainly, tyl I sterve,
For wel or wo, that I shal her serve.

'And for her sake, nowe this holy tyme,
Saynt Valentyne, somwhat shal I write;
Although so be that I cannot ryme,
Nor curyously by no crafte endyte,
Yet lever I have that she put the wyte
In unconnyng than in neglygence,
Whatever I saye of her excellence.

'Whatever I say, it is of duté,
In sothfastnesse, and no presumpcion;
This I ensure to you that shal it se,
That it is al under correction,
What I reherce in commendacion
Of her, that I shal to you, as blyve,
So as I can, her vertues here discryve.

'Ryght by example as the somer sonne
Passeth the sterre with his beames shene,
And Lucyfer, amonge the skyes donne,
A-morowe sheweth to voyde nyghtes tene,
So verily, withouten any wene,
My lady passeth, whoso taketh hede,
Al tho alyve, to speke of womanhede.

'And as the ruby hath the soveraynté
Of ryche stones and the regalye,
And the rose of swetenesse and beauté
Of fresshe floures, without any lye,
Ryght so, in sothe, with her goodly eye,
She passeth al in bountie and fayrenesse,
Of maner eke, and of gentylnesse.

'For she is bothe the fayrest and the beste,
To reken al, in very sothfastnesse,
For every vertue is in her at reste;
And furthermore, to speke of stedfastnesse,
She is the rote, and of semelynesse
The very myrrour, and of governaunce,
To al example, withouten varyaunce.

'Of porte benygne, and wonder glad of chere,
Havyng evermore her trewe advertence
Alway to reason, so that her desyre
Is brideled aye by wytte and provydence;
Thereto of wytte and of hye prudence
She is the welle, aye devoyde of pride,
That unto vertue her selven is the gyde.

'And over this, in her dalyaunce
Lowly she is, discrete and secree,
And goodly gladde by attemperaunce,
That every wight, of hygh and lowe degré,
Are glad in herte with her forto be;
So that, shortly, if I shal not lye,
She named is The Floure of Curtesye.

'And there to speke of femynyté,
The leste mannysshe in comparyson,
Goodly abasshed, havyng aye pyté
Of hem that ben in trybulacion;
For she alone is consolacion
To al that arne in mischefe and in nede,
To comforte hem of her womanhede.

'And aye in vertue is her besy charge,
Sadde and demure, and but of wordes fewe;
Dredful also of tonges that ben large,
Eschewyng aye hem that lysten to hewe
Above her heed, her wordes for to shewe;
Dishonestly to speke of any wight -
She deedly hateth of hem to have a syght.

'The herte of whom so honest is and clene,
And her entent so faythful and entere
That she ne may, for al the worlde, sustene
To suffre her eeres any worde to here
Of frende nor foe, neyther ferre ne nere,
Amysse resowning that hynder shulde his name;1
And if she do, she wexeth reed for shame.

'So trewely in menyng she is in-sette,
Without chaungyng or any doublenesse,
For bountie and beautie are together knette
In her persone, under faythfulnesse;
For voyde she is of newfanglenesse,
In herte aye one, forever to persever
There she is sette, and never to dissever.

'I am to rude her vertues everychone
Connyngly to discryve and write;
For wel ye wote, colour have I none,
Lyke her discrecion craftely to endyte,
For what I say, al it is to lyte;
Wherfore to you thus I me excuse,
That I aqueynted am not with no muse.

'By rethorike my style to governe
In her preise and commendacion,
I am to blynde so hylye to discerne
Of her goodnesse to make discrypcion,
Save thus I say, in conclusyon,
If that I shal shortly her commende,
In her is naught that Nature can amende.

'For good she is, lyke to Polycene,
And in fayrenesse to the quene Helayne,
Stedfast of herte, as was Dorigene,
And wyfely trouthe, if I shal not fayne,
In constaunce eke and faythe, she may attayne
To Cleopatre, and therto as secree
As was of Troye the whyte Antygoné.

'As Hester meke, lyke Judith of prudence,
Kynde as Alcest or Marcia Catoun,
And to Grisylde lyke in pacience,
And Ariadné of discrecioun,
And to Lucrece, that was of Rome toun,
She may be lykened as for honesté,
And for her faythe, unto Penelopé.

'To fayre Phyllis and to Hipsyphilee,
For innocence and for womanhede,
For semelynesse unto Canacé;
And over this, to speke of goodlyhede,
She passeth al that I can of rede,
For worde and dede, that she naught ne fal,
Acorde in vertue, and her werkes al.

'For though that Dydo with wytte sage
Was in her tyme stedfast to Enee,
Of hastynesse yet she dyd outrage,
And so for Jason dyd also Medee;
But my lady is so avysee
That, bountie and beautie bothe in her demeyne,
She maketh bountie alway soverayne.

'This is to meane, bountie gothe afore,
Lad by prudence, and hath the soveraynté,
And beautie foloweth, ruled by her lore,
That she ne fende her in no degré;
So that, in one, this goodly fresshe fre,
Surmountyng al, withouten any were,
Is good and fayre in one persone yfere.

'And though that I, for very ignoraunce,
Ne may discryve her vertues by and by,
Yet on this day, for a remembraunce,
Onely supported under her mercy,
With quakyng honde, I shal ful humbly
To her hynesse, my rudenesse forto quyte,
A lytel balade here byneth endyte,

'Ever as I can supprise in myn herte,
Alway with feare, betwyxt drede and shame,
Leste out of lose any worde asterte
In this metre, to make it seme lame;
Chaucer is deed, that had suche a name
Of fayre makyng, that was, without wene,
Fayrest in our tonge, as the laurer grene.

'We may assay forto countrefete
His gay style, but it wyl not be!
The welle is drie with the lycoure swete,
Bothe of Clye and of Caliopé;
And, first of al, I wol excuse me
To her that is grounde of goodlyhede,
And thus I say untyl her womanhede:

Balade Symple

''With al my might and my best entent,
With al the faythe that mighty God of kynde
Me gave syth he me soule and knowyng sent,
I chese, and to this bonde ever I me bynde,
To love you best whyle I have lyfe and mynde.
Thus herde I foules in the daunynge
Upon the day of Saynte Valentyne synge.

''Yet chese I, at the begynnyng, in this entent,
To love you, though I no mercy fynde,
And if you lyste I dyed, I wolde assent,
As ever twynne I quicke out of this lynde;
Suffyseth me to sene your fethers ynde.
Thus herde I foules in the mornynge
Upon the daye of Saynte Valentyne synge.

''And over this, myne hertes luste to bente,
In honour onely of the wodde-bynde,
Holy I geve, never to repente
In joye or wo, where so that I wynde
Tofore Cupyde, with his eyen blynde.
The foules al, whan Tytan dyd springe,
With devoute hert, me thought I herde synge.''

Lenvoye

Princesse of beautie, to you I represent
This symple dyté, rude as in makynge,
Of herte and wyl faythful in myn entent,
Lyke as this day foules herde I synge.

Here endeth the Floure of Curtesy.

poem by John Lydgate
Submitted by Poetry Lover
Vote! | Copy!

The Canterbury Tales; The Clerkes Tale (a)

THE CLERKES TALE - PROLOGUE

Heere folweth the Prologe of the clerkes tale of Oxenford.

'Sire clerk of Oxenford,' oure Hooste sayde,
'Ye ryde as coy and stille as dooth a mayde,
Were newe spoused, sittynge at the bord.
This day ne herde I of youre tonge a word.
I trowe ye studie about som sophyme;

But Salomon seith, `every thyng hath tyme.'
For Goddes sake, as beth of bettre cheere;
It is no tyme for to studien heere,
Telle us som myrie tale, by youre fey.
For what man that is entred in a pley,

He nedes moot unto the pley assente;
But precheth nat as freres doon in Lente,
To make us for oure olde synnes wepe,
Ne that thy tale make us nat to slepe.
Telle us som murie thyng of aventures;

Youre termes, youre colours, and youre figures,
Keep hem in stoor, til so be that ye endite
Heigh style, as whan that men to kynges write.
Speketh so pleyn at this tyme, we yow preye,
That we may understonde what ye seye.'

This worthy clerk benignely answerde,
'Hooste,' quod he, 'I am under youre yerde.
Ye han of us as now the governance;
And therfore wol I do yow obeisance
As fer as resoun axeth, hardily.

I wol yow telle a tale, which that I
Lerned at Padwe of a worthy clerk,
As preved by his wordes and his werk.
He is now deed, and nayled in his cheste;
I prey to God so yeve his soule reste.

Fraunceys Petrark, the lauriat poete,
Highte this clerk, whos rethorike sweete
Enlumyned al Ytaille of poetrie,
As Lynyan dide of philosophie,
Or lawe, or oother art particuler.

But deeth, that wol nat suffre us dwellen heer
But as it were a twynklyng of an eye,
Hem bothe hath slayn, and alle shul we dye.
But forth to tellen of this worthy man,
That taughte me this tale as I bigan,

I seye, that first with heigh stile he enditeth
Er he the body of his tale writeth,
A prohemye in the which discryveth he
Pemond, and of Saluces the contree,
And speketh of Apennyn, the hilles hye,

That been the boundes of Westlumbardye;
And of Mount Vesulus in special,
Where as the Poo out of a welle smal
Taketh his firste spryngyng and his sours,
That estward ay encresseth in his cours

To Emeleward, to Ferrare, and Venyse;
The which a long thyng were to devyse.
And trewely, as to my juggement,
Me thynketh it a thyng impertinent,
Save that he wole convoyen his mateere;
But this his tale, which that ye may heere.'

Part 23

THE CLERKES TALE

Heere bigynneth the tale of the Clerk of Oxenford.

Ther is, at the west syde of Ytaille,
Doun at the roote of Vesulus the colde,
A lusty playne, habundant of vitaille,
Where many a tour and toun thou mayst biholde
That founded were in tyme of fadres olde,
And many another delitable sighte,
And Saluces this noble contree highte.

A markys whilom lord was of that lond,
As were hise worthy eldres hym bifore,
And obeisant and redy to his hond
Were alle hise liges, bothe lasse and moore.
Thus in delit he lyveth, and hath doon yoore,
Biloved and drad thurgh favour of Fortune,
Bothe of hise lordes and of his commune.

Therwith he was, to speke as of lynage,
The gentilleste yborn of Lumbardye;
A fair persone, and strong, and yong of age,
And ful of honour and of curteisye,
Discreet ynogh his contree for to gye,
Save that in somme thynges that he was to blame,
And Walter was this yonge lordes name.

I blame hym thus, that he considereth noght
In tyme comynge what hym myghte bityde,
But in his lust present was al his thoght,
As for to hauke and hunte on every syde.
Wel ny alle othere cures leet he slyde;
And eek he nolde,-and that was worst of alle-
Wedde no wyf, for noght that may bifalle.

Oonly that point his peple bar so soore,
That flokmeele on a day they to hym wente,
And oon of hem, that wisest was of loore,
Or elles that the lord best wolde assente,
That he sholde telle hym what his peple mente,
Or elles koude he shewe wel swich mateere,
He to the markys seyde as ye shul heere:

'O noble Markys, youre humanitee
Asseureth us, and yeveth us hardinesse,
As ofte as tyme is of necessitee
That we to yow mowe telle oure hevynesse.
Accepteth, lord, now for youre gentillesse
That we with pitous herte unto yow pleyne,
And lat youre eres nat my voys desdeyne,

Al have I noght to doone in this mateere
Moore than another man hath in this place;
Yet for as muche as ye, my lord so deere,
Han alwey shewed me favour and grace,
I dar the bettre aske of yow a space
Of audience to shewen oure requeste,
And ye, my lord, to doon right as yow leste.

For certes, lord, so wel us liketh yow
And al youre werk, and evere han doon that we
Ne koude nat us-self devysen how
We myghte lyven in moore felicitee,
Save o thyng, lord, if it youre wille be,
That for to been a wedded man yow leste,
Thanne were youre peple in sovereyn hertes reste.

Boweth youre nekke under that blisful yok
Of soveraynetee, noght of servyse,
Which that men clepeth spousaille or wedlock;
And thenketh, lord, among youre thoghtes wyse
How that oure dayes passe in sondry wyse,
For thogh we slepe, or wake, or rome, or ryde,
Ay fleeth the tyme, it nyl no man abyde.

And thogh youre grene youthe floure as yit,
In crepeth age alwey, as stille as stoon,
And deeth manaceth every age, and smyt
In ech estaat, for ther escapeth noon;
And al so certein as we knowe echoon
That we shul deye, as uncerteyn we alle
Been of that day, whan deeth shal on us falle.

Accepteth thanne of us the trewe entente
That nevere yet refuseden thyn heeste;
And we wol, lord, if that ye wole assente,
Chese yow a wyf in short tyme atte leeste,
Born of the gentilleste and of the meeste
Of al this land, so that it oghte seme
Honour to God, and yow, as we kan deeme.

Delivere us out of al this bisy drede,
And taak a wyf for hye Goddes sake,
For if it so bifelle, as God forbede,
That thurgh your deeth your lyne sholde slake,
And that a straunge successour sholde take
Youre heritage, o wo were us alyve!
Wherfore we pray you hastily to wyve.'

Hir meeke preyere and hir pitous cheere
Made the markys herte han pitee.
'Ye wol,' quod he, 'myn owene peple deere,
To that I nevere erst thoughte, streyne me.
I me rejoysed of my liberte,
That seelde tyme is founde in mariage.
Ther I was free, I moot been in servage.

But nathelees I se youre trewe entente,
And truste upon youre wit, and have doon at;
Wherfore of my free wyl I wole assente
To wedde me, as soone as evere I may.
But ther as ye han profred me this day
To chese me a wyf, I yow relesse
That choys, and prey yow of that profre cesse.

For God it woot, that children ofte been
Unlyk hir worthy eldres hem bifore.
Bountee comth al of God, nat of the streen,
Of which they been engendred and ybore.
I truste in Goddes bontee; and therfore
My mariage, and myn estaat and reste,
I hym bitake, he may doon as hym leste.

Lat me allone in chesynge of my wyf,
That charge upon my bak I wole endure;
But I yow preye, and charge upon youre lyf
That what wyf that I take, ye me assure
To worshipe hir, whil that hir lyf may dure,
In word and werk, bothe heere and everywheere,
As she an emperoures doghter weere.

And forthermoore, this shal ye swere, that ye
Agayn my choys shul neither grucche ne stryve,
For sith I shal forgoon my libertee
At youre requeste, as evere moot I thryve,
Ther as myn herte is set, ther wol I wyve!
And but ye wole assente in this manere,
I prey yow, speketh namoore of this matere.'

With hertely wyl they sworen and assenten
To al this thyng, ther seyde no wight nay,
Bisekynge hym of grace er that they wenten,
That he wolde graunten hem a certein day
Of his spousaille, as soone as evere he may,
For yet alwey the peple somwhat dredde
Lest that this markys no wyf wolde wedde.

He graunted hem a day, swich as hym leste,
On which he wolde be wedded sikerly,
And seyde he dide al this at hir requeste;
And they with humble entente, buxomly,
Knelynge upon hir knees ful reverently
Hym thonken alle, and thus they han an ende
Of hir entente, and hoom agayn they wende.

And heerupon he to hise officeres
Comaundeth for the feste to purveye,
And to hise privee knyghtes and squieres
Swich charge yaf, as hym liste on hem leye.
And they to his comandement obeye,
And ech of hem dooth al his diligence
To doon unto the feeste reverence:

Explicit prima pars.

Incipit secunda pars.

Noght fer fro thilke paleys honurable
Ther as this markys shoop his mariage,
Ther stood a throop, of site delitable,

In which that povre folk of that village
Hadden hir beestes and hir herbergage,
And of hir lobour tooke hir sustenance,
After that the erthe yaf hem habundance.

Amonges thise povre folk ther dwelte a man
Which that was holden povrest of hem alle;
(But hye God somtyme senden kan
His grace into a litel oxes stalle)
Janicula men of that throop hym calle.
A doghter hadde he, fair ynogh to sighte,
And Grisildis this yonge mayden highte.

But for to speke of vertuous beautee,
Thanne was she oon the faireste under sonne,
For povreliche yfostred up was she,
No likerous lust was thurgh hir herte yronne.
Wel ofter of the welle than of the tonne
She drank, and for she wolde vertu plese
She knew wel labour but noon ydel ese.

But thogh this mayde tendre were of age,
Yet in the brest of hire virginitee
Ther was enclosed rype and sad corage;
And in greet reverence and charitee
Hir olde povre fader fostred shee.
A fewe sheepe, spynnynge on feeld she kepte,
-She wolde noght been ydel, til she slepte.

And whan she homward cam, she wolde brynge
Wortes, or othere herbes tymes ofte,
The whiche she shredde and seeth for hir lyvynge,
And made hir bed ful harde and no thyng softe;
And ay she kepte hir fadres lyf on lofte
With everich obeisaunce and diligence
That child may doon to fadres reverence.

Upon Grisilde, this povre creature,
Ful ofte sithe this markys caste his eye,
As he on huntyng rood paraventure.
And whan it fil that he myghte hire espye,
He noght with wantowne lookyng of folye
Hise eyen caste on hir, but in sad wyse,
Upon hir chiere he wolde hym ofte avyse,

Commendynge in his herte hir wommanhede
And eek hir vertu, passynge any wight
Of so yong age, as wel in chiere as dede.
For thogh the peple hadde no greet insight
In vertu, he considered ful right
Hir bountee, and disposed that he wolde
Wedde hir oonly, if evere he wedde sholde.

The day of weddyng cam, but no wight kan
Telle what womman that it sholde be,
For which merveille wondred many a man,
And seyden, whan that they were in privetee,
'Wol nat oure lord yet leve his vanytee?
Wol he nat wedde? allas, allas, the while!
Why wole he thus hymself and us bigile?'

But nathelees this markys hath doon make
Of gemmes set in gold and in asure
Brooches and rynges, for Grisildis sake,
And of hir clothyng took he the mesure,
By a mayde lyk to hir stature,
And eek of othere ornementes alle
That unto swich a weddyng sholde falle.

The time of undren of the same day
Approcheth, that this weddyng sholde be;
And al the paleys put was in array,
Bothe halle and chambres, ech in his degree;
Houses of office stuffed with plentee
Ther maystow seen, of deyntevous vitaille,
That may be founde as fer as last Ytaille.

This roial markys, richely arrayed,
Lordes and ladyes in his compaignye,
The whiche that to the feeste weren yprayed,
And of his retenue the bachelrye,
With many a soun of sondry melodye
Unto the village, of the which I tolde,
In this array the righte wey han holde.

Grisilde (of this, God woot, ful innocent,
That for hir shapen was al this array)
To fecchen water at a welle is went,
And cometh hoom as soone as ever she may;
For wel she hadde herd seyd, that thilke day
The markys sholde wedde, and if she myghte,
She wolde fayn han seyn som of that sighte.

She thoghte, 'I wole with othere maydens stonde,
That been my felawes, in oure dore, and se
The markysesse, and therfore wol I fonde
To doon at hoom as soone as it may be
The labour, which that longeth unto me,
And thanne I may at leyser hir biholde,
If she this wey unto the castel holde.'

And as she wolde over hir thresshfold gon
The markys cam and gan hire for to calle,
And she set doun hir water pot anon
Biside the thresshfold in an oxes stalle,
And doun up-on hir knes she gan to falle,
And with sad contenance kneleth stille,
Til she had herd what was the lordes will.

This thoghtful markys spak unto this mayde
Ful sobrely, and seyde in this manere,
'Where is youre fader, O Grisildis?' he sayde,
And she with reverence in humble cheere
Answerde, 'Lord, he is al redy heere.'
And in she gooth, withouten lenger lette,
And to the markys she hir fader fette.

He by the hand thanne took this olde man,
And seyde thus, whan he hym hadde asyde,
'Janicula, I neither may ne kan
Lenger the plesance of myn herte hyde;
If that thou vouchsauf, what so bityde,
Thy doghter wol I take, er that I wende,
As for my wyf unto hir lyves ende.

Thou lovest me, I woot it wel certeyn,
And art my feithful lige man ybore,
And all that liketh me, I dar wel seyn,
It liketh thee; and specially therfore
Tel me that poynt that I have seyd bifore,
If that thou wolt unto that purpos drawe,
To take me as for thy sone-in-lawe.'

This sodeyn cas this man astonyed so,
That reed he wax abayst and al quakyng
He stood, unnethes seyde he wordes mo,
But oonly thus, 'Lord,' quod he, 'my willynge
Is as ye wole, ne ayeyns youre likynge
I wol no thyng, ye be my lord so deere;
Right as yow lust governeth this mateere.'

'Yet wol I,' quod this markys softely,
'That in thy chambre I and thou and she
Have a collacioun, and wostow why?
For I wol axe, if it hir wille be
To be my wyf, and reule hir after me;
And al this shal be doon in thy presence,
I wol noght speke out of thyn audience.'

And in the chambre whil they were aboute
Hir tretys which as ye shal after heere,
The peple cam unto the hous withoute,
And wondred hem in how honeste manere
And tentifly she kepte hir fader deere.
But outrely Grisildis wondre myghte
For nevere erst ne saugh she swich a sighte.

No wonder is thogh that she were astoned
To seen so greet a grest come in that place;
She nevere was to swiche gestes woned,
For which she looked with ful pale face-
But shortly forth this tale for to chace,
Thise arn the wordes that the markys sayde
To this benigne verray feithful mayde.

'Grisilde,' he seyde, 'ye shal wel understonde
It liketh to youre fader and to me
That I yow wedde, and eek it may so stonde,
As, I suppose, ye wol that it so be.
But thise demandes axe I first,' quod he,
'That sith it shal be doon in hastif wyse,
Wol ye assente, or elles yow avyse?

I seye this, be ye redy with good herte
To al my lust, and that I frely may,
As me best thynketh, do yow laughe or smerte,
And nevere ye to grucche it nyght ne day,
And eek whan I sey ye, ne sey nat nay,
Neither by word, ne frownyng contenance?
Swere this, and heere I swere yow alliance.'

Wondrynge upon this word, quakynge for drede,
She seyde, 'Lord, undigne and unworthy
Am I to thilke honour, that ye me beede,
But as ye wole yourself, right so wol I.
And heere I swere, that nevere willyngly
In werk ne thoght I nyl yow disobeye,
For to be deed, though me were looth to deye.'

'This is ynogh, Grisilde myn,' quod he,
And forth he gooth with a ful sobre cheere
Out at the dore, and after that cam she;
And to the peple he seyde in this manere,
'This is my wyf,' quod he, 'that standeth heere;
Honoureth hir, and loveth hir, I preye,
Whoso me loveth; ther is namoore to seye.'

And for that nothyng of hir olde geere
She sholde brynge into his hous, he bad
That wommen sholde dispoillen hir right theere;-
Of which thise ladyes were nat right glad
To handle hir clothes, wherinne she was clad-
But nathelees, this mayde bright of hewe
Fro foot to heed they clothed han al newe.

Hir heris han they kembd, that lay untressed
Ful rudely, and with hir fyngres smale
A corone on hir heed they han ydressed,
And sette hir ful of nowches grete and smale.
Of hir array what sholde I make a tale?
Unnethe the peple hire knew for hir fairnesse
Whan she translated was in swich richesse.

This markys hath hir spoused with a ryng
Broght for the same cause, and thanne hir sette
Upon an hors, snow-whit and wel amblyng,
And to his paleys, er he lenger lette,
With joyful peple that hir ladde and mette
Convoyed hir; and thus the day they spende
In revel, til the sonne gan descende.

And shortly forth this tale for to chace,
I seye, that to this newe markysesse
God hath swich favour sent hir of his grace,
That it ne semed nat by liklynesse
That she was born and fed in rudenesse
As in a cote or in an oxe-stalle,
But norissed in an emperoures halle.

To every wight she woxen is so deere
And worshipful, that folk ther she was bore
And from hir birthe knewe hir yeer by yeere,
Unnethe trowed they, but dorste han swore
That she to Janicle, of which I spak bifore,
She doghter nere, for as by conjecture,
Hem thoughte she was another creature.

For though that evere vertuous was she,
She was encressed in swich excellence,
Of thewes goode, yset in heigh bountee,
And so discreet and fair of eloquence,
So benigne, and so digne of reverence,
And koude so the peples herte embrace,
That ech hir lovede, that looked on hir face.

Noght oonly of Saluces in the toun
Publiced was the bountee of hir name,
But eek biside in many a regioun,
If oon seide wel, another seyde the same;
So spradde of hir heighe bountee the fame
That men and wommen, as wel yonge as olde,
Goon to Saluce upon hir to biholde.

Thus Walter lowely, nay! but roially
Wedded with fortunat honestetee,
In Goddes pees lyveth ful esily
At hoom, and outward grace ynogh had he,
And for he saugh that under low degree
Was ofte vertu hid, the peple hym heelde
A prudent man, and that is seyn ful seelde.

Nat oonly this Grisildis thurgh hir wit
Koude al the feet of wyfly humblenesse,
But eek, whan that the cas required it,
The commune profit koude she redresse.
Ther nas discord, rancour, ne hevynesse
In al that land, that she ne koude apese,
And wisely brynge hem alle in reste and ese.

Though that hir housbonde absent were anon
If gentil men, or othere of hir contree
Were wrothe, she wolde bryngen hem aton.
So wise and rype wordes hadde she,
And juggementz of so greet equitee,
That she from hevene sent was, as men wende,
Peple to save and every wrong tamende.

Nat longe tyme after that this Grisild
Was wedded, she a doghter hath ybore-
Al had hir levere have born a man child;
Glad was this markys and the folk therfore,
For though a mayde child coome al bifore,
She may unto a knave child atteyne
By liklihede, syn she nys nat bareyne.

Explicit secunda pars.

Incipit tercia pars.

Ther fil, as it bifalleth tymes mo,
Whan that this child had souked but a throwe,
This markys in his herte longeth so
To tempte his wyf, hir sadnesse for to knowe,
That he ne myghte out of his herte throwe
This merveillous desir his wyf tassaye.
Nedelees, God woot, he thoghte hir for taffraye.

He hadde assayed hir ynogh bifore,
And foond hir evere good; what neded it
Hir for to tempte and alwey moore and moore?
Though som men preise it for a subtil wit,
But as for me, I seye that yvele it sit
To assaye a wyf, whan that it is no nede,
And putten hir in angwyssh and in drede.

For which this markys wroghte in this manere;
He cam allone a nyght, ther as she lay,
With stierne face and with ful trouble cheere,
And seyde thus, 'Grisilde,' quod he, 'that day
That I yow took out of your povere array,
And putte yow in estaat of heigh noblesse,
Ye have nat that forgeten, as I gesse.

I seye, Grisilde, this present dignitee
In which that I have put yow, as I trowe
Maketh yow nat foryetful for to be
That I yow took in povre estaat ful lowe
For any wele ye moot youreselven knowe.
Taak heede of every word that y yow seye,
Ther is no wight that hereth it but we tweye.

Ye woot yourself wel how that ye cam heere
Into this hous, it is nat longe ago.
And though to me that ye be lief and deere,
Unto my gentils ye be no thyng so.
They seyn, to hem it is greet shame and wo
For to be subgetz, and to been in servage,
To thee that born art of a smal village.

And namely, sith thy doghter was ybore,
Thise wordes han they spoken, doutelees;
But I desire, as I have doon bifore,
To lyve my lyf with hem in reste and pees.
I may nat in this caas be recchelees,
I moot doon with thy doghter for the beste,
Nat as I wolde, but as my peple leste.

And yet God woot, this is ful looth to me!
But nathelees, withoute youre wityng
I wol nat doon, but this wol I,' quod he,
'That ye to me assente as in this thyng.
Shewe now youre pacience in youre werkyng,
That ye me highte and swore in youre village,
That day that maked was oure mariage.'

Whan she had herd al this, she noght ameved
Neither in word, or chiere, or countenaunce;
For as it semed she was nat agreved.
She seyde, 'Lord, al lyth in youre plesaunce,
My child, and I, with hertely obeisaunce
Been youres al, and ye mowe save and spille
Your owene thyng, werketh after youre wille.

Ther may no thyng, God so my soule save,
Liken to yow, that may displese me,
Ne I ne desire no thyng for to have,
Ne drede for to leese save oonly yee;
This wyl is in myn herte, and ay shal be;
No lengthe of tyme or deeth may this deface,
Ne chaunge my corage to another place.'

Glad was this markys of hir answeryng,
But yet he feyned as he were nat so.
Al drery was his cheere and his lookyng,
Whan that he sholde out of the chambre go.
Soone after this, a furlong wey or two,
He prively hath toold al his entente
Unto a man, and to his wyf hym sente.

A maner sergeant was this privee man,
The which that feithful ofte he founden hadde
In thynges grete, and eek swich folk wel kan
Doon execucioun on thynges badde.
The lord knew wel that he hym loved and dradde;-
And whan this sergeant wiste the lordes wille,
Into the chambre he stalked hym ful stille.

'Madame,' he seyde, 'ye moote foryeve it me
Though I do thyng to which I am constreyned,
Ye been so wys, that ful wel knowe ye
That lordes heestes mowe nat been yfeyned,
They mowe wel been biwailled and compleyned,
But men moote nede unto hir lust obeye;
And so wol I, ther is namoore to seye.

This child I am comanded for to take.'
And spak namoore, but out the child he hente
Despitously, and gan a cheere make
As though he wolde han slayn it er he wente.
Grisildis moot al suffren and consente,
And as a lamb she sitteth meke and stille,
And leet this crueel sergeant doon his wille.

Suspecious was the diffame of this man,
Suspect his face, suspect his word also,
Suspect the tyme in which he this bigan.
Allas, hir doghter that she loved so!
She wende he wolde han slawen it right tho;
But nathelees she neither weep ne syked,
Consentynge hir to that the markys lyked.

But atte laste speken she bigan,
And mekely she to the sergeant preyde,
So as he was a worthy gentil man,
That she moste kisse hire child, er that it deyde,
And in hir barm this litel child she leyde,
With ful sad face, and gan the child to kisse,
And lulled it, and after gan it blisse.

And thus she seyde in hir benigne voys,
'Fareweel, my child, I shal thee nevere see,
But sith I thee have marked with the croys
Of thilke fader blessed moote thou be,
That for us deyde upon a croys of tree.
Thy soule, litel child, I hym bitake,
For this nyght shaltow dyen for my sake.'

I trowe, that to a norice in this cas
It had been hard this reuthe for to se;
Wel myghte a mooder thanne han cryd `allas!'
But nathelees so sad and stidefast was she,
That she endured al adversitee,
And to the sergeant mekely she sayde,
'Have heer agayn your litel yonge mayde.'

'Gooth now,' quod she, 'and dooth my lordes heeste;
But o thyng wol I prey yow of youre grace,
That, but my lord forbad yow atte leeste,
Burieth this litel body in son place
That beestes ne no briddes it torace.'
But he no word wol to that purpos seye,
But took the child, and wente upon his weye.

This sergeant cam unto his lord ageyn,
And of Grisildis wordes and hir cheere
He tolde hym point for point, in short and pleyn,
And hym presenteth with his doghter deere.
Somwhat this lord hath routhe in his manere,
But nathelees his purpos heeld he stille,
As lordes doon whan they wol han hir wille;

And bad his sergeant, that he pryvely
Sholde this child ful softe wynde and wrappe,
With alle circumstances tendrely,
And carie it in a cofre or in a lappe,
But upon peyne his heed of for to swappe
That no man sholde knowe of his entente,
Ne whenne he cam, ne whider that he wente.

But at Boloigne to his suster deere,
That thilke tyme of Panik was Countesse,
He sholde it take, and shewe hir this mateere,
Bisekynge hir to doon hir bisynesse
This child to fostre in alle gentillesse,
And whos child that it was, he bad hire hyde
From every wight, for oght that may bityde.

The sergeant gooth, and hath fulfild this thyng,
But to this markys now retourne we,
For now gooth he ful faste ymaginyng,
If by his wyves cheere he myghte se
Or by hir word aperceyve that she
Were chaunged, but he nevere hir koude fynde,
But evere in oon ylike sad and kynde.

As glad, as humble, as bisy in servyse,
And eek in love, as she was wont to be,
Was she to hym in every maner wyse,
Ne of hir doghter noght a word spak she.
Noon accident for noon adversitee
Was seyn in hir, ne nevere hir doghter name
Ne nempned she, in ernest nor in game.

poem by Geoffrey Chaucer
Submitted by Poetry Lover
Vote! | Copy!

Fortune

This wrecched worldes transmutacioun,
As wele or wo, now povre and now honour,
Withouten ordre or wys discrecioun
Governed is by Fortunes errour.
But natheles, the lak of hir favour
Ne may nat don me singen though I dye,
Jay tout perdu mon temps et mon labour;
For fynally, Fortune, I thee defye.

Yit is me left the light of my resoun
To knowen frend fro fo in thy mirour.
So muchel hath yit thy whirling up and doun
Ytaught me for to knowen in an hour.
But trewely, no force of thy reddour
To him that over himself hath the maystrye.
My suffisaunce shal be my socour,
For fynally Fortune, I thee defye.

O Socrates, thou stidfast champioun,
She never mighte be thy tormentour;
Thou never dreddest hir oppressioun,
Ne in hir chere founde thou no savour.
Thou knewe wel the deceit of hir colour,
And that hir moste worshipe is to lye.
I knowe hir eek a fals dissimulour,
For fynally, Fortune, I thee defye!

La respounse de Fortune au Pleintif

No man is wrecched but himself it wene,
And he that hath himself hath suffisaunce.
Why seystow thanne I am to thee so kene,
That hast thyself out of my governaunce?
Sey thus: 'Graunt mercy of thyn haboundaunce
That thou hast lent or this.' Why wolt thou stryve?
What wostow yit how I thee wol avaunce?
And eek thou hast thy beste frend alyve.

I have thee taught divisioun bitwene
Frend of effect and frend of countenaunce;
Thee nedeth nat the galle of noon hyene,
That cureth eyen derked for penaunce;
Now seestow cleer that were in ignoraunce.
Yit halt thyn ancre and yit thou mayst arryve
Ther bountee berth the keye of my substaunce,
And eek thou hast thy beste frend alyve.

How many have I refused to sustene
Sin I thee fostred have in thy plesaunce.
Woltow than make a statut on thy quene
That I shal been ay at thyn ordinaunce?
Thou born art in my regne of variaunce,
Aboute the wheel with other most thou dryve.
My lore is bet than wikke is thy grevaunce,
And eek thou hast thy beste frend alyve.

La respounse du Pleintif countre Fortune

Thy lore I dampne; it is adversitee.
My frend maystow nat reven, blind goddesse;
That I thy frendes knowe, I thanke it thee.
Tak hem agayn, lat hem go lye on presse.
The negardye in keping hir richesse
Prenostik is thou wolt hir tour assayle;
Wikke appetyt comth ay before syknesse.
In general, this reule may nat fayle.

La respounse de Fortune countre le Pleintif

Thou pinchest at my mutabilitee
For I thee lente a drope of my richesse,
And now me lyketh to withdrawe me.[Riv., p. 653]
Why sholdestow my realtee oppresse?
The see may ebbe and flowen more or lesse;
The welkne hath might to shyne, reyne, or hayle;
Right so mot I kythen my brotelnesse.
In general, this reule may nat fayle.

Lo, th'execucion of the majestee
That al purveyeth of his rightwysnesse,
That same thing 'Fortune'' clepen ye,
Ye blinde bestes ful of lewdednesse.
The hevene hath propretee of sikernesse.
This world hath ever resteles travayle;
Thy laste day is ende of myn intresse.
In general, this reule may nat fayle.

Lenvoy de Fortune

Princes, I prey you of your gentilesse
Lat nat this man on me thus crye and pleyne,
And I shal quyte you your bisinesse
At my requeste, as three of you or tweyne,
And but you list releve him of his peyne,
Preyeth his beste frend of his noblesse
That to som beter estat he may atteyne.

poem by Geoffrey Chaucer
Submitted by Poetry Lover
Vote! | Copy!

Pilgrimage In Search Of Do-Well

Thus y-robed in russet . romed I aboute
Al in a somer seson . for to seke Do-wel;
And frayned full ofte . of folk that I mette
If any wight wiste . wher Do-wel was at inne;
And what man he myghte be . of many man I asked.
Was nevere wight, as I wente . that me wisse kouthe
Where this leode lenged, . lasse ne moore.
Til it bifel on a Friday . two freres I mette
Maisters of the Menours . men of grete witte.
I hailsed them hendely, . as I hadde y-lerned.
And preede them par charite, . er thei passed ferther,
If thei knew any contree . or costes as thei wente,
'Where that Do-wel dwelleth . dooth me to witene'.
For thei be men of this moolde . that moost wide walken,
And knowen contrees and courtes, . and many kynnes places,
Bothe princes paleises . and povere mennes cotes,
And Do-wel and Do-yvele . where thei dwelle bothe.
'Amonges us' quod the Menours, . 'that man is dwellynge,
And evere hath as I hope, . and evere shal herafter.'
'_Contra_', quod I as a clerc, . and comsed to disputen,
And seide hem soothly, . '_Septies in die cadit justus_'.
'Sevene sithes, seeth the book . synneth the rightfulle;
And who so synneth,' I seide, . 'dooth yvele, as me thynketh;
And Do-wel and Do-yvele . mowe noght dwelle togideres.
Ergo he nis noght alway . among you freres:
He is outher while ellis where . to wisse the peple.'
'I shal seye thee, my sone' . seide the frere thanne,
'How seven sithes the sadde man, . on a day synneth;
By a forbisne' quod the frere, . 'I shal thee faire showe.
Lat brynge a man in a boot, . amydde the brode watre;
The wynd and the water . and the boot waggyng,
Maketh the man many a tyme . to falle and to stonde;
For stonde he never so stif, . he stumbleth if he meve,
Ac yet is he saaf and sound, . and so hym bihoveth;
For if he ne arise the rather, . and raughte to the steere,
The wynd wolde with the water . the boot over throwe;
And thanne were his lif lost, . thorough lackesse of hymselve.
And thus it falleth,' quod the frere, . 'by folk here on erthe;
The water is likned to the world . that wanyeth and wexeth;
The goodes of this grounde arn like . to the grete wawes,
That as wyndes and wedres . walketh aboute;
The boot is likned to oure body . that brotel is of kynde,
That thorough the fend and the flesshe . and the frele worlde
Synneth the sadde man . a day seven sithes.
Ac dedly synne doth he noght, . for Do-wel hym kepeth;
And that is Charite the champion, . chief help ayein Synne;
For he strengtheth men to stonde, . and steereth mannes soule,
And though the body bowe . as boot dooth in the watre,
Ay is thi soul saaf, . but if thou wole thiselve
Do a deedly synne, . and drenche so thi soule,
God wole suffre wel thi sleuthe . if thiself liketh.
For he yaf thee a yeres-gyve, . to yeme wel thiselve,
And that is wit and free-wil, . to every wight a porcion,
To fleynge foweles, . to fisshes and to beastes:
Ac man hath moost thereof, . and moost is to blame,
But if he werch wel therwith, . as Do-wel hym techeth.'
'I have no kynde knowyng,' quod I, . 'to conceyven alle your wordes:
Ac if I may lyve and loke, . I shall go lerne bettre.'
'I bikenne thee Christ,' quod he, . 'that on cros deyde!'
And I seide 'the same . save you fro myschaunce,
And gyve you grace on this grounde . goode men to worthe!'
And thus I wente wide wher . walkyng myn one,
By a wilderness, . and by a wodes side:
Blisse of the briddes. . Broughte me a-slepe,
And under a lynde upon a launde . lened I a stounde,
To lythe the layes . the lovely foweles made,
Murthe of hire mowthes . made me ther to slepe;
The merveillouseste metels . mette me thanne
That ever dremed wight . in worlde, as I wene.
A muche man, as me thoughte . and like to myselve,
Cam and called me . by my kynde name.
'What artow,' quod I tho, . 'that thow my name knowest.'
'That woost wel,' quod he, . 'and no wight bettre.'
'Woot I what thou art?' . 'Thought,' seide he thanne;
'I have sued thee this seven yeer, . seye thou me no rather.'
'Artow Thought,' quod I thoo, . 'thow koudest me wisse,
Where that Do-wel dwelleth, . and do me that to knowe.'
'Do-wel and Do-bet, . and Do-best the thridde,' quod he,
'Arn thre fair vertues, . and ben noght fer to fynde.
Who so is trewe of his tunge, . and of his two handes,
And thorugh his labour or thorugh his land, . his liflode wynneth,
And is trusty of his tailende, . taketh but his owene,
And is noght dronklewe ne dedeynous, . Do-wel hym folweth.
Do-bet dooth ryght thus; . ac he dooth much more;
He is as lowe as a lomb, . and lovelich of speche,
And helpeth alle men . after that hem nedeth.
The bagges and the bigirdles, . he hath to-broke hem alle
That the Erl Avarous . heeld and hise heires.
And thus with Mammonaes moneie . he hath maad hym frendes,
And is ronne to religion, . and hath rendred the Bible,
And precheth to the peple . Seint Poules wordes:
_Libenter suffertis insipientes, cum sitis ipsi sapientes_:
'And suffreth the unwise' . with you for to libbe
And with glad will dooth hem good . and so God you hoteth.
Do-best is above bothe, . and bereth a bisshopes crosse,
Is hoked on that oon ende . to halie men fro helle;
A pik is on that potente, . to putte a-down the wikked
That waiten any wikkednesse . Do-wel to tene.
And Do-wel and Do-bet . amonges hem han ordeyned,
To crowne oon to be kyng . to rulen hem bothe;
That if Do-wel or Do-bet . dide ayein Do-best,
Thanne shal the kyng come . and casten hem in irens,
And but if Do-best bede for hem, . thei to be there for evere.
Thus Do-wel and Do-bet, . and Do-best the thridde,
Crouned oon to the kyng . to kepen hem alle,
And to rule the reme . by hire thre wittes,
And noon oother wise, . but as thei thre assented.'
I thonked Thoght tho, . that he me thus taughte.
'Ac yet savoreth me noght thi seying. . I coveit to lerne
How Do-wel, Do-bet, and Do-best . doon among the peple.'
'But Wit konne wisse thee,' quod Thoght, . 'Where tho thre dwelle,
Ellis woot I noon that kan . that now is alyve.'
Thoght and I thus . thre daies we yeden,
Disputyng upon Do-wel . day after oother;
And er we were war, . with Wit gonne we mete.
He was long and lene, . lik to noon other;
Was no pride on his apparaille . ne poverte neither;
Sad of his semblaunt, . and of softe chere,
I dorste meve no matere . to maken hym to jangle,
But as I bad Thoght thoo . be mene bitwene,
And pute forth som purpos . to preven his wittes,
What was Do-wel fro Do-bet, . and Do-best from hem bothe.
Thanne Thoght in that tyme . seide these wordes:
'Where Do-wel, Do-bet, . and Do-best ben in londe,
Here is Wil wolde wite, . if Wit koude teche him;
And whether he be man or woman . this man fayn wolde aspie,
And werchen as thei thre wolde, . thus is his entente'

poem by William Langland
Submitted by Poetry Lover
Vote! | Copy!

The Canterbury Tales; Epilogue

The wordes of the Hoost to the Phisicien and the Pardoner.

Oure Hooste gan to swere as he were wood;
'Harrow!' quod he, 'by nayles and by blood!
This was a fals cherl and a fals justice!
As shameful deeth as herte may devyse
Come to thise juges and hire advocatz!

Algate this sely mayde is slayn, allas!
Allas! to deere boughte she beautee!
Wherfore I seye al day, as men may see
That yiftes of Fortune and of Nature
Been cause of deeth to many a creature.

(Hir beautee was hir deeth, I dar wel sayn;
Allas, so pitously as she was slayn!)
Of bothe yiftes that I speke of now
Men han ful ofte moore harm than prow.
But trewely, myn owene maister deere,

This is a pitous tale for to heere.
But nathelees, passe over is no fors;
I pray to God so save thy gentil cors,
And eek thyne urynals and thy jurdanes,
Thyn ypocras and eek thy Galianes

And every boyste ful of thy letuarie,
God blesse hem, and oure lady Seinte Marie!
So moot I theen, thou art a propre man,
And lyk a prelat, by Seint Ronyan.
Seyde I nat wel? I kan nat speke in terme;

But wel I woot thou doost myn herte to erme,
That I almoost have caught a cardyacle.
By corpus bones, but I have triacle,
Or elles a draughte of moyste and corny ale,
Or but I heere anon a myrie tale,

Myn herte is lost, for pitee of this mayde!
Thou beelamy, thou Pardoner,' he sayde,
'Telle us som myrthe or japes right anon.'
'It shal be doon,' quod he, 'by Seint Ronyon;
But first,' quod he, 'heere at this ale-stake,

I wol bothe drynke and eten of a cake.'
And right anon the gentils gonne to crye,
'Nay, lat hym telle us of no ribaudye!
Telle us som moral thyng that we may leere
Som wit, and thanne wol we gladly heere!'

'I graunte, ywis,' quod he, 'but I moot thynke
Upon som honeste thyng, while that I drynke.'

poem by Geoffrey Chaucer
Submitted by Poetry Lover
Vote! | Copy!

The Canterbury Tales; the Seconde Nonnes Tale

The Prologe of the Seconde Nonnes Tale.

The ministre and the norice unto vices,
Which that men clepe in Englissh ydelnesse,
That porter of the gate is of delices,
To eschue, and by hir contrarie hir oppresse,
(That is to seyn by leveful bisynesse),
Wel oghten we to doon al oure entente,
Lest that the feend thurgh ydelnesse us shente.

For he, that with hise thousand cordes slye
Continuelly us waiteth to biclappe,
Whan he may man in ydelnesse espye,
He kan so lightly cacche hym in his trappe,
Til that a man be hent right by the lappe,
He nys nat war the feend hath hym in honde.
Wel oghte us werche, and ydelnesse withstonde.

And though men dradden nevere for to dye,
Yet seen men wel by resoun, doutelees,
That ydelnesse is roten slogardye,
Of which ther nevere comth no good encrees;
And seen that slouthe hir holdeth in a lees,
Oonly to slepe, and for to ete and drynke,
And to devouren al that othere swynke.

And for to putte us fro swich ydelnesse,
That cause is of so greet confusioun,
I have heer doon my feithful bisynesse,
After the legende, in translacioun
Right of thy glorious lyf and passioun,
Thou with thy gerland wroght with rose and lilie,
Thee meene I, mayde and martir, seint Cecilie.

Invocacio ad Mariam.

And thow that flour of virgines art alle,
Of whom that Bernard list so wel to write,
To thee at my bigynnyng first I calle,
Thou confort of us wrecches, do me endite
Thy maydens deeth, that wan thurgh hir merite

The eterneel lyf, and of the feend victorie,
As man may after reden in hir storie.

Thow mayde and mooder, doghter of thy sone,
Thow welle of mercy, synful soules cure,
In whom that God for bountee chees to wone,
Thow humble and heigh, over every creature
Thow nobledest so ferforth oure nature,
That no desdeyn the makere hadde of kynde,
His sone in blood and flessh to clothe and wynde,

Withinne the cloistre blisful of thy sydis
Took mannes shape the eterneel love and pees,
That of the tryne compas lord and gyde is,
Whom erthe and see and hevene out of relees
Ay heryen, and thou, virgine wemmelees,
Baar of thy body, and dweltest mayden pure,
The creatour of every creature.

Assembled is in thee magnificence
With mercy, goodnesse, and with swich pitee
That thou, that art the sonne of excellence,
Nat oonly helpest hem that preyen thee,
But oftentyme, of thy benygnytee,
Ful frely, er that men thyn help biseche,
Thou goost biforn, and art hir lyves leche.

Now help, thow meeke and blisful faire mayde,
Me, flemed wrecche in this desert of galle;
Thynk on the womman Cananee, that sayde
That whelpes eten somme of the crommes alle,
That from hir lordes table been yfalle,
And though that I, unworthy sone of Eve,
Be synful, yet accepte my bileve.

And for that feith is deed withouten werkis,
So for to werken yif me wit and space,
That I be quit fro thennes that moost derk is.
O thou, that art so fair and ful of grace,
Be myn advocat in that heighe place
Ther as withouten ende is songe Osanne,
Thow Cristes mooder, doghter deere of Anne!

And of thy light my soule in prison lighte,
That troubled is by the contagioun
Of my body, and also by the wighte
Of erthely lust and fals affeccioun,
O havene of refut, O salvacioune
Of hem that been in sorwe and in distresse,
Now help, for to my werk I wol me dresse.

Yet preye I yow that reden that I write,
Foryeve me, that I do no diligence
This ilke storie subtilly to endite,
For bothe have I the wordes and sentence
Of hym that at the seintes reverence
The storie wroot, and folwe hir legende.
I pray yow, that ye wole my werk amende.

First wolde I yow the name of seinte Cecile
Expowne, as men may in hir storie see.
It is to seye in Englissh, `hevenes lilie'
For pure chaastnesse of virginitee,
Or for she whitnesse hadde of honestee
And grene of conscience, and of good fame
The soote savour, lilie was hir name.

Or Cecilie is to seye, `the wey to blynde,'
For she ensample was by good techynge;
Or elles, Cecile, as I writen fynde
Is joyned by a manere conjoynynge
Of `hevene' and `lia,' and heere in figurynge
The `hevene' is set for thoght of hoolynesse,
And `lia' for hir lastynge bisynesse.

Cecile may eek be seyd, in this manere,
`Wantynge of blyndnesse,' for hir grete light
Of sapience, and for hire thewes cleere
Or elles, loo, this maydens name bright
Of `hevene' and `leos' comth, for which by right
Men myghte hir wel `the hevene of peple' calle,
Ensample of goode and wise werkes alle.

For `leos' `peple' in Englissh is to seye,
And right as men may in the hevene see
The sonne and moone and sterres every weye,
Right so men goostly, in this mayden free,
Syen of feith the magnanymytee,
And eek the cleernesse hool of sapience,
And sondry werkes, brighte of excellence.

And right so as thise philosophres write
That hevene is swift and round and eek brennynge,
Right so was faire Cecilie the white
Ful swift and bisy evere in good werkynge,
And round and hool in good perseverynge,
And brennynge evere in charite ful brighte.
Now have I yow declared what she highte.

Here bigynneth the Seconde Nonnes tale of the lyf of Seinte Cecile.

This mayden, bright Cecilie, as hir lyf seith,
Was comen of Romayns, and of noble kynde,
And from hir cradel up fostred in the feith
Of Crist, and bar his gospel in hir mynde.
She nevere cessed, as I writen fynde,
Of hir preyere, and God to love and drede,
Bisekynge hym to kepe hir maydenhede.

And whan this mayden sholde unto a man
Ywedded be, that was ful yong of age,
Which that ycleped was Valerian,
And day was comen of hir mariage,
She, ful devout and humble in hir corage,
Under hir robe of gold, that sat ful faire,
Hadde next hir flessh yclad hir in an haire.

And whil the orgnes maden melodie,
To God allone in herte thus sang she:
'O Lord, my soule and eek my body gye
Unwemmed, lest that I confounded be.'
And for his love that dyde upon a tree,
Every seconde and thridde day she faste,
Ay biddynge in hir orisons ful faste.

The nyght cam, and to bedde moste she gon
With hir housbonde, as ofte is the manere,
And pryvely to hym she seyde anon,
'O sweete and wel biloved spouse deere,
Ther is a conseil, and ye wolde it heere,
Which that right fayn I wolde unto yow seye,
So that ye swere ye shul me nat biwreye.'

Valerian gan faste unto hire swere
That for no cas, ne thyng that myghte be,
He sholde nevere mo biwreyen here,
And thanne at erst to hym thus seyde she,
'I have an Aungel which that loveth me,
That with greet love, wher so I wake or sleepe,
Is redy ay my body for to kepe.

And if that he may feelen out of drede
That ye me touche, or love in vileynye,
He right anon wol sle yow with the dede,
And in youre yowthe thus ye sholden dye.
And if that ye in clene love me gye,
He wol yow loven as me for youre clennesse,
And shewen yow his joye and his brightnesse.'

Valerian, corrected as God wolde,
Answerde agayn, 'If I shal trusten thee,
Lat me that aungel se, and hym biholde,
And if that it a verray aungel bee,
Thanne wol I doon as thou hast prayed me;
And if thou love another man, forsothe
Right with this swerd thanne wol I sle yow bothe.'

Cecile answerde anon right in this wise,
'If that yow list, the aungel shul ye see,
So that ye trowe in Crist, and yow baptize.
Gooth forth to Via Apia,' quod she,
'That fro this toun ne stant but miles thre;
And to the povre folkes that ther dwelle
Sey hem right thus as that I shal yow telle.

Telle hem, that I Cecile yow to hem sente,
To shewen yow the goode Urban the olde,
For secree thynges and for good entente;
And whan that ye Seint Urban han biholde,
Telle hym the wordes whiche that I to yow tolde,
And whan that he hath purged yow fro synne,
Thanne shul ye se that aungel er ye twynne.'

Valerian is to the place ygon,
And right as hym was taught by his lernynge,
He foond this hooly olde Urban anon
Among the seintes buryeles lotynge.
And he anon, withouten tariynge,
Dide his message, and whan that he it tolde,
Urban for joye his handes gan up holde.

The teeris from hise eyen leet he falle.
'Almyghty lord, O Jesu Crist,' quod he,
'Sower of chaast conseil, hierde of us alle,
The fruyt of thilke seed of chastitee
That thou hast sowe in Cecile, taak to thee.
Lo, lyk a bisy bee, withouten gile,
Thee serveth ay thyn owene thral Cecile!

For thilke spouse that she took but now
Ful lyk a fiers leoun, she sendeth heere
As meke as evere was any lomb, to yow.'
And with that word anon ther gan appeere
An oold man clad in white clothes cleere,
That hadde a book with lettre of gold in honde,
And gan bifore Valerian to stonde.

Valerian as deed fil doun for drede
Whan he hym saugh, and he up hente hym tho,
And on his book right thus he gan to rede,
'O lord, o feith, o god, withouten mo,
O Cristendom, and fader of alle also,
Aboven alle, and over alle, everywhere.-'
Thise wordes al with gold ywriten were.

Whan this was rad, thanne seyde this olde man,
'Leevestow this thyng or no? sey ye or nay?'
'I leeve al this thyng,' quod Valerian,
'For oother thyng than this, I dar wel say,
Under the hevene no wight thynke may.'
Tho vanysshed this olde man, he nyste where;
And Pope Urban hym cristned right there.

Valerian gooth hoom, and fynt Cecile
Withinne his chambre with an aungel stonde.
This aungel hadde of roses and of lilie
Corones two, the whiche he bar in honde;
And first to Cecile, as I understonde,
He yaf that oon, and after gan he take
That oother to Valerian hir make.

'With body clene and with unwemmed thoght
Kepeth ay wel thise corones,' quod he,
'Fro Paradys to yow have I hem broght,
Ne nevere mo ne shal they roten bee,
Ne lese hir soote savour, trusteth me,
Ne nevere wight shal seen hem with his eye
But he be chaast and hate vileynye.

And thow Valerian, for thow so soone
Assentedest to good conseil also,
Sey what thee list, and thou shalt han thy boone.'
'I have a brother,' quod Valerian tho,
'That in this world I love no man so.
I pray yow that my brother may han grace,
To knowe the trouthe, as I do in this place.'

The aungel seyde, 'God liketh thy requeste,
And bothe with the palm of martirdom
Ye shullen com unto his blisful feste.'
And with that word Tiburce his brother coom;
And whan that he the savour undernoom,
Which that the roses and the lilies caste,
Withinne his herte he gan to wondre faste,

And seyde, 'I wondre, this tyme of the yeer,
Whennes that soote savour cometh so
Of rose and lilies that I smelle heer.
For though I hadde hem in myne handes two,
The savour myghte in me no depper go,
The sweete smel that in myn herte I fynde
Hath chaunged me al in another kynde.'

Valerian seyde, 'Two corones han we,
Snow-white and rose-reed that shynen cleere,
Whiche that thyne eyen han no myght to see,
And as thou smellest hem thurgh my preyere,
So shaltow seen hem, leeve brother deere,
If it so be thou wolt, withouten slouthe,
Bileve aright and knowen verray trouthe.'

Tiburce answerde, 'Seistow this to me?
In soothnesse or in dreem I herkne this?'
'In dremes,' quod Valerian, 'han we be
Unto this tyme, brother myn, ywes;
But now at erst in trouthe oure dwellyng is.'
'How woostow this,' quod Tiburce, 'in what wyse?'
Quod Valerian, 'That shal I thee devyse.

The aungel of God hath me the trouthe ytaught
Which thou shalt seen, if that thou wolt reneye
The ydoles and be clene, and elles naught.'
And of the myracle of thise corones tweye
Seint Ambrose in his preface list to seye.
Solempnely this noble doctour deere
Commendeth it, and seith in this manere;

The palm of martirdom for to receyve
Seinte Cecile, fulfild of Goddes yifte,
The world and eek hire chambre gan she weyve,
Witnesse Tyburces and Valerians shrifte,
To whiche God of his bountee wolde shifte
Corones two, of floures wel smellynge,
And made his aungel hem the corones brynge.

The mayde hath broght thise men to blisse above;
The world hath wist what it is worth, certeyn,
Devocioun of chastitee to love. . . .
Tho shewed hym Cecile, al open and pleyn,
That alle ydoles nys but a thyng in veyn,
For they been dombe and therto they been deve,
And charged hym hise ydoles for to leve.

'Whoso that troweth, nat this, a beest he is,'
Quod tho Tiburce, 'if that I shal nat lye.'
And she gan kisse his brest, that herde this,
And was ful glad he koude trouthe espye.
'This day I take thee for myn allye,'
Seyde this blisful faire mayde deere,
And after that she seyde as ye may heere.

'Lo, right so as the love of Crist,' quod she,
'Made me thy brotheres wyf, right in that wise
Anon for myn allyee heer take I thee,

Syn that thou wolt thyne ydoles despise.
Go with thy brother now, and thee baptise,
And make thee clene, so that thou mowe biholde
The aungels face of which thy brother tolde.'

Tiburce answerde and seyde, 'Brother deere,
First tel me whider I shal, and to what man?'
'To whom?' quod he, 'com forth with right good cheere,
I wol thee lede unto the Pope Urban.'
'Til Urban? brother myn Valerian,'
Quod tho Tiburce, 'woltow me thider lede?
Me thynketh that it were a wonder dede.'

'Ne menestow nat Urban,' quod he tho,
'That is so ofte dampned to be deed,
And woneth in halkes alwey to and fro,
And dar nat ones putte forth his heed;
Men sholde hym brennen in a fyr so reed,
If he were founde, or that men myghte hym spye;
And we also, to bere hym compaignye,

And whil we seken thilke divinitee,
That is yhid in hevene pryvely,
Algate ybrend in this world shul we be!'
To whom Cecile answerde boldely,
'Men myghten dreden wel and skilfully
This lyf to lese, myn owene deere brother,
If this were lyvynge oonly and noon oother.

But ther is bettre lyf in oother place,
That nevere shal be lost, ne drede thee noght,
Which Goddes sone us tolde thurgh his grace.
That fadres sone hath alle thyng ywroght,
And al that wroght is with a skilful thoght,
The goost, that fro the fader gan procede,
Hath sowled hem, withouten any drede.

By word and by myracel Goddes Sone,
Whan he was in this world, declared heere
That ther was oother lyf ther men may wone.'
To whom answerde Tiburce, 'O suster deere,
Ne seydestow right now in this manere,
Ther nys but o God, lord in soothfastnesse,
And now of thre how maystow bere witnesse?'

'That shal I telle,' quod she, 'er I go.
Right as a man hath sapiences thre,
Memorie, engyn, and intellect also,
So, in o beynge of divinitee
Thre persones may ther right wel bee.'
Tho gan she hym ful bisily to preche
Of Cristes come, and of hise peynes teche,

And many pointes of his passioun;
How Goddes sone in this world was withholde
To doon mankynde pleyn remissioun,
That was ybounde in synne and cares colde . . .
Al this thyng she unto Tiburce tolde;
And after this, Tiburce in good entente
With Valerian to Pope Urban he wente;

That thanked God, and with glad herte and light
He cristned hym, and made hym in that place
Parfit in his lernynge, Goddes knyght.
And after this Tiburce gat swich grace
That every day he saugh in tyme and space
The aungel of God, and every maner boone
That he God axed, it was sped ful soone.

It were ful hard by ordre for to seyn
How manye wondres Jesu for hem wroghte.
But atte laste, to tellen short and pleyn,
The sergeantz of the toun of Rome hem soghte,
And hem biforn Almache the Prefect broghte,
Which hem opposed, and knew al hire entente,
And to the ymage of Juppiter hem sente,

And seyde, 'Whoso wol nat sacrifise,
Swap of his heed, this my sentence heer.'
Anon thise martirs that I yow devyse,
Oon Maximus, that was an officer
Of the prefectes, and his corniculer,
Hem hente, and whan he forth the seintes ladde,
Hymself he weepe, for pitee that he hadde.

Whan Maximus had herd the seintes loore,
He gat hym of the tormentoures leve,
And ladde hem to his hous withoute moore.
And with hir prechyng, er that it were eve,
They gonnen fro the tormentours to reve,
And fro Maxime, and fro his folk echone
The fals feith, to trowe in God allone.

Cecile cam whan it was woxen nyght,
With preestes that hem cristned alle yfeere,
And afterward, whan day was woxen light,
Cecile hem seyde, with a ful stedefast cheere,
'Now Cristes owene knyghtes, leeve and deere,
Cast alle awey the werkes of derkness
And armeth yow in armure of brightnesse.

Ye han forsothe ydoon a greet bataille,
Youre cours is doon, youre feith han ye conserved,
Gooth to the corone of lyf that may nat faille.
The rightful juge which that ye han served
Shal yeve it yow as ye han it deserved.'
And whan this thyng was seyd as I devyse,
Men ledde hem forth to doon the sacrifise.

But whan they weren to the place broght,
To tellen shortly the conclusioun,
They nolde encense ne sacrifise right noght,
But on hir knees they setten hem adoun
With humble herte and sad devocioun,
And losten bothe hir hevedes in the place.
Her soules wenten to the kyng of grace.

This Maximus that saugh this thyng bityde,
With pitous teeris tolde it anon-right,
That he hir soules saugh to hevene glyde,
With aungels ful of cleernesse and of light;
And with this word converted many a wight.
For which Almachius dide hym so bete
With whippe of leed, til he the lyf gan lete.

Cecile hym took, and buryed hym anon
By Tiburce and Valerian softely,
Withinne hir buriyng place under the stoon,
And after this Almachius hastily
Bad hise ministres fecchen openly
Cecile, so that she myghte in his presence
Doon sacrifice, and Juppiter encense.

But they, converted at hir wise loore,
Wepten ful soore, and yaven ful credence
Unto hire word, and cryden moore and moore,
'Crist, Goddes sone, withouten difference,
Is verray God, this is al oure sentence,
That hath so good a servant hym to serve
This with o voys we trowen, thogh we sterve.'

Almachius, that herde of this doynge,
Bad fecchen Cecile, that he myghte hir see,
And alderfirst, lo, this was his axynge:
'What maner womman artow?' tho quod he.
'I am a gentil womman born,' quod she.
'I axe thee,' quod he, 'though it thee greeve,
Of thy religioun and of thy bileeve.'

'Ye han bigonne youre question folily,'
Quod she, 'that wolden two answeres conclude
In o demande; ye axed lewedly.'
Almache answerde unto that similitude,
'Of whennes comth thyn answeryng so rude?'
'Of whennes?' quod she, whan that she was freyned,
'Of conscience and of good feith unfeyned.'

Almachius seyde, 'Ne takestow noon heede
Of my power?' and she answerde hym,
'Youre myght,' quod she, 'ful litel is to dreede,
For every mortal mannes power nys
But lyke a bladdre ful of wynd, ywys;
For with a nedles poynt, whan it is blowe,
May al the boost of it be leyd ful lowe.'

'Ful wrongfully bigonne thow,' quod he,
'And yet in wrong is thy perseveraunce;
Wostow nat how oure myghty princes free
Han thus comanded and maad ordinaunce
That every cristen wight shal han penaunce,
But if that he his cristendom withseye-
And goon al quit, if he wole it reneye?'

'Youre princes erren, as youre nobleye dooth,'
Quod tho Cecile, 'and with a wood sentence
Ye make us gilty, and it is nat sooth,
For ye, that knowen wel oure innocence,
For as muche as we doon a reverence
To Crist, and for we bere a cristen name,
Ye putte on us a cryme, and eek a blame.

But we that knowen thilke name so
For vertuous, we may it nat withseye.'
Almache answerde, 'Chees oon of thise two,
Do sacrifise, or cristendom reneye,
That thou mowe now escapen by that weye.'
At which the hooly blisful faire mayde
Gan for to laughe, and to the juge sayde,

'O Juge, confus in thy nycetee,
Woltow that I reneye innocence,
To make me a wikked wight,' quod shee;
'Lo, he dissymuleth heere in audience,
He stareth, and woodeth in his advertence.'
To whom Almachius, 'Unsely wrecche,
Ne woostow nat how far my myght may strecche?

Han noght oure myghty princes to me yeven
Ye, bothe power and auctoritee
To maken folk to dyen or to lyven?
Why spekestow so proudly thanne to me?'
'I speke noght but stedfastly,' quod she,
'Nat proudly, for I speke as for my syde,
We haten deedly thilke vice of pryde.

And if thou drede nat a sooth to heere,
Thanne wol I shewe al openly by right
That thou hast maad a ful grete lesyng heere,
Thou seyst, thy princes han thee yeven myght
Bothe for to sleen, and for to quyken a wight.
Thou that ne mayst but oonly lyf bireve,
Thou hast noon oother power, ne no leve!

But thou mayst seyn thy princes han thee maked
Ministre of deeth, for if thou speke of mo,
Thou lyest, for thy power is ful naked.'
'Do wey thy booldnesse,' seyde Almachius tho,
'And sacrifise to oure goddes er thou go.
I recche na twhat wrong that thou me profre,
For I can suffre it as a philosophre.

But thilke wronges may I nat endure
That thou spekest of oure goddes heere,' quod he.
Cecile answerde, 'O nyce creature,
Thou seydest no word, syn thou spak to me,
That I ne knew therwith thy nycetee,
And that thou were in every maner wise
A lewed officer and a veyn justise.

Ther lakketh no thyng to thyne outter eyen
That thou nart blynd, for thyng that we seen alle
That it is stoon, that men may wel espyen,
That ilke stoon a god thow wolt it calle.
I rede thee lat thyn hand upon it falle,
And taste it wel, and stoon thou shalt it fynde,

Syn that thou seest nat with thyne eyen blynde.

It is a shame that the peple shal
So scorne thee, and laughe at thy folye,
For communly men woot it wel overal
That myghty God is in hise hevenes hye,
And thise ymages, wel thou mayst espye,
To thee ne to hemself mowen noght profite,
For in effect they been nat worth a myte.'

Thise wordes and swiche othere seyde she,
And he weex wrooth, and bad men sholde hir lede
Hom til hir hous, and 'in hire hous,' quod he,
'Brenne hire right in a bath of flambes rede.'
And as he bad, right so was doon in dede,
For in a bath they gonne hire faste shetten,
And nyght and day greet fyre they underbetten.

The longe nyght and eek a day also
For al the fyr and eek the bathes heete
She sat al coold, and feelede no wo;
It made hir nat a drope for to sweete.
But in that bath hir lyf she moste lete,
For he Almachius, with a ful wikke entente,
To sleen hir in the bath his sonde sente.

Thre strokes in the nekke he smoot hir tho,
The tormentour, but for no maner chaunce
He myghte noght smyte al hir nekke atwo.
And for ther was that tyme an ordinaunce
That no man sholde doon men swich penaunce
The ferthe strook to smyten, softe or soore,
This tormentour ne dorste do namoore.

But half deed, with hir nekke ycorven there,
He lefte hir lye, and on his wey is went.
The cristen folk, which that aboute hir were,
With sheetes han the blood ful faire yhent.
Thre dayes lyved she in this torment,
And nevere cessed hem the feith to teche;
That she hadde fostred, hem she gan to preche.

And hem she yaf hir moebles, and hir thyng,
And to the Pope Urban bitook hem tho,
And seyde, 'I axed this at hevene kyng
To han respit thre dayes, and namo,
To recomende to yow er that I go
Thise soules, lo, and that I myghte do werche
Heere of myn hous perpetuelly a chirche.'

Seint Urban with hise deknes prively
This body fette, and buryed it by nyghte,
Among hise othere seintes, honestly.
Hir hous the chirche of seinte Cecilie highte;
Seint Urban halwed it, as he wel myghte,
In which, into this day, in noble wyse
Men doon to Crist and to his seinte servyse.

Heere is ended the Seconde Nonnes tale.

poem by Geoffrey Chaucer
Submitted by Poetry Lover
Vote! | Copy!

The Canterbury Tales; The Maunciples Tale

PROLOGUE TO THE MAUNCIPLES TALE

Heere folweth the Prologe of the Maunciples tale.

Woot ye nat where ther stant a litel toun,
Which that ycleped is Bobbe-up-and-doun
Under the Blee, in Caunterbury weye?
Ther gan oure Hooste for to jape and pleye,
And seyde, 'Sires, what, Dun is in the Myre!

Is ther no man for preyere ne for hyre,
That wole awake oure felawe al bihynde?
A theef myghte hym ful lightly robbe and bynde.
See how he nappeth, see how for Cokkes bones,
That he wol falle fro his hors atones.

Is that a Cook of London, with meschaunce?
Do hym com forth, he knoweth his penaunce,
For he shal telle a tale, by my fey,
Although it be nat worth a botel hey.
Awake, thou Cook,' quod he, 'God yeve thee sorwe,

What eyleth thee, to slepe by the morwe?
Hastow had fleen al nyght, or artow dronke?
Or hastow with som quene al nyght yswonke
So that thow mayst nat holden up thyn heed?'
This Cook that was ful pale, and no thyng reed,

Seyde to oure Hoost, 'So God my soule blesse,
As ther is falle on me swich hevynesse,
Noot I nat why, that me were levere slepe
Than the beste galon wyn in Chepe.'
'Wel,' quod the Maunciple, 'if it may doon ese

To thee, Sire Cook, and to no wight displese
Which that heere rideth in this compaignye,
And that oure Hoost wole of his curteisye,
I wol as now excuse thee of thy tale,
For, in good feith, thy visage is ful pale.

Thyne eyen daswen eek, as that me thynketh,
And wel I woot, thy breeth ful soure stynketh.
That sheweth wel thou art nat wel disposed,
Of me, certeyn, thou shalt nat been yglosed.
See how he ganeth, lo, this dronken wight!

As though he wolde swolwe us anonright.
Hoold cloos thy mouth, man, by thy fader kyn,
The devel of helle sette his foot therin.
Thy cursed breeth infecte wole us alle,
Fy, stynkyng swyn! fy, foule moothe thou falle!

A, taketh heede, sires, of this lusty man!
Now, sweete sire, wol ye justen atte fan?
Therto me thynketh ye been wel yshape,
I trowe that ye dronken han wyn-ape,
And that is, whan men pleyen with a straw.'

And with this speche the Cook wax wrooth and wraw,
And on the Manciple he gan nodde faste,
For lakke of speche, and doun the hors hym caste,
Where as he lay til that men up hym took;
This was a fair chyvachee of a Cook!

Allas, he nadde holde hym by his ladel!
And er that he agayn were in his sadel
Ther was greet showvyng bothe to and fro,
To lifte hym up, and muchel care and wo,
So unweeldy was this sory palled goost.

And to the Manciple thanne spak oure hoost,
'By cause drynke hath dominacioun,
Upon this man, by my savacioun,
I trowe he lewedly wolde telle his tale.
For were it wyn, or oold or moysty ale,

That he hath dronke, he speketh in his nose,
And fneseth faste, and eek he hath the pose.
He hath also to do moore than ynough
To kepen hym and his capul out of slough,
And if he falle from his capul eftsoone,

Thanne shal we alle have ynogh to doone
In liftyng up his hevy dronken cors.
Telle on thy tale, of hym make I no fors;
But yet, Manciple, in feith thou art to nyce,
Thus openly repreve hym of his vice.

Another day he wole peraventure
Reclayme thee and brynge thee to lure.
I meene he speke wole of smale thynges,
As for to pynchen at thy rekenynges,
That were nat honeste, if it cam to preef.'

'No,' quod the Manciple, 'that were a greet mescheef,
So myghte he lightly brynge me in the snare;
Yet hadde I levere payen for the mare,
Which that he rit on, than he sholde with me stryve
I wol nat wratthen hym, al so moot I thryve;

That that I speke, I seyde it in my bourde.
And wite ye what, I have heer in a gourde
A draghte of wyn, ye, of a ripe grape,
And right anon ye shul seen a good jape.
This Cook shal drynke therof if that I may,

Up peyne of deeth, he wol nat seye me nat.'
And certeynly, to tellen as it was,
Of this vessel the Cook drank faste; allas,
What neded hym? he drank ynough biforn!
And whan he hadde pouped in this horn,

To the Manciple he took the gourde agayn,
And of that drynke the Cook was wonder fayn,
And thanked hym in swich wise as he koude.
Thanne gan oure Hoost to laughen wonder loude,
And seyde, 'I se wel it is necessarie

Where that we goon, that drynke we with us carie.
For that wol turne rancour and disese
Tacord and love and many a wrong apese.
O thou Bacus, yblessed be thy name,
That so kanst turnen ernest into game!

Worship and thank be to thy deitee!
Of that mateere ye gete namoore of me,
Telle on thy tale, Manciple, I thee preye.'
'Wel, sire,' quod he, 'now herkneth what I seye.'

THE MAUNCIPLES TALE

Heere bigynneth the Maunciples tale of the Crowe.

Whan Phebus dwelled heere in this world adoun,
As olde bookes maken mencioun,
He was the mooste lusty bachiler
In al this world, and eek the beste archer.
He slow Phitoun the serpent, as he lay

Slepynge agayn the sonne upon a day;
And many another noble worthy dede
He with his bowe wroghte, as men may rede.
Pleyen he koude on every mynstralcie,
And syngen, that it was a melodie

To heeren of his cleere voys the soun.
Certes, the kyng of Thebes, Amphioun,
That with his syngyng walled that citee,
Koude nevere syngen half so wel as hee.
Therto he was the semelieste man,

That is or was sith that the world bigan.
What nedeth it hise fetures to discryve?
For in this world was noon so fair on lyve.
He was therwith fulfild of gentillesse,
Of honour, and of parfit worthynesse.

This Phebus that was flour of bachilrie,
As wel in fredom as in chivalrie,
For his desport, in signe eek of victorie
Of Phitoun, so as telleth us the storie,
Was wont to beren in his hand a bowe.

Now hadde this Phebus in his hous a crowe,
Which in a cage he fostred many a day,
And taughte it speken as men teche a jay.
Whit was this crowe, as is a snow-whit swan,
And countrefete the speche of every man

He koude, whan he sholde telle a tale.
Therwith in al this world no nyghtngale
Ne koude, by an hondred thousand deel,
Syngen so wonder myrily and weel.
Now hadde this Phebus in his hous a wyf

Which that he lovede moore than his lyf;
And nyght and day dide evere his diligence
Hir for to plese and doon hire reverence.
Save oonly, if the sothe that I shal sayn,
Jalous he was, and wolde have kept hire fayn,

For hym were looth byjaped for to be-
And so is every wight in swich degree;
But al in ydel, for it availleth noght.
A good wyf that is clene of werk and thoght
Sholde nat been kept in noon awayt, certayn.

And trewely the labour is in vayn
To kepe a shrewe, for it wol nat bee.
This holde I for a verray nycetee,
To spille labour for to kepe wyves,
Thus writen olde clerkes in hir lyves.

But now to purpos, as I first bigan:
This worthy Phebus dooth al that he kan
To plesen hir, wenynge that swich plesaunce,
And for his manhede and his governaunce,
That no man sholde han put hym from hire grace.

But God it woot, ther may no man embrace
As to destreyne a thyng, which that nature
Hath natureelly set in a creature.
Taak any bryd, and put it in a cage,
And do al thyn entente and thy corage

To fostre it tendrely with mete and drynke,
Of alle deyntees that thou kanst bithynke;
And keepe it al so clenly as thou may,
Al though his cage of gold be nevere so gay,
Yet hath this bryd, by twenty thousand foold,

Levere in a forest that is rude and coold
Goon ete wormes, and swich wrecchednesse;
For evere this bryd wol doon his bisynesse
To escape out of his cage, whan he may.
His libertee this bryd desireth ay.

Lat take a cat, and fostre hym wel with milk,
And tendre flessh, and make his couche of silk,
And lat hym seen a mous go by the wal,
Anon he weyveth milk and flessh and al,
And every deyntee that is in that hous,

Swich appetit he hath to ete a mous.
Lo, heere hath lust his dominacioun,
And appetit fleemeth discrecioun.
A she wolf hath also a vileyns kynde,
The lewedeste wolf that she may fynde,

Or leest of reputacioun wol she take,
In tyme whan hir lust to han a make.
Alle thise ensamples speke I by thise men,
That been untrewe, and no thyng by wommen,
For men han evere a likerous appetit

On lower thyng to parfourne hire delit,
Than on hire wyves, be they nevere so faire,
Ne nevere so trewe, ne so debonaire.
Flessh is so newefangel, with meschaunce,
That we ne konne in no thyng han plesaunce

That sowneth into vertu any while.
This Phebus, which that thoghte upon no gile,
Deceyved was, for al his jolitee;
For under hym another hadde shee,
A man of litel reputacioun,

Nat worth to Phebus in comparisoun.
The moore harm is, it happeth ofte so,
Of which ther cometh muchel harm and wo.
And so bifel, whan Phebus was absent,
His wyf anon hath for hir lemman sent;

Hir lemman? certes, this is a knavyssh speche,
Foryeveth it me, and that I yow biseche.
The wise Plato seith, as ye may rede,
'The word moot nede accorde with the dede.'
If men shal telle proprely a thyng,

The word moot cosyn be to the werkyng.
I am a boystous man, right thus seye I.
Ther nys no difference trewely
Bitwixe a wyf that is of heigh degree-
If of hire body dishoneste she bee-

And a povre wenche, oother than this,
If it so be they werke bothe amys,
But that the gentile in hire estaat above,
She shal be cleped his lady as in love,
And for that oother is a povre womman,

She shal be cleped his wenche, or his lemman;
And God it woot, myn owene deere brother,
Men leyn that oon as lowe as lith that oother.
Right so bitwixe a titlelees tiraunt
And an outlawe, or a theef erraunt,

The same I seye, ther is no difference.
To Alisaundre was toold this sentence,
That for the tiraunt is of gretter myght,
By force of meynee for to sleen dounright,
And brennen hous and hoom, and make al playn,

Lo, therfore is he cleped a capitayn!
And for the outlawe hath but smal meynee,
And may nat doon so greet an harm as he,
Ne brynge a contree to so greet mescheef,
Men clepen hym an outlawe or a theef.

But for I am a man noght textueel,
I wol noght telle of textes nevere a deel;
I wol go to my tale as I bigan.
Whan Phebus wyf had sente for hir lemman,
Anon they wroghten al hir lust volage.

The white crowe that heeng ay in the cage
Biheeld hire werk, and seyde nevere a word,
And whan that hoom was com Phebus the lord,
This crowe sang, 'Cokkow! Cokkow! Cokkow!'
'What bryd!' quod Phebus, 'what song syngestow?

Ne were thow wont so myrily to synge
That to myn herte it was a rejoysynge
To heere thy voys? allas, what song is this?'
'By God,' quod he, 'I synge nat amys.
Phebus,' quod he, 'for al thy worthynesse,

For al thy beautee and thy gentillesse,
For al thy song and al thy mynstralcye,
For al thy waityng, blered is thyn eye
With oon of litel reputacioun
Noght worth to thee, as in comparisoun

The montance of a gnat, so moote I thryve,
For on thy bed thy wyf I saugh hym swyve.'
What wol ye moore? the crowe anon hym tolde,
By sadde tokenes and by wordes bolde,
How that his wyf han doon hire lecherye,

Hym to greet shame and to greet vileynye,
And tolde hym ofte, he asugh it with hise eyen.
This Phebus gan aweyward for to wryen,
And thoughte his sorweful herte brast atwo,
His bowe he bente and sette ther inne a flo,

And in his ire his wyf thanne hath he slayn.
This is theffect, ther is namoore to sayn,
For sorwe of which he brak his mynstralcie,
Bothe harpe, and lute, and gyterne, and sautrie,
And eek he brak hise arwes and his bowe,

And after that thus spak he to the crowe.
'Traitour,' quod he, 'with tonge of scorpioun,
Thou hast me broght to my confusioun,
Allas, that I was wroght! why nere I deed?
O deere wyf, O gemme of lustiheed,

That were to me so sad and eek so trewe,
Now listow deed with face pale of hewe,
Ful giltelees, that dorste I swere, ywys.
O rakel hand, to doon so foule amys!
O trouble wit, O ire recchelees!

That unavysed smyteth gilteles.
O wantrust, ful of fals suspecioun,
Where was thy wit and thy discrecioun?
O, every man, be war of rakelnesse,
Ne trowe no thyng withouten strong witnesse.

Smyt nat to soone, er that ye witen why,
And beeth avysed wel and sobrely,
Er ye doon any execucioun
Upon youre ire for suspecioun.
Allas, a thousand folk hath rakel ire

Fully fordoon, and broght hem in the mire!
Allas, for sorwe I wol myselven slee!'
And to the crowe, 'O false theef,' seyde he,
'I wol thee quite anon thy false tale;
Thou songe whilom lyk a nyghtngale,

Now shaltow, false theef, thy song forgon,
And eek thy white fetheres everichon.
Ne nevere in al thy lyf ne shaltou speke,
Thus shal men on a traytour been awreke.
Thou and thyn ofspryng evere shul be blake,

Ne nevere sweete noyse shul ye make,
But evere crie agayn tempest and rayn,
In tokenynge that thurgh thee my wyf is slayn.'
And to the crowe he stirte, and that anon,
And pulled hise white fetheres everychon,

And made hym blak, and refte hym al his song,
And eek his speche, and out at dore hym slong,
Unto the devel-which I hym bitake!-
And for this caas been alle Crowes blake.
Lordynges, by this ensample I yow preye,

Beth war and taketh kepe what I seye:
Ne telleth nevere no man in youre lyf
How that another man hath dight his wyf;
He wol yow haten mortally, certeyn.
Daun Salomon, as wise clerkes seyn,

Techeth a man to kepen his tonge weel.
But as I seyde, I am noght textueel;
But nathelees, thus taughte me my dame;
'My sone, thenk on the crowe, on Goddes name.
My sone, keepe wel thy tonge and keepe thy freend,

A wikked tonge is worse than a feend.
My sone, from a feend men may hem blesse.
My sone, God of his endelees goodnesse
Walled a tonge with teeth and lippes eke,
For man sholde hym avyse what he speeke.

My sone, ful ofte for to muche speche
Hath many a man been spilt, as clerkes teche.
But for litel speche, avysely,
Is no man shent, to speke generally.
My sone, thy tonge sholdestow restreyne

At alle tymes, but whan thou doost thy peyne
To speke of God in honour and in preyere;
The firste vertu sone, if thou wolt leere,
Is to restreyne and kepe wel thy tonge.
Thus lerne children, whan that they been yonge,

My sone, of muchel spekyng yvele avysed,
Ther lasse spekyng hadde ynough suffised,
Comth muchel harm-thus was me toold and taught.-
In muchel speche synne wanteth naught.
Wostow wherof a rakel tonge serveth?

Right as a swerd forkutteth and forkerveth
An arme atwo, my deere sone, right so
A tonge kutteth freendshipe al atwo.
A jangler is to God abhomynable;
Reed Salomon, so wys and honurable,

Reed David in hise psalmes, reed Senekke!
My sone, spek nat, but with thyn heed thou bekke;
Dissimule as thou were deef, it that thou heere
A jangler speke of perilous mateere.
The Flemyng seith, and lerne it if thee leste,

That litel janglyng causeth muchel reste.
My sone, if thou no wikked word hast seyd,
Thee thar nat drede for to be biwreyd;
But he that hath mysseyd, I dar wel sayn,
He may by no wey clepe his word agayn.

Thyng that is seyd is seyd, and forth it gooth;
Though hym repente, or be hym leef or looth,
He is his thral to whom that he hath sayd
A tale, of which he is now yvele apayd.
My sone, be war, and be noon auctour newe

Of tidynyges, wheither they been false or trewe,
Wherso thou com, amonges hye or lowe,
Kepe wel thy tonge, and thenk upon the Crowe.'

Heere is ended the Maunciples tale of the Crowe.

poem by Geoffrey Chaucer
Submitted by Poetry Lover
Vote! | Copy!

The Not-Browne Mayd

'Be it ryght or wrong, these men among
On women do complayne;
Affyrmynge this, how that it is
A labour spent in vayne
To love them wele; for never a dele
They love a man agayne:
For late a man do what he can
Theyr favour to attayne,
Yet yf a newe do them persue,
Theyr furst true lover than
Laboureth for nought; for from her thought
He is a banyshed man.'

'I say nat nay, but that all day
It is bothe writ and sayd,
That woman's faith is as who sayth,
All utterly decayd;
But neverthelesse, ryght good wytnesse
In this case might be layd,
That they love true, and continue:
Recorde the Not-Brown Mayde;
Which, when her love came, her to prove,
To her to make his mone,
Wolde nat depart, for in her hart
She loved but hym alone.'

'Than betwaine us late us dyscus,
What was all the manere
Betwayne them two; we wyll also
Telle all the payne and fere
That she was in. Nowe I begyn,
So that ye me answere:
Wherefore all ye that present be,
I pray you gyve an eare.
I am the knyght, I come by nyght
As secret as I can,
Sayinge, 'Alas! thus standeth the case,
I am a banyshed man.''

She.

And I your wyll, for to fulfyll
In this wyll nat refuse,
Trustyng to shewe, in wordes fewe,
That men have an yll use,
(To theyr own shame) women to blame,
And causelesse them accuse:
Therfore to you I answere nowe,
All women to excuse, -
'Myn own hart dere, with you what chere?
I pray you telle anone;
For in my mynde, of al mankynde,
I love but you alone.'

He.

'It standeth so: a dede is do,
Whereof grete harme shall growe.
My destiny is for to dy
A shamefull deth, I trowe,
Or elles to fle: the one must be:
None other way I knowe,
But to withdrawe, as an outlawe,
And take me to my bowe.
Wherefore, adue, my owne hart true,
None other rede I can;
For I must to the grene wode go,
Alone, a banyshed man.'

She.

'O Lord, what is thys worldys blysse,
That changeth as the mone!
My somers day in lusty May
Is derked before the none.
I here you saye farewell: Nay, nay,
We depart nat so sone.
Why say ye so? wheder wyll ye go?
Alas, what have ye done?
All my welfare to sorrowe and care
Sholde chaunge, yf ye were gone:
For in my mynde, of all mankynde
I love but you alone.'

He.

'I can beleve it shall you greve,
And somewhat you dystrayne;
But aftyrwarde your paynes harde,
Within a day or twayne,
Shall sone aslake, and ye shall take
Comfort to you agayne.
Why sholde ye ought? for, to make thought
Your labur were in vayne:
And thus I do, and pray you to,
As hartely as I can:
For I must to the grene wode go,
Alone, a banyshed man.'

She.

'Now syth that ye have shewed to me
The secret of your mynde,
I shall be playne to you agayne,
Lyke as ye shall me fynde:
Syth it is so that ye wyll go,
I wolle not leve behynde;
Shall never be sayd the Not-browne Mayd
Was to her love unkynde.
Make you redy, for so am I,
Although it were anone;
For in my mynd, of all mankynde,
I love but you alone.'

He.

'Yet I you rede to take good hede
What men wyll thynke, and say;
Of yonge and olde it shall be tolde,
That ye be gone away
Your wanton wyll for to fulfill,
In grene wode you to play;
And that ye myght from your delyght
No lenger make delay.
Rather than ye sholde thus for me
Be called an yll woman,
Yet wolde I to the grene wode go,
Alone, a banyshed man.'

She.

'Though it be songe of olde and yonge
That I sholde be to blame,
Theyrs be the charge that speke so large
In hurtynge of my name.
For I wyll prove that faythfulle love
It is devoyd of shame,
In your dystresse and hevynesse,
To part with you the same;
And sure all tho that do not so,
True lovers are they none;
For in my mynde, of al mankynde
I love but you alone.'

He.

'I counceyle you remember howe
It is no maydens lawe,
Nothynge to dout, but to renne out
To wode with an outlawe.
For ye must there in your hand bere
A bowe, redy to drawe,
And as a thefe thus must ye lyve,
Ever in drede and awe;
Whereby to you grete harme myght growe;
Yet I had lever than
That I had to the grene wode go
Alone, a banyshed man.'

She.

'I thinke nat nay; but as ye say,
It is no maydens lore;
But love may make me for your sake,
To come on fote to hunt and shote,
To gete us mete in store;
For so that I your company
May have, I aske no more;
From which to part, it maketh my hart
As colde as ony stone:
For in my mynde, of all mankynde
I love but you alone.'

He.

'For an outlawe this is the lawe,
That men hym take and bynde,
Without pyte hanged to be,
And waver with the wynde.
If I had nede, (as God forbede!
What rescous could ye finde?
Forsoth, I trowe, ye and your bowe
For fere wolde drawe behynde:
And no merveyle; for lytel avayle
Were in your counceyle than;
Wherefore I wyll to the grene wode goe
Alone, a banyshed man.'

She.

'Ryght wele knowe ye that women be
But feble for to fyght;
No womanhede it is indede
To be bolde as a knyght.
Yet in suche fere yf that ye were,
With enemyes day and nyght,
I wolde withstande wyth bowe in hande,
To greve them as I myght;
And you to save, as women have,
From dethe 'men' many one:
For in my mynde, of al mankynde
I love but you alone.'

He.

'Yet take gude hede; for ever I drede
That ye coude nat sustayne
The thornie wayes, the depe valeies,
The snowe, the frost, the rayne,
The colde, the hete; for, dry or wete,
We must lodge on the playne;
And us above none other rofe
But a brake bush or twayne,
Which sone sholde greve you, I beleve;
And ye wolde gladly than
That I had to the grene wode goe
Alone, a banyshed man.'

She.

'Syth I have here bene partynere
With you of joy and blysse,
I must also parte of your wo
Endure, as reson is;
Yet am I sure of one pleasure,
And shortely, it is this:
That where ye be, me seemeth, parde,
I coude nat fare amysse.
Without more speche, I you beseche
That we were soon agone;
For in my mynde, of all mankynde
I love but you alone.'

He.

'If ye goo thyder, ye must consyder
When ye have lust to dyne,
There shal no mete be for you gete,
Nor drinke, bere, ale, ne wyne;
Ne shetes clene to lye betwene,
Made of threde and twyne;
None other house but leves and bowes
To cover your hed and myne.
O myne harte swete, this evyll dyete
Sholde make you pale and wan:
Wherefore I wyll to the grene wode go,
Alone, a banyshed man.'

She.

'Among the wylde dere, such an archere
As men say that ye be
Ne may nat fayle of good vitayle,
Where is so grete plente;
And water clere of the ryvere
Shall be full swete to me,
With which in hele I shall ryght wele
Endure, as ye shal see;
And or we go, a bedde or two
I can provyde anone;
For in my mynde, of all mankynde
I love but you alone.'

He.

'Lo, yet before, ye must do more
Yf ye wyll go with me,
As cut your here up by your ere,
Your kyrtel by the kne;
With bowe in hande, for to withstande
Your enemyes, yf nede be;
And this same nyght, before daylyght,
To wode-warde wyll I fle;
Yf ye wyll all this fulfill,
Do it shortely as ye can:
Els wyll I to the grene wode goe
Alone, a banyshed man.'

She.

'I shall as nowe do more for you
Than longeth to womanhede,
To shorte my here, a bow to bere,
To shote in tyme of nede.
O my sweet mother, before all other,
For you have I most drede!
But now, adue! I must ensue
Where Fortune doth me lede.
All this make ye; and let us fle;
The day cometh fast upon;
For in my mynde, of all mankynde
I love but you alone.'

He.

'Nay, nay, nat so: ye shall nat go;
And I shall tell ye why; --
Your appetyght is to be lyght
Of love, I wele espie:
For lyke as ye have sayed to me,
In lyke wyse, hardely,
Ye wolde answere, whosoever it were,
In way of company.
It is sayd of olde, Sone hote, sone colde,
And so is a woman;
Wherefore I to the wode wyll goe,
Alone, a banyshed man.'

She.

'Yf ye take hede, it is no nede
Such wordes to say be me;
For oft ye prayed, and longe assayed,
Or I you loved, parde;
And though that I of auncestry
A barons daughter be,
Yet have you proved howe I you loved,
A squyer of lowe degre;
And ever shall, whatso befall,
To dy therfore anone;
For in my mynde, of al mankynde
I love but you alone.'

He.

'A baron's chylde to be begyled,
It were a cursed dede!
To be felawe with an outlawe,
Almighty God forbede!
Yet beter were the pore squyere
Alone to forest yede,
Than ye sholde saye another day,
That by my cursed dede
Ye were betrayed; wherefore, good mayd,
The best rede that I can
Is that I to the grene wode go,
Alone, a banyshed man.'

She.

'Whatever befall, I never shall
Of this thyng you upbrayd;
But yf ye go, and leve me so,
Then have ye me betrayd.
Remember ye wele, howe that ye dele,
For yf ye, as ye sayd,
Be so unkynde to leve behynde
Your love, the Not-Browne Mayd,
Trust me truly, that I shall dy,
Some after ye be gone;
For in my mynde, of al mankynde
I love but you alone.'

He.

'Yf that ye went, ye sholde repent,
For in the forest nowe
I have purvayed me of a mayd,
Whom I love more than you:
Another fayrere than e'er ye were,
I dare it wele avowe;
And of you bothe eche sholde be worthe
With other, as I trowe.
It were myne ese to lyve in pese;
So wyll I, yf I can;
Wherefore I to the wode wyll go
Alone, a banyshed man.'

She.

'Though in the wode I undyrstode
Ye had a paramour,
All this may nought remove my thought,
But that I wyll be your;
And she shall fynde me soft and kynde,
And courteys every hour,
Glad to fulfyll all that she wylle
Commaunde me, to my power;
For had ye, lo, an hundred mo,
'Of them I wolde be one.'
For in my mynde, of all mankynde
I love but you alone.'

He.

'Myne own dere love, I see the prove
That ye be kynde and true;
Of mayde and wyfe, in all my lyfe
The best that ever I knewe.
Be mery and glad, be no more sad,
The case is chaunged newe;
For it were ruthe, that for your truthe
Ye sholde have cause to rewe.
Be nat dismayed: whatsoever I sayd
To you, whan I began,
I wyll nat to the grene wode goe;
I am no banishyd man.'

She.

'These tydings be more gladd to me
Than to be made a quene,
Yf I were sure they sholde endure;
But is often sene,
Whan men wyll breke promyse, they speke
The wordes on the splene.
Ye shape some wyle me to begyle,
And stele from me, I wene;
Than were the case worse than it was,
And I more wo-begone;
For in my mynde, of al mankynde
I love but you alone.'

He.

'Ye shal nat nede further to drede:
I wyll nat dysparage
You, (God defend!) syth ye descend
Of so grete a lynage.
Now undyrstande, to Westmarlande,
Which is myne herytage,
I wyll you brynge, and with a rynge,
By way of maryage,
I wyll you take, and lady make,
As shortely as I can:
Thus have you won an erlys son,
And not a banyshed man.'

Author.

Here may ye se, that women be
In love meke, kynde, and stable:
Late never man reprove them than,
Or call them variable;
But rather pray God that we may
To them be comfortable,
Which sometyme proveth such as he loveth,
Yf they be charytable.
For syth men wolde that women sholde
Be meke to them each one,
Moche more ought they to God obey,
And serve but hym alone.

poem by Anonymous Olde English
Submitted by Poetry Lover
Vote! | Copy!

The Canterbury Tales; The Milleres Tale

PROLOGUE TO THE MILLERES TALE

Heere folwen the wordes bitwene the Hoost and the Millere

Whan that the Knyght had thus his tale ytoold,
In al the route ne was ther yong ne oold

That he ne seyde it was a noble storie,
And worthy for to drawen to memorie;
And namely the gentils everichon.
Oure Hooste lough, and swoor, 'So moot I gon,
This gooth aright, unbokeled is the male,

Lat se now who shal telle another tale,
For trewely the game is wel bigonne.
Now telleth on, sir Monk, if that ye konne
Somwhat to quite with the Knyghtes tale.'
The Miller that for-dronken was al pale,

So that unnethe upon his hors he sat,
He nolde avalen neither hood ne hat,
Ne abyde no man for his curteisie,
But in Pilates voys he gan to crie,
And swoor by armes and by blood and bones,

'I kan a noble tale for the nones,
With which I wol now quite the Knyghtes tale.'
Oure Hooste saugh that he was dronke of ale,
And seyde, 'Abyd, Robyn, my leeve brother,
Som bettre man shal telle us first another,

Abyd, and lat us werken thriftily.'
'By Goddes soule,' quod he, 'that wol nat I,
For I wol speke, or elles go my wey.'
Oure Hoost answerde, 'Tel on, a devele wey!
Thou art a fool, thy wit is overcome!

'Now herkneth,' quod the Miller, 'alle and some,
But first I make a protestacioun
That I am dronke, I knowe it by my soun;
And therfore, if that I mysspeke or seye,
Wyte it the ale of Southwerk I you preye.

For I wol telle a legende and a lyf
Bothe of a carpenter and of his wyf,
How that a clerk hath set the wrightes cappe.'
The Rev answerde and seyde, 'Stynt thy clappe,
Lat be thy lewed dronken harlotrye,

It is a synne and eek a greet folye
To apeyren any man or hym defame,
And eek to bryngen wyves in swich fame;
Thou mayst ynogh of othere thynges seyn.'
This dronke Miller spak ful soone ageyn,

And seyde, 'Leve brother Osewold,
Who hath no wyf, he is no cokewold.
But I sey nat therfore that thou art oon,
Ther been ful goode wyves many oon,
And evere a thousand goode ayeyns oon badde;

That knowestow wel thyself, but if thou madde.
Why artow angry with my tale now?
I have a wyf, pardee, as wel as thow,
Yet nolde I for the oxen in my plogh
Take upon me moore than ynogh,

As demen of myself that I were oon;
I wol bileve wel, that I am noon.
An housbonde shal nat been inquisityf
Of Goddes pryvetee, nor of his wyf.
So he may fynde Goddes foysoun there,

Of the remenant nedeth nat enquere.'
What sholde I moore seyn, but this Miller
He nolde his wordes for no man forbere,
But tolde his cherles tale in his manere;
Me thynketh that I shal reherce it heere.

And therfore every gentil wight I preye,
For Goddes love, demeth nat that I seye
Of yvel entente, but that I moot reherce
Hir tales alle, be they bettre or werse,
Or elles falsen som of my mateere.

And therfore who-so list it nat yheere,
Turne over the leef, and chese another tale;
For he shal fynde ynowe, grete and smale,
Of storial thyng that toucheth gentillesse,
And eek moralitee, and hoolynesse.

Blameth nat me if that ye chese amys;
The Miller is a cherl, ye knowe wel this,
So was the Reve, and othere manye mo,
And harlotrie they tolden bothe two.
Avyseth yow, and put me out of blame,

And eek men shal nat maken ernest of game.

THE TALE

(One John, a rich and credulous carpenter of Oxford, is
beguiled by his wife Alison, through Nicholas, a poor
scholar boarding with them. Absolon, the parish clerk, is
slighted by Alison; but wreaks vengeance on Nicholas.)

poem by Geoffrey Chaucer
Submitted by Poetry Lover
Vote! | Copy!