<div style="background:#fff;border:#bbb dashed 1px;padding:5px"><a href="http://en.citatepedia.ro/comments.php?id=421838" style="color:#000;text-decoration:none"><div style="margin:10px 0"><strong>The Bowge of Courte</strong></div><div style="margin:10px 0">In Autumpne whan the sonne in vyrgyne<br>By radyante hete enryped hath our corne<br>Whan luna full of mutabylyte<br>As Emperes the dyademe hath worne<br>Of our pole artyke smylynge halfe in scorne<br>At our foly and our vnstedfastnesse<br>The tyme whan Mars to werre hym dyd dres</div><div style="margin:10px 0">I callynge to mynde the great auctoryte<br>Of poetes olde whyche full craftely<br>Under as couerte termes as coude be<br>Can touche a troughte and cloke it subtylly<br>Wyth fresshe vtteraunce full sentencyously<br>Dyuerse in style some spared not vyce to wrythe<br>Some of moralyte nobly dyde endyte</div><div style="margin:10px 0">Wherby I rede theyr renome and theyr fame<br>Maye neuer dye bute euermore endure<br>I was sore moued to a force the same<br>But Ignoraunce full soone dyde me dyscure<br>And shewed that in this arte I was not sure<br>For to Illumyne she sayde I was to dulle<br>Auysynge me my penne awaye to pulle</div><div style="margin:10px 0">And not to wrythe/ for he so wyll atteyne<br>Excedynge ferther than his connynge is<br>His hede maye be harde but feble is his brayne<br>Yet haue I knowen suche er this<br>But of reproche surely he maye not mys<br>That clymmeth hyer than he may fotynge haue<br>What and he slyde downe who shall hym saue</div><div style="margin:10px 0">Thus vp & down my mynde was drawen & cast<br>That I ne wyste what to do was beste<br>Soo sore enwered that I was at the laste<br>Enforsed to slepe and for to take some reste<br>And to lye downe as soone as I me dreste<br>At harwyche porte slumbrynge as I laye<br>In myne hostes house called powers keye</div><div style="margin:10px 0">Me thoughte I sawe a shyppe goodly of sayle<br>Come saylynge forth into that hauen brood<br>Her takelynge ryche and of hye apparayle<br>She kyste an anker and there she laye at rode<br>Marchauntes her borded to see what she had lode<br>Therein they founde Royall marchaundyse<br>Fraghted with plesure of what ye coude deuyse</div><div style="margin:10px 0">But than I thoughte I wolde not dwell behynde<br>Amonge all other I put myselfe in prece<br>Than there coude I none aquentaunce fynde<br>There was moche noyse anone one cryed cese<br>Sharpely commaundynge eche man holde hys pece<br>Maysters he sayde the shyp that ye here see<br>The bowge of courte it hyghte for certeynte</div><div style="margin:10px 0">The awnner therof is lady of estate<br>Whoos name to tell is dame saunce pere<br>Her marchaundyse is ryche and fortunate<br>But who wyll haue it muste paye therfore dere<br>This Royall chaffre that is shypped here<br>Is called fauore to stonde in her good grace<br>Than sholde ye see there pressynge in a pace</div><div style="margin:10px 0">Of one and other that wolde this lady see<br>Whiche sat behynde a traues of sylke fyne<br>Of golde of tessew the fynest that myghte be<br>In a trone whiche fer clerer dyde shyne<br>Than Phebus in his spere celestyne<br>Whoos beaute honoure goodly porte<br>I haue to lytyll connynge to reporte</div><div style="margin:10px 0">But of eche thynge there as I toke hede<br>Amonge all other was wrytten in her trone<br>In golde letters this worde whiche I dyde rede<br>Garder le fortune que est mauelz et bone<br>And as I stode redynge this verse myselfe allone<br>Her chyef gentylwoman daunger by her name<br>Gaue me a taunte and sayde I was to blame</div><div style="margin:10px 0">To be so perte to prese so proudly vppe<br>She sayde she trowed that I had eten sause<br>She asked yf euer I dranke of saucys cuppe<br>And I than softly answered to that clause<br>That so to saye. I had gyuen her no cause<br>Than asked she me Syr so god the spede<br>What is thy name and I sayde it was drede</div><div style="margin:10px 0">What mouyd the quod she hydder to come<br>Forsoth quod I to bye some of youre ware<br>And with that worde on me she gaue a glome<br>With browes bente and gan on me to stare<br>Full daynnously and fro me she dyde fare<br>Leuynge me stondynge as a mased man<br>To whome there came another gentylwoman</div><div style="margin:10px 0">Desyre her name was and so she me tolde<br>Sayenge to me broder be of good chere<br>Abasshe you not but hardely be bolde<br>Auaunce yourselfe to aproche and come nere<br>What though our chaffer be neuer so dere<br>Yet I auyse you to speke for ony drede<br>Who spareth to speke in fayth he spareth to spede</div><div style="margin:10px 0">Maystres quod I. I haue none aquentaunce<br>That wyll for me be medyatoure and mene<br>And this another I haue but smale substaunce<br>Pece quod Desyre ye speke not worth a bene<br>Yf ye haue not in fayth I wyll you lene<br>A precyous Iewell no rycher in this londe<br>Bone auenture haue here now in your honde</div><div style="margin:10px 0">Shyfte now therwith let see as ye can<br>In bowge of courte cheuysaunce to make<br>For I dare saye that there nys erthly man<br>But an he can bone auenture take<br>There can no fauour nor frendshyp hym forsake<br>Bone auenture may brynge you in suche case<br>That ye shall stonde in fauoure and in grace</div><div style="margin:10px 0">But of one thynge I werne you er I goo<br>She that styreth the shyp make her your frende<br>Maystres quod I. I praye you tell me why soo<br>And how I maye that waye & meanes fynde<br>Forsothe quod she howeuer blowe the wynde<br>Fortune gydeth and ruleth all oure shyppe<br>Whome she hateth shall ouer the seeboorde skyp</div><div style="margin:10px 0">Whome she loueth of all plesyre is ryche<br>Whyles she laugheth and hath luste for to playe<br>Whome she hateth she casteth in the dyche<br>For whan she frouneth she thynketh to make a fray<br>She cheryssheth him and hym she casseth a waye<br>Alas quod I how myghte I haue her sure<br>In fayth quod she by bone auenture</div><div style="margin:10px 0">Thus in a rowe of martchauntes a grete route<br>Suwed to fortune that she wold be theyre frynde<br>They thronge in fast and flocked her aboute<br>And I with them prayed her to haue in mynde<br>She promysed to vs all she wolde be kynde<br>Of bowge of court she asketh what we wold haue<br>And we asked fauoure/ and fauour she vs gaue</div><div style="margin:10px 0">Thus endeth the prologue. And begynneth the bowge of Courte breuely compyled.</div><div style="margin:10px 0">Drede </div><div style="margin:10px 0">The sayle is vp fortune ruleth our helme<br>We wante no wynde to passe now ouerall<br>Fauoure we haue toughther than ony elme<br>That wyll abyde and neuer frome vs fall<br>But vnder hony oftetyme lyeth bytter gall<br>For as methoughte in our shyppe I dyde see<br>Full subtyll persones in nombre foure and thre</div><div style="margin:10px 0">The fyrste was Fauell full of flatery<br>Wyth fables false that well coude fayne a tale<br>The seconde was Suspecte whiche that dayly<br>Mysdempte eche man with face deedly & pale<br>And Haruy hafter that well coude picke a male<br>With other foure of theyr affynyte<br>Dysdayne. Ryotte. Dyssymuler. Subtylte.</div><div style="margin:10px 0">Fortune theyr frende with whome oft she dyde daunce<br>They coude not faile thei thought they were so sure<br>And oftentymes I wolde myselfe auaunce<br>With them to make solace and pleasure<br>But my dysporte they coude not well endure<br>They sayde they hated for to dele with Drede<br>Than Fauell gan wyth fayre speche me to fede</div><div style="margin:10px 0">Fauell.</div><div style="margin:10px 0">Noothynge erthely that I wonder so sore<br>As of your connynge that is so excellent<br>Deynte to haue with vs suche one in store<br>So vertuously that hath his dayes spente<br>Fortune to you gyftes of grace hath lente<br>Loo what it is a man to haue connynge<br>All erthly tresoure it is surmountynge</div><div style="margin:10px 0">Ye be an apte man as ony can be founde<br>To dwell with vs & serue my ladyes grace<br>Ye be to her yea worth a thousande pounde<br>I herde her speke of you within shorte space<br>Whan there were dyuerse that sore dyde you manace<br>And though I say it I was myselfe your frende<br>For here be dyuerse to you that be vnkynde</div><div style="margin:10px 0">But this one thynge ye maye be sure of me<br>For by that lorde that bought dere all mankynde<br>I can not flater I muste be playne to the<br>And ye nede ought man shewe to me your mynde<br>For ye haue me whome faythfull ye shall fynde<br>Whyles I haue ought by god thou shalt not lacke<br>And yf nede be a bolde worde I dare cracke</div><div style="margin:10px 0">Nay naye be sure whyles I am on your syde<br>Ye maye not fall truste me ye maye not fayle<br>Ye stonde in fauoure and fortune is your gyde<br>And as she wyll so shall our grete shyppe sayle<br>Thyse lewde cokwattes shall neuermore preuayle<br>Ageynste you hardely therfore be not afrayde<br>Farewell tyll soone but no worde that I sayde</div><div style="margin:10px 0">Drede.</div><div style="margin:10px 0">Than thanked I hym for his grete gentylnes<br>But as methoughte he ware on hym a cloke<br>That lyned was with doubtfull doublenes<br>Methoughte of wordes that he had full a poke<br>His stomak stuffed oftetymes dyde reboke<br>Suspycyon methoughte mette hym at a brayde<br>And I drewe nere to herke what they two sayde</div><div style="margin:10px 0">In fayth quod suspecte) spake drede no worde of me<br>Why what than wylte thou lete men to speke<br>He sayth he can not well accorde with the<br>Twyst quod suspecte) goo playe hym I ne reke<br>By cryste quod fauell drede is soleyne freke<br>What lete vs holde him vp man for a whyle<br>Ye soo quod suspecte) he maye vs bothe begyle</div><div style="margin:10px 0">And whan he came walkynge soberly<br>Wyth whom/ and /ha/ and with a croked loke<br>Methoughte his hede was full of gelousy<br>His eyen rollynge his hondes faste they quoke<br>And to me warde the strayte waye he toke<br>God spede broder to me quod he than<br>And thus to talke with me he began</div><div style="margin:10px 0">Suspycyon</div><div style="margin:10px 0">Ye remembre the gentylman ryghte nowe<br>That commaunde with you methought a praty space<br>Beware of him for I make god auowe<br>He wyll begyle you and speke fayre to your face<br>Ye neuer dwelte in suche another place<br>For here is none that dare well other truste<br>But I wolde telle you a thynge and I durste</div><div style="margin:10px 0">Spake he a fayth no worde to you of me<br>I wote and he dyde ye wolde me telle<br>I haue a fauoure to you wherof it be<br>That I muste shewe you moche of my counselle<br>But I wonder what the deuyll of helle<br>He sayde of me whan he with you dyde talke<br>By myne auyse vse not with him to walke</div><div style="margin:10px 0">The soueraynst thynge that ony man maye haue<br>Is lytyll to saye/ and moche to here and see<br>For but I trusted you so god me saue<br>I wolde noothynge so playne be<br>To you oonly methynke I durste shryue me<br>For now am I plenarely dysposed<br>To shewe you thynges that may not be disclosed</div><div style="margin:10px 0"><br>Drede</div><div style="margin:10px 0">Than I assured hym my fydelyte<br>His counseyle secrete neuer to dyscure<br>Yf he coude fynde in herte to truste me<br>Els I prayed hym with all my besy cure<br>To kepe it hymselfe for than he myghte be sure<br>That noo man erthly coude hym bewreye<br>Whyles of his mynde it were lockte with the keye</div><div style="margin:10px 0">By god quod he this and thus it is<br>And of his mynde he shewed me all and some<br>Farewell quod he we wyll talke more of this<br>Soo he departed there he wolde be come<br>I dare not speke I promysed to be dome<br>But as I stode musynge in my mynde<br>Haruy hafter came lepynge lyghte as lynde</div><div style="margin:10px 0">Upon his breste he bare a versyngeboxe<br>His throte was clere and lustely coude fayne<br>Methoughte his gowne was all furred wyth foxe<br>And euer he sange/ sythe I am nothynge playne<br>To kepe him frome pykynge it was a grete payne<br>He gased on me with his gotyshe berde<br>Whan I loked on hym my purse was half aferde</div><div style="margin:10px 0">Heruy hafter. </div><div style="margin:10px 0">Syr god you saue why loke ye so sadde<br>What thynge is that I maye do for you<br>A wonder thynge that ye waxe not madde<br>For and I studye sholde as ye doo nowe<br>My wytte wolde waste I make god auowe<br>Tell me your mynde methynke ye make a verse<br>I coude it skan and ye wolde it reherse</div><div style="margin:10px 0">But to the poynte shortely to procede<br>Where hathe your dwellynge ben er ye cam here<br>For as I trowe I haue sene you indede<br>Er this whan that ye made me Royall chere<br>Holde vp the helme loke vp & lete god stere<br>I wolde be mery what wynde that euer blowe<br>Heue & how rombelow row the bote norman rowe</div><div style="margin:10px 0">Prynces of youghte can ye synge by rote<br>Or shall I sayle wyth you a felashyp assaye<br>For on the booke I can not synge a note<br>Wolde to god it wolde please you some daye<br>A baladeboke before me for to laye<br>And lerne me to synge Re my fa sol<br>And whan I fayle bobbe me on the noll</div><div style="margin:10px 0">Loo what is to you a pleasure grete<br>To haue that connynge & wayes that ye haue<br>By goddis soule I wonder how ye gete<br>Soo greate pleasyre or who to you it gaue<br>Syr pardone me I am an homely knaue<br>To be with you thus perte and thus bolde<br>But ye be welcome to our housholde</div><div style="margin:10px 0">And I dare saye there is no man hereInne<br>But wolde be glad of your company<br>I wyste neuer man that so soone coude wynne<br>The fauoure that ye haue with my lady<br>I praye to god that it maye neuer dy<br>It is your fortune for to haue that grace<br>As I be saued it is a wonder case</div><div style="margin:10px 0">For as for me I serued here many a daye<br>And yet vnneth I can haue my lyuynge<br>But I requyre you no worde that I saye<br>For and I knowe ony erthly thynge<br>That is agayne you ye shall haue wetynge<br>And ye be welcome syr so god me saue<br>I hope hereafter a frende of you to haue</div><div style="margin:10px 0">Drede.</div><div style="margin:10px 0">Wyth that as he departed soo fro me<br>Anone ther mette with him as methoughte<br>A man/ but wonderly besene was he<br>He loked hawte he sette eche man at noughte<br>His gawdy garment with scornnys was all wrought<br>With Indygnacyon lyned was his hode<br>He frowned as he wolde swere by cockes blode</div><div style="margin:10px 0">He bote the lyppe he loked passynge coye<br>His face was belymmed as byes had him stounge<br>It was no tyme with him to Iape nor toye<br>Enuye hathe wasted hys lyuer and his lounge<br>Hatred by the herte so had hym wrounge<br>That he loked pale as asshes to my syghte<br>Dysdayne I wene this comerous carkes hyghte</div><div style="margin:10px 0">To heruy hafter than he spake of me<br>And I drewe nere to harke what they two sayde<br>Now quod Dysdayne as I shall saued be<br>I haue grete scorne & am ryghte euyll apayed <br>Than quod Heruy why arte thou so dysmayde<br>By cryste quod he for it is shame to saye<br>To see Iohan dawes that came but yesterdaye</div><div style="margin:10px 0">How he is now taken in conceyte<br>This doctour dawcocke Drede I wene he hyghte<br>By goddis bones but yf we haue som sleyte<br>It is lyke he wyll stonde in our lyghte<br>By god quod Heruy & it so happen myghte<br>Lete vs therfore shortely at a worde<br>Fynde some mene to caste him ouer the borde</div><div style="margin:10px 0">By him that me boughte than quod Dysdayne<br>I wonder sore he is in such conceyte<br>Turde quod Hafter I wyll the nothynge layne<br>There muste for hym be layde some prety beyte<br>We tweyne I trowe be not withoute dysceyte<br>Fyrste pycke a quarell & fall oute with hym then<br>And soo outface hym with a carde of ten</div><div style="margin:10px 0">Forthwith he made on me a prowde assawte<br>With scornfull loke meuyd all in moode<br>He wente aboute to take me in a fawte<br>He frounde he stared he stampped where he stoode<br>I loked on hym I wende he had be woode<br>He set the arme proudly vnder the syde<br>And in this wyse he gan with me to chyde</div><div style="margin:10px 0">Disdayne.</div><div style="margin:10px 0">Remembrest thou what thou sayd yesternyght<br>Wylt thou abyde by the wordes agayne<br>By god I haue of the now grete dyspyte<br>I shall the angre ones in euery vayne<br>It is greate scorne to see suche an hayne<br>As thou arte one that cam but yesterdaye<br>With vs olde seruauntes such maysters to playe</div><div style="margin:10px 0">I tell the I am of countenaunce<br>What weneste I were. I trowe thou knowe not me<br>By goddis woundes but for dysplesaunce<br>Of my querell soone wolde I venged be<br>But no force I shall ones mete with the<br>Come whan it wyll oppose the I shall<br>Whatsomeuer auenture therof fall</div><div style="margin:10px 0">Trowest thou dreuyll I saye thou gawdy knaue<br>That I haue deynte to see the cherysshed thus<br>By goddis syde my sworde thy berde shall shaue<br>Well ones thou shalte be chermed I wus<br>Naye strawe for tales thou shalte not rule vs<br>We be thy betters and so thou shalte vs take<br>Or we shall the oute of thy clothes shake</div><div style="margin:10px 0">Drede.</div><div style="margin:10px 0">Wyth that came Ryotte russhynge all atones<br>A rusty gallande to ragged and to rente<br>And on the borde he whyrled a payre of bones<br>Quater treye dews he clatered as he wente<br>Nowe haue at all by saynte Thomas of kente<br>And euer he threwe & kyst I wote nere what<br>His here was growen thoroweoute his hat</div><div style="margin:10px 0">Thenne I behelde how he dysgysed was<br>His hede was heuy for watchynge ouernyghte<br>His eyen blereed his face shone lyke a glas<br>His gowne so shorte that it ne couer myghte<br>His rumpe he wente so all for somer lyghte<br>His hose was garded wyth a lyste of grene<br>Yet at the knee they were broken I wene</div><div style="margin:10px 0">His cote was checked with patches rede & blewe<br>Of kyrkeby kendall was his shorte demye<br>And ay he sange in fayth decon thou crewe<br>His elbowe bare he ware his gere so nye<br>His nose a droppynge his lyppes were full drye<br>And by his syde his whynarde & his pouche<br>The deuyll myghte daunce therin for ony crowche</div><div style="margin:10px 0">Counter he coude (O lux) vpon a potte<br>An eestrychefedder of a capons tayle<br>He set vp fresshely vpon his hat a lofte<br>What reuellroute quod he and gan to rayle<br>How ofte he hadde hit Ienet on the tayle<br>Of felyce fetewse and lytell prety cate<br>How ofte he knocked at her klyckedgate</div><div style="margin:10px 0">What sholde I tell more of his rebaudrye<br>I was ashamed so to here hym prate<br>He had no pleasure but in harlotrye<br>Ay quod he in the deuylles date<br>What arte thou I sawe the nowe but late<br>Forsothe quod I in this courte I dwell nowe<br>Welcome quod Ryote I make god auowe</div><div style="margin:10px 0">Ryote.</div><div style="margin:10px 0">And syr in fayth why comste not vs amonge<br>To make the mery as other felowes done<br>Thou muste swere and stare man aldaye longe<br>And wake all nyghte and slepe tyll it be none<br>Thou mayste not studye or muse on the mone<br>This worlde is nothynge but ete drynke & slepe<br>And thus with vs good company to kepe</div><div style="margin:10px 0">Plucke vp thyne herte vpon a mery pyne<br>And lete us laugh a placke or tweyne at nale<br>What the deuyll man myrthe was neuer one<br>What loo man see here of dyce a bale<br>A brydelyngecaste for that is in thy male<br>Now haue at all that lyeth vpon the burde<br>Fye on this dyce they be not worth a turde</div><div style="margin:10px 0">Haue at the hasarde or at the dosen browne<br>Or els I pas a peny to a pounde<br>Now wolde to god thou wolde leye money downe<br>Lorde how that I wolde caste it full rounde<br>Ay in my pouche a buckell I haue founde<br>The armes of calyce I haue no coyne nor crosse<br>I am not happy I renne ay on the losse</div><div style="margin:10px 0">Now renne muste I to the stewys syde<br>To wete yf malkyn my lemman haue gete oughte<br>I lete her to hyre that men maye on her ryde<br>Her harnes easy ferre and nere is soughte<br>By goddis sydes syns I her thyder broughte<br>She hath gote me more money with her tayle<br>Than hath some shyppe that into bordews sayle</div><div style="margin:10px 0">Had I as good an hors as she is a mare<br>I durste auenture to Iourney thorugh Fraunce<br>Who rydeth on her he nedeth not to care<br>For she is trussed for to breke a launce<br>It is a curtel that well can wynche & praunce<br>To her wyll I nowe all my pouerte lege<br>And tyll I come haue here is myne hat to plege</div><div style="margin:10px 0">Drede</div><div style="margin:10px 0">Gone is this knaue this rybaude foule & leude<br>He ran as fast as euer that he myghte<br>Unthryftynes in hym may well be shewed<br>For whome tyborne groneth both daye and nyghte<br>And as I stode and kyste asyde my syghte<br>Dysdayne I sawe with Dyssymulacyon<br>Standynge in sadde communicacion</div><div style="margin:10px 0">But there was poyntynge & noddynge with his hede<br>And many wordes sayde in secrete wyse<br>They wandred ay and stode styll in no stede<br>Methoughte alwaye Dyscymular dyde deuyse<br>Me passynge sore myne herte than gan aryse<br>I dempte & drede theyr talkynge was not good<br>Anone dyscymular came where I stode</div><div style="margin:10px 0">Than in his hode I sawe there faces tweyne<br>That one was lene & lyke a pyned goost<br>That other loked as he wolde me haue slayne<br>And to mewarde as he gan for to coost<br>Whan that he was euen at me almoost<br>I sawe a knyfe hyd in his one sleue<br>Wheron was wryten this worde myscheue</div><div style="margin:10px 0">And in his other sleue methought I sawe<br>A spone of golde full of hony swete<br>To fede a fole and for to preye a dawe<br>And on that sleue these wordes were wrete<br>A false abstracte cometh from a fals concrete<br>His hode was syde his cope was roset graye<br>Thyse were the wordes he to me dyde saye</div><div style="margin:10px 0">Dyssymulation</div><div style="margin:10px 0">How do ye mayster ye loke so soberly<br>As I be saued at the dredefull daye<br>It is a perylous vyce this enuy<br>Alas a connynge man ne dwelle maye<br>In no place well but foles with hym fraye<br>But as for that connynge hath no foo<br>Saue hym that nought can/ scrypture sayth soo.</div><div style="margin:10px 0">I knowe your vertu and your lytterkture<br>By that lytel connynge that I haue<br>Ye be malygned sore I you ensure<br>But ye haue crafte yourselfe alwaye to saue<br>It is grete scorne to se a mysproude knaue<br>With a clerke that connynge is to prate<br>Lete theym go lowse theym in the deuylles date</div><div style="margin:10px 0">For allbeit that this longe not to me<br>Yet on my backe I bere suche lewde delynge<br>Ryghte now I spake with one I trowe I see<br>But what a strawe I maye not tell allthynge<br>By god I saye there is a grete hertebrennynge<br>Betwene the persone ye wote of you<br>Alas I coude not dele so with a Iew</div><div style="margin:10px 0">I wolde eche man were as playne as I<br>It is a worlde I saye to here of some<br>I hate this faynynge fye vpon it fye<br>A man can not wote where to become<br>I wys I coude tell but humlery home<br>I dare not speke we be so layde awayte<br>For all our courte is full of dysceyte</div><div style="margin:10px 0">Now by saynte fraunceys that holy man & frere<br>I hate this wayes agayne you that they take<br>Were I as you I wolde ryde them full nere<br>And by my trouthe but yf an ende they make<br>Yet wyll I saye some wordes for your sake<br>That shall them angre I holde thereon a grote<br>For some shall wene be hanged by the throte</div><div style="margin:10px 0">I haue a stoppyngeoyster in my poke<br>Truste me and yf it come to a nede<br>But I am lothe for to reyse a smoke<br>Yf ye coude be otherwyse agrede<br>And so I wolde it were so god me spede<br>For this maye brede to a confusyon<br>Withoute god make a good conclusyon</div><div style="margin:10px 0">Naye see where yonder stondeth the teder man<br>A flaterynge knaue & false he is god wote<br>The dreuyll stondeth to herken and he can<br>It were more thryft he boughte him a newe cote<br>It wyll not be/ his purse is not on flote<br>All that he wereth it is borowed ware<br>His wytte is thynne his hode is thredebare</div><div style="margin:10px 0">More coude I saye but what this is ynowe<br>Adewe tyll soone we shall speke more of this<br>Ye muste be ruled as I shall tell you howe<br>Amendis maye be of that is now a mys<br>And I am your syr so haue I blys<br>In euery poynte that I can do or saye<br>Gyue me your honde farewell & haue good daye</div><div style="margin:10px 0">Drede</div><div style="margin:10px 0">Sodaynly as he departed me fro<br>Came pressynge in one in a wonder araye<br>Er I was ware behynde me he sayde bo<br>Thenne I astonyed of that sodeyne fraye<br>Sterte all at ones I lyked nothynge his playe<br>For yf I had not quyckely fledde the touche<br>He had plucte oute the nobles of my pouche</div><div style="margin:10px 0">He was trussed in a garmente strayte<br>I haue not sene suche anothers page<br>For he coude well vpon a casket wayte<br>His hode all pounsed and garded lyke a cage<br>Lyghte lymefynger he toke none other wage<br>Harken quod he loo here myne honde in thyne<br>To vs welcome thou arte by saynte Quyntyne</div><div style="margin:10px 0">Disceyte.</div><div style="margin:10px 0">But by that lorde that is one two and thre<br>I haue an errande to rounde in your ere<br>He tolde me so by god ye maye truste me<br>Parde remembre whan ye were there<br>There I wynked on you/ wote ye not where<br>In (A) loco I mene iuxta (B)<br>Woo is hym that is blynde and maye not see</div><div style="margin:10px 0">But to here the subtylte and the crafte<br>As I shall tell you yf ye wyll harke agayne<br>And whan I sawe the horsons wolde you hafte<br>To holde myne honde by god I had grete payne<br>For forthwyth there I had him slayne<br>But that I drede mordre wolde come oute<br>Who deleth with shrewes hath nede to loke aboute</div><div style="margin:10px 0">Drede.</div><div style="margin:10px 0">And as he rounded thus in myne ere<br>Of false collusyon confetryd by assente<br>Methoughte I see lewde felawes here and there<br>Came for to slee me of mortall entente<br>And as they came the shypborde faste I hente<br>And thoughte to lepe/ and euen with that woke<br>Caughte penne and ynke & wroth this lytyll boke</div><div style="margin:10px 0">I wolde therwith no man were myscontente<br>Besechynge you that shall it see or rede<br>In euery poynte to be indyfferente<br>Syth all in substaunce of slumbrynge doth procede<br>I wyll not saye it is mater indede<br>But yet oftyme suche dremes be founde trewe<br>Now constrewe ye what is the resydewe</div><div style="margin:10px 0"><br /></a><br />poem by <a href="http://en.citatepedia.ro/by.php?a=John+Skelton">John Skelton</a><div class=q> <img src="https://www.citatepedia.ro/g/32share.png" style="float:left" alt="Share"> <script type="text/javascript" src="//s7.addthis.com/js/300/addthis_widget.js#pubid=citatepedia" async="async"></script><div style="display:inline-block" class="addthis_sharing_toolbox" data-url="http://en.citatepedia.ro/comments.php?id=421838" data-title="The Bowge of Courte de John Skelton" data-description="In Autumpne whan the sonne in vyrgyne By radyante hete enryped hath our corne Whan luna full of mutabylyte As Emperes the dyademe hath worne Of our pole artyke smylynge halfe in scorne At our foly and our vnstedfastnesse The tyme whan Mars to werr..."></div> </div> </div>

solid border dashed border dotted border double border groove border ridge border inset border outset border no border blue green red purple cyan gold silver black