<div style="background:#fff;border:#bbb dashed 1px;padding:5px"><a href="http://en.citatepedia.ro/comments.php?id=116695" style="color:#000;text-decoration:none"><div style="margin:10px 0"><strong>To a Louse</strong></div><div style="margin:10px 0">Ha! whaur ye gaun, ye crowlin ferlie?<br>Your impudence protects you sairly;<br>I canna say but ye strunt rarely,<br>Owre gauze and lace;<br>Tho', faith! I fear ye dine but sparely<br>On sic a place.</div><div style="margin:10px 0">Ye ugly, creepin, blastit wonner,<br>Detested, shunn'd by saunt an' sinner,<br>How daur ye set your fit upon her-<br>Sae fine a lady?<br>Gae somewhere else and seek your dinner<br>On some poor body.</div><div style="margin:10px 0">Swith! in some beggar's haffet squattle;<br>There ye may creep, and sprawl, and sprattle,<br>Wi' ither kindred, jumping cattle,<br>In shoals and nations;<br>Whaur horn nor bane ne'er daur unsettle<br>Your thick plantations.</div><div style="margin:10px 0">Now haud you there, ye're out o' sight,<br>Below the fatt'rels, snug and tight;<br>Na, faith ye yet! ye'll no be right,<br>Till ye've got on it-<br>The verra tapmost, tow'rin height<br>O' Miss' bonnet.</div><div style="margin:10px 0">My sooth! right bauld ye set your nose out,<br>As plump an' grey as ony groset:<br>O for some rank, mercurial rozet,<br>Or fell, red smeddum,<br>I'd gie you sic a hearty dose o't,<br>Wad dress your droddum.</div><div style="margin:10px 0">I wad na been surpris'd to spy<br>You on an auld wife's flainen toy;<br>Or aiblins some bit dubbie boy,<br>On's wyliecoat;<br>But Miss' fine Lunardi! fye!<br>How daur ye do't?</div><div style="margin:10px 0">O Jeany, dinna toss your head,<br>An' set your beauties a' abread!<br>Ye little ken what cursed speed<br>The blastie's makin:<br>Thae winks an' finger-ends, I dread,<br>Are notice takin.</div><div style="margin:10px 0">O wad some Power the giftie gie us<br>To see oursels as ithers see us!<br>It wad frae mony a blunder free us,<br>An' foolish notion:<br>What airs in dress an' gait wad lea'e us,<br>An' ev'n devotion!</div><div style="margin:10px 0"><br /></a><br />poem by <a href="http://en.citatepedia.ro/by.php?a=Robert+Burns">Robert Burns</a><div class=q> <img src="https://www.citatepedia.ro/g/32share.png" style="float:left" alt="Share"> <script type="text/javascript" src="//s7.addthis.com/js/300/addthis_widget.js#pubid=citatepedia" async="async"></script><div style="display:inline-block" class="addthis_sharing_toolbox" data-url="http://en.citatepedia.ro/comments.php?id=116695" data-title="To a Louse de Robert Burns" data-description="Ha! whaur ye gaun, ye crowlin ferlie?/Your impudence protects you sairly;/I canna say but ye strunt rarely,/Owre gauze and lace;/Tho', faith! I fear ye dine but sparely/On sic a place./Ye ugly, creepin, blastit wonner,/Detested, shunn'd by saunt a..."></div> </div> </div>

solid border dashed border dotted border double border groove border ridge border inset border outset border no border blue green red purple cyan gold silver black