Related quotes
Fareweel, ye bughts
*
1. Fareweel, ye bughts, an' all your ewes,
An' fields whare bIoomin' heather grows;
Nae mair the sportin' lambs I'll see
Since my true love's forsaken me.
CHORUS.
Nae mair I'll hear wi' pleasure sing
The cheerfu' lav'rock in the Spring,
But sad in grief now I maun mourn,
Far, far frae her, o'er Logan-burn.
2. Alas! nae mair we'll meetings keep
At bughts, whan herds ca' in their sheep;
Nae mair amang the threshes green
We'll row, where we hae aften been.
CHORUS
3. Nae mair for me , ye vi'lets blaw,
Or lilies whiter than the snaw;
Nae mair your pleasures I can bear,
While I am absent frae my dear.
CHORUS
4. I ken the cause of my hard fate;
In courtin' her I was too blate;
I never kiss'd my lass at a'
But when we met an' gaed awa'.
CHORUS
5. Oh could my tears again bring back
The days now past, I'd no' be slack
For ev'ry kiss she got before
I wad gie to her now a score.
CHORUS
6. O fortune I wad you favour me
In some snug corner her to see.
My heart I wad to her reveal,
An' in her arms my pardon seal.
CHORUS
*
poem by James Thomson
Submitted by Poetry Lover
Vote! | Copy!
There's Nae Luck about the House
And are ye sure the news is true?
And are ye sure he's weel?
Is this a time to think o' wark?
Mak haste, lay by your wheel;
Is this the time to spin a thread
When Colin's at the door?
Reach me my cloak, I'll to the quay
And see him come ashore.
For there's nae luck about the house,
There's nae luck at a',
There's little pleasure in the house
When our gudeman's awa.
And gie to me my bigonet,
My bishop's satin gown;
For I maun tell the bailie's wife
That Colin's come to town.
My Turkey slippers maun gae on,
My stockings pearly blue;
It's a' to pleasure my gudeman,
For he's baith leel and true.
For there's nae luck about the house,
There's nae luck at a',
There's little pleasure in the house
When our gudeman's awa.
Rise, lass, and mak a clean fire side,
Put on the muckle pot,
Gie little Kate her button gown,
And Jock his Sunday coat;
And mak their shoon as black as slaes,
Their hose as white as snaw,
It's a' to please my ain gudeman,
For he's been lang awa.
For there's nae luck about the house,
There's nae luck at a',
There's little pleasure in the house
When our gudeman's awa.
There's twa fat hens upo' the bauk,
Been fed this month and mair,
Mak haste and thraw their necks about,
That Colin weel may fare;
And mak the table neat and clean,
Gar ilka thing look braw,
For wha can tell how Colin fared
When he was far awa?
Ah, there's nae luck about the house,
There's nae luck at a',
There's little pleasure in the house
When our gudeman's awa.
Sae true his heart, sae smooth his speech,
His breath like cauler air,
His very foot has music in't
As he comes up the stair!
And will I see his face again,
And will I hear him speak?
I'm downright dizzy wi' the thought,
In troth I'm like to greet.
For there's nae luck about the house,
There's nae luck at a',
There's little pleasure in the house
When our gudeman's awa.
If Colin's weel, and weel content,
I hae nae mair to crave--
And gin I live to keep him sae,
I'm blest aboon the lave.
And will I see his face again,
And will I hear him speak?
I'm downright dizzy wi' the thought,
In troth I'm like to greet.
For there's nae luck about the house,
There's nae luck at a',
There's little pleasure in the house
When our gudeman's awa.
poem by William Mickle
Submitted by Poetry Lover
Vote! | Copy!
He that has a muckle nose thinks ilk ane speaks o't.
Ne'er lippen ower muckle to a new friend or an auld enemy.
Johnie Faa
The gypsies came to our good lord's gate
And wow but they sang sweetly!
They sang sae sweet and sae very complete
That down came the fair lady.
And she came tripping doun the stair,
And a' her maids before her;
As soon as they saw her weel-far'd face,
They coost the glamer o'er her.
'O come with me,' says Johnie Faw,
'O come with me, my dearie;
For I vow and I swear by the hilt of my sword,
That your lord shall nae mair come near ye.'
Then she gied them the beer and the wine,
And they gied her the ginger;
But she gied them a far better thing,
The goud ring aff her finger.
'Gae take frae me this yay mantle,
And bring to me a plaidie;
For if kith and kin, and a' had sworn,
I'll follow the gypsy laddie.
'Yestreen I lay in a weel-made bed,
Wi' my good lord beside me;
But this night I'll lye in a tenant's barn,
Whatever shall betide me!'
'Come to your bed,' says Johnie Faw,
'Oh, come to your bed, my dearie:
For I vow and swear by the hilt of my sword,
Your lord shall nae mair come near ye.'
'I'll go to bed to my Johnie Faw,
I'll go to bed to my dearie;
For I vow and I swear by the fan in my hand,
My lord shall nae mair come near me.
'I'll mak a hap to my Johnie Faw,
I'll mak a hap to my dearie;
And he's get a' the coat gaes round,
And my lord shall nae mair come near me.'
And when our lord came hame at e'en,
And spier'd for his fair lady,
The tane she cry'd, and the other reply'd,
'She's awa' wi' the gypsy laddie!'
'Gae saddle to me the black black steed,
Gae saddle and make him ready;
Before that I either eat or sleep,
I'll gae seek my fair lady.'
And we were fifteen weel-made men,
Altho' we were na bonny;
And we were a' put down but ane,
For a fair young wanton lady.
poem by Andrew Lang
Submitted by Poetry Lover
Vote! | Copy!
Lusty May
O LUSTY May, with Flora queen!
The balmy dropis from Phoebus sheen
Preluciand beams before the day:
By that Diana growis green
Through gladness of this lusty May.
Then Esperus, that is so bricht,
Til woful hairtis castis his light,
With bankis that bloomis on every brae;
And schouris are shed forth of their sicht
Through gladness of this lusty May.
Birdis on bewis of every birth,
Rejoicing notis makand their mirth
Richt plesantly upon the spray,
With flourishingis o'er field and firth
Through gladness of this lusty May.
All luvaris that are in care
To their ladies they do repair
In fresh morningis before the day,
And are in mirth ay mair and mair
Through gladness of this lusty May.
poem by Anonymous Olde English
Submitted by Poetry Lover
Vote! | Copy!
Son Davie! Son Davie!
'What bluid's that on thy coat lap?
Son Davie! Son Davie!
What bluid's that on thy coat lap?
And the truth come tell to me, O.'
'It is the bluid of my great hawk,
Mother lady, Mother lady!
It is the bluid of my great hawk,
And the truth I hae tald to thee, O.'
'Hawk's bluid was ne'er sae red,
Son Davie! Son Davie!
Hawk's bluid was ne'er sae red,
And the truth come tell to me, O.'
'It is the bluid of my grey hound,
Mother lady! Mother lady!
It is the bluid of my grey hound,
And it wudna rin for me, O.'
'Hound's bluid was ne'er sae red,
Son Davie! Son Davie!
Hound's bluid was ne'er sae red,
And the truth come tell to me, O.'
'It is the bluid o' my brother John,
Mother lady! Mother lady!
It is the bluid o' my brother John,
And the truth I hae tald to thee, O.'
'What about did the plea begin?
Son Davie! Son Davie!'
'It began about the cutting o' a willow wand,
That would never hae been a tree, O.'
'What death dost thou desire to die?
Son Davie! Son Davie!
What death dost thou desire to die?
And the truth come tell to me, O.'
'I'll set my foot in a bottomless ship,
Mother lady! mother lady!
I'll set my foot in a bottomless ship,
And ye'll never see mair o' me, O.'
'What wilt thou leave to thy poor wife?
Son Davie! Son Davie!'
'Grief and sorrow all her life,
And she'll never get mair frae me, O.'
'What wilt thou leave to thy young son?
Son Davie! son Davie!'
'The weary warld to wander up and down,
And he'll never get mair o' me, O.'
'What wilt thou leave to thy mother dear?
Son Davie! Son Davie!'
'A fire o' coals to burn her wi' hearty cheer,
And she'll never get mair o' me, O.'
poem by Andrew Lang
Submitted by Poetry Lover
Vote! | Copy!
My Last Farewell To Stirling
Nae lark in transport mounts the sky
Or leaves wi' early plaintive cry,
But I will bid a last good-bye,
My last farewell to Stirling O.
Chorus:
Tho' far awa, ma hert's wi' you.
Our youthful 'oors, upon wings they flew
But I will bid a last adieu
A last farewell to Stirling O.
Nae mair I'll meet ye in the dark
Or gang wi' you to the King's Park
Or raise the hare from oot their flap
When I gae far fae Stirling O.
Nae mair I'll wander through the glen,
Disturb the roost o' the pheasant hen.
Or chase the rabbits tae their den
When I gae far fae Stirling O.
Their one request before I go
And this is to my comrades all:
My dog and gun I'll leave to you
When I gae far fae Stirling O.
So fare thee well my Jeannie dear
For you I'll shed a bitter tear.
I hope you'll find another, dear,
When I gae far fae Stirling O.
So fare thee well, for I am bound
For twenty years to Van Diemen's Land.
But think of me, and what I've done
When I gae far fae Stirling O.
poem by Robert Burns
Submitted by Poetry Lover
Vote! | Copy!
Edward, Edward
'Why does your brand sae drop wi' blude,
Edward, Edward?
Why does your brand sae drop wi' blude
And why sae sad gang ye, O?'
'O I hae killed my hawk sae gude,
Mither, mither;
O I hae killed my hawk sae gude,
And I hae nae mair but he, O.'
'Your hawk's blude was never sae red,
Edward, Edward;
Your hawk's blude was never sae red,
My dear son, I tell thee, O.'
'O I hae killed my red-roan steed,
Mither, mither;
O I hae killed my red-roan steed,
That was sae fair and free, O.'
'Your steed was auld, and ye've plenty mair,
Edward, Edward;
Your steed was auld, and ye've plenty mair;
Some ither dule ye dree, O.'
'O I hae killed my father dear,
Mither, mither;
O I hae killed my father dear,
Alas, and wae is me, O!'
'And whatten penance will ye dree for that,
Edward, Edward?
Whatten penance will ye dree for that?
My dear son, now tell me, O.'
'I'll set my feet in yonder boat,
Mither, mither;
I'll set my feet in yonder boat,
And I'll fare over the sea, O.'
'And what will ye do wi' your tow'rs and your ha',
Edward, Edward?
And what will ye do wi' your tow'rs and your ha',
That were sae fair to see, O?'
'I'll let them stand till they doun fa',
Mither, mither;
I'll let them stand till they doun fa',
For here never mair maun I be, O.'
'And what will ye leave to your bairns and your wife,
Edward, Edward?
And what will ye leave to your bairns and your wife,
When ye gang ower the sea, O?'
'The warld's room: let them beg through life,
Mither, mither;
The warld's room: let them beg through life;
For them never mair will I see, O.'
'And what will ye leave to your ain mither dear,
Edward, Edward?
And what will ye leave to your ain mither dear,
My dear son, now tell me, O?'
'The curse of hell frae me sall ye bear,
Mither, mither;
The curse of hell frae me sall ye bear:
Sic counsels ye gave to me, O!'
poem by Andrew Lang
Submitted by Poetry Lover
Vote! | Copy!