<div style="background:#fff;border:#bbb dashed 1px;padding:5px"><a href="http://en.citatepedia.ro/comments.php?id=538540" style="color:#000;text-decoration:none"><div style="margin:10px 0"><strong>The Vision Of Piers Plowman - Part 18</strong></div><div style="margin:10px 0">Wolleward and weetshoed wente I forth after <br>As a recchelees renk that [reccheth of no wo], <br>And yede forth lik a lorel al my lif tyme, <br>Til I weex wery of the world and wilned eft to slepe, <br>And lened me to a Lenten - and longe tyme I slepte; <br>Reste me there and rutte faste til ramis palmarum. <br>Of gerlis and of Gloria, laus gretly me dremed <br>And how osanna by organye olde folk songen, </div><div style="margin:10px 0">And of Cristes passion and penaunce, the peple that ofraughte. <br>Oon semblable to the Samaritan, and somdeel to Piers the Plowman, <br>Barefoot on an asse bak bootles cam prikye, <br>Withouten spores other spere; spakliche he loked, <br>As is the kynde of a knyght that cometh to be dubbed, <br>To geten hym gilte spores on galoches ycouped. <br>Thanne was Feith in a fenestre, and cryde 'At Fili David!' <br>As dooth an heraud of armes whan aventrous cometh to iustes. <br>Olde Jewes of Jerusalem for joye thei songen, <br>Benedictus qui venit in nomine Domini. <br>Thanne I frayned at Feith what al that fare bymente, <br>And who sholde juste in Jerusalem. 'jesus,' he seide, <br>'And fecche that the fend claymeth - Piers fruyt the Plowman.' <br>'Is Piers in this place?' quod I, and he preynte on me. <br>'This Jesus of his gentries wol juste in Piers armes, <br>In his helm and in his haubergeon - humana natura. <br>That Crist be noght biknowe here for consummatus Deus, <br>In Piers paltok the Plowman this prikiere shal ryde; <br>For no dynt shal hym dere as in deitate Patris.' <br>'Who shal juste with Jesus?' quod I, 'Jewes or scrybes?' <br>'Nay,' quod Feith, 'but the fend and fals doom to deye. <br>Deeth seith he shal fordo and adoun brynge <br>Al that lyveth or loketh in londe or in watre. <br>Lif seith that he lieth, and leieth his lif to wedde <br>That, for al that Deeth kan do, withinne thre daies to walke <br>And fecche fro the fend Piers fruyt the Plowman, <br>And legge it ther hym liketh, and Lucifer bynde, </div><div style="margin:10px 0">And forbete and adoun brynge bale-deeth for evere<br>O Mors ero mors tua!' <br>Thanne cam Pilatus with muche peple, sedens pro tribunali, <br>To se how doghtiliche Deeth sholde do, and deme hir botheres right. <br>The Jewes and the justieeayeins Jesu thei weere, <br>And al the court on hym cryde ' Crucifige!' sharpe. <br>Tho putte hym forth a p[e]lour bifore Pilat and seide, <br>'This Jesus of oure Jewes temple japed and despised, <br>To fordoon it on o day, and in thre dayes after <br>Edifie it eft newe - here he stant that seide it - <br>And yit maken it as muche in alle manere poyntes <br>Bothe as long and as large a lofte and by grounde.' <br>' Crucifige!' quod a cachepol, ' I warante hym a wicche!' <br>' Tolle, tolle!' quod another, and took of kene thornes, <br>And bigan of [gr]ene thorn a garland to make, <br>And sette it sore on his heed and seide in envye, <br>'A ve, rabyt' quod that ribaud - and threw reedes at hym, <br>Nailed hym with thre nailes naked on the roode, <br>And poison on a poole thei putte up to hise lippes, <br>And beden hym drynken his deeth-yvel - hise dayes were ydone - <br>And [seiden], ' If that thow sotil be, help now thiselve; <br>If thow be Crist and kynges sone, com down of the roode; <br>Thanne shul we leve that lif thee loveth and wol noght lete thee deye!' <br>' Consummatum est,' quod Crist, and comsede for to swoune, <br>Pitousliche and pale as a prison that deieth; <br>The lord of lif and of light tho leide hise eighen togideres. <br>The day for drede withdrough and derk bicam the sonne. <br>The wal waggede and cleef, and al the world quaved. <br>Dede men for that dene come out of depe graves, <br>And tolde why that tempeste so longe tyme durede. <br>'For a bitter bataille,' the dede body seide; <br>'Lif and Deeth in this derknesse, hir oon fordeoth hir oother. <br>Shal no wight wite witterly who shal have the maistrie <br>Er Sonday aboute sonne risyng' - and sank with that til erthe. </div><div style="margin:10px 0">Some seide that he was Goddes sone, that so faire deyde<br>Vere filius Dei erat iste. <br>And some seide he was a wicche - 'Good is that we assaye <br>Wher he be deed or noght deed, doun er he be taken.' <br>Two theves also tholed deeth that tyme <br>Upon a croos bisides Crist - so was the comune lawe. <br>A cachepol cam forth and craked bothe hir legges, <br>And hir armes after of either of tho theves. <br>Ac was no boy so boold Goddes body to touche; <br>For he was knyght and kynges sone, Kynde foryaf that throwe <br>That noon harlot were so hardy to leyen hond upon hym. <br>Ac ther cam forth a knyght with a kene spere ygrounde, <br>Highte Longeus, as the lettre telleth, and longe hadde lore his sight. <br>Bifore Pilat and oother peple in the place he hoved. <br>Maugree his manye teeth he was maad that tyme <br>To [justen with Jesus, this blynde Jew Longeus]. <br>For alle thei were unhardy, that hoved on horse or stode, <br>To touchen hym or to tasten hym or taken hym doun of roode, <br>But this blynde bacheler, that baar hym thorugh the herte. <br>The blood sprong doun by the spere and unspered the knyghtes eighen. <br>Thanne fil the knyght upon knees and cryde Jesu mercy<br>'Ayein my wille it was, Lord, to wownde yow so soore!' <br>He sighed and seide, ' Soore it me athynketh! <br>For the dede that I have doon I do me in youre grace. <br>Have on me ruthe, rightful Jesu!' - and right with that he wepte. <br>Thanne gan Feith felly the false Jewes despise - <br>Callede hem caytyves acorsed for evere<br>' For this foule vileynye vengeaunce to yow falle! <br>To do the blynde bete hym ybounde, it was a boyes counseille. <br>Cursede caytyves! Knyghthood was it nevere </div><div style="margin:10px 0">To mysdo a deed body by daye or by nyghte. <br>The gree yit hath he geten, for al his grete wounde. <br>' For youre champion chivaler, chief knyght of yow alle, <br>Yilt hym recreaunt rennyng, right at Jesus wilk. <br>For be this derknesse ydo, Deeth worth yvenquisshed; <br>And ye, lurdaynes, han ylost - for Lif shal have the maistrye. <br>And youre fraunchyse, that fre was, fallen is in thraldom, <br>And ye, cherles, and youre children, cheve shulle ye nevere, <br>Ne have lordshipe in londe, ne no lond tilye, <br>But al barayne be and usurie usen, <br>Which is lif that Oure Lord in alle lawes acurseth. <br>Now youre goode dayes arn doon, as Daniel prophecied<br>Whan Crist cam hir kyngdom the crowne sholde lese - <br>Cum veniat sanctus sanctorum cessabit unxio vestra.' <br>What for feere of this ferly and of the false Jewes, <br>I drow me in that derknesse to descendit ad inferna, <br>And there I saugh soothly, secundum scripturas, <br>Out of the west coste, a wenche, as me thoughte, <br>Cam walkynge in the wey; to helleward she loked. <br>Mercy highte that mayde, a meke thyng with alle, <br>A ful benigne burde, and buxom of speche. <br>Hir suster, as it semed, cam softely walkynge <br>Evene out of the est, and westward she lokede - <br>A ful comely creature [and a clene], Truthe she highte; <br>For the vertue that hire folwede, afered was she nevere. <br>Whan thise maydenes mette, Mercy and Truthe, <br>Either asked oother of this grete wonder - <br>Of the dyn and of the derknesse, and how the day rowed, <br>And which a light and a leme lay bifore helle. <br>'Ich have ferly of this fare, in feith,' seide Truthe, <br>'And am wendynge to wite what this wonder meneth.' <br>'Have no merveille', quod Mercy, 'murhte it bitokneth. </div><div style="margin:10px 0">A maiden that highte Marie, and moder withouten felyng <br>Of any kynde creature, conceyved thorugh speche <br>And grace of the Holy Goost; weex greet with childe; <br>Withouten wem into this world she broghte hym; <br>And that my tale be trewe, I take God to witnesse. <br>'Sith this barn was ybore ben thritti wynter passed, <br>Which deide and deeth tholed this day aboute mydday - <br>And that is cause of this clips that closeth now the sonne, <br>In menynge that man shal fro merknesse be drawe <br>The while this light and this leme shal Lucifer ablende. <br>For patriarkes and prophetes han preched herof often - <br>That man shal man save thorugh a maydenes helpe, <br>And that was tynt thorugh tree, tree shal it wynne, <br>And that Deeth down broughte, deeth shal releve.' <br>'That thow tellest; quod Truthe, 'is but a tale of waltrot! <br>For Adam and Eve and Abraham with othere <br>Patriarkes and prophetes that in peyne liggen, <br>Leve thow nevere that yon light hem alofte brynge, <br>Ne have hem out of helle - hold thi tonge, Mercy! <br>It is but trufle that thow tellest - I, Truthe, woot the sothe. <br>For that is ones in helle, out cometh it nevere; <br>Job the prophete patriark repreveth thi sawes<br>Quia in inferno nulla est redempcio.' <br>Thanne Mercy ful myldely mouthed thise wordes<br>'Thorugh experience,' quod he[o], ' I hope thei shul be saved. <br>For venym fordooth venym - and that I preve by reson. <br>For of alle venymes foulest is the scorpion; <br>May no medicyne [am]e[nd]e the place ther he styngeth, <br>Til he be deed and do therto - the yvel he destruyeth, <br>The firste venymouste, thorugh vertu of hymselve. <br>So shal this deeth fordo - I dar my lif legge - <br>Al that deeth dide first thorugh the develes entisyng; <br>And right as thorugh [gilours] gil;e [bigiled was man], <br>So shal grace that al bigan make a good ende </div><div style="margin:10px 0">[And bigile the gilour - and that is good] sleighte<br>Ars ut artem falleret.' <br>'Now suffre we!' seide Truthe, ' I se, as me thynketh, <br>Out of the nyppe of the north, noght ful fer hennes, <br>Rightwisnesse corne rennynge; reste we the while, <br>For he[o] woot moore than we - he[o] was er we bothe.' <br>'That is sooth,' seide Mercy, 'and I se here by sowthe <br>Where cometh Pees pleyinge, in pacience yclothed. <br>Love hath coveited hire longe - leve I noon oother <br>But [Love] sente hire som lettre, what this light bymeneth <br>That overhoveth helle thus; she us shal telle.' <br>Whan Pees in pacience yclothed approched ner hem tweyne, <br>Rightwisnesse hire reverenced for hir riche clothyng, <br>And preide Pees to telle hire to whit place she wolde <br>And in hire gaye garnements whom she grete thoughte? <br>'My wil is to wende,' quod she, 'and welcome hem alle <br>That many day myghte I noght se for merknesse of synne - <br>Adam and Eve and othere mo in helle, <br>Moyses and many mo; Mercy shul [synge], <br>And I shal daunce therto - do thow so, suster! <br>For Jesus justede wel, joye bigynneth dawe<br>Ad vesperum demorabitur fletus, et ad matutinum leticia. <br>' Love, that is my lemman, swiche lettres me sente <br>That Mercy, my suster, and I mankynde sholde save, <br>And that God hath forgyven and graunted me, Pees, and Mercy <br>To be mannes meynpernour for everemoore after. <br>Lo, here the patente!' quod Pees, 'In pace in idipsum, <br>And that this dede shal dure, dormiam et requiescam.' <br>'What, ravestow?' quod Rightwisnesse; 'or thow art righty dronke! </div><div style="margin:10px 0">Levestow that yond light unlouke myghte helle <br>And save mannes soule? Suster, wene it nevere! <br>At the bigynnyng God gaf the doom hymselve - <br>That Adam and Eve and alle that hem suwede <br>Sholden deye downrighte, and dwelle in peyne after <br>If that thei touchede a tree and of the fruyt eten. <br>Adam afterward, ayeins his defence, <br>Freet of that fruyt, and forsook, as it were, <br>The love of Oure Lord and his loore bothe <br>And folwede that the fend taughte and his felawes wille <br>Ayeins reson - I, Rightwisnesse, recorde thus with Truthe <br>That hir peyne be perpetuel and no preiere hem helpe. <br>Forthi lat hem chewe as thei chosen, and chide we noght, sustres, <br>For it is botelees bale, the byte that thei eten.' <br>'And I shal preie,' quod Pees, 'hir peyne moot have ende, <br>And wo into wele mowe wenden at the laste. <br>For hadde thei wist of no wo, wele hadde thei noght knowen; <br>For no wight woot what wele is, that nevere wo suffrede, <br>Ne what is hoot hunger, that hadde nevere defaute. <br>If no nyght ne weere, no man, as I leve, <br>Sholde wite witterly what day is to meene. <br>Sholde nevere right riche man that lyveth in reste and ese <br>Wite what wo is, ne were the deeth of kynde. <br>So God that bigan al of his goode wille <br>Bicam man of a mayde mankynde to save, <br>And suffrede to be sold, to se the sorwe of deying, <br>The which unknytteth alle care, and comsynge is of reste. <br>For til modicum mete with us, I may it wel avowe, <br>Woot no wight, as I wene, what is ynogh to mene. <br>' Forthi God, of his goodnesse, the firste gome Adam, <br>Sette hym in solace and in sovereyn murthe; <br>And siththe he suffred hym synne, sorwe to feele - <br>To wite what wele was, kyndeliche to knowe it. <br>And after, God auntrede hymself and took Adames kynde <br>To wite what he hath suffred in thre sondry places, </div><div style="margin:10px 0">Bothe in hevene and in erthe - and now til helle he thenketh, <br>To wite what alle wo is, that woot of alle joye. <br>'So it shal fare by this folkhir folie and hir synne <br>Shal lere hem what langour is, and lisse withouten ende. <br>Woot no wight what werre is ther that pees regneth, <br>Ne what is witterly wele til ''weylawey'' hym teche.' <br>Thanne was ther a wight with two brode eighen; <br>Book highte that beaupeere, a bold man of speche. <br>'By Goddes body!' quod this Book, 'I wol bere witnesse <br>That tho this barn was ybore, ther blased a sterre <br>That alle the wise of this world in o wit acordeden - <br>That swich a barn was ybore in Bethleem the citee <br>That mannes soule sholde save and synne destroye. <br>'And alle the elements,' quod the Book, 'herof beren witnesse. <br>That he was God that al wroghte the wolkne first shewed<br>Tho that weren in hevene token stella comata <br>And tendeden hire as a torche to reverencen his burthe; <br>The light folwede the Lord into the lowe erthe. <br>The water witnesseth that he was God, for he wente on it; <br>Peter the Apostel parceyved his gate, <br>And as he wente on the water wel hym knew, and seide, <br>''tube me venire ad te super aquas.'' <br>And lo! how the sonne gan louke hire light in hirselve <br>Whan she seigh hym suffre, that sonne and see made. <br>The erthe for hevynesse that he wolde suffre <br>Quaked as quyk thyng and al biquasshed the roche. <br>'Lo! helle myghte nat holde, but opnede tho God tholede, <br>And leet out Symondes sones to seen hym hange on roode. <br>And now shal Lucifer leve it, though hyrn looth thynke. <br>For Gigas the geaunt with a gyn engyned <br>To breke and to bete adoun that ben ayeins Jesus. <br>And I, Book, wole be brent, but Jesus rise to lyve <br>In alle myghtes of man, and his moder gladie, </div><div style="margin:10px 0">And conforte al his kyn and out of care brynge, <br>And al the Jewene joye unjoynen and unlouken; <br>And but thei reverencen his roode and his resurexion, <br>And bileve on a newe lawe, be lost, lif and soule!' <br>'Suffre we!' seide Truthe, 'I here and see bothe <br>A spirit speketh to helle and biddeth unspere the yates<br>''Attolite portas.'' <br>A vois loude in that light to Lucifer crieth, <br>''Prynees of this place, unpynneth and unlouketh! <br>For here cometh with crowne that kyng is of glorie.'' <br>Thanne sikede Sathan, and seide to helle, <br>'Swich a light, ayeins oure leve, Lazar it fette; <br>Care and combraunce is comen to us alle! <br>If this kyng come in, mankynde wole he fecche, <br>And lede it ther Lazar is, and lightliche me bynde. <br>Patriarkes and prophetes han parled herof longe - <br>That swich a lord and a light shal lede hem alle hennes.' <br>'Listneth!' quod Lucifer, 'for I this lord knowe; <br>Bothe this lord and this light, is longe ago I knew hym. <br>May no deeth this lord dere, ne no develes queyntise, <br>And where he wole, is his wey - ac ware hym of the perils! <br>If he reve me of my right, he robbeth me by maistrie; <br>For by right and by reson the renkes that ben here <br>Body and soule beth myne, bothe goode and ille. <br>For hymself seide, that sire is of hevene, <br>That if Adam ete the appul, alle sholde deye, <br>And dwelle [in deol] with us develes - this thretynge he made. <br>And [sithen] he that Soothnesse is seide thise wordes, <br>And I sithen iseised sevene [thousand] wynter, <br>I leeve that lawe nyl noght lete hym the leeste.' </div><div style="margin:10px 0">'That is sooth,' seide Satan, 'but I me soore drede; <br>For thow gete hem with gile, and his gardyn breke, <br>And in semblaunce of a serpent sete on the appultre, <br>And eggedest hem to ete, Eve by hirselve, <br>And toldest hire a tale - of treson were the wordes; <br>And so thou haddest hem out and hider at the laste. <br>It is noght graithly geten, ther gile is the roote!' <br>' For God wol noght be bigiled,' quod Gobelyn, ' ne byjaped. <br>We have no trewe title to hem, for thorugh treson were thei dampned.' <br>' Certes, I drede me,' quod the Devel, 'lest Truthe wol hem fecche. <br>Thise thritty wynter, as I wene, he wente aboute and preched. <br>I have assailled hym with synne, and som tyme I asked <br>Wheither he were God or Goddes sone - he gaf me short answere; <br>And thus hath he trolled forth thise two and thritty wynter. <br>And whan I seigh it was so, slepynge I wente <br>To warne Pilates wif what done man was Jesus; <br>For Jewes hateden hym and han doon hym to dethe. <br>I wolde have lengthed his lif - for I leved, if he deide, <br>That his soule wolde suffre no synne in his sighte; <br>For the body, while it on bones yede, aboute was evere <br>To save men from synne if hemself wolde. <br>And now I se wher a soule cometh [silynge hiderward] <br>With glorie and with gret light - God it is, I woot wel! <br>I rede we fle,' quod he, 'faste alle hennes - <br>For us were bettre noght be than biden his sighte. <br>For thi lesynges, Lucifer, lost is al oure praye. <br>First thorugh the we fellen fro hevene so heighe; <br>For we leved thi lesynges, we lopen out alle with thee; <br>And now for thi laste lesynge, ylorn we have Adam, <br>And al oure lordshipe, I leve, a londe and a watre<br>Nunc Princeps huius mundi eicietur foras.' </div><div style="margin:10px 0">Eft the light bad unlouke, and Lucifer answerde, <br>' Quis est iste ? <br>What lord artow?' quod Lucifer. The light soone seide, <br>Rex glorie, <br>The lord of myght and of mayn and alle manere vertues - <br>Dominus virtutum. <br>Dukes of this dymme place, anoon undo thise yates, <br>That Crist may come in, the Kynges sone of Hevene!' <br>And with that breeth helle brak, with Belialles barres - <br>For any wye or warde, wide open the yates. <br>Patriarkes and prophetes, populus in tenebris, <br>Songen Seint Johanes song, ' Ecce Agnus Dei.' <br>Lucifer loke ne myghte, so light hym ablente. <br>And tho that Oure Lord lovede, into his light he laughte, <br>And seide to Sathan, 'Lo! here my soule to amendes <br>For alle synfulle soules, to save tho that ben worthi. <br>Myne thei ben and of me - I may the bet hem cleyme. <br>Although reson recorde, and right of myselve, <br>That if thei ete the appul, alle sholde deye, <br>I bihighte hem noght here helle for evere. <br>For the dede that thei dide, thi deceite it made; <br>With gile thow hem gete, ageyn alle reson. <br>For in my paleis, Paradis, in persone of an addre, <br>Falsliche thow fettest there thyng that I lovede. <br>'Thus ylik a lusard with a lady visage, <br>Thefliche thow me robbedest; the Olde Lawe graunteth <br>That gilours be bigiled - and that is good reson<br>Dentem pro dente et oculum pro oculo. </div><div style="margin:10px 0">Ergo soule shal soule quyte and synne to synne wende, <br>And al that man hath mysdo, I, man, wole amende it. <br>Membre for membre [was amendes by the Olde Lawe], <br>And lif for lif also - and by that lawe I clayme <br>Adam and al his issue at my wille herafter. <br>And that deeth in hem fordide, my deeth shal releve, <br>And bothe quyke and quyte that queynt was thorugh synne; <br>And that grace gile destruye, good feith it asketh. <br>So leve it noght, Lucifer, ayein the lawe I fecche hem, <br>But by right and by reson raunsone here my liges<br>Non veni solvere legem set adimplere. <br>'Thow fettest myne in my place ayeins alle reson - <br>Falsliche and felonliche; good feith me it taughte, <br>To recovere hem thorugh raunsoun, and by no reson ellis, <br>So that with gile thow gete, thorugh grace it is ywonne. <br>Thow, Lucifer, in liknesse of a luther addere <br>Getest bi gile tho that God lovede; <br>And I, in liknesse of a leode, that Lord am of hevene, <br>Graciousliche thi gile have quyt - go gile ayein gile! <br>And as Adam and alle thorugh a tree deyden, <br>Adam and alle thorugh a tree shal turne to lyve; <br>And gile is bigiled, and in his gile fallen<br>Et cecidit in foveam quam fecit. <br>Now bigynneth thi gile ageyn thee to turne <br>And my grace to growe ay gretter and widder. <br>The bitternesse that thow hast browe, now brouke it thiselve; <br>That art doctour of deeth, drynk that thow madest! <br>'For I that am lord of lif, love is my drynke, <br>And for that drynke today, I deide upon erthe. <br>I faught so, me thursteth yet, for mannes soule sake; <br>May no drynke me moiste, ne my thurst stake, </div><div style="margin:10px 0">Til the vendage falle in the vale of Josaphat, <br>That I drynke right ripe must, resureccio mortuorum. <br>And thanne shal I come as a kyng, crouned, with aungeles, <br>And have out of helle alle mennes soules. <br>' Fendes and fendekynes bifore me shul stande <br>And be at my biddyng wheresoevere [be] me liketh. <br>Ac to be merciable to man thanne, my kynde it asketh, <br>For we beth bretheren of blood, but noght in baptisme alle. <br>Ac alle that beth myne hole bretheren, in blood and in baptisme, <br>Shul noght be dampned to the deeth that is withouten ende<br>Tibi soli peccavi . <br>'It is noght used on erthe to hangen a feloun <br>Ofter than ones, though he were a tretour. <br>And if the kyng of that kyngdom corne in that tyme <br>There the feloun thole sholde deeth oother juwise, <br>Lawe wolde he yeve hym lif, and he loked on hym. <br>And I that am kyng of kynges shal come swich a tyme <br>There doom to the deeth dampneth alle wikked; <br>And if lawe wole I loke on hem, it lith in my grace <br>Wheither thei deye or deye noght for that thei diden ille. <br>Be it any thyng abought, the boldnesse of hir synnes, <br>I may do mercy thorugh rightwisnesse, and alle my wordes trewe. <br>And though Holy Writ wole that I be wroke of hem that diden ille - <br>Nullum malum impunitum - <br>Thei shul be clensed clerliche and [clene] wasshen of hir synnes <br>In my prisone Purgatorie, til parce it hote. <br>And my mercy shal be shewed to manye of my bretheren; </div><div style="margin:10px 0">For blood may suffre blood bothe hungry and acale, <br>Ac blood may noght se blood blede, but hym rewe.' <br>Audivi archana verba que non licet homini loqui. <br>'Ac my rightwisnesse and right shal rulen al helle, <br>And mercy al mankynde bifore me in hevene. <br>For I were an unkynde kyng but I my kyn helpe - -<br>And nameliche at swich a nede ther nedes help bihoveth<br>Non intres in iudicium cum servo tuo. <br>'Thus by lawe,' quod Oure Lord, 'lede I wole fro hennes <br>Tho [leodes] that I lov[e] and leved in my comynge. <br>And for thi lesynge, Lucifer, that thow leighe til Eve, <br>Thow shalt abyen it bittre!' - and bond hym with cheynes. <br>As troth and al the route hidden hem in hernes; <br>They dorste noght loke on Oure Lord, the [lothli]este of hem alle, <br>But leten hym lede forth what hym liked and lete what hym liste. <br>Manye hundred of aungeles harpeden and songen, <br>' Culpat caro, purgat caro, regnat Deus Dei caro.' <br>Thanne pipede Pees of poesie a note<br>' Clarior est solito post maxima nebula phebus; <br>Post inimicicias clarior est et amor. <br>' After sharpest shoures,' quod Pees, ' moost shene is the sonne; <br>Is no weder warmer than after watry cloudes; <br>Ne no love levere; ne lever frendes <br>Than after werre and wo, whan love and pees ben maistres. <br>Was nevere werre in this world, ne wikkednesse so kene, <br>'That Love, and hym liste, to laughyng ne broughte, <br>And Pees, thorugh pacience, alle perils stoppede.' </div><div style="margin:10px 0">' Trewes!' quod Truthe; ' thow tellest us sooth, by Jesus! <br>Clippe we in covenaunt, and ech of us kisse oother.' <br>'And lete no peple,' quod Pees, 'parceyve that we chidde; <br>For inpossible is no thyng to Hym that is almyghty.' <br>'Thow seist sooth,' seide Rightwisnesse, and reverentliche hire kiste, <br>Pees, and Pees h[i]re, per secula seculorum. <br>Misericordia et Veritas obviaverunt sibi, justicia et Pax osculate sunt. <br>Truthe trumpede tho and song Te Deum laudamus, <br>And thanne lutede Love in a loud note, <br>' Ecce quam bonum et quam iocundum .' <br>Til the day dawed thise damyseles carolden, <br>That men rongen to the resurexion - and right with that I wakede, <br>And called Kytte my wif and Calote my doghter<br>'Ariseth and reverenceth Goddes resurexion, <br>And crepeth to the cros on knees, and kisseth it for a juwel! <br>For Goddes blik body it bar for eure body, <br>And it afereth the fend - for swich is the myghte, <br>May no grisly goost glide there it shadweth!'</div><div style="margin:10px 0"><br /></a><br />poem by <a href="http://en.citatepedia.ro/by.php?a=William+Langland">William Langland</a><div class=q> <img src="https://www.citatepedia.ro/g/32share.png" style="float:left" alt="Share"> <script type="text/javascript" src="//s7.addthis.com/js/300/addthis_widget.js#pubid=citatepedia" async="async"></script><div style="display:inline-block" class="addthis_sharing_toolbox" data-url="http://en.citatepedia.ro/comments.php?id=538540" data-title="The Vision Of Piers Plowman - Part 18 de William Langland" data-description="Wolleward and weetshoed wente I forth after As a recchelees renk that [reccheth of no wo], And yede forth lik a lorel al my lif tyme, Til I weex wery of the world and wilned eft to slepe, And lened me to a Lenten - and longe tyme I slepte; Re..."></div> </div> </div>

solid border dashed border dotted border double border groove border ridge border inset border outset border no border blue green red purple cyan gold silver black