<div style="background:#fff;border:#bbb dashed 1px;padding:5px"><a href="http://en.citatepedia.ro/comments.php?id=538529" style="color:#000;text-decoration:none"><div style="margin:10px 0"><strong>The Vision Of Piers Plowman - Part 06</strong></div><div style="margin:10px 0">'This were a wikkede wey but whoso hadde a gyde <br>That [myghte] folwen us ech a foot' - thus this folk hem mened. <br>Quod Perkyn the Plowman, ' By Seint Peter of Rome! <br>I have an half acre to erie by the heighe weye; <br>Hadde I cryed this half acre and sowen it after, <br>I wolde wende with yow and the wey teche.' <br>'This were a long lettyng,' quod a lady in a scleyre; </div><div style="margin:10px 0">'What sholde we wommen werche the while?' <br>'Somme shul sowe the sak ' quod Piers, ' for shedyng of the whete; <br>And ye lovely ladies with youre longe fyngres, <br>That ye have silk and sandel to sowe whan tyme is <br>Chesibles for chapeleyns chirches to honoure. <br>Wyves and widewes, wolle and flex spynneth<br>Maketh cloth, I counseille yow, and kenneth so youre doughtres. <br>The nedy and the naked, nymeth hede how thei liggeth, <br>And casteth hem clothes, for so commaundeth Truthe. <br>For I shal lenen hem liflode, but if the lond faille, <br>As longe as I lyve, for the Lordes love of hevene. <br>And alle manere of men that by mete and drynke libbeth, <br>Helpeth hym to werche wightliche that wynneth youre foode.' <br>'By Crist!' quod a knyght thoo, 'he kenneth us the beste; <br>Ac on the teme, trewely, taught was I nevere. <br>Ac kenne me,' quod the knyght, 'and by Crist I wole assaye!' <br>'By Seint Poul!' quod Perkyn, 'Ye profre yow so faire <br>That I shal swynke and swete and sowe for us bothe, <br>And [ek] labour[e] for thi love al my lif tyme, <br>In covenaunt that thow kepe Holy Kirke and myselve <br>Fro wastours and fro wikked men that this world destruyeth; <br>And go hunte hardiliche to hares and foxes, <br>To bores and to bukkes that breken down myne hegges; <br>And go affaite thi faucons wilde foweles to kille, <br>For thei cometh to my croft and croppeth my whete.' <br>Curteisly the knyght thanne co[nseyved] thise wordes<br>'By my power, Piers, I plighte thee my trouthe <br>To fulfille this forward, though I fighte sholde; <br>Als longe as I lyve I shal thee mayntene.' <br>' Ye, and yet a point,' quod Piers, 'I preye yow of moore</div><div style="margin:10px 0">Loke ye tene no tenaunt but Truthe wole assente; <br>And though ye mowe amercy hem, lat mercy be taxour <br>And mekenesse thi maister, maugree Medes chekes. <br>And though povere men profre yow presentes and yiftes, <br>Nyme it noght, an aventure thow mowe it noght deserve; <br>For thow shalt yelde it ayein at one yeres ende <br>In a ful perilous place - Purgatorie it hatte. <br>And mysbede noght thi bondemen - the bettre may thow spede; <br>Though he be thyn underlyng here, wel may happe in hevene <br>That he worth worthier set and with moore blisse<br>Amice, ascende superius. <br>For in charnel at chirche cherles ben yvel to knowe, <br>Or a knyght from a knave there - knowe this in thyn herte. <br>And that thow be trewe of thi tonge, and tales that thow hatie, <br>But if thei ben of wisdom or of wit, thi werkmen to chaste. <br>Hold with none harlotes ne here noght hir tales, <br>And namely at the mete swiche men eschuwe - <br>For it ben the develes disours, I do the to understonde.' <br>'I assente, by Seint Jame,' seide the knyght thanne, <br>'For to werche by thi wordes the while my lif dureth.' <br>'And I shal apparaille me,' quod Perkyn, 'in pilgrymes wise <br>And wende with yow I wile til we fynde Truthe.' <br>[He] caste on [hise] clothes, yclouted and hole, <br>[Hise] cokeres and [hise] coffes for cold of [hise] nailes, <br>And [heng his] hoper at [his] hals in stede of a scryppe</div><div style="margin:10px 0">'A busshel of bred corn brynge me therinne, <br>For I wol sowe it myself, and sithenes wol I wende <br>To pilgrymage as palmeres doon, pardon for to have. <br>And whoso helpeth me to erie or sowen here er I wende, <br>Shal have leve, by Oure Lord, to lese here in hervest <br>And make hym murie thermyd, maugree whoso bigruccheth it. <br>And alle kynne crafty men that konne lyven in truthe, <br>I shal fynden hem fode that feithfulliche libbeth - <br>Save Jakke the Jogelour and Jonette of the Stuwes, <br>And Danyel the Dees-pleyere and Denote the Baude, <br>And Frere the Faitour, and folk of his ordre, <br>And Robin the Ribaudour, for hise rusty wordes. <br>Truthe tolde me ones and bad me telle it forth<br>Deleantur de libro vivencium - I sholde noght dele with hem, <br>For Holy Chirche is hote, of hem no tithe to aske, <br>Quia cum iustis non scribantur. <br>Thei ben ascaped good aventure - now God hem amende!' <br>Dame Werch-whan-tyme-is Piers wif highte; <br>His doughter highte Do-right-so-or-thi-dame-shal-thee-bete; <br>His sone highte Suffre-thi-Sovereyns-to-haven-hir-wille<br>Deme-h em-noght-for-if-thow-doost-thow-shalt-it-deere-ab ugge; <br>Lat-God-yworthe-with-al-for-so-His-word-teche th. <br>'For now I am old and hoor and have of myn owene, <br>To penaunce and to pilgrimage I wol passe with thise othere; <br>Forthi I wole er I wende do write my biqueste. <br>In Dei nomine, Amen, I make it myselve. <br>' He shal have my soule that best hath deserved it, <br>And [defende it fro the fend], for so I bileve, <br>Til I come to hise acountes as my crede me telleth, </div><div style="margin:10px 0">To have a relees and a remission - on that rental I leve. <br>'The kirke shal have my caroyne, and kepe my bones, <br>For of my corn and catel he craved the tithe. <br>I paide it hym prestly, for peril of my soule; <br>Forthi is he holden, I hope, to have me in his masse <br>And mengen me in his memorie amonges alle Cristene. <br>' My wif shal have of that I wan with truthe, and namoore, <br>And dele among my doughtres and my deere children; <br>For though I deye today, my dettes are quyte; <br>I bar hom that I borwed er I to bedde yede. <br>And with the residue and the remenaunt, by the Rode of Lukes! <br>I wol worshipe therwith Truthe by my lyve, <br>And ben His pilgrym atte plow for povere mennes sake. <br>My plowpote shal be my pikstaf, and picche atwo the rotes, <br>And helpe my cultour to kerve and clense the furwes.' <br>Now is Perkyn and thise pilgrimes to the plow faren. <br>To erie this half-acre holpen hym manye; <br>Dikeres and delveres digged up the balkes; <br>Therwith was Perkyn apayed and preised hem faste. <br>Othere werkmen ther were that wroghten ful yerne<br>Ech man in his manere made hymself to doone, <br>And somme to plese Perkyn piked up the wedes. <br>At heigh prime Piers leet the plough stonde, <br>To oversen hem hymself; whoso best wroghte, <br>He sholde be hired therafter, whan hervest tyme come. <br>Thanne seten somme and songen atte nale, <br>And holpen ere this half acre with 'How trolly lolly!' </div><div style="margin:10px 0">'Now, by the peril of my soule!' quod Piers al in pure tene, <br>'But ye arise the rather and rape yow to werche, <br>Shal no greyn that here groweth glade yow at nede, <br>And though ye deye for doel, the devel have that recche!' <br>Tho were faitours afered, and feyned hem blynde; <br>Somme leide hir legges aliry, as swiche losels konneth, <br>And made hir [pleynt] to Piers and preide hym of grace<br>'For we have no lymes to laboure with, lord, ygraced be ye! <br>Ac we preie for yow, Piers, and for youre plowgh bothe, <br>That God of his grace youre greyn multiplie <br>And yelde yow of youre almesse that ye yyve us here; <br>For we may neither swynke ne swete, swich siknesse us eyleth.' <br>If it be sooth.' quod Piers, 'that ye seyn, I shal it soone aspie. <br>Ye ben wastours, I woot wel, and Truthe woot the sothe; <br>And I am his olde hyne and highte hym to warne <br>Whiche thei were in this world hise werkmen apeired. <br>Ye wasten that men wynnen with travaille and with tene; <br>Ac Truthe shal teche yow his teme to dryve, <br>Or ye shul eten barly breed and of the broke drynke; <br>But if he be blynd or brokelegged or bolted with irens, <br>He shal ete whete breed and [with myselve drynke] <br>Til God of his goodnesse garisoun] hym sende. <br>Ac ye myghte travaille as Truthe wolde and take mete and hyre <br>To kepe kyen in the feld, the corn fro the bestes, <br>Diken or delven or dyngen upon sheves, <br>Or helpe make morter or bere muk afeld. <br>In lecherie and losengerie ye lyven, and in sleuthe, <br>And al is thorugh suffraunce that vengeaunce yow ne taketh! <br>'Ac ancres and heremites that eten but at Nones </div><div style="margin:10px 0">And na moore er morwe - myn almesse shul thei have, <br>And of my catel to cope hem with that han cloistres and chirches. <br>Ac Robert Renaboute shal [right] noght have of myne, <br>Ne postles, but thei preche konne and have power of the bisshop<br>Thei shul have payn and potage and [put] hemself at ese - <br>For it is an unresonable Religion that hath right noght of certein.' <br>Thanne gan Wastour to wrathen hym and wolde have yfoughte, <br>And to Piers the Plowman he profrede his glove. <br>A Bretoner, a braggere, abosted Piers als <br>And bad hym go pissen with his plowgh, forpynede sherewe! <br>'Wiltow or neltow, we wol have oure wille <br>Of thi flour and of thi flesshe - fecche whanne us liketh, <br>And maken us murye thermyde, maugree thi chekes.' <br>Thanne Piers the Plowman pleyned hym to the knyghte <br>To kepen hym as covenaunt was fro cursede sherewes <br>And fro thise wastours wolveskynnes that maketh the world deere<br>' For tho wasten and wynnen noght, and that [while ilke] <br>Worth nevere plentee among the peple the while my plowgh liggeth.' <br>Curteisly the knyght thanne, as his kynde wolde, <br>Warnede Wastour and wissed hym bettre<br>'Or thow shalt abigge by the lawe, by the ordre that I bere!' <br>' I was noght wont to werche,' quod Wastour, 'and now wol I noght bigynne! '-<br>And leet light of the lawe, and lasse of the knyghte, <br>And sette Piers at a pese, and his plowgh bothe, <br>And manaced Piers and his men if thei mette eftsoone. <br>' Now, by the peril of my soule!' quod Piers, ' I shal apeire yow alle' - <br>And houped after Hunger, that herde hym at the firste. <br>'Awreke me of thise wastours,' quod he, 'that this world shendeth!' <br>Hunger in haste thoo hente Wastour by the mawe </div><div style="margin:10px 0">And wrong hym so by the wombe that al watrede hise eighen. <br>He buffetted the Bretoner aboute the chekes <br>That he loked lik a lanterne al his lif after. <br>He bette hem so bothe, he brast ner hire guttes; <br>Ne hadde Piers with a pese loot-preyed [hym bileve], <br>They hadde be dolven bothe - ne deme thow noon oother. <br>'Suffre hem lyve,' he seide-and lat hem etc with hogges, <br>Or ellis benes and bren ybaken togideres.' <br>Faitours for fere herof flowen into bernes <br>And flapten on with flailes fro morwe til even, <br>That hunger was noght hardy on hem for to loke <br>For a potful of peses that Piers hadde ymaked. <br>An heep of herernytes henten hem spades <br>And kitten hir copes and courtepies hem maked. <br>And wente as werkmen with spades and with shoveles, <br>And dolven and dikeden to dryve awey Hunger. <br>Blynde and bedreden were bootned a thousand, <br>That seten to begge silver, soone were thei heeled ; <br>For that was bake for Bayard was boote for many hungry; <br>And many a beggere for benes buxum was to swynke, <br>And ech a povere man wel apaied to have pesen for his hyre, <br>And what Piers preide hem to do as prest as a sperhauk. <br>And [Piers was proud therof ], and putte hem to werke <br>And yaf hem mete as he myghte aforthe and mesurable hyre. <br>Thanne hadde Piers pite, and preide Hunger to wende <br>Hoom into his owene erd and holden hym there [evere]<br>' For I am wel awroke of wastours thorugh thy myghte. <br>Ac I preie thee, er thow passe,' quod Piers to Hunger, <br>'Of beggeris and of bidderis what best be to doone? <br>For I woot wel, be thow went, thei wol werche ful ille; <br>Meschief it maketh thei be so meke nouthe, <br>And for defaute of hire foode this folk is at my wille. </div><div style="margin:10px 0">[And] it are my blody bretheren, for God boughte us alle. <br>Truthe taughte me ones to loven hem ech one <br>And to helpen hem of alle thyng, ay as hem nedeth. <br>Now wolde I wite of thee, what were the beste, <br>And how I myghte amaistren hem and make hem to werche.' <br>' Here now,' quod Hunger, 'and hoold it for a wisdom<br>Bolde beggeris and bigge that mowe hir breed biswynke, <br>With houndes breed and horse breed hoold up hir hertes - <br>Aba[v]e hem with benes, for bollynge of hir wombe; <br>And if the gomes grucche, bidde hem go swynke, <br>And he shal soupe swetter whan he it hath deserved. <br>'Ac if thow fynde any freke that Fortune hath apeired <br>Or any manere false men, fonde thow swiche to knowe<br>Conforte hem with thi catel for Cristes love of hevene; <br>Love hem and lene hem, for so Iawe of [kynde wolde]<br>Alter alterius onlera portate. <br>And alle manere of men that thow myght aspie <br>That nedy ben [or naked, and nought han to spende, <br>Love hem and lakke hem noght - lat God take the vengeaunce; <br>Theigh thei doon yvele, lat thow God yworthe<br>Michi vindictam et ego retribuam. <br>And if thow wilt be gracious to God, do as the Gospel techeth, <br>And bilove thee amonges lowe men - so shaltow lacche grace<br>Facite vobis amicos de mammona iniquitatis.' </div><div style="margin:10px 0">'I wolde noght greve God,' quod Piers,-for al the good on grounde!' <br>Mighte I synnelees do as thow seist?' seide Piers thanne. <br>'Ye, I bihote thee,' quod Hunger, 'or ellis the Bible lieth <br>Go to Genesis the geaunt, the engendrour of us alle<br>''In sudore and swynk thow shalt thi mete tilie, <br>And laboure for thi liflode,'' and so Oure Lord highte. <br>And Sapience seith the same - I seigh it in the Bible<br>'' Piger pro frigore no feeld nolde tilie - <br>And therfore he shal begge and bidde, and no man bete his hunger.'' <br>' Mathew with mannes face moutheth thise wordes - <br>That servus nequam hadde a mnam, and for he wolde noght chaffare, <br>He hadde maugree of his maister everemoore after; <br>And bynam hym his mnam for he ne wolde werche, <br>And yaf that mnam to hym that ten mnames hadde, <br>And with that he seide, that Holy Chirche it herde<br>'' He that hath shal have and helpe there it nedeth; <br>And he that noght hath shal noght have, and no man hym helpe, <br>And that he weneth wel to have, I wole it hym bireve.'' <br>' Kynde Wit wolde that ech a wight wroghte, <br>Or in [te]chynge or in [tell]ynge or travaillynge in preieres - <br>Contemplatif lif or Actif lif, Crist wolde men wroghte. <br>The Sauter seith in the psalme of Beati omnes, <br>The freke that fedeth hymself with his feithful labour, <br>He is blessed by the book in body and in soule<br>Labores manuum tuarum &c.' <br>' Yet I preie yow,' quod Fiers, 'pur charite, and ye konne <br>Any leef of lechecraft, lere it me, my deere; <br>For some of my servaunts and myself bothe <br>Of al a wike werche noght, so oure wombe aketh.' </div><div style="margin:10px 0">'I woot wel,' quod Hunger, 'what siknesse yow eyleth; <br>Ye han manged over muche - that maketh yow grone. <br>Ac I hote thee,' quod Hunger, 'as thow thyn hele wilnest, <br>That thow drynke no day er thow dyne somwhat. <br>Ete noght, I hote thee, er hunger thee take <br>And sende thee of his sauce to savore with thi lippes; <br>And keep som til soper tyme and sitte noght to longe; <br>Arys up er appetit have eten his fille. <br>Lat noght Sire Surfet sitten at thi borde - <br>Love hym noght, for he is lecherous and likerous of tonge, <br>And after many maner metes his mawe is afyngred. <br>'And if thow diete thee thus, I dar legge myn eris <br>That Phisik shal his furred hood for his fode selle, <br>And his cloke of Calabre with alle the knappes of golde, <br>And be fayn, by my feith, his phisik to lete, <br>And lerne to laboure with lond [lest] liflode [hym faille]. <br>Ther aren mo [li]eres than leches - Lord hem amende! <br>They do men deye thorugh hir drynkes er destynee it wolde.' <br>' By Seint Poul,' quod Piers, 'thise arn profitable wordes! <br>For this is a lovely lesson, Lord it thee foryelde! <br>Wend now, Hunger, whan thow wolt, that wel be thow evere.' <br>' I bihote God,' quod Hunger, ' hennes ne wole I wende <br>[Er] I have dyned bi this day and ydronke bothe.' <br>' I have no peny,' quod Piers, 'pulettes to bugge, <br>Neither gees ne grys, but two grene cheses, <br>A fewe cruddes and creme and [a cake of otes], <br>And two loves of benes and bran ybake for my fauntes. <br>And yet I seye, by my soule, I have no salt bacon <br>Ne no cokeney, by Crist, coloppes to maken! </div><div style="margin:10px 0">Ac I have percile and porettes and manye [plaunte coles], <br>And ek a cow and a calf, and a cart mare <br>To drawe afeld my donge the while the droghte lasteth. <br>By this liflode we mote lyve til Lammesse tyme. <br>And by that I hope to have hervest in my crofte; <br>Thanne may I dighte thi dyner as me deere liketh.' <br>Al the povere peple tho pescoddes fetten; <br>Benes and baken apples thei broghte in hir lappes, <br>Chibolles and chervelles and ripe chiries manye, <br>And profrede Piers this present to plese with Hunger. <br>Al Hunger eet in haste and axed after moore. <br>Thanne povere folk for fere fedden Hunger yerne; <br>With grene poret and pesen to poisone hym thei thoghte! <br>By that it neghed neer hervest and newe corn cam to chepyng; <br>Thanne was folk fayn, and fedde Hunger with the beste - <br>With good ale, as Gloton taghte - and garte Hunger to slepe. <br>And tho wolde Wastour noght werche, but wandren aboute, <br>Ne no beggere ete breed that benes inne were, <br>But of coket and clermatyn or ellis of clene whete, <br>Ne noon halfpeny ale in none wise drynke, <br>But of the beste and of the brunneste that [brewesteres] selle. <br>Laborers that have no land to lyve on but hire handes <br>Deyned nought to dyne aday nyght-olde wortes; <br>May no peny ale hem paie, ne no pece of bacoun, <br>But if it be fressh flessh outher fissh fryed outher ybake - <br>And that chaud and plus chaud, for chillynge of hir mawe. <br>And but if he be heighliche hyred, ellis wole he chide - <br>And that he was werkman wroght wa[ri]e the tyme. </div><div style="margin:10px 0">Ayeins Catons counseil comseth he to jangle<br>Paupertatis onus pacienter ferre memento. <br>He greveth hym ageyn God and gruccheth ageyn Reson. <br>And thanne corseth he the Kyng and al his Counseil after <br>Swiche lawes to loke, laborers to greve. <br>Ac whiles Hunger was hir maister, ther wolde noon of hem chide, <br>Ne stryven ayeins his statut, so sterneliche he loked! <br>Ac I warne yow werkmen - wynneth whil ye mowe, <br>For Hunger hiderward hasteth hym faste! <br>He shal awake [thorugh] water, wastours to chaste, <br>Er fyve yer be fulfilled swich famyn shal aryse<br>Thorugh flodes and thorugh foule wedres, fruytes shul faille - <br>And so seith Saturne and sent yow to warne<br>Whan ye se the [mo]ne amys and two monkes heddes, <br>And a mayde have the maistrie, and multiplie by eighte, <br>Thanne shal deeth withdrawe and derthe be justice, <br>And Dawe the Dykere deye for hunger - <br>But if God of his goodnesse graunte us a trewe.</div><div style="margin:10px 0"><br /></a><br />poem by <a href="http://en.citatepedia.ro/by.php?a=William+Langland">William Langland</a><div class=q> <img src="https://www.citatepedia.ro/g/32share.png" style="float:left" alt="Share"> <script type="text/javascript" src="//s7.addthis.com/js/300/addthis_widget.js#pubid=citatepedia" async="async"></script><div style="display:inline-block" class="addthis_sharing_toolbox" data-url="http://en.citatepedia.ro/comments.php?id=538529" data-title="The Vision Of Piers Plowman - Part 06 de William Langland" data-description="'This were a wikkede wey but whoso hadde a gyde That [myghte] folwen us ech a foot' - thus this folk hem mened. Quod Perkyn the Plowman, ' By Seint Peter of Rome! I have an half acre to erie by the heighe weye; Hadde I cryed this half acre and..."></div> </div> </div>

solid border dashed border dotted border double border groove border ridge border inset border outset border no border blue green red purple cyan gold silver black