<div style="background:#fff;border:#bbb dashed 1px;padding:5px"><a href="http://en.citatepedia.ro/comments.php?id=538530" style="color:#000;text-decoration:none"><div style="margin:10px 0"><strong>The Vision Of Piers Plowman - Part 07</strong></div><div style="margin:10px 0">Treuthe herde telle herof, and to Piers sente <br>To taken his teme and tilien the erthe, <br>And purchaced hym a pardoun a pena et a culpa <br>For hym and for hyse heirs for ever oore after-</div><div style="margin:10px 0">And bad hym holde hym at home and erien hise Ieyes, <br>And alle that holpen hym to erye, to sette or to sowe, <br>or any [man]er mestier that myghte Piers availe - <br>Pardon with Piers Plowman Truthe hath ygraunted. <br>Kynges and knyghtes that kepen Holy Chirche <br>And rightfully in remes rulen the peple, <br>Han pardon thorugh purgatorie to passen ful lightly, <br>With patriarkes and prophetes in paradis to be felawe. <br>Bysshopes yblessed, if thei ben as thei sholde <br>Legistres of bothe lawes, the lewed therwith to preche, <br>And in as muche as thei mowe amenden alle synfulle, <br>Arn peres with the Apostles - this pardon Piers sheweth - <br>And at the day of dome at the heighe deys to sitte. <br>Marchaunts in the margyne hadde manye yeres, <br>Ac noon A pena et a culpa the Pope nolde hem graunte. <br>For thei holde noght hir halidayes as Holy Chirche techeth, <br>And for thei swere 'by hir soule' and-so God moste hem helpe' <br>Ayein clene Conseience, hir catel to selle. <br>Ac under his secret seel Truthe sente hem a lettre, <br>[And bad hem] buggen boldely what hem best liked <br>And sithenes selle it ayein and save the wynnyng, <br>And amende mesondieux thermyd and myseise folk helpe; <br>And wikkede weyes wightly amende, <br>And do boote to brugges that tobroke were; <br>Marien maydenes or maken hem nonnes; <br>Povere peple and prisons fynden hem hir foode, <br>And sette soolers to scole or to som othere craftes; <br>Releve Religion and renten hem bettre. <br>'And I shal sende yow myselve Seynt Michel myn angel, </div><div style="margin:10px 0">That no devel shal yow dere ne [in youre deying fere yow], <br>And witen yow fro wanhope, if ye wol thus werche, <br>And sende youre soules in saufte to my Seintes in joye.' <br>Thanne were marchaunts murie - manye wepten for joye-<br>And preiseden Piers the Plowman, that purchaced this bulle. <br>Men of lawe leest pardon hadde that pleteden for mede, <br>For the Sauter saveth hem noght, swiche as take yiftes, <br>And nameliche of innocents that noon yvel ne konneth<br>Super innocentem munera non accipies. <br>Pledours sholde peynen hem to plede for swiche and helpe; <br>Princes and prelates sholde paie for hire travaille<br>A regibus et principibus erit merces eorum. <br>Ac many a justice and jurour wolde for Johan do moore <br>Than pro Deipietate - leve thow noon oother! <br>Ac he that spendeth his speche and speketh for the povere <br>That is innocent and nedy and no man apeireth, <br>Conforteth hym in that caas, coveit[eth noght hise] yiftes, <br>And [for Oure Lordes love lawe for hym sheweth] - <br>Shal no devel at his deeth day deren hym a myte <br>That he ne worth saaf and his soule, the Sauter bereth witnesse<br>Domine, quis habitabit in tabernaculo tuo ? <br>Ac to bugge water, ne wynd, ne wit, ne fir the ferthe - <br>Thise foure the Fader of Hevene made to this foold in commune<br>Thise ben Truthes tresores trewe folk to helpe, </div><div style="margin:10px 0">That nevere shul wex ne wanye withouten God hymselve. <br>Whan thei drawen on to the deth, and indulgences wolde have, <br>His pardon is ful petit at his partyng hennes <br>That any mede of mene men for hir motyng taketh. <br>Ye legistres and lawieres, [if I lye witeth Mathew]<br>Quodcumque vultis ut faciant vobis homines, facite eis. <br>Alle libbynge laborers that lyven with hir hondes, <br>That treweliche taken and treweliche wynnen, <br>And lyven in love and in lawe, for hir lowe herte <br>Haveth the same absolucion that sent was to Piers. <br>Beggeres and bidderes beth noght in the bulle <br>But if the suggestion be sooth that shapeth hem to begge<br>For he that beggeth or bit, but it he have nede, <br>He is fals with the feend and defraudeth the nedy, <br>And also gileth the gyvere ageynes his wille; <br>For if he wiste he were noght nedy he wolde [that yyve] <br>Another that were moore nedy than he - so the nedieste sholde be holpe. <br>Caton kenneth me thus, and the Clerc of the Stories<br>Cui des, videto is Catons techyng; <br>And in the Stories he techeth to bistowe thyn almesse<br>Sit elemosina tua in manu tua donec studes cui des. <br>Ac Gregory was a good man, and bad us gyven alle </div><div style="margin:10px 0">That asketh for His love that us al leneth<br>Non eligas cui miserearis, ne forte pretereas illum qui meretur <br>accipere; quia incertum est pro quo Deo magis placeas. <br>For wite ye nevere who is worthi-ac God woot who hath nede. <br>In hym that taketh is the trecherie, if any treson walke-<br>For he that yeveth, yeldeth, and yarketh hym to reste, <br>And he that biddeth, borweth, and bryngeth hymself in dette. <br>For beggeres borwen everemo, and hir borgh is God Almyghty-<br>To yelden hem that yeveth hem, and yet usure moore<br>Quare non dedisti pecuniam meam ad mensam, ut <br>ego ueniens cum usuris exegissem utique illam? <br>Forthi biddeth noght, ye beggeres, but if ye have gret nede. <br>For whoso hath to buggen hym breed-the Book bereth witnesse-<br>He hath ynough that hath breed ynough, though he have noght ellis<br>Satis dives est qui non indiget pane. <br>Lat usage be your solas of seintes lyves redyng; <br>The Book banneth beggerie, and blameth hem in this manere<br>Iunior fui etenim senui, et non vidi iustum derelictum nec <br>semen eius querens panem. <br>For [thei] lyve in no love, ne no lawe holde<br>[Thei] ne wedde no womman that [thei] with deele, <br>But as wilde bestes with 'wehee' worthen uppe and werchen, <br>And bryngen forth barnes that bastardes men calleth. <br>Or the bak or som soon their breketh in his youthe, </div><div style="margin:10px 0">And goon [and] faiten with hire fauntes for everemoore after. <br>Ther is moore mysshapen amonges thise beggeres <br>Than of alle [othere] manere men that on this moolde walketh. <br>Tho that lyve thus hir lif mowe lothe the tyme <br>That evere he was man wroght, whan he shal hennes fare. <br>Ac olde men and hore that helplees ben of strengthe, <br>And wommen with childe that werche ne mowe, <br>Blynde and bedreden and broken hire membres, <br>That taken this myschief mekeliche, as mesels and othere, <br>Han as pleyn pardon as the Plowman hymselve. <br>For Iove of hir lowe hertes Oure Lord hath hem graunted <br>Hir penaunce and hir Purgatorie upon this [pure] erthe. <br>' Piers,' quod a preest thoo, ' thi pardon moste I rede; <br>For I shal construe ech clause and kenne it thee on Englissh.' <br>And Piers at his preiere the pardon unfoldeth - <br>And I bihynde hem bothe biheld al the bull <br>In two lynes it lay, and noght a le[ttre] moore, <br>And was writen right thus in witnesse of truthe<br>Et qui bona egerunt ibunt in vitam eternam. <br>Qui vero mala, in ignem eternum. <br>' Peter! ' quod the preest thoo, ' I kan no pardon fynde <br>But '-Do wel and have wel. and God shal have thi soule,' <br>And ' Do yvel and have yvel, and hope thow noon oother <br>That after thi deeth day the devel shal have thi soule!' <br>And Piers for pure tene pulled it atweyne <br>And seide,-Si ambulavero in medio umbre mortis <br>Non timebo mala, quoniam tu mecum es. </div><div style="margin:10px 0">'I shal cessen of my sowyng,' quod Piers, 'and swynke noght so harde, <br>Ne aboute my bely joye so bisy be na moore; <br>Of preieres and of penaunce my plough shal ben herafter, <br>And wepen whan I sholde slepe, though whete breed me faille. <br>'The prophete his payn eet in penaunce and in sorwe, <br>By that the Sauter seith - so dide othere manye. <br>That loveth God lelly, his lifiode is ful esy<br>Fuerunt michi lacrime mee panes die ac nocte. <br>'And but if Luc lye, he lereth us by foweles <br>We sholde noght be to bisy aboute the worldes blisse<br>Ne soliciti sitis, he seith in the Gospel <br>And sheweth us by ensamples us selve to wisse. <br>The foweles in the feld, who fynt hem mete at wynter? <br>Have thei no gerner to go to, but God fynt hem alle.' <br>'What!' quod the preest to Perkyn, 'Peter! as me thynketh, <br>Thow art lettred a litel - who lerned thee on boke?' <br>'Abstynence the Abbesse,' quod Piers,-myn a.b.c. me taughte, <br>And Conscience cam afterward and kenned me muche moore.' <br>' Were thow a preest, Piers,' quod he, ' thow myghtest preche where thow sh <br>As divinour in divinite, with Dixit insipiens to thi teme.' <br>' Lewed lorel!' quod Piers, 'litel lokestow on the Bible; <br>On Salomons sawes selden thow biholdest - <br>Eice derisores et iurgia cum eis ne crescant &c.' <br>The preest and Perkyn apposeden either oother - <br>And I thorugh hir wordes awook, and waited aboute, <br>And seigh the sonne in the south sitte that tyme. <br>Metelees and moneilees on Malverne hulles, <br>Musynge on this metels a my[le] wey ich yede. <br>Many tyme this metels hath maked me to studie <br>Of that I seigh slepynge - if it so be myghte; <br>And for Piers the Plowman ful pencif in herte, </div><div style="margin:10px 0">And which a pardon Piers hadde, al the peple to conforte, <br>And how the preest inpugned it with two propre wordes. <br>Ac I have no savour in songewarie, for I se it ofte faille; <br>Caton and canonistres counseillen us to leve <br>To sette sadnesse in songewarie - for sompnia ne cures. <br>Ac for the book Bible bereth witnesse <br>How Daniel divined the dremes of a kyng <br>That was Nabugodonosor nempned of clerkes . . . <br>Daniel seide, 'Sire Kyng, thi dremels bitokneth <br>That unkouthe knyghtes shul come thi kyngdom to cleyme; <br>Amonges lower lordes thi lond shal be departed.' <br>And as Daniel divined, in dede it fel after<br>The kyng lees his lordshipe, and lower men it hadde. <br>And Joseph mette merveillously how the moone and the sonne <br>And the ellevene sterres hailsed hym alle. <br>Thanne Jacob jugged Josephes swevene <br>' Beau fiz,' quod his fader, ' for defaute we shullen - <br>I myself and my sones - seche thee for nede.' <br>It bifel as his fader seide, in Pharaoes tyme, <br>That Joseph was Justice Egipte to loke<br>It bifel as his fader tolde - hise frendes there hym soughte. <br>Al this maketh me on metels to thynke - <br>And how the preest preved no pardon to Dowel, <br>And demed that Dowel indulgences passed, <br>Biennals and triennals and bisshopes lettres, <br>And how Dowel at the Day of Dome is digneliche underfongen, <br>And passeth al the pardon of Seint Petres cherche. <br>Now hath the Pope power pardon to graunte <br>The peple, withouten penaunce to ja into [joye]; <br>This is [a leef of] oure bileve, as lettred men us techeth<br>Quodcumque ligaveris super terram erit ligatum et in celis &c. </div><div style="margin:10px 0">And so I leve leelly (Lord forbede ellis!) <br>That pardon and penaunce and preieres doon save <br>Soules that have synned seven sithes dedly. <br>Ac to trust on thise triennals - trewely, me thynketh, <br>It is noght so siker for the soule, certes, as is Dowel. <br>Forthi I rede yow renkes that riche ben on this erthe, <br>Upon trust of youre tresor triennals to have, <br>Be ye never the bolder to breke the ten hestes; <br>And namely ye maistres, meires and jugges, <br>That have the welthe of this world and wise men ben holden, <br>To purchace yow pardon and the Popes bulles. <br>At the dredful dome, whan dede shulle arise <br>And comen alle bifore Crist acountes to yelde - <br>How thow laddest thi lif here and hise lawes keptest, <br>And how thow didest day by day the doom wole reherce. <br>A pokeful of pardon there, ne provincials lettres, <br>Theigh ye be founde in the fraternite of alle the foure ordres <br>And have indulgences doublefold - but Dowel yow helpe, <br>I sette youre patentes and youre pardon at one pies hele! <br>Forthi I counseille alle Cristene to crie God mercy, <br>And Marie his moder be oure meene bitwene, <br>That God gyve us grace here, er we go hennes, <br>Swiche werkes to werche, while we ben here, <br>That after oure deth day, Dowel reherce <br>At the day of dome, we dide as he highte.</div><div style="margin:10px 0"><br /></a><br />poem by <a href="http://en.citatepedia.ro/by.php?a=William+Langland">William Langland</a><div class=q> <img src="https://www.citatepedia.ro/g/32share.png" style="float:left" alt="Share"> <script type="text/javascript" src="//s7.addthis.com/js/300/addthis_widget.js#pubid=citatepedia" async="async"></script><div style="display:inline-block" class="addthis_sharing_toolbox" data-url="http://en.citatepedia.ro/comments.php?id=538530" data-title="The Vision Of Piers Plowman - Part 07 de William Langland" data-description="Treuthe herde telle herof, and to Piers sente To taken his teme and tilien the erthe, And purchaced hym a pardoun a pena et a culpa For hym and for hyse heirs for ever oore after- And bad hym holde hym at home and erien hise Ieyes, And alle t..."></div> </div> </div>

solid border dashed border dotted border double border groove border ridge border inset border outset border no border blue green red purple cyan gold silver black