<div style="background:#fff;border:#bbb dashed 1px;padding:5px"><a href="http://en.citatepedia.ro/comments.php?id=421331" style="color:#000;text-decoration:none"><div style="margin:10px 0"><strong>The Testament of John Lydgate</strong></div><div style="margin:10px 0">...<br> Beholde, o man! lyft up thyn eye and see<br> What mortall peyne I suffre for thi trespace.<br> With pietous voys I crye and sey to the:<br> Beholde my woundes, behold my blody face,<br> Beholde the rebukes that do me so manace,<br> Beholde my enemyes that do me so despice,<br> And how that I, to reforme the to grace,<br> Was like a lambe offred in sacryfice.</div><div style="margin:10px 0">...<br> And geyn thi pryde behold my gret mekenesse;<br> Geyn thyn envie behold my charit&eacute;;<br> Geyn thi leccherye behold my chast clennesse;<br> Geyn thi covetyse behold my povert&eacute;.<br> Atweene too thevys nayl{.e}d to a tree,<br> Rayled with reed blood, they lyst me so desguyse,<br> Behold, O man! all this I did for the,<br> Meke as a lambe offred in sacryfice.</div><div style="margin:10px 0"> Behold my love, and gyf me thyn ageyn;<br> Behold, I deyde thy raunsom for to paye.<br> Se howe myn herte is open brode and pleyn,<br> Thy gostly enemyes onely to affraye.<br> An hardere batayle no man myght assaye,<br> Of all tryumphes the grettest hye empryse.<br> Wher-for, O man! no lenger to dismaye,<br> I gaf for the my blood in sacryfice.</div><div style="margin:10px 0"> Turne home ageyn, thy synne do forsake.<br> Behold and se yf ought be left behynde,<br> How I to mercy am redy the to take.<br> Gyf me thyn herte and be no more unkynde;<br> Thy love and myn, togedyr do hem bynde,<br> And late hem never departe in any wyse.<br> Whan thou were lost, thy sowle ageyn to fynde,<br> My blod I offred for the in sacryfice.</div><div style="margin:10px 0"> Emprente thes thynges in thyn inward thought,<br> And grave hem depe in thy remembraunce;<br> Thynke on hem, and forgete hem nowght.<br> Al this I suffred to do the allegeaunce,<br> And with my seyntes to yeve the suffisaunce,<br> In the hevenly court for the I do devyse<br> A place eternall, a place of all plesaunce;<br> For which my blood I gaf in sacryfice.</div><div style="margin:10px 0"> And more my mercy to putte att a preef,<br> To every synnere that non ne shal it mysse,<br> Remembre how I gaf mercy to the theef<br> Which hadde so longe trespaced and doon amys;<br> Went he not frely with me to paradise?<br> Have this in mende, how it is my guyse<br> All repentaunt to bryng hem to my blysse,<br> For whom my blood I gaf in sacryfice.</div><div style="margin:10px 0"> Tarye no lenger toward thyn herytage;<br> Hast on thy weye and be of ryght good chere.<br> Go eche day onward on thy pylgrymage;<br> Thynke howe short tyme thou hast abyden here.<br> Thy place is bygged above the sterres clere,--<br> Noon erthly palys wrought in so statly wyse.<br> Kome on, my frend, my brother most entere!<br> For the I offered my blood in sacryfice!<br> Amen.</div><div style="margin:10px 0">Explicit testamentum Johanis Lydgate.</div><div style="margin:10px 0"><br /></a><br />poem by <a href="http://en.citatepedia.ro/by.php?a=John+Lydgate">John Lydgate</a><div class=q> <img src="https://www.citatepedia.ro/g/32share.png" style="float:left" alt="Share"> <script type="text/javascript" src="//s7.addthis.com/js/300/addthis_widget.js#pubid=citatepedia" async="async"></script><div style="display:inline-block" class="addthis_sharing_toolbox" data-url="http://en.citatepedia.ro/comments.php?id=421331" data-title="The Testament of John Lydgate de John Lydgate" data-description="... Beholde, o man! lyft up thyn eye and see What mortall peyne I suffre for thi trespace. With pietous voys I crye and sey to the: Beholde my woundes, behold my blody face, Beholde the rebukes that do me so manace, Beholde my enemyes that d..."></div> </div> </div>

solid border dashed border dotted border double border groove border ridge border inset border outset border no border blue green red purple cyan gold silver black