<div style="background:#fff;border:#bbb dashed 1px;padding:5px"><a href="http://en.citatepedia.ro/comments.php?id=538542" style="color:#000;text-decoration:none"><div style="margin:10px 0"><strong>The Vision Of Piers Plowman - Part 20</strong></div><div style="margin:10px 0">Thanne as I wente by the way, whan I was thus awaked, <br>Hevy chered I yede, and elenge in herte; <br>For I ne wiste wher to ete ne at what place, <br>And it neghed neigh the noon, and with Nede I mette, <br>That afrounted me foule and faitour me called. <br>'Coudestow noght excuse thee, as dide the kyng and othere - <br>That thow toke to thy bilyve, to clothes and to sustenaunce, <br>Was by techynge and by tellynge of Spiritus Temperancie, <br>And that thow nome na moore than nede thee taughte, <br>And nede ne hath no lawe, ne nevere shal falle in dette <br>For thre thynges he taketh his lif for to save? - <br>That is, mete whan men hym werneth, and he no moneye weldeth, <br>Ne wight noon wol ben his borugh, ne wed hath noon to legge; <br>And he ca[cch]e in that caas and come therto by sleighte, </div><div style="margin:10px 0">He synneth noght, soothliche, that so wynneth his foode. <br>And though he come so to a clooth, and kan no bettre chevyssaunce, <br>Nede anoon righte nymeth hym under maynprise. <br>And if hym list for to lape, the lawe of kynde wolde <br>That he dronke at ech dych, er he [deide for thurst]. <br>So Nede, at gret nede, may nymen as for his owene, <br>Withouten conseil of Conscience or Cardynale Vertues - <br>So that he sewe and save Spiritus Temperancie. <br>'For is no vertue bi fer to Spiritus Temperancie - <br>Neither Spiritus Iusticie ne Spiritus Fortitudinis. <br>For Spiritus Fortitudinis forfeteth ful ofte<br>He shal do moore than mesure many tyme and ofte, <br>And bete men over bittre, and som body to litel, <br>And greve men gretter than good feith it wolde. <br>'And Spiritus Iusticie shal juggen, wole he, nel he, <br>After the kynges counseil and the comune like. <br>And Spiritus Prudencie in many a point shal faille <br>Of that he weneth wolde falle if his wit ne weere. <br>Wenynge is no wysdom, ne wys ymaginacion<br>Homo proponit et Deus disponit - <br>[God] governeth alle goode vertues; <br>And Nede is next hym, for anoon he meketh <br>And as lowe as a lomb, for lakkyng that hym nedeth; <br>For nede maketh nede fele nedes lowe-herted. <br>Philosophres forsoke welthe for thei wolde be nedy, <br>And woneden wel elengely and wolde noght be riche. <br>'And God al his grete joye goostliche he lefte, <br>And cam and took mankynde and bicam nedy.' <br>So he was nedy, as seith the Book, in manye sondry places, <br>That he seide in his some on the selve roode, <br>''the Fox and fowel may fle to hole and crepe, </div><div style="margin:10px 0">And the fissh hath fyn to flete with to reste, <br>Ther nede hath ynome me, that I moot nede abide <br>And suffre sorwes ful soure, that shal to joye torne.'' <br>Forthi be noght abasshed to bide and to be nedy, <br>Sith he that wroghte al the world was wilfulliche nedy, <br>Ne nevere noon so nedy ne poverer deide.' <br>Whan Nede hadde undernome rne thus, anoon I fil aslepe, <br>And mette ful merveillously that in mannes forme <br>Antecrist cam thanne, and al the crop of truthe <br>Torned it [tid] up-so-doun, and overtilte the roote, <br>And made fals sprynge and sprede and spede mennes nedes. <br>In ech a contree ther he cam he kutte awey truthe. <br>And gerte gile growe there as he a god weere. <br>Freres folwede that fend, for he gaf hem copes, <br>And religiouse reverenced hym and rongen hir belles, <br>And al the covent cam to welcome that tyraunt, <br>And alle hise as wel as hym - save oonly fooles; <br>Whiche fooles were wel gladdere to deye <br>Than to lyve lenger sith Leute was so rebuked, <br>And a fals fend Antecrist over alle folk regnede. <br>And that were rnylde men and holye, that no meschief dradden, <br>Defyed alle falsnesse and folk that it usede; <br>And what kyng that hem conforted, knowynge h[ir] gile, <br>They cursed, and hir conseil - were it clerk or lewed. <br>Antecrist hadde thus soone hundredes at his baner, <br>And Pride bar it bare boldely aboute, <br>With a lord that lyveth after likyng of body, <br>That cam ayein Conscience, that kepere was and gyour <br>Over kynde Cristene and Cardynale Vertues. <br>'I conseille,' quod Conscience tho, 'cometh with me, ye fooles, <br>Into Unite Holy Chirche, and holde we us there. <br>And crye we to Kynde that he come and defende us <br>Fooles fro thise fendes lymes, for Piers love the Plowman. <br>And crye we on al the comune that thei come to Unitee, <br>And there abide and bikere ayeins Beliales children.' </div><div style="margin:10px 0"><br>Kynde Conscience tho herde, and cam out of the planetes, <br>And sente forth his forreyours - feveres and fluxes, <br>Coughes and cardiacles, crampes and toothaches, <br>Rewmes and radegundes and roynouse scalles, <br>Biles and bocches and brennynge agues, <br>Frenesies and foule yveles - forageres of Kynde <br>Hadde ypriked and prayed polles of peple; <br>Largeliche a legion lees hir lif soone. <br>There was ' Harrow!' and ' Help! Here cometh Kynde, <br>With Deeth that is dredful, to undo us alle!' <br>The lord that lyved after lust tho aloud cryde <br>After Confort, a knyght, to come and bere his baner. <br>'Alarme! Alarme!' quod that lord, 'ech lif kepe his owene!' <br>Thanne mette thise men, er mynstrals myghte pipe, <br>And er heraudes of armes hadden discryved lordes, <br>Elde the hoore; he was in the vauntwarde, <br>And bar the baner bifore Deeth - bi right he it cleymede. <br>Kynde cam after hym, with many kene soores, <br>As pokkes and pestilences - and muche peple shente; <br>So Kynde thorugh corrupcions kilde ful manye, <br>Deeth cam dryvynge after and al to duste passhed <br>Kynges and knyghtes, kaysers and popes. <br>Lered ne lewed, he lefte no man stonde <br>That he hitte evene, that evere stired after. <br>Manye a lovely lady and [hir] lemmans knyghtes <br>Swowned and swelted for sorwe of Dethes dyntes. <br>Conscience of his curteisie to Kynde he bisoughte <br>To cesse and suffre, and see wher thei wolde <br>Leve Pride pryvely and be parfite Cristene. <br>And Kynde cessede tho, to se the peple amende. <br>Fortune gan flatere thanne tho fewe that were alyve, <br>And bihighte hem long lif - and lecherie h <br>Amonges alle manere men, wedded and unwedded, </div><div style="margin:10px 0">And gaderede a greet hoost al agayn Conscience. <br>'This Lecherie leide on with laughynge chiere <br>And with pryvee speche and peyntede wordes, <br>And armede hym in ydelnesse and in heigh berynge. <br>He bar a bowe in his hand and manye brode arewes, <br>Weren fethered with fair biheste and many a fals truthe. <br>With untidy tales he tened ful ofte <br>Conscience and his compaignye, of Holy Kirke the techeris. <br>Thanne cam Coveitise and caste how he myghte <br>Overcome Conscience and Cardinale Vertues, <br>And armed hym in avarice and hungriliche lyvede. <br>His wepne was al wiles, to wynnen and to hiden; <br>With glosynges and with gabbynges he giled the peple. <br>Symonye hym s[ue]de to assaille Conscience, <br>And preched to the peple, and prelates thei hem maden <br>To holden with Antecrist, hir temporaltees to save; <br>And cam to the kynges counseille as a kene baroun, <br>And kneled to Conscience in Court afore hem alle, <br>And garte Good Feith flee and Fals to abide; <br>And boldeliche bar adoun with many a bright noble <br>Muche of the wit and wisdom of Westmynstre Halle. <br>He jogged til a justice and justed in his eere, <br>And overtilte al his truthe with 'Tak this up amendement.' <br>And to the Arches in haste he yede anoon after, <br>And tornede Cyvyle into Symonye, and siththe he took the Official<br>For a menever mantel he made lele matrymoyne <br>Departen er deeth cam, and a devors shapte. <br>'Allas!' quod Conscience, and cryde tho, 'wolde Crist of his grace <br>That Coveitise were Cristene, that is so kene to fighte, <br>And boold and bidynge the while his bagge lasteth!' <br>And thanne lough Lyf, and leet daggen hise clothes, </div><div style="margin:10px 0">And armed hym in haste in harlotes wordes, <br>And heeld Holynesse a jape and Hendenesse a wastour, <br>And leet Leautee a cherl and Lyere a fre man; <br>Conscience and counseil, he counted it folye. <br>Thus relyede Lif for a litel fortune, <br>And priked forth with Pride - preiseth he no vertue, <br>Ne careth noght how Kynde slow, and shal come at the laste <br>And kille alle erthely creature save Conscience oone. <br>Lyf lepte aside and laughte hym a lemman. <br>'Heele and I,' quod he, 'and heighnesse of herte <br>Shal do thee noght drede neither deeth ne elde. <br>And to foryyte sorwe and yyve noght of synne.' <br>This likede Lif and his lemman Fortune, <br>And geten in hir glorie a gadelyng at the laste, <br>Oon that muche wo wroughte, Sleuthe was his name. <br>Sleuthe wax wonder yerne and soone was of age, <br>And wedded oon Wanhope, a wenche of the stuwes. <br>Hir sire was a sysour that nevere swoor truthe - -<br>Oon Tomme Two-tonge, atteynt at ech a queste. <br>This Sleuthe was war of werre, and a slynge made. <br>And threw drede of dispair a dozeyne myle aboute. <br>For care Conscience tho cryde upon Elde, <br>And bad hym fonde to fighte and afere Wanhope. <br>And Elde hente good hope, and hastiliche he shifte hym, <br>And wayved awey Wanhope and with Lif he fighteth. <br>And Lif fleigh for feere to Phisik after helpe, <br>And bisoughte hym of socour, and of his salve hadde, <br>And gaf hym gold good woon that gladede his herte - <br>And thei gyven hym ageyn a glazene howve. <br>Lyf leeved that lechecraft lette sholde Elde, <br>And dryven awey deeth with dyas and drogges. <br>And Elde auntred hym on Lyf - and at the laste he hitte <br>A phisicien with a furred hood, that he fel in a palsie, <br>And there dyed that doctour er thre dayes after. <br>'Now I se,' seide Lif, 'that surgerie ne phisik </div><div style="margin:10px 0">May noght a myte availle to medle ayein Elde.' <br>And in hope of his heele good herte he hente <br>And rood so to Revel, a riche place and a murye - <br>The compaignye of confort men cleped it som tyme - <br>And Elde anoon after hym, and over myn heed yede, <br>And made me balled bifore and bare on the croune<br>So harde he yede over myn heed it wol be sene evere. <br>'Sire yvele ytaught Elde!' quod I, 'unhende go with the! <br>Sith whanne was the wey over menne heddes? <br>Haddestow be hende,' quod I, 'thow woldest have asked leeve!' <br>'Ye - leve, lurdeyn?' quod he, and leyde on me with age, <br>And hitte me under the ere - unnethe may ich here. <br>Helbuffetted me aboute the mouth and bette out my wangteeth, <br>And gyved me in goutes - I may noght goon at large. <br>And of the wo that I was inne my wif hadde ruthe, <br>And wisshed wel witterly that I were in hevene. <br>For the lyme that she loved me fore, and leef was to feele - <br>On nyghtes, namely, whan we naked weere - <br>I ne myghte in no manere maken it at hir wille, <br>So Elde and he[o] hadden it forbeten. <br>And as I seet in this sorwe, I saugh how Kynde passede, <br>And deeth drogh neigh me - for drede gan I quake, <br>And cryde to Kynde, 'Out of care me brynge! <br>Lo! how Elde the hoore hath me biseye<br>Awreke me if youre wille be, for I wolde ben hennes! <br>'If thow wolt be wroken, wend into Unitee, <br>And hold thee there evere, til I sende for thee; <br>And loke thow konne som craft er thow come thennes.' <br>'Counseille me, Kynde,' quod I, 'what craft be best to lerne?' <br>'Lerne to love,' quod Kynde, 'and leef alle othere.' <br>'How shal I come to catel so, toclothe me and to feede?' <br>'And thow love lelly, lakke shal thee nevere <br>Weede ne worldly mete, while thi lif lasteth.' </div><div style="margin:10px 0">And there by conseil of Kynde I comsed to rome <br>Thorugh Contricion and Confession til I cam to Unitee. <br>And there was Conscience conestable Cristene to save, <br>And bisegede soo[r]ly with sevene grete geaunts <br>That with Antecrist helden harde ayein Conscience. <br>Sleuthe with his slynge an hard saut he made. <br>Proude preestes coome with hym - pange an hundred <br>In paltokes and pyked shoes and pisseris longe knyves <br>Coomen ayein Conscience - with Coveitise thei helden. <br>'By the Marie!' quod a mansed preest, was of the march of Irlonde, <br>'I counte na moore Conscience, by so I cacche silver, <br>Than I do to drynke a draughte of good ale!' <br>And so seiden sixty of the same contree, <br>And shotten ayein with shot, many a sheef of othes, <br>And brode hoked arwes - Goddes herte and hise nayles - <br>And hadden almoost Unitee and holynesse adown. <br>Conscience cryede, ' Help, Clergie. or ellis I falle <br>Thorugh inparfite preestes and prelates of Holy Chirche! <br>Freres herden hym crye, and comen hym to helpe - <br>Ac for thei kouthe noght wel hir craft, Conscience forsook hem. <br>Nede neghede tho neer, and Conscience he tolde <br>That thei come for coveitise to have cure of soules. <br>'And for thei are povere, paraventure, for patrymoyne hem failleth, <br>Thei wol flatere, to fare wel, folk that ben riche. <br>And sithen thei chosen chele and cheitiftee, poverte - <br>Lat hem chewe as thei chose, and charge hem with no cure! <br>For lomere he lyeth, that liflode moot begge, <br>Than he that laboureth for liflode and leneth it beggeres. <br>And sithen freres forsoke the felicite of erthe, </div><div style="margin:10px 0">Lat hem be as beggeris, or lyve by aungeles foode!' <br>Conscience of this counseil tho comsede for to laughe, <br>And curteisliche conforted hem and called in alle freres, <br>And seide, Sires, soothly welcome be ye alle <br>To Unitee and Holy Chirche - ac o thyng I yow preye<br>Holdeth yow in unitee, and haveth noon envye <br>To lered ne to lewed, but lyveth after youre reule. <br>And I wol be youre borugh, ye shal have breed and clothes <br>And othere necessaries ynowe - yow shal no thyng lakke, <br>With that ye leve logik and lerneth for to lovye. <br>For love lafte thei lordshipe, bothe lond and scole - <br>Frere Fraunceys and Domynyk - for love to be holye. <br>'And if ye coveite cure, Kynde wol yow telle <br>That in mesure God made alle manere thynges, <br>And sette it at a certein and at a siker nombre, <br>And nempnede hem names newe, and noumbrede the sterres<br>Qui numerat multitudinem stellarum et omnibus eis . <br>'Kynges and knyghtes, that kepen and defenden, <br>Han officers under hem, and ech of hem a certein. <br>And if thei wage men to werre, thei write hem in noumbre; <br>Wol no tresorere taken hem wages, travaille thei never so soore, <br>[But thei ben nempned in the noumbre of hem that ben ywaged]. <br>Alle othere in bataille ben yholde brybours - <br>Pylours and pykeharneys, in ech a parisshe ycursed. <br>' Monkes and moniales and alle men of religion - <br>Hir ordre and hir reule wole to han a certein noumbre; <br>Of lewed and of lered the lawe wole and asketh <br>A certein for a certein - save oonliche of freres! </div><div style="margin:10px 0">Forthi,' quod Conscience, 'by Crist! kynde wit me telleth <br>It is wikked to wage yow - ye wexen out of noumbre! <br>Hevene hath evene noumbre, and helle is withoute noumbre; <br>Forthi I wolde witterly that ye were in the registre <br>And youre noumbre under notarie sygne, and neither mo ne lasse!' <br>Envye herde this and heet freres go to scole <br>And lerne logyk and lawe - and ek contemplacion - <br>And preche men of Plato, and preve it by Seneca <br>That alle thynges under hevene oughte to ben in cornune. <br>He lyeth, as I leve, that to the lewed so precheth<br>For God made to men a lawe and Moyses it taughte - <br>Non concupisces rem proximi tui. <br>And yvele is this yholde in parisshes of Engelonde; <br>For persons and parissh preestes, that sholde the peple shryve, <br>Ben curatours called to knowe and to hele. <br>Alle that ben hir parisshens penaunces enjoigne, <br>And ben ashamed in hir shrift; ac shame maketh hem wende <br>And fleen to the freres - -as fals folk to Westmynstre, <br>That borweth, and bereth it thider, and thanne biddeth frendes <br>Yerne of foryifnesse or lenger yeres leve. <br>Ac while he is in Westmynstre he wol be bifore <br>And maken hym murie with oother menne goodes. <br>And so it fareth with muche folk that to freres shryveth; <br>As sisours and executours - thei shul yyve the freres </div><div style="margin:10px 0">A parcel to preye for hem, and [purchace] hem mur[th]e <br>With the remenaunt that othere [renkes] biswonke, <br>And suffre the dede in dette to the day of doome. <br>Envye herfore hatede Conscience, <br>And freres to philosophie he fond hem to scole, <br>The while Coveitise and Unkyndenesse Conscience assaillede. <br>In Unitee Holy Chirche Conscience held hym, <br>And made Pees porter to pynne the yates <br>Of alle taletelleris and titeleris in ydel. <br>Ypocrisie and h[ii] an hard saut thei made. <br>Ypocrisie at the yate harde gan fighte, <br>And woundede wel wikkedly many a wise techere <br>That with Conscience acordede and Cardynale Vertues. <br>Conscience called a leche, that coude wel shryve, <br>To go salve tho that sike were and thorugh synne ywounded. <br>Shrift shoop sharp salve, and made men do penaunce <br>For hire mysdedes that thei wroght hadde, <br>And that Piers [pardon] were ypayed, redde quod debes. <br>Some liked noght this leche, and lettres thei sente, <br>If any surgien were in the sege that softer koude plastre. <br>Sire Leef-to-lyve-in-lecherie lay there and gronede; <br>For fastynge of a Fryday he ferde as he wolde deye<br>'Ther is a surgien in this sege that softe kan handle, <br>And moore of phisik bi fer, and fairer he plastreth - <br>Oon Frere Flaterere, is phisicien and surgien.' <br>Quod Contricion to Conscience, 'Do hym come to Unitee; <br>For here is many a man hurt thorugh Ypocrisye.' <br>'We han no nede,' quod Conscience, 'I woot no bettre leche <br>Than person or parissh preest, penitauncer or bisshop - <br>Save Piers the Plowman, that hath power over alle, <br>And indulgence may do, but if dette lette it. </div><div style="margin:10px 0">I may wel suffre,' seide Conscience, 'syn ye desiren, <br>That Frere Flaterere be fet and phisike yow sike.' <br>The frere herof herde and hiede faste <br>To a lord for a lettre, leve to have to curen <br>As a curatour he were, and cam with his lettre <br>Boldely to the bisshop, and his brief hadde, <br>In contrees ther he coome, confessions to here - <br>And cam there Conseience was, and knokked at the yate. <br>Pees unpynned it, was porter of Unitee, <br>And in haste askede what his wille were. <br>'In faith,' quod this frere, 'for profit and for helthe <br>Carpe I wolde with Contricion, and therfore cam I hider,' <br>'He is sik,' seide Pees, 'and so are manye othere; <br>Ypocrisie hath hurt hem - ful hard is if thei kevere.' <br>'I am a surgien,' seide the frere, 'and salves can make. <br>Conscience knoweth me wel and what I kan do bothe.' <br>'I praye thee,' quod Pees tho, 'er thow passe ferther, <br>What hattestow? I praye thee, hele noght thi name.' <br>'Certes,' seide his felawe, ' Sire Penetrans-domos.' <br>'Ye? Go thi gate!' quod Pees, 'by God, for al thi phisik, <br>But thow konne any craft, thow comest nought herinne! <br>I knew swich oon ones, noght eighte wynter passed, <br>Coom in thus ycoped at a court there I dwelde, <br>And was my lordes leche - and my ladies bothe. <br>And at the laste this lymytour, tho my lord was oute, <br>He salvede so oure wommen til some were with childe.' <br>Hende-Speche heet Pees tho, ' Opene the yates. <br>Lat in the frere and his felawe, and make hem fair cheere. <br>He may se and here here, so may bifalle, <br>That Lif thorugh his loore shal leve coveitise, <br>And be adrad of deeth and withdrawe hym fram pryde, <br>And acorde with Conseience and kisse hir either oother.' <br>Thus thorugh Hende-Speche entred the frere, <br>And cam in to Conseience and curteisly hym grette. <br>' Thow art welcome,' quod Conscience, 'kanstow heele sike? <br>Here is Contricion,' quod Conscience, 'my cosyn, ywounded. <br>Conforte hym,' quod Conscience, 'and take kepe to hise soores. <br>The plastres of the person and poudres ben to soore, </div><div style="margin:10px 0">And lat hem ligge overlonge and looth is to chaunge hem; <br>Fro Lenten to Lenten he lat his plastres bite.' <br>'That is overlonge!' quod this lymytour, ' I leve - I shal amende it' - <br>And gooth, gropeth Contricion, and gaf hym a plastre <br>Of 'A pryvee paiement, and I shal praye for yow, <br>And for al [hem] that ye ben holden to, al my lif tyme, <br>And make yow [and] my Lady in masse and in matyns <br>As freres of oure fraternytee for a litel silver.' <br>Thus he gooth and gadereth, and gloseth there he shryveth - <br>Til Contricion hadde clene foryeten to crye and to wepe, <br>And wake for hise wikked werkes as he was wont to doone. <br>For confort of his confessour contricion he lafte, <br>That is the soverayneste salve for alle[s]kynnes synnes. <br>Sleuth seigh that, and so dide Pryde, <br>And comen with a kene wille Conscience to assaille. <br>Conseience cryed eft [Clergie come] helpe hym, <br>And [bad] Contricion [come] to kepe the yate. <br>' He lith adreynt,' seide Pees, 'and so do manye othere; <br>The frere with his phisyk this folk hath enchaunted, <br>And plastred hem so esily [that hii] drede no synne!' <br>'By Crist!' quod Conscience tho, ' I wole bicome a pilgrym, <br>And walken as wide as the world lasteth, <br>To seken Piers the Plowman, that Pryde myghte destruye, <br>And that freres hadde a fyndyng, that for nede flateren <br>And countrepledeth me, Conscience. Now Kynde me avenge, <br>And sende me hap and heele, til I have Piers the Plowman!' <br>And siththe he gradde after Grace, til I gan awake.</div><div style="margin:10px 0"><br /></a><br />poem by <a href="http://en.citatepedia.ro/by.php?a=William+Langland">William Langland</a><div class=q> <img src="https://www.citatepedia.ro/g/32share.png" style="float:left" alt="Share"> <script type="text/javascript" src="//s7.addthis.com/js/300/addthis_widget.js#pubid=citatepedia" async="async"></script><div style="display:inline-block" class="addthis_sharing_toolbox" data-url="http://en.citatepedia.ro/comments.php?id=538542" data-title="The Vision Of Piers Plowman - Part 20 de William Langland" data-description="Thanne as I wente by the way, whan I was thus awaked, Hevy chered I yede, and elenge in herte; For I ne wiste wher to ete ne at what place, And it neghed neigh the noon, and with Nede I mette, That afrounted me foule and faitour me called. 'C..."></div> </div> </div>

solid border dashed border dotted border double border groove border ridge border inset border outset border no border blue green red purple cyan gold silver black