Related quotes
The Soldier's Return
When wild war's deadly blast was blawn,
And gentle peace returning,
Wi' mony a sweet babe fatherless,
And mony a widow mourning;
I left the lines and tented field,
Where lang I'd been a lodger,
My humble knapsack a' my wealth,
A poor but honest sodger.
A leal, light heart was in my breast,
My hand unstain'd wi' plunder;
And for fair Scotia, hame again,
I cheery on did wander:
I thought upon the banks o' Coil,
I thought upon my Nancy,
I thought upon the witching smile
That caught my youthful fancy.
At length I reach'd the bonie glen,
Where early life I sported;
I pass'd the mill and trysting thorn,
Where Nancy aft I courted:
Wha spied I but my ain dear maid,
Down by her mother's dwelling!
And turn'd me round to hide the flood
That in my e'en was swelling.
Wi' alter'd voice, quoth I, "Sweet lass,
Sweet as yon hawthorn's blossom,
O! happy, happy may he be,
That's dearest to thy bosom:
My purse is light, I've far to gang,
And fain wad be thy lodger;
I've serv'd my king and country lang-
Take pity on a sodger."
Sae wistfully she gaz'd on me,
And lovelier was than ever;
Quo' she, "A sodger ance I lo'ed,
Forget him shall I never:
Our humble cot, and hamely fare,
Ye freely shall partake it;
That gallant badge-the dear cockade,
Ye're welcome for the sake o't."
She gaz'd-she redden'd like a rose -
Syne pale like only lily;
She sank within my arms, and cried,
'Art thou my ain dear Willie?'
'By him who made yon sun and sky!
By whom true love's regarded,
I am the man; and thus may still
True lovers be rewarded.
'The wars are o'er, and I'm come hame,
And find thee still true-hearted;
Tho' poor in gear, we're rich in love,
And mair we'se ne'er be parted.'
Quo' she, "My grandsire left me gowd,
A mailen plenish'd fairly;
And come, my faithfu' sodger lad,
Thou'rt welcome to it dearly!"
For gold the merchant ploughs the main,
The farmer ploughs the manor;
But glory is the sodger's prize,
The sodger's wealth is honor:
The brave poor sodger ne'er despise,
Nor count him as a stranger;
Remember he's his country's stay,
In day and hour of danger.
poem by Robert Burns
Submitted by Veronica Serbanoiu
Vote! | Copy!
Bonie Dundee
My blessin's upon thy sweet wee lippie!
My blessin's upon thy e'e-brie!
Thy smiles are sae like my blythe sodger laddie,
Thou's aye the dearer, and dearer to me!
But I'll big a bow'r on yon bonie banks,
Whare Tay rins wimplin' by sae clear;
An' I'll cleed thee in the tartan sae fine,
And mak thee a man like thy daddie dear.
poem by Robert Burns
Submitted by Veronica Serbanoiu
Vote! | Copy!
Will He No Come Back Again?
Royal Charlie's now awa,
Safely owre the friendly main;
Mony a heart will break in twa,
Should he ne'er come back again.
Will you no come back again?
Will you no come back again?
Better lo'ed you'll never be,
And will you no come back again?
Mony a traitor 'mang the isles
Brak the band o' nature's law;
Mony a traitor, wi' his wiles,
Sought to wear his life awa.
Will he no come back again?
Will he no come back again?
Better lo'ed he'll never be,
And will he no come back again?
The hills he trode were a' his ain,
And bed beneath the birken tree;
The bush that hid him on the plain,
There's none on earth can claim but he.
Will he no come back again?
Will he no come back again?
Better lo'ed he'll never be,
And will he no come back again?
Whene'er I hear the blackbird sing,
Unto the e'ening sinking down,
Or merl that makes the woods to ring,
To me they hae nae ither soun',
Than, Will he no come back again?
Will he no come back again?
Better lo'ed he'll never be,
And will he no come back again?
Mony a gallant sodger fought,
Mony a gallant chief did fa';
Death itself were dearly bought,
A' for Scotland's king and law.
Will he no come back again?
Will he no come back again?
Better lo'ed he'll never be,
And will he no come back again?
Sweet the lav'rock's note and lang,
Lilting wildly up the glen;
And aye the o'erword o' the sang
Is "Will he no come back again?"
Will he no come back again?
Will he no come back again?
Better lo'ed he'll never be,
And will he no come back again?
Will He No Come Back Again?
Royal Charlie's now awa,
Safely owre the friendly main;
Mony a heart will break in twa,
Should he ne'er come back again.
Will you no come back again?
Will you no come back again?
Better lo'ed you'll never be,
And will you no come back again?
Mony a traitor 'mang the isles
Brak the band o' nature's law;
Mony a traitor, wi' his wiles,
Sought to wear his life awa.
Will he no come back again?
Will he no come back again?
Better lo'ed he'll never be,
And will he no come back again?
The hills he trode were a' his ain,
And bed beneath the birken tree;
The bush that hid him on the plain,
There's none on earth can claim but he.
Will he no come back again?
Will he no come back again?
Better lo'ed he'll never be,
And will he no come back again?
Whene'er I hear the blackbird sing,
Unto the e'ening sinking down,
Or merl that makes the woods to ring,
To me they hae nae ither soun',
Than, Will he no come back again?
Will he no come back again?
Better lo'ed he'll never be,
And will he no come back again?
Mony a gallant sodger fought,
Mony a gallant chief did fa';
Death itself were dearly bought,
A' for Scotland's king and law.
Will he no come back again?
Will he no come back again?
Better lo'ed he'll never be,
And will he no come back again?
Sweet the lav'rock's note and lang,
Lilting wildly up the glen;
And aye the o'erword o' the sang
Is "Will he no come back again?"
Will he no come back again?
Will he no come back again?
Better lo'ed he'll never be,
And will he no come back again?
poem by Anonymous Americas
Submitted by Poetry Lover
Vote! | Copy!
The Farewell
IT was a' for our rightfu' King
We left fair Scotland's strand;
It was a' for our rightfu' King
We e'er saw Irish land,
My dear--
We e'er saw Irish land.
Now a' is done that men can do,
And a' is done in vain;
My love and native land, farewell,
For I maun cross the main,
My dear--
For I maun cross the main.
He turn'd him right and round about
Upon the Irish shore;
And gae his bridle-reins a shake,
With, Adieu for evermore,
My dear--
With, Adieu for evermore!
The sodger frae the wars returns,
The sailor frae the main;
But I hae parted frae my love,
Never to meet again,
My dear--
Never to meet again.
When day is gane, and night is come,
And a' folk bound to sleep,
I think on him that 's far awa',
The lee-lang night, and weep,
My dear--
The lee-lang night, and weep.
poem by Robert Burns
Submitted by Poetry Lover
Vote! | Copy!
The Sodger's Lassie
A'the toun is to the doun
Puin' o' the blaeberrie.
Ab's gane, Rab's gane,
Aggie's gane, Maggie's gane,
A' the toun is to the doun,
An's left the house to wae and me.
Heigho the blaeberrie!
Wha'll hae a blaeberrie?
Ah, to min' o' auld lang syne,
Puin' o' the blaeberrie!
Sodger Tam, he cam an' cam,
Puin' o' the blaeberrie;
Still I went, an' still I bent,
Puin' o' the blaeberrie.
Berries high, an' berries low,
Heigho the blaeberrie!
Tam maun come where berries grow,
Puin' o' the blaeberrie.
Heigho the blaeberrie!
Wha'll hae a blaeberrie?
Ah, to min' o' auld lang syne,
Puin' o' the blaeberrie!
Never ance I looked at Tam,
Heigho the blaeberrie!
Weel I kent him when he cam,
Puin' o' the blaeberrie.
Baith our faces to the groun',
Puin' o' the blaeberrie,
Tam cam near without a soun',
Heigho the blaeberrie!
Wow! but we were near, I ween,
Puin' o' the blaeberrie!
A' the air was warm between,
Heigho the blaeberrie!
Could a lassie think o' ill,
Puin' o' the blaeberrie?
Berries e'en grow where they will,
Heigho the blaeberrie!
Berries here, an' berries there,
Heigho the blaeberrie!
I was kissed or I was ware,
Puin' o' the blaeberrie.
Wha wad fash wi' ane anither
Puin' o' the blaeberrie?
Berries whiles will grow thegither,
Heigho the blaeberrie!
I was kissed or I could speer,
Heigho the blaeberrie!
Hech! that folk sud come sae near,
A' to pu' a blaeberrie!
While I grat and chid forbye,
Heigho the blaeberrie!
Doun we sat-I ken na why-
A' amang the blaeberrie.
Heigho the blaeberrie!
Wha 'll hae a blaeberrie?
Oh, to min' o' auld lang syne,
A' amang the blaeberrie!
Sidelong Tam he cam an' cam
A' amang the blaeberrie.
Wha could tell he meant na fair?
Weel I ken I chid him sair,
But that day we gaed na mair
Puin' o' the blaeberrie!
Heigho the blaeberrie!
Wha 'll hae a blaeberrie?
Oh, to min' o' auld lang syne,
Doun amang the blaeberrie!
poem by Sydney Thompson Dobell
Submitted by Poetry Lover
Vote! | Copy!
On The Late Captain Grose's Peregrinations Thro' Scotland
Hear, Land o' Cakes, and brither Scots,
Frae Maidenkirk to Johnie Groat's;-
If there's a hole in a' your coats,
I rede you tent it:
A chield's amang you takin notes,
And, faith, he'll prent it:
If in your bounds ye chance to light
Upon a fine, fat fodgel wight,
O' stature short, but genius bright,
That's he, mark weel;
And wow! he has an unco sleight
O' cauk and keel.
By some auld, houlet-haunted biggin,
Or kirk deserted by its riggin,
It's ten to ane ye'll find him snug in
Some eldritch part,
Wi' deils, they say, Lord save's! colleaguin
At some black art.
Ilk ghaist that haunts auld ha' or chaumer,
Ye gipsy-gang that deal in glamour,
And you, deep-read in hell's black grammar,
Warlocks and witches,
Ye'll quake at his conjuring hammer,
Ye midnight bitches.
It's tauld he was a sodger bred,
And ane wad rather fa'n than fled;
But now he's quat the spurtle-blade,
And dog-skin wallet,
And taen the-Antiquarian trade,
I think they call it.
He has a fouth o' auld nick-nackets:
Rusty airn caps and jinglin jackets,
Wad haud the Lothians three in tackets,
A towmont gude;
And parritch-pats and auld saut-backets,
Before the Flood.
Of Eve's first fire he has a cinder;
Auld Tubalcain's fire-shool and fender;
That which distinguished the gender
O' Balaam's ass:
A broomstick o' the witch of Endor,
Weel shod wi' brass.
Forbye, he'll shape you aff fu' gleg
The cut of Adam's philibeg;
The knife that nickit Abel's craig
He'll prove you fully,
It was a faulding jocteleg,
Or lang-kail gullie.
But wad ye see him in his glee,
For meikle glee and fun has he,
Then set him down, and twa or three
Gude fellows wi' him:
And port, O port! shine thou a wee,
And Then ye'll see him!
Now, by the Pow'rs o' verse and prose!
Thou art a dainty chield, O Grose!-
Whae'er o' thee shall ill suppose,
They sair misca' thee;
I'd take the rascal by the nose,
Wad say, "Shame fa' thee!"
poem by Robert Burns
Submitted by Veronica Serbanoiu
Vote! | Copy!