<div style="background:#fff;border:#bbb dashed 1px;padding:5px"><a href="http://en.citatepedia.ro/comments.php?id=538537" style="color:#000;text-decoration:none"><div style="margin:10px 0"><strong>The Vision Of Piers Plowman - Part 14</strong></div><div style="margin:10px 0">'I have but oon hool hater,' quod Haukyn, 'I am the lasse to blame <br>Though it be soiled and selde clene - I slepe therinne o nyghtes; <br>And also I have an houswif, hewen and children - <br>Uxorem duxi, et ideo non possum venire - <br>That wollen bymolen it many tyme, maugree my chekes. </div><div style="margin:10px 0">It hath be laved in Lente and out of Lente bothe <br>With the sope of siknesse, that seketh wonder depe, <br>And with the losse of catel, that looth me w[ere] <br>For to agulte God or any good man, by aught that I wiste; <br>And was shryven of the preest, that [for my synnes gaf me] <br>To penaunce, pacience, and povere men to fede, <br>Al for coveitise of my Cristendom in clennesse to kepen it. <br>And kouthe I nevere, by Crist! kepen it clene an houre, <br>That I ne soiled it with sighte or som ydel speche, <br>Or thorugh werk or thorugh word, or wille of myn herte, <br>That I ne flobre it foule fro morwe til even.' <br>'And I shal kenne thee,' quod Conscience, 'of Contricion to make <br>That shal clawe thi cote of alle kynnes filthe - <br>Cordis contricio <br>Dowel shal wasshen it and wryngen it thorugh a wis confessour - <br>Oris confessio <br>Dobet shal beten it and bouken it as bright as any scarlet, <br>And engreynen it with good wille and Goddes grace to amende the, <br>And sithen sende thee to Satisfaccion for to sonnen it after<br>Satisfaccio. <br>'And Dobest kepe[th] clene from unkynde werkes. <br>Shal nevere my[te] bymolen it, ne mothe after biten it, <br>Ne fend ne fals man defoulen it in thi lyve. <br>Shal noon heraud ne harpour have a fairer garnement <br>Than Haukyn the Actif man, and thow do by my techyng, <br>Ne no mynstrall be moore worth amonges povere and riche <br>Than Haukyn wi[l] the wafrer, which is Activa Vita.' <br>'And I shal purveie thee paast,' quod Pacience, 'though no plough erye, <br>And flour to fede folk with as best be for the soule; <br>Though nevere greyn growed, ne grape upon vyne, <br>Alle that lyveth and loketh liflode wolde I fynde, <br>And that ynogh - shal noon faille of thyng that hem nedeth. </div><div style="margin:10px 0">We sholde noght be to bisy abouten oure liflode<br>Ne soliciti sitis Volucres celi Deus pascit Pacientes vincunt <br>Thanne laughed Haukyn a litel, and lightly gan swerye, <br>'Whoso leveth yow, by Oure Lord, I leve noght he be blessed!' <br>'No?' quod Pacience paciently, and out of his poke hente <br>Vitailles of grete vertues for alle manere beestes, <br>And seide, ' Lo! here liflode ynogh, if oure bileve be trewe. <br>For lent nevere was lif but liflode were shapen, <br>Wherof or wherfore or wherby to libbe. <br>' First the wilde worm under weet erthe, <br>Fissh to lyve in the flood, and in the fir the criket, <br>The corlew by kynde of the eyr, moost clennest flessh of briddes, <br>And bestes by gras and by greyn and by grene rootes, <br>In menynge that alle men myghte the same <br>Lyve thorugh leel bileve and love, as God witnesseth<br>Quodcumque pecieritis a patre in nomine meo Et alibi, Non <br>in solo pane vivit homo, set in omni verbo, quod procedit de ore Dei;' <br>But I lokede what liflode it was that Pacience so preisede; <br>And thanne was it a pece of the Paternoster - Fiat voluntas tua. <br>'Have, Haukyn,' quod Pacience, 'and et this whan the hungreth, <br>Or whan thow clomsest for cold or clyngest for droughte; <br>And shul nevere gyves thee greve ne gret lordes wrathe, <br>Aison ne peyne - for pacientes vincunt. <br>By so that thow be sobre of sighte and of tonge, <br>In [ond]ynge and in handlynge and in alle thi fyve wittes, <br>Darstow nevere care for corn ne lynnen cloth ne wollen, <br>Ne for drynke, ne deeth drede, but deye as God liketh, <br>Or thorugh hunger or thorugh hete - at his wille be it. <br>For if thow lyvest after his loore, the shorter lif the bettre<br>Si quis amat Christum mundum non diligit istum. </div><div style="margin:10px 0">'For thorugh his breeth beestes woxen and abrood yeden<br>Dixit et facta sunt, <br>Ergo thorugh his breeth mowen [bothe] men and beestes lyven, <br>As Holy Writ witnesseth whan men seye hir graces<br>*Aperis tu manum tuam, et imples omne animal benediccione. <br>'It is founden that fourty wynter folk lyvede withouten tulying, <br>And out of the flynt sprong the flood that folk and beestes dronken; <br>And in Elyes tyme hevene was yclosed, <br>That no reyn ne roon - thus rede men in bokes, <br>That manye wyntres men lyveden and no mete ne tulieden. <br>'Sevene slepe, as seith the book, sevene hundred wynter, <br>And lyveden withouten lifiode - and at the laste thei woken. <br>And if men lyvede as mesure wolde, sholde nevere moore be defaute <br>Amonges Cristene creatures, if Cristes wordes ben trewe. <br>Ac unkyndenesse caristiam maketh amonges Cristen peple, <br>And over-plentee maketh pryde amonges poore and riche; <br>Ac mesure is so muche worth it may noght be to deere; <br>For the meschief and the meschaunce amonges men of Sodome <br>Weex thorugh plentee of payn and of pure sleuthe<br>Ociositas et habundancia panis peccatum turpissimum nutrivit. <br>For thei mesured noght hemself of that thei ete and dronke, <br>Diden dedly synne that the devel liked, <br>Vengeaunce fil upon hem for hir vile synnes; <br>[So] thei sonken into helle, the citees echone. <br>' Forthi mesure we us wel and make oure feith oure sheltrom; <br>And thorugh feith cometh contricion, conscience woot wel, <br>Which dryveth awey dedly synne and dooth it to be venial. <br>And though a man myghte noght speke, contricion myghte hym save, </div><div style="margin:10px 0">And brynge his soule to blisse, by so that feith bere witnesse <br>That whiles he lyvede he bilevede in the loore of Holy Chirche. <br>Ergo contricion, feith and conscience is kyndeliche Dowel, <br>And surgiens for dedly synnes whan shrift of mouthe failleth. <br>Ac shrift of mouth moore worthi is, if man be ynliche contrit, <br>For shrift of mouthe sleeth synne be it never so dedly - <br>Per confessionem to a preest peccata occiduntur - <br>Ther contricion dooth but dryveth it doun into a venial synne, <br>As David seith in the Sauter, et quorum tecta sunt peccata. <br>Ac satisfaccion seketh out the roote, and bothe sleeth and voideth, <br>And as it nevere [n]adde ybe, to noghte bryngeth dedly synne, <br>That it nevere eft is sene ne soor, but semeth a wounde yheeled.' <br>'Where wonyeth Charite?' quod Haukyn. 'I wiste nevere in my lyve <br>Man that with hym spak, as wide as I have passed.' <br>'Ther parfit truthe and poore herte is, and pacience of tonge - <br>There is Chante the chief, chaumbrere for God hymselve.' <br>'Wheither paciente poverte,' quod Haukyn, 'be moore plesaunt to Oure Dright <br>Than richesse rightfulliche wonne and resonably despended?' <br>' Ye - quis est ilie?' quod Pacience, ' quik - laudabimus eum ! <br>Though men rede of richesse right to the worldes ende, <br>I wiste nevere renk that riche was, that whan he rekene sholde, <br>Whan he drogh to his deeth day, that he ne dredde hym soore, <br>And that at the rekenyng in arrerage fel, rather than out of dette. <br>Ther the poore dar plede, and preve by pure reson <br>To have allowaunce of his lord; by the lawe he it cleymeth<br>Joye, that nevere joye hadde, of rightful jugge he asketh, <br>And seith, ''Lo! briddes and beestes, that no blisse ne knoweth, <br>And wilde wormes in wodes, thorugh wyntres thow hem grevest, <br>And makest hem wel neigh meke and mylde fer defaute, <br>And after thew sedet hem somer, that is hir soveyn joye, </div><div style="margin:10px 0">And blisse to alle that ben, bothe wilde and tame.' <br>'Thanne may boggeris, as beestes, after boote waiten, <br>That al hir lif han lyved in langour and in defaute. <br>But God sente hem som tyme som manere joye <br>Outher here or elliswhere, kynde wolde it nevere; <br>For to wrotherhele was he wroght that nevere was joye shapen! <br>'Aungeles that in helle now ben hadden joye som tyme, <br>And Dives in deyntees lyvede and in douce vie; <br>Right so reson sheweth that tho men that [riche were] <br>And hir makes also lyvede hir lif in murthe. <br>'Ac God is of a wonder wille, by that kynde wit sheweth, <br>To yyve many men his mercymonye er he it have deserved. <br>Right so fareth God by some richeruthe me it thynketh - <br>For thei han hir hire heer, and hevene, as it were, <br>And greet likynge to lyve withouten labour of bodye, <br>And whan he dyeth, ben disalowed, as David seith in the Sauter<br>Dormierunt et nichil invenerunt; et alibi, Velud sompnum surgencium, <br>Domine, in civitate tua, et ad nichilum rediges &c. <br>Allas, that richesse shal reve and robbe mannes soule <br>From the love of Oure Lord at his laste ende! <br>' Hewen that han hir hire afore arn everemoore nedy; <br>And selden deyeth he out of dette that dyneth er he deserve it <br>And til he have doon his devoir and his dayes journee. <br>For whan a werkman hath wroght, than may men se the sothe - <br>What he were worthi for his werk, and what he hath deserved, <br>And noght to fonge bifore, for drede of disalowyng. <br>'So I seye by yow riche - it semeth noght that ye shulle <br>Have hevene in youre here-beyng and hevene therafter, </div><div style="margin:10px 0">Right as a servaunt taketh his salarie bifore, and siththe wolde clayme moore, <br>As he that noon hadde, and hath hire at the laste. <br>It may noght be, ye riche men, or Mathew on God lyeth<br>De deliciis ad delicias difficile est transire ! <br>'Ac if ye riche have ruthe, and rewarde wel the poore, <br>And lyven as lawe techeth, doon leaute to hem alle, <br>Crist of his curteisie shal conforte yow at the laste <br>And rewarden alle double richesse that rewful hertes habbeth. <br>And as an hyne that hadde his hire er he bigonne, <br>And whan he hath doon his devoir wel, men dooth hym oother bountee - <br>Yyveth hym a cote above his covenaunt - right so Crist yyveth hevene <br>Bothe to riche and to noght riche that rewfulliche libbeth; <br>And alle that doon hir devoir wel han double hire for hir travaille - <br>Here forgifnesse of hir synnes, and hevene blisse after. <br>'Ac it is but selde yseien, as by holy seintes bokes, <br>That God rewarded double reste to any riche wye. <br>For muche murthe is amonges riche, as in mete and clothyng, <br>And muche murthe in May is amonges wilde beestes, <br>And so forth while somer lasteth hir solace dureth. <br>Ac beggeris aboute Midsomer bredlees thei soupe, <br>And yet is wynter for hem worse, for weetshoed thei gauge, <br>Afurst soore and afyngred, and foule yrebuked <br>And arated of riche men, that ruthe is to here . . . <br>Now, Lord, sende hem somer, and som maner joye, <br>Hevene after hir hennes goyng, that here han swich defaute! <br>For alle myghtestow have maad noon mener than oother, <br>And yliche witty and wise, if thee wel hadde liked. <br>And have ruthe on thise riche men that rewarde noght thi prisoners; <br>Of the good that thow hem gyvest ingrati ben manye; <br>Ac God, of thi goodnesse, gyve hem grace to amende. <br>For may no derthe be hem deere, droghte ne weet, <br>Ne neither hete ne hayll, have thei hir heele; <br>Of that thei wilne and wolde wanteth hem noght here. <br>'Ac poore peple, thi prisoners, Lord, in the put of meschief - </div><div style="margin:10px 0">Conforte tho creatures that muche care suffren <br>Thorugh derthe, thorugh droghte, alle hir dayes here, <br>Wo in wynter tymes for wantynge of clothes, <br>And in somer tyme selde soupen to the fulle; <br>Conforte thi carefulle, Crist, in thi riche - <br>For how thow confortest alle creatures clerkes bereth witnesse<br>Convertimini ad me et salvi eritis. <br>'Thus in genere of gentries Jesu Crist seide <br>To robberis and to reveris, to riche and to poore, <br>To hores, to harlotes, to alle maner peple, <br>Thou taughtest hem in the Trinite to taken bapteme <br>And be clene thorugh that cristnyng of alle kynnes synne, <br>And if us fille thorugh folie to falle in synne after, <br>Confession and knowlichynge and cravynge thi mercy <br>Shulde amenden us as manye sithes as man wolde desire. <br>Ac if the pouke wolde plede herayein, and punysshe us in conscience, <br>We sholde take the acquitaunce as quyk and to the queed shewen it - <br>Pateat &cPer passionem Domini - <br>And putten of so the pouke, and preven us under borwe. <br>Ac the parchemyn of this patente of poverte be moste, <br>And of pure pacience and parfit bileve. <br>Of pompe and of pride the parchemyn decourreth, <br>And principalliche of alle peple; but thei be poore of herte. <br>Ellis is al on ydel, al that evere we wr[ogh]ten - <br>Paternostres and penaunce and pilgrimage to Rome, </div><div style="margin:10px 0">But oure spences and spendynge sprynge of a trewe welle; <br>Ellis is al oure labour lost - lo, how men writeth <br>In fenestres at the freres! - if fals be the foundement. <br>Forthi Cristene sholde be in commune riche, noon coveitous for hymselve. <br>' For sevene synnes ther ben, that assaillen us evere; <br>The fend folweth hem alle and fondeth hem to helpe, <br>Ac with richesse tho ribaudes rathest men bigileth. <br>For ther that richesse regneth, reverences folweth, <br>And that is plesaunt to pride, in poore and in riche. <br>And the riche is reverenced by reson of his richesse <br>Ther the poore is put bihynde, and paraventure kan moore <br>Of wit and of wisdom, that fer awey is bettre <br>Than richesse or reautee, and rather yherd in hevene. <br>For the riche hath muche to rekene, and right softe walketh; <br>The heighe wey to heveneward ofte richesse letteth - <br>Ita inpossibile diviti &c - <br>Ther the poore preesseth bifore, with a pak at his rugge - <br>Opera enim illorum sequuntur illos - <br>Batauntliche, as beggeris doon, and boldeliche he craveth <br>For his poverte and his pacience a perpetuel blisse<br>Beati pauperesquoniam ipsorum est regnum celorum. <br>'And pride in richesse regneth rather than in poverte<br>Or in the maister or in the man som mansion he haveth. <br>Ac in poverte ther pacience is, Pride hath no mygte, <br>Ne none of the sevene synnes sitten ne mowe ther longe, <br>Ne have power in poverte, if pacience it folwe. <br>For the poore is ay prest to plese the riche, </div><div style="margin:10px 0">And buxom at his biddyng for his broke loves; <br>And buxomnesse and boost ben everemoore at werre, <br>And either hateth oother in alle maner werkes. <br>If Wrathe wrastle with the poore he hath the worse ende, <br>For if thei bothe pleyne, the poore is but feble, <br>And if he chide or chatre, hym cheveth the worse, <br>For lowliche he loketh and lovelich is his speche <br>That mete or money of othere men moot asken. <br>'And if Glotonie greve poverte, he gadereth the lasse. <br>For his rentes wol naught reche no riche metes to bigge; <br>And though his glotonye be to good ale, he goth to cold beddyng, <br>And his heved unheled, unesiliche ywrye - <br>For whan he streyneth hym to strecche, the strawe is his shetes. <br>So for his Glotome and his greete Sleuthe he hath a grevous penaunce, <br>That is welawo whan he waketh and wepeth for colde - <br>And som tyme for his synnes - so he is nevere murie <br>Withoute mournynge amonge and meschief to bote. <br>'And though Coveitise wolde cacche the poore, thei may noght come togideres <br>And by the nekke, namely, hir noon may hente oother. <br>For men knowen wel that Coveitise is of a kene wille, <br>And hath hondes and armes of a long lengthe, <br>And Poverte nys but a petit thyng, apereth noght to his navele - <br>And lovely layk was it nevere bitwene the longe and the shorte. <br>And though Avarice wolde angre the poore, he hath but litel myghte, <br>Fer Poverte hath but pokes to putten in hise goodes, </div><div style="margin:10px 0">Ther Avarice hath almaries and yren-bounden cofres. <br>And wheither be lighter to breke? Lasse boost it maketh - <br>A beggeris baggethan an yren-bounde cofre ! <br>' Lecherie loveth hym noght, for he yyveth but litel silver, <br>Ne dooth hym noght dyne delicatly ne drynke wyn ofte. <br>A straw for the stuwes! It stoode noght, I trowe, <br>Hadde thei noon [haunt] but of poore men - hir houses stoode untyled! <br>'And though Sleuthe suwe Poverte, and serve noght God to paie, <br>Meschief is his maister, and maketh hym to thynke <br>That God is his grettest help and no gorne ellis, <br>And he his servaunt, as he seith, and of his sute bothe. <br>And wheither he be or be noght, he bereth the signe of poverte, <br>And in that secte Oure Saveour saved al mankynde. <br>Forthi al poore that pacient is, may [asken and cleymen], <br>After hir endynge here, heveneriche blisse. <br>'Muche hardier may he asken, that here myghte have his wille <br>In lond and in lordshipe and likynge of bodie, <br>And for Goddes love leveth al and lyveth as a beggere. <br>And as a mayde for mannes love hire moder forsaketh, <br>Hir fader and alle hire frendes, and folweth hir make - <br>Muche is that maide to love of [a man] that swich oon taketh, <br>Moore than a maiden is that is maried thorugh brocage, <br>As by assent of sondry parties and silver to boote, <br>Moore for coveitise of good than kynde love of bothe - <br>So it fareth by ech a persone that possession forsaketh <br>And put hym to be pacient, and poverte weddeth, </div><div style="margin:10px 0">The which is sib to God hymself, and so neigh is poverte.' <br>'Have God-my trouthe,' quod Haukyn, 'l here ye preise faste poverte. <br>What is poverte, Pacience,' quod he, 'proprely to mene?' <br>' Paupertas.' quod Pacience, ' est odibile bonum - <br>Remocio curarum, possessio sine calumpnia, donum Dei, <br>sanitatis mater, absque sollicitudine semita, sapiencie <br>temperatrix, negocium sine dampno, incerta fortuna, <br>absque sollicitudine felicitas.' <br>'I kan noght construe al this,' quod Haukyn, 'ye moste kenne me this on Englis <br>' In Englissh,' quod Pacience, 'it is wel hard, wel to expounen, <br>Ac somdeel I shal seyen it, by so thow understonde. <br>Poverte is the firste point that Pride moost hateth; <br>Thanne is it good by good skile - al that agasteth pride. <br>Right as contricion is confortable thyng, conseience woot wel, <br>And a sorwe of hymself, and a solace to the soule, <br>So poverte propreliche penaunce [is to the body <br>And joye also to the soule], pure spiritual helthe, <br>And contricion confort, and cura animarum<br>Ergo paupertas est odibile bonum. <br>'Selde sit poverte the sothe to declare, <br>Or as justice to jugge men enjoyned is no poore, <br>Ne to be mair above men, ne mynystre under kynges; </div><div style="margin:10px 0">Selde is any poore yput to punysshen any peple; <br>Remocio curarum. <br>Ergo poverte and poore men parfournen the comaundement - </div><div style="margin:10px 0">Nolite iudicare quemquam. <br>'Selde is poore right riche but of rightful heritage<br>Wynneth he noght with wightes false ne with unseled mesures, <br>Ne borweth of hise neighebores but that he may wel paie<br>Possessio sine calumpnia. <br>'The ferthe is afor-tune that florissheth the soule <br>With sobretee fram alle synne and also yit moore; <br>It afaiteth the flessh fram folies ful manye - <br>A collateral confort, Cristes owene yifte<br>Donum Dei. <br>'The fifte is moder of [myght and of mannes] hele, <br>A frend in alle fondynges, [of foule yveles leche], <br>And for the lewde evere yliche a lemman of alle clennesse<br>Sanitatis mater. <br>'The sixte is a path of pees - ye, thorugh the paas of Aulton <br>Poverte myghte passe withouten peril of robbyng! <br>For ther that Poverte passeth pees folweth after, <br>And ever the lasse that he [led]eth, the [light]er he is of herte - <br>Cantabit paupertas coram latrone viator - <br>And an hardy man of herte among an heep of theves; <br>Forthi seith Seneca Paupertas est absque sollicitudine semita. <br>'The seventhe is welle of wisedorn and fewe wordes sheweth, <br>For lordes alloweth hym litel or listneth to his reson. <br>He tempreth the tonge to trutheward, that no tresor coveiteth<br>Sapiencie temperatrix. <br>'The eightethe is a lele labour and looth to take moore </div><div style="margin:10px 0">Than he may [sothly] deserve, in somer or in wynter, <br>And if he chaffareth, he chargeth no losse mowe he charite wynne<br>Negocium sine dampno. <br>'The nynthe is swete to the soule, no sugre is swetter; <br>For pacience is payn for poverte hymselve, <br>And sobretee swete drynke and good leche in siknesse. <br>Thus lered me a lered man for Oure Lordes love, Seint Austyn - <br>A blessed lif withouten bisynesse for body and for soule<br>Absque sollicitudine felicitas. <br>Now God, that alle good gyveth, graunte his soule reste <br>That thus first wroot to wissen men what Poverte was to mene!' <br>'Allas,' quod Haukyn the Actif Man tho, 'that after my cristendom <br>I ne hadde be deed and dolven for Dowelis sake! <br>So hard it is,' quod Haukyn, 'to lyve and to do synne. <br>Synne seweth us evere,' quod he, and sory gan wexe, <br>And wepte water with hise eighen and weyled the tyme <br>That evere he dide dede that deere God displesed - <br>Swouned and sobbed and siked ful ofte <br>That evere he hadde lond or lordshipe, lasse other moore, <br>Or maistrie over any man mo than of hymselve.. <br>' I were noght worthi, woot God,' quod Haukyn, ' to werien any clothes, <br>Ne neither sherte ne shoon, save for shame one <br>To covere my careyne', quod he, and cride mercy faste, <br>And wepte and wailede - and therwith I awakede.</div><div style="margin:10px 0"><br /></a><br />poem by <a href="http://en.citatepedia.ro/by.php?a=William+Langland">William Langland</a><div class=q> <img src="https://www.citatepedia.ro/g/32share.png" style="float:left" alt="Share"> <script type="text/javascript" src="//s7.addthis.com/js/300/addthis_widget.js#pubid=citatepedia" async="async"></script><div style="display:inline-block" class="addthis_sharing_toolbox" data-url="http://en.citatepedia.ro/comments.php?id=538537" data-title="The Vision Of Piers Plowman - Part 14 de William Langland" data-description="'I have but oon hool hater,' quod Haukyn, 'I am the lasse to blame Though it be soiled and selde clene - I slepe therinne o nyghtes; And also I have an houswif, hewen and children - Uxorem duxi, et ideo non possum venire - That wollen bymolen ..."></div> </div> </div>

solid border dashed border dotted border double border groove border ridge border inset border outset border no border blue green red purple cyan gold silver black